Ebhikorwa bhya Abhatumwa 14
14
Pawuro na Bharinaabha bhari Ikooniyo
1Bhunu Pawuro na Bharinaabha ꞉bhaariga bhari mu-musi gwa Ikooniyo ayo, mbeengira mw-isunagoogi rya Abhayawudi, rwa kutyo ꞉yaariga iri ntungwa yeebhwe. Mw-isunagoogi muyo enu bhari na riibhaasi, mbeeyigisha abhaanu amangʼana ga Yeesu, na abhaanu bhaafu muno mbeekirisha Yeesu, Abhayawudi amwi na abhaanu abha ebhyaro ebhindi. 2Nawe Abhayawudi abhandi bhanu ꞉bhaaremere okwikirisha Yeesu, mbaamba okusooyeresha bhanu bhatari Bhayawudi, mbeendaga abhaanu bhayo bhasoke abhaanu bhanu ꞉bheekirisiishe Yeesu. 3Mmbe, Pawuro na Bharinaabha mbagenderera okwikara Ikooniyo ayo nsiku nyafu, mbakomeera okubhwiraga abhaanu iiguru ya Raatabhugenyi Yeesu bhari na riibhaasi, na iiguru ya iinema yaaye. Raatabhugenyi woone ˆnaabha nabho, ˆnaatuura abhweru ati amangʼana geebhwe ꞉gaariga gari ga kimari, ˆnaabhayaanaga na obhuturo bhwa okukora ebhimenyegesho na ebhiruguusho. 4Niwe abhaanu bha omusi guyo mbaawukana kabhiri. Abhandi ꞉bhaariga bhari orubhaara rwa Abhayawudi, na abhandi bhari orubhaara rwa abhatumwa.
5Ku-bhuteero, Abhayawudi abhandi na abhaanu abhandi abha ebhyaro ebhindi, na abhatungi bheebhwe, mbakorera Pawuro na Bharinaabha ekiina kya okubhakorera amabhiibhi, na okubhabhuma na amagina. 6Nawe Pawuro na Bharinaabha mboongwa amangʼana gayo, mbabhirimira mu-kyaro kya Rikawoniya mu-misi gya Risitira na Deribhe, na mu-misi egindi gya ayeeyiyeeyi na ekyaro kiyo. 7Eyo woone mbagenderera okuraasha Amangʼana Amajomu iiguru ya Yeesu.
Pawuro na Bharinaabha bhari Risitira
8Ku-musi gwa Risitira ayo, ꞉aariga ariwo omuunu wumwi ari murema bhwibhurwa bhwaye. Omurema uyo ꞉aariga akyariga okusaka okuribhata. 9Omuunu uyo ꞉aariga eekaaye ˆneetegeereshaga Pawuro bhunu ꞉aariga ˆnaaika. Pawuro ˆnaamuringira amwikomiishe, ˆnaarora ati arimo obhwikirisha bhwa okuwosibhwa. 10Pawuro ˆnaamura obhuraka naamubhwira ati, “Iimuka! Uyambaare na amaguru gaawo.” Kimwi omuunu uyo ˆnaayambaara bhwangubhwangu, ˆnaamba okuribhata omwene!
11Bhunu Pawuro ꞉aawosiishe omuunu uyo, abhaanu bhaafu ꞉bhaarorere, niwe mbaamba okwamura obhuraka, mbaaikiraga mu-nyaaika yeebhwe eya Kirikawoniya ati, “Emisambwa gyakiyikira gibheeye mu-rususo rwa abhaanu!” 12Kimwi mbayaana Bharinaabha riisiina rya riisambwa ryebhwe erimwi ati Jewu. Pawuro weeki, mbamuyaana riisiina rya riisambwa ryebhwe erindi ati Werime,#14:12 Ku-misambwa gya Abhayunaani, Jewu uyo niwe ꞉aariga ari omukuru okukira abheejaabho bhoone kutyo, na Werime niwe ꞉aariga ari omwaiki. kwa okubha Pawuro niwe ꞉aariga ari omwaiki. 13Areera-wo na omusi guyo, ꞉ryariga ririwo riiyekaru rya Jewu. Mmbe, omushengesi wa riiyekaru rya Jewu ˆnaareeta gingeeni na amawuuwa imbere ya riirango rya omusi, kwa okubha omushengesi uyo ari amwi na abhaanu abhandi bhaafu, ꞉bhaariga mbeenda okusoosha ekimweso kyebhwe kiyo ku-Pawuro na Bharinaabha.
14Nawe bhunu abhatumwa Bharinaabha na Pawuro ꞉bhoonguuywe gayo, mbakarura gingibho gyebhwe, mbabhirimira mw-isangi rya abhaanu bhayo, mbamwayaga mbabhabhwira ati, 15“Bhamura! Kubhaki omukora amangʼana ganu? Eswe kyone kiri abhaanu era rwa emwe! Eswe kiri anu okubheeyigisha era Iingʼana Injomu ya Nyamuwanga, insonga musige kimwi okuramya emisambwa giyo. Gitari na bhwera! Nawe, muyinduke muramye Nyamuwanga, niwe keesha omwoyo! Uyo niwe ꞉aabhumbire orwire, na ekyaro, iinyanja, na ebhiinu bhyende-mo bhyone kutyo. 16Kara Nyamuwanga ꞉aasigire abhaanu bha ebhyaro bhyone kutyo bheekare kutyo ꞉bhaariga mbeenda. 17Nawe, ꞉ataasigire okweresha abhaanu ati ariwo. ꞉Aabheeresiishe emwe okubha-wo kwaye, bhunu ꞉aabhakoreraga amajomu, ˆnaabharagasishaga ingubha okusooka mu-rwire, insonga mu-kabhaga ka okugesa, mugese, murye mw-igute. Na emyoyo gyemwe, ˆnaagiijushaga amajomerwa.” 18Raabhé kutyo Pawuro na Bharinaabha ꞉bhaaikire amangʼana gayo, nawe ꞉yaariga ikomeeye muno okuyinga abhaanu bhayo bhasige okubhasoosisha ekimweso kiyo. Ku-bhuteero mbabhayinga.
19Kimwi Abhayawudi mbaaja okusookerera mu-musi gwa Antiyokiya, na abhandi bhasookereeye Ikooniyo, mbakongya abhaanu bhayo, na abhaanu bhayo bhoone mbayimbana nabho. Kimwi abhaanu bhayo bhoone kutyo mbabhuma Pawuro na amagina. Bhunu ꞉bhaamubhumire mbatoga ati aafwa, mbamukurura mbamwesa iibhara. 20Nawe bhunu abheeyigira abhandi ꞉bhaamusangiiye mbamwiyinda, Pawuro ˆneemuka, ˆnaasubha kweki mu-musi guyo. Mwejo, mbasooka ayo na Bharinaabha, mbagenda mu-musi gwa Deribhe.
Pawuro na Bharinaabha abhasubha Antiyokiya eya Siiriya
21Bhunu Pawuro na Bharinaabha, ꞉bhaariga bhari Deribhe ayo, mbeeyigisha abhaanu Amangʼana Amajomu iiguru ya Raatabhugenyi Yeesu, na abhaanu bhaafu mbeekirisha Yeesu, mbagenderera okwiyigisibhwa. Okumara ayo mbagenda emisi gya Risitira na Ikooniyo, kimwi mbasubha Antiyokiya. 22Anu ꞉bhaaturaga, ꞉bhaariga mbakomeesha abheeyigira emitima, mbabhabhwira bhagenderere ku-bhwikirisha bhwebhwe. Mbabhabhwira ati, “Iisire eswe kiturire mu-bhinyansho bhyafu niwe kiingire mu-bhukama bhwa Nyamuwanga.” 23Woone enu Pawuro na Bharinaabha ꞉bhaaturaga, ꞉bhaariga mbasora abhakaruka abhayambaasi mu-makanisa goone kutyo, mbabhasabhira ku-Nyamuwanga bheeyimire ebhyokurya, mbabhatuura mu-mabhoko ga Raatabhugenyi, unu ꞉bhaariga bheekirisiishe.
24Okumara gayo, Pawuro na Bharinaabha mbagenda, mbatura mu-kyaro kya Pisiidiya, mbeengira Pamufwiriya. 25Mbayika mu-musi gwa Perige. Perige ayo mbaraasha-wo Amangʼana Amajomu aga Raatabhugenyi Yeesu, okumara okuraasha, mbooromokera Ataariya. 26Okusooka ayo mbatweka eryato, mbasubha Antiyokiya eya Siiriya. Eyo niwe ꞉bhaariga bhasabhiiywe iinema ya Nyamuwanga eya okukora emirimu ginu ꞉bhaariga bhamarire okukora. 27Bhunu ꞉bhaayikire kweki Antiyokiya ayo, mbakumanya riikanisa ryone kutyo. Mbabhatondera amangʼana goone kutyo ganu Nyamuwanga ꞉aakorere ari amwi nabho, na kutyo Nyamuwanga eeguriiye bhanu bhatari Bhayawudi omuryango gwa okwikirisha Yeesu. 28Kimwi mbeekara Antiyokiya ayo ebhaga ereera bhari amwi na abheeyigira bhayo.
Trenutno izabrano:
Ebhikorwa bhya Abhatumwa 14: kya
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. All rights reserved