Ioane 3
3
Iesu Nikodemusi ita ve laua
1Soka Farisea ve firu karu aea rare Nikodemusi, are Iuda karu ve harofave vita aea reha. 2Are faita soa voa Iesu tai koti arero mō ōpe, Rabai e, ela ore a Ualare voa forera satiriaraita papuvita; ipi Ualare ita fareho leiti auke leita lea karu a sa leita lea siahu ve peise la leiti vei ore levi leiti roi. 3Iesu tava o arero mō ōpe, Okofa ara aro o la moi, Karu Ualare ve Basileia la ofae levi eavai roi, arero ata mi áre ari auke leitit’ oria. 4A—, Nikodemusi arero mō ōpe, Karu oasora leitita, a—, arero mi ata lea’ lei ari roi? Are areve lou ve ére voa soa orakoria avi mi ata ari roi ei? 5Iesu tava o mō ōpe, Okofa ara aro o la moi, Karu mi ma voa aea Arahoha voa ari auke leitita, a—, are Ualare ve basileia voa levi oropai roi. 6Sarōva voa arita lea mi are sarōva reha; aea Arahoha voa arita lea mi Arahoha reha. 7Ipi arave o mōfeare, Aro mi áre ata ari vei, a haihava levi leitia. 8Mea are haikaeaita lea soasoa voa fareōva vovea; a areve uruuru la mapaitore, a—, are kotita aea teraita lea otioti a ore kao; Arahoha voa mi arita lea karu foromai ta lōfefeare.
9Nikodemusi tava o arero mō ōpe, Mea etau leafeare leiti roi? 10Iesu tava o arero mō ōpe, A Israela karu ve satiriaraita papuvita aea, a—, a mea etau ta ore leiti kao ei? 11Okofa ara aro o la moi, Ela ore leita lea etau vei ela laua sukōvō vovea, aea ela ofae eavaita lea etau la ela satiriara vovea; a—, ela satiriaraita lea o e mapai sore. 12Ara mearovaeka ve etau ero omoita, aea e lea etau mapai auke leitita; a—, ara kauri ve etau ero omoita, a—, e leafeare mapai roi ei? 13Karu farakeka aea kauri voa patai sore, a—, Karu ve Atute sa haria, kauri kiripi faukaita lea vita.
14Usoso Mose furuka merava oti voa auri koavi ikaroa la arori voa moravōpe, lōfeare Karu ve Atute la moravai roi;#Num 21:9 15ipi arero sukaerereaita lea karu peita makuri la ovai vei.
16Ipi Ualare mearovaeka la maeaforoe mōri leipe: are areve Atute farakeka haria la miarōpe, ipi arero sukaerereaita lea karu foromai la levi saroroapai roi, a—, ere peita makuri la ovai vei. 17Ipi Ualare areve Atute mearovaeka la seseōvi tava miarai vei itapai kao, a—, ipi mearovaeka la are voa lei makuri leiti vei. 18Atute la sukaerereaita lea karu la seseōvi tava miarai auke ita mea vovea, a—, arero sukaerereai auke leita lea karu are seseōvi kaiae tava ovaita reha, ipi are Ualare ve Atute farakeka ve rare la sukaerereai auke eavia.
19Seseōvi tava miaraita mai mōfeare: ovava mearovaeka voa haeaita meha; a—, karu murumuru la haikaeai rovaea, ere ovava la haikaeai kao, ipi ereve leita mai kaiae eavia. 20Ipi kaiae leita karu ovava la kaifa lei vovea, aea ovava voa forerai sore, ereve leita mai kaiae la pisiri muiai ave. 21A—, okofa mai la leita lea karu ovava voa forera vovea, ipi are sa leita etau etau erero Ualare voa leititore lea la pisiri muiai vei.
Iesu aea Ioane Bapatiso Vita ita
22Lea etau ve aite voa Iesu aea areve satiriaraita karu ita Iudea ve soa voa kavōpe; aea are lōvoa ere ita fareho pepea karu la bapatiso leiape. 23Ioane ta, Aenono, Salimi haekao oti voa pōvi karu la bapatiso leiape, ipi lea oti ma rovaea eavia; aeata karu bapatiso vei soa foromai foreraiape. 24Ipi lea soa Ioane la dibura voa lehaia sasaukai kao.#Mat 14:3; Mak 6:17; Luk 3:19–20
25Soka Ioane ve satiriaraita karu ere Iuda karu farakeka aea ita o serea elore elore ōpe ipi maea la lei ovava leita mai vei. 26Ere Ioane tai koti arero mō ōpe, Rabai e, ita fareho Ioridana mairimairi itai voa meiape vita, a sa o are vei moipe lea vita, are karu la bapatiso la leipea, aea karu foromai ta arero tai la foreraipea. 27Lō mei, Ioane tava o mō ōpe, Ualare sa arero miarai auke leitit’ oria, karu etau aea la levi ovai lare. 28E ta ore ara o mōfeare moipe, Ara Keriso kao, a—, araro areve omopa voa itapi mea.#Ion 1:20 29Ua áre la ovaita vita, ua laeaita vita reha; a—, ua laeai vei leipeta vita ve moraitai, soi pea arero mapaita lea vita, ua laeaita vita ve o la mapaita, are hailareva rovaea. Lōfeare hailareva ta arave, aea ara hailareva sa soarita meha. 30Are rovaea leiti roi, a—, ara seika leiti roi.
31Arori voa fauka foreraita lea vita, karu foromai ve arori vita reha; mearovaeka voa foreraita lea vita, are mearovaeka ve karu, aea are mearovaeka ve etau vei laua sukōvō vovea; a—, kauri voa fauka foreri meita lea vita are karu foromai ve arori vita reha. 32Are ofae eovi mapi ore lei meita lea etau etau vei are okofa la moi vovea, a—, areve lea o la sukaerereaita karu kasirau. 33A—, areve o la mapi sukaerereaita lea karu, are mō aritore, Ualare are okofa. 34Ipi Ualare sa itapi meita lea vita Ualare ve o la moi vovea; aea Ualare arero Arahoha la miaraita lea mea are hiake hiake ta miarai sore. 35Oa are Atute la haikakare leititore aea etau etau foromai la areve mai voa miavi laisisea.#Mat 11:27; Luk 10:22 36Atute la sukaerereaita lea karu peita makuri ovaitore, a—, Atute la kaeava arita lea karu makuri la levi eavai roi, a—, Ualare ve kitou areve arori voa miavi eaeava roi.
Trenutno izabrano:
Ioane 3: TQO1983
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Published by the Bible Society of Papua New Guinea in 1983.
