MATHAI 9
9
Kamkhawn Kami A Hoihsak
(Mrk 2:1-12; Luk 5:17-26)
1Jesuh loa palong thungah akun, tuili angkat moa hapbang yaeh angmah vang ah amlaem let.#9:1 Angmah vang tihae Kapernaum to ni. 2Kamkhawn kami longto hnibaih hoi maek ah Jesuh khaeah angzawn o. Jesuh mah natanto maw taanghaih a tawnh o tito a hnuk na-ah kamkhawn kami khaeah, “Ka capa, palung mongsak ah! Na zaehaih ihnawk loa tahmen ah oh boah,” tiah a naa.
3Tona-ah Tawklok patukkung thoemtonawk mah, “Hi kami loa Sithaw hmin setsakhaih hoiah lok a thuih,” a ti o.
4Jesuh loa anihcae dawnhaih to panoek pae moa, “Tipongmaw tobatih hmuen kahoih ainawk to na dawn o? 5‘Na zaehaih loa tahmen ah oh boah,’ tito maw ka zoi kue, ‘Angthawk aloa taka ah,’ tito maw ka zoi kue? 6Kami Capa mah longnui ah zaehaihnawk tahmen hanah akaa a tawnh tito kang patueng o han,” tiah a naa moa kamkhawn kami khaeah, “Angthawk ah, nangmah ih hnibaih to la aloa im ah caeh ah!” tiah a naa pae.
7Kamkhawn kami to loa angthawk moa im ah caeh. 8Minawk mah a hnuk o na-ah a dawnrai o moa tobatih akaatawnhhaih to kaminawk khaeah a paek pongah Sithaw to saphaw o.
Jesuh Mah Mathai A Kawk
(Mrk 2:13-17; Luk 5:27-32)
9To hmuenh hoito Jesuh tacawt moa a caeh tapai li nathuemah Mathai naa pae ih tamut congkung, zung ah kanghnu to a hnuk. Anih mah, “Kai hnukah na baang ah,” tiah a naa pae.
Mathai loa angthawk moa a baang.
10Jesuh loa Mathai im ah duembuh a cak li na-ah tamut congkung paroeai hoi kalah kami kazae tahnawng sut ihnawk angzoh o moa Jesuh hoi hnukbangnawk to buh angvai o haih nawn.#Luk 15:1-2 11Farasi thoemto mah loa a hnuk o na-ah Jesuh hnukbangnawk khaeah, “Tipongmaw nangcae ih patukkung loa tobatih kaminawk hoiah buh nawnto a cak?” tiah a duengh pae o.
12Jesuh mah a thaih moa anihcae khaeah, “Ngantuinawk loa dawkta angtoeng ai, to-e ngannanawk mah khueh ni loa angtoeng,” tiah a naa pae. 13Caeh aloa, “ Angbawnhaih ka koeh ai moa tahmenhaih palungthin ni ka koeh,” tiah Cabu Kacai mah a thuih ih hae ahlongrui to dawn o noek ah. Kami katoengnawk kawk hanah kangzo ai moa kami kazaenawk kawk hanah ni kangzoh,” tiah a naa.#Mat 12:7; Hos 6:6
Buhzahhaih Kawng Lokduenghhaih
(Mrk 2:18-22; Luk 5:33-39)
14Topacoengah Baptisma paekkung Johan ih hnukbangnawk to angzoh o moa Jesuh khaeah, “Tipongmaw kaicae hoi Farasinawk loa buh ka zah o toepsoep e, nangcae ih hnukbangnawk loa buhza o ai?” tiah a duengh pae o.
15Jesuh mah, “Zupaluen poi ah pacae ih kaminawk loa zulakung a oh nathungah palungsae o tih,” tiah na dawn o maw? Palungsae o mak ai! To-e zulakung to anihcae khae hoitoah lak ving ih ani to pha tih, tona-ah loa buhza o toeng tih.
16Mimah doeh laihaw kangquem to laihaw angan kangtha hoiah abu vaih ai, kawmawtiah totiah abuhaih ih kangtha mah angsiksak aep ueloa akhaw to len aep tih. 17Amimah doeh misur moihin tabu kangquem thungah misur tui kangtha to lawn vaih ai, kawmawtiah moihin tabu to tapok phawt ueloa misurtui to amsah king tih. Totipongloa misur moihin tabu kangtha thungah misurtui kangtha to lawn nahaeloa hnetto cuem maek tih,” tiah a naa.
Jairas Canu hoi Kahnitom Kasui Nongpui
(Mrk 5:21-43; Luk 8:40-56)
18Jesuh loa to lok to a thuih li na-ah Judah angraeng longto Jesuh khaeah angzoh, khokkhu samkrawn moa tabok lamhoi, “Vaihi pangah ka canu a duek. To-e angzo loa a nuiah ban koeng pae rae ah, hing let tih,” tiah a naa pae.
19Topongah Jesuh loa angthawk moa anih hnukah baang. A hnukbangnawk doeh Jesuh hnukah baang o toeng.
20Tona thuemah nongpui longto, saning hlaihnetto thung thipahawt nathaih ka tawn to Jesuh ih ahnuk ah angzoh moa kahnitom to a sui pae. 21“Kahnitom khueh mah ka sui nahaeloa ka nathaih hoih khaeh tih,” tiah palung thungah a dawn.
22Jesuh loa hnuk bangah angqoi moa nongpui to a hnuk moa anih khaeah, “Ka canu, palung mongsak ah! Na taanghaih ih mah anghoihsak boah,” tiah a naa pae. Tona tue roeroe ah nongpui loa a hoih roep.
23Topacoengah Jesuh loa Judah angraeng im ah to akun. Qok toephaih tuenkamding ka tum ka uengnawk hoi tuen carawtui ah ka omnawk to Jesuh mah a hnuk na-ah, 24“Mi kawbatih doeh tacawt o king ah! Nongpui hae dueh ai, ka iip ni,” tiah a naa pae. Tona-ah a pahnuih o thuih. 25To-e kaminawk caehsak pacoeng rumhoi Jesuh loa nongpui ohhaih imlaek thungah akun moa a ban hoiah yaeh moa pathawk tahang. 26To kawng to taenghaek ih prae thung boih ah amthang.
Mikmaeng Longhnetto A Hoihsak
27Jesuh loa to hoitoah tacawt moa a caeh na-ah, mikmaeng longhnetto mah patom moa, “David Capa na tahmen ah,” tiah a hangh hoi.
28Jesuh loa im thungah akun na-ah, mikmaeng longhnetto angzoh hoi moa Jesuh mah anih hnit khaeah, “Kang hoihsak thaih tito na taang hoi maw?” tiah a naa pae.
Anih hnit mah, “Kang taang, Angraeng,” tiah a naa pae hoi.
29Topacoengah Jesuh mah anih hnit ih mik to a sui pae moa, “Na taang batih toengah oh na soe,” tiah a naa pae moa, 30anih hnit loa mik aang hoi let. Jesuh mah anih hnit khaeah, “Hi hae mita khaeah doeh thui hoi hmah,” tiah a naa pae.
31To-e anih hnit loa caeh hoi moa Jesuh kawng to ato ih prae bum boih ah thuih hoi.
Jesuh Mah Lok-aa Longto A Hoihsak
32Mipuinawk im bangah amlaem o dudu na-ah Mi kalahnawk mah taqawk mah naeh pongah lok ka pae thaih ai nongpa longto Jesuh khaeah angzoh o haih. 33To-e taqawk to pathok pacoeng rumhoi to nongpa loa lok apaeh amtong moa mi boih mah dawnrai o. Anihcae loa, “Hibatih hae Israel kaminawk thungah tita doeh ka hnuh o vaih ai,” tih o.
34To-e Farasinawk mah loa, “Taqawk pathokhaih thaih ih hmuensak thaihaih hae Jesuh ka paekkung loa taqawk angraeng ni,” ti o.#Mat 10:25; 12:24; Mrk 3:22; Luk 11:15
Jesuh Mah Kaminawk Tahmen
35Jesuh loa vangpui hoi vangcanawk boih ah caeh moa amkaeh. Sinakok ah patuk moa Prae Tamthang Kahoih to taphong moa ngoinathaih hoi nathaih congca to a hoihsak.#Mat 4:23; Mrk 1:39; Luk 4:44 36Jesuh loa tuukroekung om aiah tuu batiah palungthin dawn kangpho hoi abomkung tawn o aiah kaom mipuinawk to a hnuk na-ah paroeai a tahmen.#Nam 27:17; 1 Sang 22:17; 2 Dung 18:16; Ezk 34:5; Mrk 6:34 37Topongah a hnukbangnawk khaeah, “Cang aah han pop parai, to-e ka aat han kami tamsi.#Luk 10:2 38Topongah cang ka aat hanah toksahkungnawk patoeh thaih hanah lawk tawnkung khaeah khophoe oah,” tiah a naa pae.
Trenutno izabrano:
MATHAI 9: AKNT2023
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Asang Khongso New Testament in Eastern Khumi © Bible Society of Myanmar, 2023.
