Mateo 6
6
Zesocca marinarrape: —Deo Pouaza uima bicani tinanemananiuarrinepe arrima tiquenani bica tani −narrari
1—Parrissehera Deo Pouaza tizepedeni irrimaneza uima bicani tinanemanezape madirra qqui toquenauiuarrinera tizepedeni irrimana terrerarri. Madirra tiadeni qqui toquenaza attidenipa: “A, tirrinedeni bica tani. Bicaqquiri tiquenani” quenauitouira timadimana terrerarri. Parri, attideni nama quenauitouira timadimanezape Abi Deo memeuarri madirraripa narraro uima nauato taporra narrari. Niza zotode poua baccouarri tidomodeni uezape: “Tirrinedeni bica tani. Bicaqquiri tiquenani” narrarauitoui. Pocca danirri bicabote naqui tiadeniza da inerreranitoui, onarraro −naui nade Zeso.
2—Nazama cappiremanarrarideniza manaconi rrirehe da tinabaqquiniuarrinepe pouadeniza teti uana teza manaconi rrirehe da tinabaqquini bica tani. Naraha madirra tirrine bica tani qqui toquenaza: “A, bica taui. Pouapa cappiremanarrarideniza manaconi rrirehe da da narrari” quenauiuarrine touini tezape bica terrerani, onarraro. Attideni nama quenaui touini tezape pina maizarridede rabotedenissa tarraro. Pouadeni naco cappiremanarrarideniza da da iquenaraha uatideni uanaqquiri narrararrari. Pouadenipa madirra mittemanauiuarrine zodeodenicca Deo Atti mamariuarri uati uati toquenarrari, amossiniuarri naco uati uati toquenarrari. Pouadeni poccadeni uimaraha: “Irrine bica tani, bicaqquiri inani” quequenanarrari. Madirra ouahadeni attidenipa: “Parrissa! Bicaqquiri tiquenani” quenauitouira madimanarrari. Neraha ouape parrissehera tiadeniza uati onarraro: Narraridenipa taide touini quenauicca carrimanapozapa niza zotode Deo Poua baccouarri domo uaza narrarideniza Deopa: “Rrehe, peperri. Bicaqquiri tiquenani” narrarauitoui. Pocca danirri bicabote naqui da inerreranitoui, onarraro. 3Neraha tiape cappiremanarrarideniza da tinauiuarrinepa ticca uima tecomerariza terrerarri. Titesse bica tarrariza naco ticca uima uati tina-rrerarri, onarraro. 4Arrina, cappiremanarrarideniza da tinauiuarrinepe madirra ouahadeni qqui toquena-rrarazana da tinani bica tani, onarraro. Nema tezape madirra ouahadeni ticca danirri nauatoqquiri narrararaha Abi Deona nauato taui. Niza zotode Deo Poua baccouarri teza tia catizezapa: “Rrehe, peperri. Bica tinani” nauitoui. Pocca danirri bicabote naqui tiaza da inanitoui, onarraro −nade Zeso.
Zesocca marinarrape: —Deoza uati tiquenaniuarrinepe arrima tiquenani bica tani −narrari
Roca 11.2-4
5—Abi Deoza uati tiquenaniuarrine naqui pina maizarridede rabotedenissa tiquenerrerarri, onarraro. Narraridenipa Deoza uatide toquerrenazapa pina madirra Deoza dameraqquiri narrarissa quenaraha maizemanarrari. Naza narrarideni nama quequenanarraridenipa zodeodenicca Deo Atti mamariuarri domo uezaza, amossiniuarri domo uaza naco madirra ouahadeni mittemanauiuarrine Deoza uatide totoquerrena narrari. Madirra ouahadeni attidenipa: “A, Deoza uatide dameraqquiri naui” quenauitouira mamadimana narrari. Noccodeni rro narronaui quenauitouira madimanarrari. Nazama ouape parrissehera tiadeniza uati onarraro: Narraridenipa taide touini quenauicca carrimanapozapa niza zotode Deo Poua baccouarri domo uaza narrarideniza Deopa: “Rrehe, peperri. Bicaqquiri tiquenani” narrarauitoui. Pocca danirri bicabote naqui da inerreranitoui, onarraro. 6Naraha tiape Abi Deoza uati tinaniuarrinepe “Oua icattaqquimana-rrerana” teza ticca oza bodiuarri tiqquezima, totoqquezima ticauacossa neza tia motta Deoza uati tinarri. Nema tezape madirra ouahadeni ticca uatinarra mittemana-rrararaha Abi Deona mittaui. Niza zotode Deo Poua baccouarri teza tia catizezapa: “Rrehe, peperri. Bica tinani” nauitoui. Pocca danirri bicabote naqui tiaza da inanitoui, onarraro −nade Zeso.
7—Deoza uatide tirreza naqui ticca uatinarra uati tinezape uati tinarraro, uati timanipomarraro, uati timanipomarraro terrerarri, onarraro. Arrana, Deoza toquerrena-rrararraridenipa nama nama quequenanarrari. Touini quenauicca toui pouadeni cacauade uatide toquerrenazapa uati toquenarrari, uati nimanimana-pomarrari, uati nimanimana-pomarrari quequenanarrari. “Nema ineza etti mittauiuarrine” quequenanaraha pouama uati uati toquenarrari. 8Neraha tiadenipe pina pouadenissa tiquenerrerana. Deoza ponima uati uati tiquenerrerana, onarraro. Arrina, ticappiremananicca bazima Deo Pouaza uati tiquenerreraccazama Poua bodipa nauato tapoui, onarraro −nade Zeso.
Deoza uati uati inaniuarrinecca uima
Maraco 11.25-26; Roca 11.1-4
9—Nazama Deoza uatide tiquerrenaniuarrinepe tettidenipe arrima tiquenarri:
“Rrehe Abi Deo, memeuarri timadirraro, tiaza iquerrenarrarope ticca madirra iquerrenarraro. Tiape nauatorride tirrirani orrari tani. Bica tinani! Madirra bazima: ‘Deo, Tiape deni tirrani!’ quenana, inarraro.
10Ticca cacauehe bazimaza tinanarizana, inarraro. Pina memeuarri Tiaza madimanarrarideni bazima Tettiza iboraqquiri zazanapomana narrarissa quenauiuarrine arri namiuarri imadirraro ia bazima naqui Tettiza iboraqquiri inana, inarraro.
11Itapari naco uada uarrirriraza iaza da da tarro.
12Madirra iaza uaidirehe inanemaneza poccadeni uaidireheza: ‘Peperriua, uadi onerrerani’ inezape manaco icca uaidirehe peperri tinanarri, Abi Deo. Icca uaidirehe manaconi narrizoue iaza tinana-rrerarri, inarraro.
13Uimasiritoui ibodi uatoza naqui narraro touini inerreraniuarrine ia acco ticanabaqquirri, uimasiri inana-rreraniuarrine, inarraro. Uaidirehe rrinede Tocorime-Tamine pouauarri ia rroca tozimanibaqqui-rrarauiuarrine ia tecauabaqquinissa tarri, inarraro.
Tiana ia bazima tecauabaqqui-zanaporraro. Daco tirrirani! Bica tinani! ihizanapo narraro. Peperri.”
14Nazama Zesopa pouadeniza denima uati tarrari: —Rrehe, arrina madirra tiaza uima inauaidireza naqui tiape: “Narraro uimaza ouati rrimana. Pouaza ouadi-rrerana” tarri. Nema tezana ticca Abi memeuarri madirrari ticca uimasiriza uati rramauitoui. 15Naraha madirra ouahacca uimaza peperri terrerezape ticca Abi Deo naco ticca uimasiri peperri inana-rreranitoui, onarraro −nade Zeso.
Zesocca marinarrape: —Rripehe tinebocossemananiuarrinepe arrima tiquenani bica tani −narrari
16—Deoza uatide tiquerrenaniuarrine rripehe tinebocossemanezape tipanodeni ozaqquiri nerrerana, pina tipanodeni bica teza timadimanana, onarraro. Neraha tipanodeni ozaqquiri nezape pina maizarridede rabotedenissa tiquenerana. Narraridenipa madirra ouahadeni qqui toquenaza: “A, rripehe nebocossemanaui, Deoza dameraqquiri naui” quenauiuarrine touira quenazapa pouadenirrine pouadeni cacauemanauissa tarrarazapa ocasseraqquiri nanarra narrari. Nazama parrissehera tiadeniza uati onarraro: Narraridenipa madirra attideni touira quenazapa pouadeni touini quenauicca taide carrimanaporrari. Nazapa zotode Deo Poua baccouarri domo uaza Deopa pouadeniza: “Rrehe, peperri. Bicaqquiri tiquenani” narrarauitoui. Pocca danirri bicabote pouadeniza da inerreranitoui, onarraro. 17Neraha rripehe tinebocossaniuarrinepe taide tipano ssaua, titati ssiri tezana rripehe tinebocossani bica tani. 18Nazama rripehe tinebocossani madirra ouahadeni ssamoqquiri naraha Abi Deozape auato tani. Pouana nauato tarrari. Niza zotode Poua baccouarri teza Deopa tiaza: “Peperriua, ticca uima bica tani” nauitoui. Pocca danirri bicabote naqui tiaza da inanitoui, onarraro −nade Zeso.
—Memeuarri Deo madiuiza uima bicanira tinauapimanana −narrari Zeso
Roca 12.33-34
19—Rrehe, arri namiza timadimanaqquezape tizepedenitarri tinauapimananiuarrine touinira timadimana terrerarri. Arrina, tozepetarri tinauapimanezape poni maccanirrine ssari nani carri tani. Motape ponira marratoni carri tani. Motape ponira boteza rrazi tani. Motape botie torra tani. Nema nezape tizepedenitarripe rrica-ca-ca nemanehe amossi nani carri tani, onarraro. 20Nazama arri namiza timadimanani parri naqquezama Deo Poua touini nauicca touira timadimanarri, onarraro. Memeuarri arra Deo madiuizana uima bicani tiadeniza touapiponiuarrinepe arrirraro namiza tizepedeni ihirrimana narri. Nema tiquenezape Deocca danirri bicabote tiadeniza da inanitoui. Narraro Deocca danirripe poni maccanirrine ssari naniuarrine nouerani. Marratoniuarrine nouerani. Bobotide botiuiuarrine noueraui. Parri rricariniuarrine naqui noueranitoui, onarraro. 21Arrina, tiadenipe arrirraro namicca tozepetarri toui, ziniro touira timadimanerre nezape narrarozara tetizerizemanarraro. Naraha Deo Poua touini nauicca touira timadimanezape Deocca danirrizana tetizemananitoui, onarraro −naui nade Zeso.
Deo ssiuerrene ibodiza qquezimauiuarrine bica tani
Roca 11.34-36
22—Inoccope essireza pina rrorrororossa narraro. Inocco bica tezape essire ssiuarrani irrini. Izepeza naqui damade nauato inarraro. Emoriza naqui ccarizade nauato inarraro. Icca tarabaia naqui iparrirerraro. Ibodi uatode naqui nauato inarraro. 23Neraha inocco bica terrerezape pina inocco zizi tarrarossa narraro, essire nemanehe issamo tani. Dama inaniuarrine naqui ssamo tani, iccarizaniuarrine naqui ssamo tani, icca tarabaia naqui ssamo tani. Uimape narrarossa narraro tibodideniza Deo ssiuerrene toqquezimezape tibodideni ssiuarrani carrini. Naraha Deo ssiuerrene toqquezime-rrerezape tibodideniza pina zizini irririzarrarossa narraro. Arri tiadenipe: “Nauatoqquiri inani. Ibodi ssiuarra tani” tiqueneraha narraro ssiuarranipe occa uimassa nerrerezape ssiuarrani ticarrimana-rrerarraro. Zizini oppina taniccaza timadimanarraroparri, onarraro −naui nade Zeso.
Deotoui, zinirotoui imadiniuarrine ssamo tani
Roca 16.13
24—Rrehe, madirra poua zossede pamahaza zepe irriuiuarrinepa parrire-rraraui. Zossede pamaha carrizapa orrariazana uati uana tarrari. Poua attizana ibora tauitoui. Ouahaza arramani uati uana tazapa pina pouaza nacassera tarrarissa nauitoui. Poua attiza ibo tauitoui.
—Madirra Deoza zepe irrizapa zinirotouira zepe irriuiuarrine ssamo taui. Zinirotouira uatizezapa Deoza uatizeuiuarrine ssamo taui. Uima pamehepe Deotoui, zinirotoui narraripa madiuiuarrine ssamo taui, onarraro −naui nade Zeso.
Deo pocca erredeni ecauabaqquirrari
Roca 12.22-31
25—Nazama tiadeniza ouattipe: Timadimananiuarrinecca ticappiremanani noppineni ticappinemana terrerarri, onarraro. Pina nerrecora orripapazerre? Nerreco zamatapa pperrenera ze onapazarra? Nerrecora oro ozimapazerre? tiquenerrerarri. Narrarotouipe tibodideni uauatomacca nerrerana, onarraro. Icca madiepe zamatapaha orrari-rraraui. Icca madiena denima bica tarraro. Essire naqui etero ezaniuarrinea orrari-rrerani. Essirecca uimana denima bica tarraro −naui nade Zeso. 26—Arrana, meme abari ppirirideni memeza rrauirizarraripa qqui qqui tiquenani. Narraridenicca uimaza tibodideni uatome-manarri. Pouadenipa uizarracca ppa taui pperaqquiri, uizarracca ppa taui zamatapa bono biteraqquiri nazapa niza zotode rripemanauiuarrine ppa taui bono naco ozaza ecauemana-rrararrari. Naraha ticcadeni Abi Deo memeuarri madirraripa pouadeniza rripemanauiuarrine da da ihinanarrari. Deopa meme abarideniza uati uana taraha tiadenizana denima uati uana tarrari. Tiadeniza naco tirripemananiuarrinecca da da ihinanauitoui. 27Naraha tiadenipe nerrecotoui tibodideni: Denima omadi-zanapopazerre? tiquenarraro? Narrarotoui tibodideni uauatomacca nezape ticcadeni madie denima tinanemananiuarrine nauatoqquiri tiquenaqui? Nauatoqquiri tiquenerrerani! Ponima tibodideni uauatomacca nerrerana, onarraro −naui nade Zeso.
28—Nazama uima onihi naqui: Nerrecotoui etero ticarriquemanani noppineni ticappinemanarraro? Narrarotoui tibodideni uauatomacca nerrerarri. Rrari, qqui tiquenanarra aua moue ppata tarizarrari. Aua mouepa tarabaiera, uepe picocora, etero ssequiquira taraha ppata tarizazapa pina etero bicani oro tozimemanarrarissa narrari. 29Arrana, maittaccazama naco Izarraeo potemauidenicca tamine Saromopa zepe sserride razapa etero bicani uatini ccara tanicca uezazapa bica tatarra naraha aua mouena denima bicaqquiri narrari, onarraro. 30Rraho, ticcadeni rrehenirripe bazira tani! Nerrecotoui tiadenipe “Deo ia touacaua-baqquiui” tiquenerrerani? Arrina, minape etero uezaniuarrine cappireraha Deorrine poni moueni carrizape pina etero bicani uezarrarossa nani. Minape moueni carrini bica teraha uada uada neza qqueze nezape botta ina tani. Neraha minape arrimanicca. Tiadenipe pina arri minassa tiquenerrerani. Deocca cacatize tabaqqui tiquerrenarraro. Nazama Deopa tezemananiuarrinecca etero naqui denima tiadeniza da inanitoui, onarraro −naui nade Zeso.
31—Neraha tiadenipe timadimananiuarrinecca ticappiremanani noppineni ticappinemana terrerarri. Pina nerrecora orripapazerre? Nerreco zamatapa pperrenera ze onapazarra? Nerrecora oro izimapazerre? tiquenerrerana, onarraro. 32Deoza toquerrena-rrararraridenipa nama nama nanarizemana narrari. Poccadeni rrirripa touira, pouadeni zepetarri touira bodideni uauatome-mana narrari. Naraha ticcadeni Abi Deo memeuarri madirrari ticarrimanani. Pouapa ticappiremananicca bazima nanauato narrari. 33Deocca cacauehecca uimaza tibodideni uatomarizaniuarrine Deotouira tatarizemana narri. Deo Poua nacassa tauiccazara tetetizemana narri, onarraro. Nema tiquenezana Deorrine ticappiremananicca tiadeniza inanarizanitoui, onarraro −naui nade Zeso. 34—Rrehe, titezerremadenicca uada tauimarini toui tibodideni uauatome-mana nerrerana. Pina: “Izamassa nerreco uimara torrapazerre?” titiquena nerrerana, onarraro. Rridapanacca ssiuarrani tauimarinira tibodideni uauatome-mana nana, onarraro −naui nade Zeso.
Trenutno izabrano:
Mateo 6: KBNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
2020 Impresso na Graafica da Biblia
