मारकुस 12
12
आङ्गुरमि बारि हाङ् आक्कुबि योम्पक् मुखुबाचि
(मट्टि २१:३३-४६; लुका २०:९-१९)
1आक्क डॆङ्पि येसुऎ आक्खाचि काठाबि गरहाङ् लोसुचि, “एक्क याॽमिऎ बारिबि आङ्गुर टिःसु। हाङ् खोसॆ चोब्न ठाल बॆङ्ठाङ्सु हाङ् आङ्गुर यिःम्माम् लागि एक्क यिःॽलुङ् स मुसु। हाङ् आक्क आङ्गुरमि बारि हुङ्माम् लागि एक्क खोप्पिरि सङ्क हेबु। हाङ् आक्क आङ्गुर बारि लम्फङ्बि टिडाउहाङ् होइक हाङ्टेम्पि खाइटा।
2“आङ्गुर टुमा हाङ् खोसॆ खोम् भाग लासि उम् योम्पक् मुखुबा एक्क याॽमि आक्खाचिबि पाङ्हाक्सु। 3टर लम्फङ् लाखुबाचिऎ आक्क लाबुचि हाङ् रगुचि हाङ् होप्पेरेक हुक् ऎन्हाङ्सुचि। 4खोसॆ आक्खाचिबि होइक एक्क योम्पक् मुखुबा पाङ्हाङ्सु, आक्क सङ्क खोचिऎ निङ्टँवाँबि रगुचि हाङ् ङेसिमा लुलु मुसुचि।
5“फेरि खोसॆ होइक पाङ्हाङ्सु। आक्क ग खोचिऎ सेॽइटुचि। गरहाङ्न खोसॆ होइढा डिरिक् पाङ्हाङ्सुचि। टर लम्फङ् लॆखुबाचिऎ ऎॽवाचि रगुचि हाङ् ऎॽवाचि चाइ सेरुचि।
6“ह खोनुङ् खोम् एक्क नेन्चाम्पा पासा टेः चुआ। आक्खाचिऎ काम् पासा ग नुःर लॆःकुचि हला मिन्मानुङ् खोसॆ उम् पासा म आङ्गुरमि बारि लम्फङ् लिखुबाचिबि पाङ्हाङ्सु।
7“टर आढिया लिखुबाचिऎ उम्चि टाङ्पाटाङ्पाबि गर कामानुङ् खानावाँ इसामि। आक्क ग टुङ्घङ्पामि पासान। डाबानॆ, आक्क सेरुम्यॆ हाङ् चोब्न चासुम् कानिम्न लि।
8“गर कामानुङ् खोचिऎ खो लाबुचिहाङ् सेरुचि हाङ् बारिबाङ् बाहिरा कॽहाङ्सुचि।
9“ह आक्क बारिमि टुङ्घङ्पाऎ आक्खा आढिया लिखुबाचि माङ् लॆकुचॆ? खो टाहाङ् आक्खा आढिया लिखुबाचि सेरुकुचि हाङ् खोम् बारि होइढाचि पिकुचि।
10“माल् आन्नॆ निवाँनेन् साब्चिराबि पाढामालॆटिटाम्नॆ?
“लुङ्कॽवा ठक्खुबाचिऎ योम्पक् पिॽनि कामानुङ् कॽहाङ्पा लुङ्कॽवान चोब्बाङ् योम्पक् पिक्खुबा लुङ्कॽवा लिसा।
11ग पारभु निवाँहाङ्ऎ लॆःॽमिम्पा योम्पक् रेम, गग कानिम् ङारिङ्पि आक्खॆॽमा लुऎ खानावाँ रेम।”#खोम्मिम्पासाम् ११८:२२-२३
12येसुऎ ग खानावाँबाङ् खोचिन काइर लोमिम्पा कामानुङ् याहुडि टुङ्घङ्पाचिऎ वाप्टकुचि। मसॆ खोचिऎ येसु लाप्मा यगुचि। टर डिरिक् याॽमिचि चुःक्मिहासॆ किसिआमि हाङ् खोबाङ् खाइटामि।
यावॆङ्गमि खानावाँ
(मट्टि २२:१५-२२; लुका २०:२०-२६)
13आक्क डॆङ्पि याहुडि टुङ्घङ्पाचिऎ येसु उम् खानावाँबि फोःप्सिॽमानुङ् लाप्भुक्साम्नॆ कामानुङ् एक्क हिप्पा फरिसिचि हाङ् हेरोडि याॽमिचि पाङ्हाङ्सुचि।
14हाङ् खोचि येसुबि टाआमिहाङ् लोसुचि, “चिन्खुबो, आनॆ चाइबानऎ खानावाँ टेः यामुक्ना कामानुङ् काङ्कॆ लेकुङ्का। आनॆ याॽमिचिऎ माङ् लोःॽङामिहा कामानुङ् माङ्स मिन्नानि, मान्ठाभनॆ आनॆ याॽमिचिम् या खाङ्मानुङ् खानावाँ इनानि। आनॆ नुःर निवाँहाङ्मि लाम्फुमि बारेबि चिनुकुचिना। ह काङ्का लोचिमॆ, यायेॽमा रक्न काइसार यावॆङ्ग फङ्मा नुऎ रु फॆन्नॆ?
15“काङ्कॆ यावॆङ्ग फङ्मॆ रु आफङ्मॆ?” आक्खाचिम् खो फोप्सिॽमॆ काइसॆ निवाँ येसुऎ वाप्टकुहाङ् लोसुचि, “आन्नॆ काङा मान्ठा फोप्सिसे ठागुॽङानिहा? एक्क ढॆक्का याङ् लाडापाम्नॆ हाङ् खाङ्मिॽङानॆ।”
16खोचिऎ एक्क ढॆक्का याङ् लाडापुचि हाङ् येसु पिट्टुचि। हाङ् येसुऎ आक्खाचि लोसुचि, “गुबि आसाम् निङ् नुङ् लायुङ् चुऎ?” खोचिऎ लोसुचि, “काइसारमि।”
17हाङ् येसुऎ आक्खाचि लोसुचि, “आक्रहाङ्ग काइसारमि ठःका काइसारन पिट्टाम्नॆ। हाङ् निवाँहाङ्मि ठका निवाँहाङ्न पिट्टाम्नॆ।” येसुमि गरक्मा खानावाँ खेमुचिहाङ् खोचि आक्खॆटुचि।
सिखॆम्पाबाङ् हिङ्पॽमॆ खानावाँ
(मट्टि २२:२३-३३; लुका २०:२७-४०)
18आक्क डॆङ्पि याॽमि सिखॆॽमिहाङ् फेरि हिङ्पॽमिनि लोमॆ खानावाँबि निवाँयुङ् लॆखुबा एक्क हिप्पा साडुकिचि टाआमिहाङ् येसु सिमुचि, 19“चिन्खुबो, मोसाऎ काङ्का गरहाङ् साप्पिडिङ्का, बुबु चाइ चाचा मालिबान सिखारा भनॆ चाचा मुमाम् लागि नुसाऎ किॽना भ्या लॆःॽमा लॆ।
20“एक्क खिम्पि वाङ्चि जाना बुबुनुसाचि चुआमि। टुम्मिऎ एक्क खिम्टाङ्मा टॆटु, टर चाचा मालिपान खो सिखारा। 21मसॆ सारुम्पाऎ किॽना लाखॆटु, टर खो सङ्क चाचा मालिपान सिखारा। हाङ् साइलाऎ किॽना लाखॆटु, खो सङ्क मरहाङ्न सिखारा। 22गरहाङ्न चोब्न नुसाचिऎ आक्क किॽना लाखॆटुचि, टर चाचा मालिपान चोब्न सिखारामि हाङ् डॆङ्पि म मेॽनुङ्मा सङ्क सिखारा।
23“हः खोचि चोब्न सिःखॆम्पाबाङ् हिङ्पक्मिर आक्क मेॽनुङ्मा आसाम् खिम्टाङ्मा लिऎ, मान्ठाभनॆ वाङ्चिऎन खो लाखॆम्पा लॆटुचि।” 24येसुऎ आक्खाचि लोसुचि, “आन्ना हाबि ह हाबि माखॆडानि, मान्ठाभनॆ आन्नॆ निवाँनेन् साब्चिराऎ लोमा यकुवॆ खानावाँ हाङ् निवाँहाङ्मि चॆक्मावा लेसाम्निनि।
25“मान्ठाभनॆ याॽमिचि सिखॆॽमिहाङ् खोचिम् भ्या लॆःॽमॆ हाङ् लॆपिॽमॆ खानावाँन लिनि। खोचि ग पारुबिऎ निवाँखाटॆखुबाचि रक्मान लिःक्मि।
26“सिखॆम्पाबाङ् हिङ्पक्मॆ बारेबिऎ खानावाँ माल् आन्नॆ मोसामि साब्चिराबि मिःछुॽमा सिङ्पि मिः हामेसिऎ ठालबाङ् लोमिम्पा खानावाँ माखाङ्टिटाम्नॆ? आक्रल निवाँहाङ्ऎ मोसा लोसु, ‘काङा आबाराहाम, इसाहाक हाङ् याकुबमि निवाँहाङ्ङा यो।’#पारास्ठान ३:६ 27खो ग सिखॆम्पाचिम् निवाँहाङ् हॆॽनॆ, टर हिङ्चाम्पाचिम् निवाँहाङ्ङा। आन्नॆ ग खानावाँबि माखॆडानि।”
चोब्बाङ् ढ्या खानावाँ
(मट्टि २२:३४-४०; लुका १०:२५-२८)
28हाङ् मोसामि यायेॽमा चिन्खुबा एक्कसॆ उम्चि खानावाँ खेम्ढाङ्पा लॆटा। येसुऎ सडुकिचि नुःर खानावाँ ऎम्पिम्पा खेमुहाङ् खोसॆस येसु सिमु, “चिन्खुबो, चोब्बाङ् ढ्या खानावाँ चाइ हाम्पॆर?”
29येसुऎ लोसु, “चोब्बाङ् ढ्या खानावाँ गन, ‘ओ, इस्राएलि याॽमिचि खेमाम्नॆ! कानिम् पारभु निवाँहाङ्न एक्क टे पारभु यो। 30आनॆ आनाम् पारभु निवाँहाङ् आनाम् चोब्न निवाँऎ, सक्माऎ, लावाऎ हाङ् चॆक्मावऎ नाम्नाम् पिसिटॆ।’ 31हाङ् होइक ढ्या खानावाँ चाइ ‘आनाम् गॆअङ्मॆअङ्हा याॽमिचि आना रक्न नाम्नाम् पिसिटॆ’#लेबि १९:१८ लोमॆ यो। गबाङ् होइक ढ्या खानावाँ माङ्स माआ।”
32हाङ् आक्क मोसामि यायेॽमा चिन्खुबाऎ लोसु, “चिन्खुबो, आनॆ नुऎन लोसुना। निवाँहाङ् एक्क टेः चु, खोबाङ् होइक आसास माआमि। 33मसॆ याॽमिऎ निवाँहाङ् टाङ्पाम् चोब्न निवाँऎ, चोब्न लावाऎ हाङ् चोब्न चॆक्मावाऎ नाम्नाम् पिसिॽमा लॆ हाङ् टाङ्पाम् गॆअङ्मॆअङ्हाचि चाइ टाङ्पा रक्मान नाम्नाम् पिसिःॽमा लॆःॽमि। चोब्न खालाहा मिःबि हिॽमानुङ् सङ्टिॽमाहा योम्पक्बाङ् सङ्क इघा हिच्चि योम्पक् चाइ ढ्या रेम।” 34आक्कमि चेन्टुबावाँऎ खानावाँ खेमुहाङ् येसुऎ आक्क लोसु, “आना निवाँहाङ्मि हाङ्डाम्मि कॆक्पिॽन चुःक्ना।” आक्कडेङ्पि आसॆस येसु खानावाँ सिम्मॆ निवाँ मामुहिसुचि।
फाक्खुबा खिरिस्टमि खानावाँ
(मट्टि २२:४१-४६; २३:१-३६; लुका २०:४१-४७)
35निवाँहाङ्मि खिम्मि पालुम्पि येसुऎ चिन्मॆ पाइटुचिर इसु, “मोसामि यायेॽमा चिन्खुबाचिऎ मान्टॽल खिरिस्ट डाउडमि पासा लोकुचॆ? 36मान्ठाभनॆ डाउड खोसॆॽन सॆङ्सॆङॆ लावाबाङ् गर काडा,
पारभु निवाँहाङ्ऎ काम् पारभु लोसु,
‘काङॆ आना सिच्चाखुबाचि आम्लाङ् खुक्माबि मायुङ्रढारि
आना काम् चुप्ठिङ् पोट्टा पॆनॆ।’#खोम्मिम्पासाम् १०:१
37“डाउडऎन खिरिस्ट काम् ‘पारभु’ लोकु हाङ्ग मान्टॽल खिरिस्ट डाउडमि पासा लोमॆ?” येसुमि खानावाँ आक्कुबि खोम्टिखॆम्पा डिरिक् याॽमिचिऎ निवाँ टिमानुङ् खेम्ढाङ्पा लॆटामि।
38येसुऎ चिन्से लोसुचि, “मोसामि यायेॽमा चिन्खुबाचिबाङ् नुःर पेनानॆ। खोचि टक्भॆहा चे चाङ्मानुङ् हाटाबि वाइटिॽमा हाङ् याॽमिचिऎ स्यामिॽङामिर मिनुक्मि। 39हाङ् याहुडिचि खोम्ठाम् खिम्पि हाङ् भोजाबि टुङ्घङ्पा पेन्ठाम ठालबि पेन्मा यगुक्मि। 40खोचिऎ लाङ्मिॽमाचिम् खिम् लुप्चाकुचि हाङ् हुन्न टक्भॆऎ टक्भॆऎ पारठाना लॆखाङ्मि। आक्रहाचिऎ एट्टान ढ्या डान्डा टक्चाकुचि।”
लाङ्मिॽमाऎ सङ्टिम्पा याङ्
(लुका २१:१-४)
41हाङ् आक्क डॆङ्पि येसु निवाँहाङ्मि खिम्पि याङ् टिमॆ कॽनाम्मि कॆक्पि पेना हाङ् याॽमिचिऎ याङ् टिमिम्पा खाङ्ढाङ्पा लॆटा। डिरिक् चासुम्टाङ्पाचिऎ डिरिक् याङ् टिसुचि। 42हाङ् आक्कुबि एक्क लाङ्मिॽमा सङ्क टाआहाङ् टाँबमि हिच्चि ढक्का याङ् टिसु। 43हाङ् येसुऎ खोम् टिङ्खुबाचि सेःरुचिहाङ् लोसुचि, “चाइबान के आन्ना लोकानि, ग माङ्स आचुखुबा लाङ्मिॽमाऎ होइढाचिऎबाङ् डिरिक् याङ् टिडु। 44मान्ठाभनॆ होइढाचिऎ ग टाङ्पामि ऎम्पम्पाबाङ् टिसुचि, टर ग लाङ्मिॽमाऎ ग खोम् चुहा चोब्न डॆन्टु।”
Trenutno izabrano:
मारकुस 12: LBR
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. and Nepal Bible Society
