मट्टि 27
27
येसु पिलाटसमि ङारिङ्पि लाखॆमिम्पा
(मारकुस १५:१; लुका २३:१-२; युहान्ना १८:२८-३२)
1नाम्सङ् माक्मि चोब्न ढ्या याटाङ्पाचि हाङ् टुङ्घङ्पाचिऎ येसु सेॽमॆ निवाँ मुसुचि। 2हाङ् खोचिऎ खो हिगुचि हाङ् रोमि टुङ्घङ्पा पिलाटसबि टॆटुचि।
याहुडा सिखॆमिम्पा
(सॆःक्ढुङ्पा १:१८-१९)
3हाङ् येसु बङ्सिखुबा याहुडाऎ येसु सेॽइमॆ आब्डिक् टिमिम्पा वाबु हाङ् खो निवाँबि चाइखॆटु आक्खा याङ् ऎम्पिॽमाम् लागि आक्खा सिःमि सुपङ् ढॆक्का ढ्या याटाङ्पाचि हाङ् टुङ्घङ्पाचिबि लाटॆटु। 4हाङ् लोसुचि, “काङॆ आब्डिक् मॆड्डिङ्मा याॽमि बङ्सिॽमानुङ् हिङ्वा योम्पक् यिःक्डिङ।” हाङ् आक्खाचिऎ लोसुचि, “काङ्कॆ लेसुम्कानि, आक्क ग आनॆॽन लेसॆ।” 5हाङ् याहुडाऎ आक्खा सिःमि ढॆक्का निवाँहाङ्मि खिम् हङ्सि कहाङ्डाउ हाङ् खाइटा हाङ् कॆङ्सिखारा।
6हाङ् ढ्या याटाङ्पाचिऎ आक्खा सिःमि ढॆक्का कोबुचिहाङ् लोसुचि, “इघा ढॆक्का निवाँहाङ्मि खिम्मि याङ् युङ्ठाम्पि डॆम्मा फॆन्नि, मान्ठाभनॆ गग याॽमि सेॽमिॽमाम् लागि फॆॽमिम्पा याङ् रेटा।” 7मसॆ खोचिऎ होइक हाङ्टेम्बिहा याॽमिचि हुम्माम् लागि आक्क याङ्बाङ् बाखापुम्चामि एक्क रोपा इन्मॆ निवाँ मुसुचि। 8मसॆ आक्क रोपा आइढारि सङ्क हारिमि बाखा लोकुचि।
9हाङ् यारमिया लोमॆ निवाँहाङ्मि खानावाँ लोखुबॆ गरहाङ् लोमिम्पा खानावाँ लिखॆडा, “आक्खाचिऎ खो इन्चामाम् लागि इस्राएलि याॽमिचिऎ लोमिम्पा सिःमि सुपङ् ढॆक्का याङ् लासुचि। 10हाङ् पारभु निवाँहाङ्ऎ काङा लोसिन्टक्न खोचिऎ आक्खा याङ् बाखापुम्चामि एक्क रोपा इन्माम् लागि पिट्टुचि।”#जाकारिया ११:१२-१३; यारमिया ३२:६-१५
पिलाटासमि ङारिङ्पि येसु
(मारकुस १५:२-१५; लुका २३:३-५,१३-२५; युहान्ना १८:२९-१९:१६)
11येसु रोमि टुङ्घङ्पा पिलाटसमि ङारिङ्पि येप्ढाङ्पा लॆटा हाङ् पिलाटसऎ खो सिमु, “माल् आना याहुडिचिम् हाङ्ना हॆटा?” येसुऎ खो लोसु, “आनान आक्र काग्ना।” 12येसु सक्पि ढ्या याटाङ्पाचि नुङ् टुङ्घङ्पाचिऎ आब्डिक् टिसुचि, टर खो माङ्स मॆयामु। 13हाङ् पिलाटसऎ येसु लोसु, “खाङॆ खोचिऎ आना ऎॽवा आब्डिक् टिमॆ पाइमि, माल् आनॆ चाइ माङ्स खेमुनानॆ?” 14टर येसुऎ माङ्स खानावाँ माऎनु। ग खाङुहाङ् पिलाटसन आक्खॆटु।
15हाङ् फाक्मॆ चाडाबि याॽमिचिऎ ङाःग्मिम्पा एक्क सॆःक्ढिङ्खॆम्पा याॽमि रोमि टुङ्घङ्पॆ लेहाङ्युक्सु। 16हाङ् आक्रल एक्क बाराब्बा लोमॆ किॽमालुऎ याॽमि सॆक्ढिङ्खॆम्पा लॆटा। 17हाङ् पिलाटसऎ आक्कबि खोम्मिम्पा याॽमिचि सिमुचि, “लु इसानॆ, आन्नामि लागि कॆ आसा चाइ लेहाङ्सुर मिङ्कानिहा? बाराब्बा रु येसु लोमॆ खिरिस्ट?” 18मान्ठाभनॆ याहुडिचिऎ येसु एट्टान सिरि लॆॽमिम्पासॆॽन खोबि टॆडुचि लोमॆ पिलाटसऎ वाप्मिम्पा लॆटु।
19हाङ् पिलाटास न्यायॆ लॆठाम् ठालबि पेन्ढाङ्मिम्पा बेला खोम् खिम्टाङ्मॆ गरक्मा खानावाँ पाङ्हाङ्सु, “आक्क आब्डिक् मॆड्डिङ्मा याॽमि माङ्स ऎलॆटॆ, मान्ठाभनॆ आइयुटा सेम्माङ्पि खोमि कारान्ऎ काङॆ एट्टान डुखा आङ्डुङ।”
20टर ढ्या याटाङ्पाचि हाङ् टुङ्घङ्पाचिऎ आक्कुबि खोम्टि खॆडामिहा याॽमिचि येसु सेॽमा लॆ हाङ् बाराब्बा चाइ लेहाङ्सॆ कासानॆ कामानुङ् चोम्पकुचि। 21फेरि पिलाटसऎ आक्खाचि सिमुचि, “आन्नॆ इघा हिप्पाङ्बि आसा चाइ लेहाङ्सुर कामानुङ् मिनुकानिहा?” आक्खाचिऎ लोसुचि, “बाराब्बान चाइ लेहाङ्सॆ।”
22हाङ् पिलाटसऎ आक्खाचि सिमुचि, “येसु लोमॆ खिरिस्ट चाइ कॆ माङ् लॆःॽमॆ टा?” खोचि चोप्पसॆ लोसुचि, “आक्क कुरुसाबि कॆङ्ढाङ्सॆ!” 23पिलाटसऎ आक्खाचि सिमुचि, “मान्ठा? गसॆ माङ् काइसॆ योम्पक् यिःक्डुवॆ?” आक्खाचि याॽलऎबाङ् सङ्क ढ्या साम्लाबि “आक्क कुरुसाबि कॆङ्ढाङ्सॆ!” कामानुङ् कासामि।
24हाङ् पिलाटासऎ ह माङ्स पाराटानि, गरक्न हाङ्ग गुबि ढ्या याटक्माटक् लि कामानुङ् मिनु। हाङ् चोब्नमि कॆक्पि खोसॆ योवॆ टाङ्पाम् हुक्सक्सॆ लोसुचि, “ग याॽमिमि हारि अङ्मिॽमिम्पाबि आब्डिक् का सक्पि हॆॽनॆ, टर आन्ना सक्पिन सिॽल।” 25चोब्न याॽमिचिऎ लोसुचि, “नुक् नुक् गमि हारिमि आब्डिक् काङ्का नुङ् काङ्कामि पिसानासाचिबि सिॽल।”
26पिलाटसऎ याॽमिचिम् लागि बाराब्बा लेहाङ्सु। हाङ् येसु कर्रा टिमानुङ् कुरुसाबि कॆङाम्नॆ कामानुङ् रोमि टिलिङ्गाचिम् हुक्पि पिट्टुचि।
टिलिङ्गाचिऎ येसु इचामिम्पा
(मारकुस १५:१६-२०; युहान्ना १९:२-३)
27हाङ् पिलाटसमि टिलिङ्गाचिऎ येसु हाङ्खिम्पि लाखॆटुचि। हाङ् होइढा चोब्न टिलिङ्गाचि सङ्क खोमुचि।
28खोचिऎ खोमि चे बिल्याङ् पिट्टुचिहाङ् हाङ्ऎ चाङ्मॆ हार्रामा चे चाङ्मिटुचि। 29हाङ् खोचिऎ चिचिङ्मि टोपि मुसुचिहाङ् निङ्टँवाँबि खाम्टिटुचि। हाङ् खोमि चुप्ठिङ् हुक्पि निगालमि टोम्राङ् याङ्मिटुचि। हाङ् सेम्चामाम् लागि उम् ङारिङ्पि पुम्रुॽवा ठःक्मानुङ् “याहुडिचिम् हाङ्मि सङ्पि लिर लोसुचि।” 30हाङ् खोचिऎ खो डुःगुचि हाङ् म निगालमि टोम्राङ् ङाबुचि हाङ् डिरिक् खेपा आक्कसॆ खो निङ्टँवाँबि रःगुचि। 31आक्खाचिऎ खो पेहिरपेसिटुचिहाङ् चे बिन्पिटुचि हाङ् खोम्न चे चाङ्टिटुचि हाङ् कुरुसाबि कॆङ्सि बाहिरा लाखॆटुचि।
येसु कुरुसाबि
(मारकुस १५:२१-३२; लुका २३:२६-४३; युहान्ना १९:१७-२७)
32लाम्फुबि खॆॽमे पाइमार खोचिऎ कुरेनि लोमॆ ठालबि पेन्खुबा सिमोन लाम्फुबि टामे पाइमिम्पा चुबुचि। टिलिङ्गाचिऎ खो येसुमि कुरुसा वोसे खिन्मिटुचि। 33हाङ् खोचि गलगाठा लोमॆ ठालबि टाआमि। (गालगाठा लोमिम्पा चाइ टाक्रक्मि ठाल यो)। 34आक्कुबि टाआमिहाङ् खोचिऎ येसु खिरिक् ठुमिम्पा आङ्गुरमि डिबु डुङ्मा पिट्टुचि। टर म येसुऎ माडुङु।
35खोचिऎ येसु कुरुसाबि कॆङुचि हाङ् खोम् चे चाइ आसाआसाम् भागबि सिऎ कामानुङ् चिठ्ठा टिमानुङ् हासुचि। 36हाङ् आक्कबि पेन्सॆ खोचिऎ खो हुङुचि। 37खोमि निङ्टँवाँ सङ्पिटु गरक्मा आब्डिक्मि साब्चिरा साबुचिहाङ् एप्टिसुचि “ग येसु याहुडिम् हाङ्।” 38खोचिऎ येसु कुरुसाबि कॆङ्मार होइढा हिप्पा खुसुबाङ्चि सङ्क येसुमि चुप्ठिङ् नुङ् बॆङ्सिङ् पोट्टा कॆङुचि।
39आक्क लाम् लाम्ढुखुबाचिऎ इचासे उम्चि निङ्टँवाँ हिक्मानुङ् लोसुचि, 40“निवाँहाङ्मि खिम् योराङ्कुङ् हाङ् सुम्चि डिनाबि हेबुकुङ् काखुबा आना! आना निवाँहाङ्मि पासाना हाङ्ग कुरुसाबाङ् युढिन्टॆ हाङ् टाङ्पा हिङ्पकॆ।” 41आक्रहाङ्न ढ्या याटाङ्पाचि हाङ् मोसामि यायेॽमा चिन्खुबाचि हाङ् टुङ्घङ्पाचिऎ सङ्क इचासे लोसुचि, 42“गसॆ होइढा याॽमिचि ग हिङ्पक्हिसुचि, टर खो चाइ माहिङ्पक्मिहिसु। खो इस्सारएलिचिम् हाङ् हाङ्ग, कुरुसाबाङ् युढिन्ल हाङ् काङ्कॆ खो निवाँयुङ् लॆकुङ्का। 43गसॆ निवाँहाङ्पि निवाँयुङ् लॆकु। चाइबान निवाँहाङ् खोनुङ् नेन्चाम्पा हाङ्ग खोसॆॽन खो हिङ्चामिकु मान्ठाभनॆ खो ‘काङा निवाँहाङ्मि पासाङा’ कासा।”
44गरहाङ्न खोनुङ् कुरुसाबि कॆङ्मिम्पाचिऎ सङ्क खो इचाउचि।
येसु सिखॆम्पा
(मारकुस १५:३३-४१; लुका २३:४४-४९; युहान्ना १९:२८-३०)
45लेन्टाऎ एपङ्हि बाजेबाङ् सुम्चि बाजेढारि चोब्न ठाल माॽयाक्टऎ डॆगु। 46सुम्चि बाजे फेरा ढ्या साम्लाबि येसु कासा, “इलोइ, इलोइ लामा साबक्ठानि?” ग लोमिम्पा चाइ “ओ काम् निवाँहाङ्, ओ काम् निवाँहाङ्, आनॆ काङा मान्ठा याइमिम्पा?”#खोम्मिम्पासाम् २२:१ लोमॆ रेम। 47येसुऎ गरहाङ् याकामिम्पा आक्कुबि येप्ढाङ्खुबा एक्क हिप्पाऎ खेमुचिहाङ् कासामि, “आक्कसॆ ग एलिया रे सेःॽमे पाइकु।”
48मरक्लन खोचिबाङ् एक्क याॽमि हिरिरि पिन्से खाराहाङ् एक्क टोम्राङ्मि निङ्टवाबि हिक्टिम्पा चेमि पका एट्टान चिक्खॆम्पा आङ्गुरमि डिबुबि रुमुहाङ् येसुमि याबि टिःसु। 49टर आक्कुबि चुखुबा होइढाचिऎ लोसुचि, “एच्छ खाङुम्यॆ, एलिया टाहाङ् ग हिङ्चामिकुरु।” 50हाङ् येसु फेरि सङ्क ढ्या साम्लाऎ याकासाहाङ् खोम् सक्मा याइटु।
51आक्रलन निवाँहाङ्मि खिम्पिऎ पार्डा सङ्पिटुबाङ् खुॽमाढारिन नाग्बकाहाङ् हिच्चि लिसा। हाङ् बाखाटेम्पि लुग्डिमा खारा हाङ् लुङ्कॽवा पक्बका। 52हाङ् येःॽमा हेम्बका हाङ् सिखॆॽमिम्पा डिरिक् निवाँहाङ्मि सॆङ्सॆङॆ याॽमिचि हिङ्पकामि। 53हाङ् येसु सिखॆमिम्पाबाङ् हिङ्पॽमा अक्सि खोचि येःॽमाबाङ् आम्पकामि। हाङ् सॆङ्सॆङॆ हाटाबि भॆनामि हाङ् डिरिक् याॽमिचिबि खाङ्मुसामि।
54हाङ् कप्टान हाङ् खोनुङ् आक्कुबि येसु हुङ्सि पेन्खुबाचिऎ लुग्डिमा टामिम्पा हाङ् आक्कुबि लिमॆपाइमिम्पा खानावाँ खाङुचि हाङ् एट्टान किसिआमि हाङ् लोसुचि, “चाइबान इग याॽमि ग निवाँहाङ्मि पासा लॆटा!”
55आक्खा लिमिम्पा खानावाँ डिरिक् मेॽनुङ्माचिऎ मिउबाङ् खाङ्मे पाइटुचि। खोचिऎ येसु गालिलबाङ् टिङ्से खो खाङ्युक्सुचि। 56आक्खाचिबि मारियाम मग्डलिनि, याकुब नुङ् योसेफमि आमा मारियाम हाङ् जाब्डियामि हिप्पा पासाचिम् उम्मा लॆटा।
येसुमि सिच्चि येःॽमाबि युङ्मिम्पा
(मारकुस १५:४२-४७; लुका २३:५०-५६; युहान्ना १९:३८-४२)
57हाङ् नाम्स किक्खॆॽमा परक्मिम्पा लॆटा। हाङ् आरामाठिया लोमॆ ठालबिऎ एक्क योसेफ लोमॆ चासुम्टाङ्पा याॽमि टाआ। खो सङ्क येसुमि टिङ्खुबा लॆटा। 58हाङ् खो पिलाटसबि खाराहाङ् येसुमि सिच्चि ङागु। हाङ् पिलाटासऎ सङ्क सिच्चि लाखॆॽमा पिट्टु। 59योसेफऎ सिच्चि लाखॆटुहाङ् काम्नुऎ सुटिमि चेऎ मोमु, 60हाङ् खोसॆ खोम् लागि खोप्मिम्पा उम्चङ्ऎ येःॽमाबि युक्सु। हाङ् एक्क ढ्या लुङ्कॽवाऎ येःॽमामि याः डॆगु हाङ् खो खाइटा। 61मारियाम मग्डलिनि हाङ् होइक मारियाम चाइ येःॽमामि मॆअङ् पेन्ढाङ्पा लॆटामि।
टिलिङ्गाचिऎ येसुमि येःॽमा हुङ्मिम्पा
62हाङ् वेन्डाक् लाम्पॆ नाचामॆ डिनाबि ढ्या याटाङ्पाचि हाङ् फारिसिचि पिलाटासबि खोम्टाआमि। 63हाङ् कासामि, “टुङ्घङ्पो, काङ्कॆ आक्क ऎट्टुबाङ्ऎ हिङ्चामार ‘काङा सुम्चि डिनाबि हिङ्पङा’ कामिम्पा खानावाँ मिॽभुङ्डुङ्का। 64मसॆ आक्क येःॽमा सुम्चि डिनाढारि काम्नुःर हुङाम्नॆ कामानुङ् लोसॆचॆ। हॆॽनॆहाङ्ग उम् टिङ्खुबाचि टाक्मिहाङ खोम् सिच्चि खुभॆकुचि हाङ् ‘खो ग सिखॆमिम्पाबाङ् हिङ्पखॆडा’ कामानुङ् याॽमिचि लोकुचि। हाङ् आक्रक्मा फोप्सिॽमॆ खानावाँ चाइ याॽलऎबाङ् सङ्क काइसॆ लि।” 65हाङ् पिलाटासऎ लोसुचि, “आन्नॆ काङाम् टिलिङ्गाचि लखॆटानॆ हाङ् खारानॆ हाङ् हेर हुङाम्नॆ।” 66हाङ् खारामिहाङ् खोचिऎ येःॽमाबि लायुङ् टिसुचिहाङ् टिलिङ्गाचि नुःर हुङ्मिडाउचि।
Trenutno izabrano:
मट्टि 27: LBR
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2023, Wycliffe Bible Translators, Inc. and Nepal Bible Society
