Luku 24
24
Iesua mutulu mumaulila
1Ioxe, no kakau manina no voxo tei no anu viki la tasema mitaxusou mimi e tuma'u lailaixe ane milalaxinu ka milai no lulu. 2Milutu xo xe mixali la mimaisou lavo'o e so utanuxu lulu anaxu a mupipau muxexesou. 3La ane'i mi'unalai ia imaisou lexe vasimolu Tatananenge Iesua uai ne uasi. 4Mo ane'i a mitulu tane'ilili sila alaxu vilesisi misaxisi'a tamitema tamei lavulutii'a lamanaxu mitulu no pa'ume'a. 5Misaxisi'a laso ane'i tane'i kalaua mo mitangatulu. Ia tatamei ne mivikalane'i lexe, “Axova so ngakamulinu anu ane mumauli no taine'i tamitema so soli 'o? 6Anu uai 'o uasi, mutulu mumauli ne. Ngaxavutalanu vaikalaou e mupilixinu noxinge loxo ngexolu ne Xalilisio. 7Anu muvikala lexe ane'i ipilixinu Itema ane molu noxou Mosinge no avo'a tamitema so susu ka ililixu no ovu valautu so usoli. Ia no anu voxo tatalusou la anu utulu umaulila.”
8Milemolu axone sila ane'i tasema ne mixavutalanu vaikalaou ne. 9Laso ane'i mixexesou lulu mo milivu. Milivu xe mixali la ane'i mia'aloi'a tatisaipeli 11 oli'a tamenexi'a se'i ane mixolu ne. 10Ane'i tasema e milai mia'aloi'a ta'aposeli ne a Malia so taoni Makatala xe Tioana xe Malia e Tiemisi nenu xe tasema se'ila. 11Mia'alo xe ta'aposeli milomusou ia mi'oxo lexe anene vaikala sivo vitanisi laso ilomuxu uasi. 12Ia Pita mu'avuti muiave mulai no lulu. Mulai xe muxali la mukelele muia'ili so usaxi ulai nonano la mumaisou lavalava keasi a muta'olu. Mukalu la mulivu no tani mo tanulili manina no anu mi e muxali ne.
Iesua muxali noxi'a tamulimuliou tamei no vote'i e so Emeusi
13Ioxe, no anu voxo anenesio la tamulimuliou Iesua tamei mimuamua'i so lexe ilai no tuala ne Emeusi. Tuala anene muxolu va'axu sevile ne Ielusalemo, kilomitasou loxo 11 'o. 14Ane'i ilou a imuamua'i ilalai la ivivikalasou mimi mukalusi e muxali ne. 15Ane'i ilou a ivivikala piena mo ana'anaxa'asou mimi ne sila Iesua mune'e se alai noxi'a so oli'a mikei mimuamua'i. 16Ia mi vile mutanuxu ie'i so itongonu uasi.
17La anu muvikalane'i lexe, “Ngingi ngilou ngalalai 'o mo ngalivulivungenge ngato'o so ngavikalasou mi ma'ia to ne?” Mutali'i axone la ilou mitulu mo ie'i lusi'usi xo opone'i tu'umaxu. 18Laso vile noxi'a e ualasou lexe Kiliopasi muvikalanu lexe, “Axova? No taine'i taasila mukalusi mixolu no Ielusalemo no anu voxo mukalu se 'o la ninisisi nalavusou mimi e muxali ne uasi?”
19La Iesua mutali'isi'a lexe, “Mimi ma'ia e ngalemolu ne?” Laso ilou mivikalanu aloxo 'o, “A telemolu mimi e muxali noxou Iesua so Nasaleti. Anu polopeti vile ane mu'oxonu xaixai xavinu mo mulanu vaikala mutiatila manina no iou Mosinge xe no ie'i tamitema latala. 20Ia tatiatila noxi'a tapilisiti oli'a tatiatilasinge mipilixinu no avolu xamani so isakinu vaikala lexe ivau. Mukalu la mililinu no ovu valautu ka musoli ne. 21Laso axova, xo nexi tei telopala lexe anu Itema ane so pamaulisinge nenge Ta'isilaeli ane.
Mo mi vilela aloxo 'o. Mimi ne muxali mo vaimomo 'o voxo tatalusou a. 22La vaimomo 'osi tasema se'i noxixe mikulukenexi kena. Xo no kakau manina ane'i milai no lulu. 23Milai ia imaisou Iesua vasimolu uai uasi. Xe milivu mine'e la mivikalanexi lexe ane'i mimaisou mi vile loxo no anu ai saxi. Xo ta'angelo mipa noxi'a mo mivikala lexe anu a mumaulila ne. 24Xe se'i noxixe milai no lulu la mimalei mu'isalili a loxo tasema milemolu. Ia anu, la ane'i kalumo imaisou to uasi.”
25Ioxe, la Iesua muvikalane'i ilou lexe, “Ai, ngingi tamitema so ngano'u lavulavu palea uasi. Ngavovoxo misevile so ngalopalanu vaikalai'a tapolopeti mukalusi. 26Xo anu ane so Kalaisiti mutavulenu tu'utumaxu anene kaio mu'una no anu xoluxoluxu iaxu. Muxali axone la anene vote'isou mulovo u'isalili.” 27Laso anu musoko'u noxou Mosisi mo mulai avile no anu vaikalai'a tapolopeti mukalusi so mupalapalasinoxu vaikalasou ane muai no anu lavukuou Mosinge loloni.
28Mimuamua'i xo xe so ixali no tuala e ilou ilai no anu ne la Iesua mu'oxo lexe ulai avilesi. 29Ia ane'i ilou mitanuxu lexe, “Uasi, nenge'a taxolu 'o xo aso a ulu'elai, mo anu so olovoxo 'oe.” Laso anu mu'unalai so oli'a ixolu. 30Mixolu mo ane'i a so i'ani la anu oli'a mixolu mipita so i'ani no latevolo. Xe anu muno'u pileti ka muvikalasou laixe noxou Mosinge. Mukalu la anu muse'inu mo muvelunuxa'a. 31Sila ilou ie'i mulamana mo mitongonu lexe anu. La alaxu vilesisi anu tasiauxu no ie'i. 32Laso ilou mivikalane'i ngato'o lexe, “Ai manina misevile. Nenge nenge'a temuamua'i no vote'i xe muvivikalanenge mo mupalapalasinoxu laxu vaikalaou Mosinge noxinge la oponenge muleilaxusi.”
33Ilou mivikala axone xe mukalu la alala'e se nesi mi'avuti milivu milai ne Ielusalemo. Mixali ne Ielusalemo la mixalisi'a tatisaipeli 11 oli'a tamenexi'a se'i a mipita ixoxolu. 34La ane'i mivikalane'i ilou lexe, “Ai anu manina lexe Tatananenge mutulu mumauli ne. Xo anu mupa noxou Saimoni.” 35Xe ane'i ilou la misisimulinu mimi mukalusi e muxali noxi'a no vote'i. Mo mivikala lexe mune'e xo mo muse'inu pileti laso ane, ilou mitongonu lexe anusi.
Iesua mupala'a noxi'a tatisaipeliou mukalusi
36Ioxe, ane'i tatisaipeli a ivivikalasio, sila anu a mutulu no taine'i. La anu muvikalane'i lexe, “Opongengi uai se'isisi.”#24.36 Tamitema so lavulavu se'i ixavutala lexe Luku molu ukaukavunu vaikala pa'usou no telexu 24:36 uasi, itema vilemo masi mukaukavunu. 37La ane'i mikuluke mo mi'ume xo mikalavoi lexe anu ulenu vile ane. 38Ia anu muvikalane'i lexe, “Axova so opongengi uauavuti mo lopala no opongengi usasalo aloxo 'o? 39Xo ngamaisou avolo mo tava'ilo 'o. Enisi a. Mo ngakasou vasimelo. Ulenu vasimolu mo xinuxinu a loxo ngamaisou noxilo 'o uasi.” 40Anu muvikala axone mo mulosoie'ixu avolu mo tava'u. 41Ane'i mi'osa manina ia ilopala manina uao xo tane'ililisio. Laso anu muvikalane'i lexe, “Ngingi la'ilali sevile a uai 'o?” 42La ane'i milosou silanga pa'usou sevile muxutu ne.#24.42 Tamitema so lavulavu se'i ixavutala lexe Luku molu ukaukavunu vaikala ane uxolu no anu 24:40 uasi, itema vilemo masi mukaukavunu. 43Milosou ka anu mu'ou no ie'i.
44Mukalu la anu muvikalane'i lexe, “Mala'o loxo nenge'a texolusio la epela'inge lexe vaikalasilo e mukaukavu muai no anu lavuku so lo noxou Mosisi xe tapolopeti xe no anu Lexelexe la uxalixu nene'axu ane.” 45La anu mukisinu xavutalai'a mo so vaikalaou Mosinge laxulaxu mupalapala'a noxi'a. 46Mo muvikalane'i aloxo 'o, “Kaukavu muai no anu Mosinge vaikalaou lexe anu ane so Kalaisiti utavulenu navunavu tei kaio no voxo tatalu la anu utulu no anu solila. 47Xe no anu ualasou la ane'i tamitemaou ilanu vaikala noxi'a tamitema so xale tuatuala mukalusi. Ilanu vaikala lexe ane'i ixiunu mo i'isalilinoxu opone'i laso Mosinge uiasou tina'uxa'a so susu. Laso ane, xaixai anene ngasoko'u ne Ielusalemo 'o. 48Xo ngingi menge ngemaisou mimi ano'o laso ngaa'aloxu. 49Mo ngalomu. Anu ane Mamilo muvavalimasou la eni a so apalusou une'e noxinge. Laso ngingi ngaxolu no taoni 'o xo mo xavi ane molu teitexi une'e usu'asinge.
Iesua mulivu mutelai no tualasou Mosinge
50Ioxe, Iesua mulaixi'a tatisaipeliou xo la mixali ne Vetani. La anu mutolosou avolu mo muvikalasou xoluxoluxa'a laixe. 51La anu a uvivikalasio sila Mosinge muno'u mulaixu no tualasou. 52Laso ane'i mi'iti'itinu Mosinge ualasou7#24.52 Tamitema so lavulavu se'i ixavutala lexe Luku molu ukaukavunu vaikala pa'usou no soko'u 24:52 uasi, itema vilemo masi mukaukavunu. mo mi'osa'osa manina so milivu milai ne Ielusalemo. 53Xe no voxovoxo utotomu ane'i milai no tasou Mosinge so i'itinu ualasou.
Trenutno izabrano:
Luku 24: ATA
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Copyright 1999 New Tribes Mission, Sanford, FL 32771-1487
