Tioni 3
3
Iesua muvikala noxou Nikotimasi
1 Ioxe, noxi'a laili Palisi la vile ualasou lexe Nikotimasi. Anu itema tila vile noxi'a Taiuta. 2La no olovoxo vile anu mune'e noxou Iesua ka muvikala lexe, “Tisao, nexi talavusine lexe nini mene noxou Mosinge nene'e so lexe natisa. Mi ne mupalasi noxixe xo telavu lexe loxo Mosinge uxolu noxou itema vile uasi la vote'i so u'oxonu sosovo so xavi aloxo 'o uasi.”
3La Iesua mukolinu lexe, “Eni avikalaneni manina e maninasi, loxo itema vile uxalisou lavulo'o alavua uasi, la vote'i uasi so anu uxolu umaisou voxo ane Mosinge molu u'uli laxune'i tamitemaou. 4La Nikotimasi mu'oxo lexe, “Uo, loxo itema mutila mukalu la uvo'ola axovao? Anu umomomo so ulivu no anu nenu opone so uvo'ola to uasi.”
5La Iesua mukolinu lexe, “Eni avikalaneni manina e maninasi, loxo itema vile uvo'ola no anu lexa xe Ulenu Laixe uasi, la anu umomomo uasi so u'una uxolu no voxo ane Mosinge u'uli laxune'i tamitemaou. 6Xoluxolu so vasime'a tamitema la ixalisou no anu lavulo'o so vasime'asi. Ia xoluxolu so ulene'i la ixalisou no anu lavulo'o e noxou Ulenu Laixesi. 7Mamu so tanenililiou vaikalaxeli e elemolu noxine 'o lexe, 'Vote'isinge vilesisi e so ngaxalisou lavulo'o tameisou.” 8Xo loxo sivo la ulavusou uili mo mi vile so utanuxu uasi, ulai no anu masaxa na'usi. Nini nalomusou lauxu ia nalavusou lexe molu ne'ei o so ulai ne'ei to uasi. Laso ane, anu uxali axone noxi'a tamitema mukalusi e ixalisou lavulo'o alavua noxou Ulenu Laixesi.”
9La Nikotimasi mu'oxo lexe, “Ai, mimi anene uxali axovao?” 10Xe Iesua muvikalanu lexe, “Loxova, nini natisa noxi'a Ta'isilaeli to ane, ia mimi anene nalamana no anu uasi? 11Eni avikalaneni manina e maninasi, nexi talemolu mimi ane telavusou, mo talanu vaikala so tapala'anixu mimi ane tesaxisou mukalu. Tapala'anixu ia ngingi nga'osasou vaikalamexi so ngalomuxu to uasi. 12Eni evikalangengixu mimi so lialiasi 'oe ia ngalopalanu lexe manina uasi. Laso loxo avikalangengixu mimi so tualasou Mosinge la ngalopala axovae? 13Evilela mutelai no tualasou Mosinge uasi. Itema ane molu noxou Mosinge e muxolu no tualasou Mosinge ka mulu'e, anusisi anesi.”
14Xe Iesua musolonu aloxo 'ola, “Tatei Mosisi mu'itinu sineke valasi no xale lia esi'esi, la anu axonesi noxou Itema ane molu noxou Mosinge xo tamitema iitinu teitexi. 15I'itinu, laso tamitema ta'ei ilopala noxou la ixalisou mauli kaluxu uasi. 16Xo Mosinge musexelaxa'a tatemanu lialia misevile, laso anu mupilixinu Olu e soxu vilesisi. Mupilixinu mo so ane'i ta'ei ilopala noxou la imamulo uasi, ixalisou mauli kaluxu uasi. 17Xo Mosinge mupalusou Olu mune'e no lialia ia so utilovosou susu noxi'a tatemanu kaio ulemolu mamulosi'a uasi. Anu mupalusou mo so tatemanu lialia ixalisou pamauli a noxousi.
18Ioxe, laso ena'ei ulopala noxou Olu la itema ne uxolu no laxu vaikala so mamulo so susu noxou uasi. Ia ena'ei ulopala uasi la a uxolu no laxu vaikalasou mamulo mukalu ne, xo anu ulopala noxou Mosinge Olu e soxu vilesisi ne uasi. 19La tava'u so vaikala so mamulo usu'asi'a tamitema axone, a aloxo 'o. Lamana mune'e no lialia mukalu ia tamitema i'osasou lamana ne uasi, miilounu isivoxosi xo ilixone'i masuamo. 20Tamitema so ilixo masua mukalusi imatapianu lamana mo ine'e no anu lamana uasi xo loxo 'o io ilixone'i upala'asi. 21Ia itema aneva xoluxoluxu no anu maninasi la ulavusou une'e no anu lamana mo so anu upalasi lexe mi ma'ia u'oxonu la Mosinge molu uxalixu ne.”
Tioni e itema so kelele mupala'anixu Iesua lexe anu ena'ei
22Ioxe, ili'i la Iesua oli'a tatisaipeliou milai no xale lia ne Iutea. Milai la oli'a mixolu voxo mose'i xe anu muvaitami noxi'a mo mu'oxonu ilixo so kelele noxi'a tamotu ne. 23La Tioni kalumo mu'oxonu ilixo so kelele noxi'a tamitema no anu tuala ne Ainoni e uxolu alai ne Salimi. Lexa tavu'alo to a muxolu no apu ne, la tamitema a mine'ene'e so ukelenixa'a. 24No voxo anene Eloti umulaxu Tioni no lakalavusu uao.
25Tioni muxolu ukelenixa'a tamitema la no voxo ne tatisaipeliou oli'a Iuta vile mipelesou anaxa'a no anu vote'isou tamitema ixali tamalemalenga. 26Mipelesou anaxa'a laso tatisaipeliou Tioni milai mivikalanu Tioni lexe, “Tisao, itema e muxolu noxine xalevile no lexa Tiotani olele, mosou e nelanu vaikalasou so napala'anixu, anu to a u'oxonu ilixo so kelele noxi'a tamitema. La ane'i latala e latala a ilalai noxousi.” 27Ia Tioni mukoline'i lexe, “Itema vile utulusou no anu xaixai vile uasi. Mi ma'ia so u'oxonu la anene molu no tualasou Mosingesi. 28Aloxo ngingi menge ngelomusou vaikalaxeli e elemolu mala'o lexe, 'Eni ane so Kalaisiti uasi, eni amitema e Mosinge mupalusilo so lexe a'uli noxousi.' 29Aloxo 'o. Loxo itema vile utaula'i la semau ne mulue a anu nesi. Xe loxo menexu la masi utulu va'axu sevile so ulomusou xolinu menexu e mutaula'i ne. Ulomusou xolinusi la u'osa'ilasou tatila. Laso maixene eni osa'ila noxilo mulolutu no anu vote'i anenesi. 30Noxou la ualasou so utilasi, ia noxilo la ualasilo so ulu'esi.”
31Anu ane muxolu teitexi kaio mulu'e la u'uli'uli xo mimi mukalusi uxolu no laxusi. Ia itema so lialia la anu so lialia mo ulemolu mimi so lialiamo. Anu ane muxolu no tualasou Mosinge kaio mulu'e la u'uli'uli xo mimi mukalusi uxolu no laxusi. 32Anu ulavusou ulanu vaikala so upala'anixu mimi ane molu musaxisou mo mulomusousi, la itema vile u'osa so ulomuxu vaikalaou e mulanu ne to uasi. 33Ia itema ane u'osa so ulomuxu la umaxa'u lexe oponu ututuluou vaikala ano'osi, “Mosinge anu maninasi.” 34Xo anu ane Mosinge mupalusou mune'e ne la ulalanu vaikalaou Mosingesi. Ulalanu vaikalaousi axone xo Mosinge mupilixinu Ulenu noxou la utukalanu uasi, mulolutuxusi. 35Maminge usexelaxu Olu misevile la mupilixinu mimi mukalusi no avolu. 36Itema aneva ulopala noxou Olu la uxalisou mauli kaluxu uasi. Ia loxo itema ulomuxu Olu uasi la uxalisou mauli uasi mo uxolu no laxu la'ia noxou Mosingesi.
Trenutno izabrano:
Tioni 3: ATA
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Copyright 1999 New Tribes Mission, Sanford, FL 32771-1487
