लूकाल 17
17
माप कियमळ आनि विस्वासमता बारेमते कराहमळ
(मत्तयाल 18:6-7,21-22; मरकुस 9:42)
1उंदि रोज येसु ओना सिस्युल्कुन इल्हा इत्तोर. “पापमते अरहना पोल्लें वायाका मन्नों, अव अय्ते वांतंगे. गानि अव बोनाहेंदाल वांतांगो, ओन्क बच्चोन गोसा वायार! 2नापोर्रो विस्वासम कियना ई सिन्ना पेडानसंटोन बोरन्ना पापमते अरहते, ओना बोंळगेक जोत्ता बंडा दोहाचि ओन समुद्रमते ओसि वाटतेने ओनाहाटीं बेस मनंता. 3अदुनहाटीं मिमेट उसारते मंटु.”
“मीवा दंटातोर पापम कीते ओन समजांचटु, ओर कीता पापमताल मनसु मार्सकुत्ते, ओन मापि कीम्टु. 4उंदि रोजुने ओर एडुं मल्कां तप्पु कीते, एडुं मल्कांगुडा ओर मिहगा वासि, नना तप्पु कीतन, इंदकेटाल इल्हा किय्योन, इंचि ओप्पुकुत्ते, ओन मापि कीम्टु,” इंचि येसु वेहातोर.
5इल्हा येसु वेहतद केंजसि, “मावा विस्वासमतुन बेर्सागोटा सामि,” इंचि ओना प्रेरितुल्क इत्तुर. 6अस्के सामि ओर्कुन इल्हा इत्तोर. “ओक्कला मीलोप्पो आवाल्कुना पेळेतच्चो विस्वासम मनिनागानि, मिमेट इद पेद्दा ताडि मरातुन, ‘निमे नीवा हिह्कुनतोनि पीकका वासि, समुद्रमते होंचि अर्रा,’ इंचि इत्ते अद मरा मीवा पोल्ले केंजंता,” इंचि इत्तोर.
जीतागाना जिम्मेदारि
7येसु मर्रा इल्हा वेहातोर, “मिहगा बोनागना वरोर जीतागाल मंतोर इनकुंटु, ओर नांगेल पूहाचि हिलाकोंटे गोर्रें मेहाचि, बस्के अय्ते ओना कबाटाल लोन वांतोर, अस्के, ओर वाता वायमळे, ‘गाटो तिनालय उदा,’ इंचि इंतिरा? बस्केने इन्निर. 8गानि, ‘नाहाटीं गाटो अट्टा, वेरे कपडिं केरसि नाकु गाटो वाटसि हीम, नना तित्ता पजा निमे तिन’ इंचि इंतिर. 9निमे वेहता कबळ जीतागाल कीतोर इंचि ओन्क, दन्यवाद इंचि बस्केने हिय्यिर. 10अल्हेने मिमेट इंका पेन वेहता कबळ पूरा मारतस्के, ‘मोमोट मामुल जीतागाह्कुम आंदुम, माक बद कबळ कियाना मत्ता अदे कबळतुन कीतोम’ इंचि इंटु,” इंचि येसु वेहातोर.
येसु मोंडिरोगमतोर्कुन बेस कीतोर
11पजा येसु येरुसलेम होनानेंके सामरिया आनि गालिल एरियाना नड्डुमताल होंचेके मत्तोर. 12अस्के बदो उंदि नाटेने होळियनेंके कुस्टरोगम आतोर पदि मंदि, हर्दुक इच्चुर लक्कु नित्तिसि मत्तुर. 13ओर येसुन हूळसि, “ए येसु, ए सामि! मावा पोर्रो दया कीम,” इंचि वरगेयतुर.#17:13 यहुदि लोकुल्क कुस्टरोगम आतोर्कुन इट्टाकोंदुर, ओर्कुन नाटेना पलाते इर्रुंदुर. 14येसु ओर्कुन हूळसि, “मिमेट होंचि, मीवा मेंदुल पेर्मालोर्कुंक हुप्सट,”#लैव्यवस्ता 14:1-32#17:14 कुस्टरोगम आतुर बोर अय्ते बेस आयुंदुर, ओर होंचि, मोमोट बेस आतोम, इंचि पेर्मालोर्कुंक हूपिचुंदुर. पेर्मालोर्क ओर्कुन मिमेट बेस आतिर इंचि इत्ते, ओर लोकुल्कुने होंचि कलियुंदुर. इंचि इत्तोर. इत्तस्के ओर होननेंके-होननेंकेन बेस आतुर. 15अस्के ओरागटाल वरोर मनकल नना बेस आतन, इंचि हूळसि पेनदुन जोर-जोरसे तल्सकुंचेके येसुनगा मल्सि वातोर. 16वासि ओना काल्कुनपोर्रो अरसि ओन्क दन्यवाद कीतोर. ओर सामरिया मनकल मत्तोर, इत्ते सिन्ना जातितोर मत्तोर. 17अस्के येसु, “पूरा पदि मंदि बेस आया हिल्लिरा? कळमता तोम्मिद मंदि बेके होत्तुर? 18पेनदुन स्तुति कियालय, ई सामरि जातितोन होळसि, कळमतोर बेस आतोर बोरे वाया हिल्लुरा?” इंचि ओन इत्तोर. 19मर्रा येसु, “तेदिस होन! निमे विस्वासम कीताहाटीं बेस आतिन,” इंचि ओन इत्तोर.
पेनदा राज्येम वायमळ
(मत्तयाल 24:23,27,28,37-41)
20“पेनदा राज्येम बस्के वांता?” इंचि उंदि मल्का परिसिल्कु येसुन पूसकीतुर. अस्के येसु, “पेनदा राज्येम कळ्कुंक दिस्सेक वायो. 21पेन मीवा नड्डुम राज्येम कींता. अदुनहाटीं पेनदा राज्येम इगे मंता, अगा मंता इंचि लोकुल्क इन्नुर,” इंचि वेहातोर. 22अद वेहता पजा सिस्युल्कुन इल्हा इत्तोर, “मनकना रूपमते पुटतोर वायाना रोजकुनाल उंदि रोजुन हूळना विचारम कींतिर, गानि मिमेट हूळा पर्रिर इसोंटा वेला वायार. 23अस्के, हुळाट! मनकना रूपमते पुटतोर इगे मंतोर, अगा मंतोर इंचि लोकुल्क इनानुर, गानि मिमेट अगा होनमट, ओरा पज्जो ताकमट.#मरकुस 13:21 24बारित्ते मब्बुने उंदि बाजुंक मेरस्ते इंकुंदि बाजुंक बल्हा वेलगु अर्रंतनो, मनकना रूपमते पुटतोन नना वायानस्केगुडा अल्हे आयार. 25गानि दानकन्ना मुन्ने नाकु बागा तकलिप वायार. इद पीळितोर नाकुन हय्सुर.”
26नोहाना रोजकुने बल्हा जर्गता, अल्हेने मनकना रूपमते पुटतोन नना वायानस्के जर्गार. 27नोहाल डोंगाते नेंगनदाका लोकुल्क तिंचेके-उंचेके मत्तुर, मरमिं कीसेके, आसेके मत्तुर. अस्के पेद्दा कम्मुड वासि अंटोर्कुन मुळाहता.
28लोतुना कालमतेगुडा अल्हेने आता. लोकुल्क तिनुड, उनुळ, अस्सुड, अम्मुड, वीतुड लोहकु दोहुड कियुंदुर. 29गानि लोतु सदोम सहरताल बस्के अय्ते पेय्सतोर, अस्के मब्बुनाल तडमि डोग्गां अरसि अद नाटेनोर अंटोर्कुन नासडेम कीता. 30अय्ते मनकना रूपमते पुटतोन नना वायाना रोजुनेगुडा अल्हे आयार. 31अदुनहाटीं अद रोज बोर अय्ते लोतपोर्रो मंतोर, लोता लोप्पो मंदना सामानतुन पीसि वायालय हिळु रेयानायो. अल्हेने बोर अय्ते नेलिने कबळ कीसेक मंतोर, ओर मल्सि वायानायो.#मत्तयाल 24:17-18; मरकुस 13:15-16 32लोतुना मुत्तो पेनदा पोल्ले केंजवा, सदोम सहरतुन तिरियसि हूळतस्के, दानकु बल्हा आता, अदुन मति कीम्टु.#उत्पत्ति 19:26
33“बोर अय्ते ओना जीवातुन ई दुनियाते पिसागोटालय हूळांतोर, ओर ओना जीवातुन पोगोटकुंतोर. बोर ओना जीवातुन नावाहाटीं पोगोटकुंतोर, ओन्क बस्केळ्क पिस्सना पिस्वर दोर्कंता.#मत्तयाल 10:39 34नना मीक वेहानद बतल इत्ते, अद नर्का उंदि कटुलते इव्वुर मनानुर. ओराव्टेटाल वरोन तेहाकुंचि ओयमळ जर्गंता, इंकावरोन अग्गेन होळ्समळ जर्गंता. 35अल्हेने रोंडु मुर्ताह्क कूळसि गट्का नोरसेक मनंतां, उंदितुन ओयमळ जर्गंता, इंकुंदितुन अग्गेन होळ्समळ जर्गंता. 36इव्वुर मनकालोर पोलमते मत्ते, पेन वरोन पीसि ओयार, वरोन बारे अग्गेन होळसिय्यार,” इंचि इत्तोर.#17:36 इद वचनम कोन्नि पांडु लिपिने हिल्ले.
37अस्के सिस्युल्कु येसुन, “इव पोल्लें बगा आयानुं सामि?” इंचि पूसकीतुर. अस्के, “बगा अय्ते पीनगु मनंता, अग्गेन गद्दलिं जमा आंतां,” इंचि येसु इत्तोर.
Trenutno izabrano:
लूकाल 17: esg-Deva
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2022, Wycliffe Bible Translators, Inc. All rights reserved.
