Matta 8
8
Iŋir nono gwa kwiji gwina gwiro ŋilaŋ
1A dina muŋw uladha galo gi len alaŋ, a liji loinyadho gwuje. 2A ŋilaŋ ŋeta ila, ŋworthadha, ŋwaici, Kweleny gwai, ada ŋa gwimari ŋa gwinyiŋiriye nono, ŋa gwuthi ŋoma. 3Ŋwun wala dhoi ganu, ŋwumini, ŋwaici, Nyi gwuminyu daŋa geta momaŋ; a babraŋ ŋwun eŋiradhadha ganu. 4A Yasuuⓐ abiŋaijo, ŋwaici, Aŋadhi athenaŋa gwabiŋaijo kwijo gwetipo dhuŋuna ibidha no; ŋabela, ŋaŋajo gasiisuŋw aŋina yuŋa gwoca ŋa dhedha Kaloŋa ŋida ŋina ŋari ŋai Muusa, alro shuhuud degen.
Iŋir nono gwa gadham ga zabith
5Dina ma Yasuuⓐ ila Kafranaaẖuum, a zabith gweta ila dugun, ŋwothaije galo, 6ŋwaici, Kweleny gwai, gadham giny ga guma dunu, gaio aŋina nono a githi ŋwuredeny nono gwuleny. 7A Yasuuⓐ abiŋaijo, ŋwaici, Nyi gwaji gwila a giny geta momaŋ. 8A zabith abiŋaijo, ŋwaici, Kweleny gwai, nyi gwati gwiŋir daŋa eladha dunu diginy no; ŋababiŋa dhuŋuna dogo, a gadham giny giŋir nono. 9Nyi ko gwadhi ŋeleny, nyuthi ejigur ina yathiny deŋinaijo; ada gwiminyabiŋaijo gweta, nyaici, Idhi, ŋwela; nyaici gwiter nu, Ila, ŋwila; nyabiŋaijo gadham giny, nyaici, Apo dhuŋuna ibidha, ŋwapai. 10A dina ma Yasuuⓐ diŋini dhuŋuna ibidhe, ŋwali galo dir, ŋwabiŋaijo lijo lina ligwujo, ŋwulaici, Titiganu nyi gwa gwacaijinu, Nyi gwati gwibujo kwijo gwetipo gi liji ganu la Israayiil gwina gwuthi imaan gwina gwinaŋ gwiro minoŋ no. 11Nyi gwa gwabiŋaijaje, ŋajaici, Liji loinyadho laji lila ŋwurel kalo peth, sharak, a qarb, a lajalo Ibraahiim ŋalai, a Isẖaag, a Yaⓐguub kidhila ga Sama. 12Abi keleŋa ga gidhila gaji ga guthini por kirim; a laji lanare, a linyini gi jiŋai. 13A Yasuuⓐ abiŋaijo zabithuŋw, ŋwaici, Idhi; gwiro ŋinena manaŋuminyi, minoŋ dhaŋa uthijo je ganu. Anbi gadham eŋiradhadha ganu gi saaⓐa ibije.
Iŋir nono gwa gwunun gwa Buṯrusŋa a liji liter
14A dina ma Yasuuⓐ ila gi dunu gwa Buṯrus, ŋwuni, ŋwubuje gwunun gwa Buṯrusŋa gwina gwiro kwa gwidhiro gi lagram alaŋ, gwuma ẖumma. 15Ŋwubi mini dhoi dhai a ẖumma erna; ŋwudire, ŋwulupijo ŋiro. 16A ma kalo ro kera, a liji udhijo lijo loinyadho lina luthi nyurinya; ŋwuteye nyurinya dhuŋun dhai, ŋwulgeta momaŋ peth lina luma. 17A dhuŋun uthi je ganu dha nebi gwina gwan Ishaⓐya, ŋwarnu, Ŋeda gwiren gwimapai gumiye gega a ŋirainy ŋega kaŋinu yuŋun.
Idheje gwan liji lina lara lagwuje Yasuuⓐuŋw
18A dina ma Yasuuⓐ aŋa lijo loinyadho dilurejo galo keligeny, ŋwabiŋaijo calmiz juŋun ŋwari lamure kimumu giter. 19A kathib geta ila dugun, ŋwabiŋaijo, ŋwaici, Muⓐallim gwai, nyi gwaŋagwuje dalela kalo peth gina gathaŋan ela. 20A Yasuuⓐ abiŋaijo, ŋwaici, Nyartumi nyuthi ŋwubo, a nyira nya kabo nyuthi jidhul; athibi Ŋari ŋa liji uthii kaloŋa ga dhidhire lira alaŋ luŋun no. 21A thilmiz dhiter abiŋaijo, ŋwaici, Kweleny gwai, abriciny nyela nyi gwurcena babuŋw gwiny kwereny. 22Abi Yasuuⓐ abiŋaijo, ŋwaici, Gwujiny; ŋabrico lijo lina limai algwurce lijo legen lina laio.
Karun gidhunujinu
23A dina muŋwuni gi felluuka ganu, a calmiz juŋun gwuje. 24A karun are gipa, ŋwuluguje ŋau ganu, a felluuka ari gwiduthe; ŋwubije didhre. 25Abi calmiz juŋun ila dugun, albirtheye, alaici, Gilaŋiyije, Kweleny gwai; anaŋa lidhi ludhirudhe. 26Ŋwulabiŋaijo, ŋwulaici, Kworaŋ nyabi dhenya minoŋ? Liji lai lina lati luthi imaan gwoinyadho no. Ŋwubidire, ŋwulo karuna a ŋau; a karun a ŋau audhaijiye galo jigwoiny. 27A liji peth ali galo dir, alarnu, Kwiji ibigwa gwiro dhaŋ, athibi karun a ŋau uthejo dhuŋuna dhuŋun nyuni?
Jadariyiin lina luthi nyurinya
28A dina muŋw mure kimumu giter gi len la Jadariyiin, a liji ram ila lina lathije kalo ga del dina dathin gwurce lijo lina luthi nyurinya lirero gwuleny, athi liji uthi ŋoma lela gi dhai ibidhe no. 29A nyuriny ure gwula gwuleny, alaici, Au gwibopajijaŋa, Ŋari ŋai ŋa Kalo? Ŋa gwiludhi mina dari ŋa gwajure ŋina nanaŋ ŋwamun ŋwuri ŋwati ŋwidhi na? 30A judhur joinyadho je romine jithi galo. 31A nyuriny othaije galo gwuleny, alaici, Ada ŋa gwimijiteye, jibabrico anela anuni gi judhur ganu. 32Ŋwulabiŋaijo, ŋwulaici, Udhinibai. Altu, alela, aluni gi judhur ganu; a judhur abire, aldhidhireje len nono, alule baẖr ganu, aldhirudhe, alai. 33A liji lina lathie judhura abire, alela gi len, alabiŋaijo lijo dhuŋuna peth dhina dhaŋudhilo gi liji lina luthi nyurinya. 34A liji peth la len ibila alela dilobadhe Yasuuⓐ ŋalai; a malaŋa, alothaije galo alari gwela, ŋwugathani kaloŋa gegen.
Trenutno izabrano:
Matta 8: HBN
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
First published by the British and Foreign Bible Society in 1966.
