युहन्न 1
1
फ्रोइ म्ही तज्यीम् ब्योन्युबल
1गोदोब्न्हङ्री ङोन्ग्यम् फ्रोइ मुबल। फ्रोइ पर्मेस्वर्तेङ् मुबल, ओसेम् फ्रोइ पर्मेस्वर्नो मुबल। 2थेङ् जम्मनो ठुङ्ब बीम ङोन्ग्यम् पर्मेस्वर्तेङ् मुबल।
3थेङ् ग्यम्सेनो पर्मेस्वर्चे जम्मनो स्हेःमा स्य्हेङ्जेत्ज्यी, ओसेम् तइ स्हेःएनो थेङ्चे अस्य्हेङ्नले अत। 4थेङ्रीनो जीवन् मुबल, ओसेम् हुजु जीवन्नो म्हीमाकी लागीरी य्हल् मुबल। 5हुजु य्हल् म्हुन्दुङ्री सर्ब, ओसेम् हुजु य्हल्त म्हुन्दुङ्चे डाबल अरे।
6पर्मेस्वर्चे युहन्न पङ्बे म्ही गीत पीत्युजेत्ज्यी। 7थेचे स्येत्पे तम् ग्यम्से जम्मचेनो य्हल्त बीस्वास् स्य्हेङ्खइ पङ्ज्यीम् थे हुजुइ बारेरी स्येत्परी खज्यी। 8युहन्न थेनो य्हल्मी अय्हीन्ब मुबल, तर थे य्हल्की बारेरी स्येत्परी युबल मुबल। 9हुजु देमेन्की य्हल्मी जम्मनो म्हीमात य्हल् पीन्बरी जम्बुलीङ्री ब्योन्युटीब मुबल।
10थेङ् जम्बुलीङ्रीनो मुबल, जम्बुलीङ् थेङ्चेनो स्य्हेङ्जेत्पल मुबल, तर थेङ्त जम्बुलीङ्चे अस्ये। 11थेङ् र्हङ्की म्हीमाजनो ब्योन्युज्यी, तर र्हङ्की म्हीमाचेनो थेङ्त ग्रहन् अस्य्हेङ्। 12तर थेङ्त ग्रहन् लज्यीम् बीस्वास् स्य्हेङ्बलमात थेङ्चे पर्मेस्वर्की ज-जमे तबे हक् न्हङ्जेत्ज्यी। 13थेङ्यीमा न्ह काः ग्यम्से, न्ह म्हीइ ल्हीः ग्यम्से, न्ह म्हीइ सेम्चे म्हेन्ज्यीम् पर्मेस्वर्ल तब, तर पर्मेस्वर्चेनो थेङ्यीमात र्हङ्की कोल स्य्हेङ्जेत्प।
14फ्रोइ म्ही तजेत्ज्यीम् ङ्य्हङ्माकी गुङ्री स्य्हुःजेत्ज्यी। थेङ् अनुग्रहतेङ् देमेन्चे प्लीङ्जेत्पल मुबल। ङ्य्हङ्माचे थेङ्की महीमा म्रङ्ज्यी। हुजु महीमा अप ग्यम्से गीकीनो मुबे जत युबल मुबल।
15युहन्नचे थेङ्की बारेरी स्येत्ज्यी, ओसेम् क्रीङ्ज्यीम् पङ्ज्यी, “थेङ्नो हुजु म्ही य्हीन्ब, ङचे थेङ्की बारेरी चोले पङ्बल मुबल, ‘ङइ लीप्चे ब्योन्खस्येकी थेङ् ङ बीमम् ङ्हच्छ्यङ् मुब, तलेपङ्सम् थेङ् ङ न्हब बीम ङोन्ग्यम् य्हङ्सेनो मुबल।’”
16थेङ्की य्हक्को अनुग्रहचे प्लीङ्जेत्पल तज्यीम् ङ्य्हङ्मा जम्मचेनो मोलम्की जोरी मोलम् यङ्बल मुब। 17तलेपङ्सम् पर्मेस्वर्की नीयम्मा मोसा ग्यम्से पीन्बल मुबल, तर अनुग्रहतेङ् देमेन्मी येसु ख्रीस्ट् ग्यम्चे खज्यी। 18खल्चेएनो पर्मेस्वर्त खेमेएनो म्रङ्बल अरे। अपतेङ् बक्च्य मुबे गीकीनो ज र्हङ्नो पर्मेस्वर्चे अपत स्येःन लजेत्पल मुब।
बप्तीस्मा पीन्बे युहन्नइ सम्तर्
(मत्ती ३:१-१२; मर्कुस् १:१-८; लुका ३:१-१८)
19यरुस्लेम्की यहुदी अगुवामाचे डेत्-डेत् लम्बुमातेङ् लेबीमात युहन्नइज, “ए खल य्हीन्ब?” बी ङ्योत्परी पीत्ज्यी। 20युहन्नचे जोहप् पीन्ज्यीम्, “ङ मुक्ती न्हङ्बे ख्रीस्ट् अय्हीन्” बी ज्यनले पङ्ज्यी।
21ओसेम् थेङ्यीमाचे ङ्योत्ज्यी, “होलेपङ्सम् ए खल? ता ए एलीया य्हीन्ब?”
युहन्नचे, “ङ अय्हीन्” पङ्ज्यी।
थेङ्यीमाचे, “ए ङ्यीमाचे ब्रेन्टीबे अगम्बक्त य्हीन्ब?” बी ङ्योत्ज्यी।
युहन्नचे, “अय्हीन्” पङ्ज्यीम् जोहप् पीन्ज्यी।
22हुजु लीप्चे थेङ्यीमाचे पङ्ज्यी, “ए खल य्हीन्ब? पङो स्यीम्! ङ्यीमात पीत्खबलमाज ङ्यीमाचे जोहप् बोर्थोब। ए र्हङ्चे र्हङ्की बारेरी ता पङ्ब?”
23युहन्नचे पङ्ज्यी, “ङ यसैया अगम्बक्तचे पङ्ब र्हङ्लेनो, ‘परम्प्रभुइ लागीरी ग्यम् टोप् लउ’#यसैया ४०:३ पङ्ज्यीम् उजाड् ग्लारी क्रीङ्बे केत् य्हीन्ब।”
24हुजु तम् ङ्योत्परी खबलमात फरीसीमाचे पीत्खबल मुबल। 25ओसेम् थेङ्यीमाचे युहन्नत ङ्योत्ज्यी, “ए मुक्ती न्हङ्बे ख्रीस्ट्एनो अय्हीन्, एलीयाएनो अय्हीन्, ओसेम् अगम्बक्तएनो अय्हीन् पङ्सम् तले बप्तीस्मा पीन्बल स्यीम्?” 26युहन्नचे जोहप् पीन्ज्यी, “ङचेम् यीचेकीनो बप्तीस्मा पीन्ब। तर एङ्यीमाइ गुङ्री गी मुब, थेङ्त एङ्यीमाचे स्येःबल अरे। 27ङइ लीप्चे ब्योन्खस्येल थेङ्नो य्हीन्ब, ओसेम् ङ थेङ्की पनेइ तन फ्रेन्बरीएनो जेःबल अरे।”
28चु तम् यर्दन् ग्येन्दीइ क्योम्सङ् बेथानीय पङ्बे ग्लारी तबल मुबल। हुजुरी युहन्नचे बप्तीस्मा पीन्बे लक् स्य्हेङ्ब मुबल।
पर्मेस्वर्की थुमा येसु
29न्हम्स्य्होर्हङ् येसु र्हङ्ज ब्योन्खटीबल म्रङ्ज्यीम् युहन्नचे पङ्ज्यी, “च्याको, पर्मेस्वर्की थुमा, थेङ्चे जम्बुलीङ्की जम्मनो म्हीमाकी पाप्मा नोम्जेत्स्ये मुब! 30थेङ्की बारेरी ङचे पङ्बल मुबल, ‘ङ बीमम् लीक्यम् गी ब्योन्खस्ये मुब, थेङ् ङ बीमम् य्हक्को ङ्हच्छ्यङ् मुब, तलेपङ्सम् थेङ् ङ न्हब बीम ङोन्ग्यम् य्हङ्सेनो मुबल।’ 31थेङ् खल य्हीन्ब बी ङचे ङोन्ग्यम् स्येःबल अरेबल, तर ङ इस्राएलीमाचे थेङ्त स्येःन लबरी यीचे बप्तीस्मा पीन्ज्यीम् खबल य्हीन्ब।”
32युहन्नचे चोले पङ्ज्यीम् गबाही पीन्ज्यी, “ङचे पबीत्र आत्मात स्वर्ग ग्यम्से ढुकुर् र्हङ्ले ब्योन्युज्यीम् थेङ्की जोरी स्य्हुःबल म्रङ्ज्यी। 33चु बीम् ङोन्ग्यम् ङचे थेङ्त स्येःबल अरेबल, तर यीचे बप्तीस्मा पीन्बरी ङत पीत्युजेत्पलचे ङत सुङ्ज्यी, ‘एचे खलइ जोरी आत्मा ब्योन्युज्यीम् स्य्हुःबल म्रङ्ब, थेनो पबीत्र आत्मा ग्यम्से बप्तीस्मा पीन्स्येकी म्ही य्हीन्ब।’ 34ङचे पबीत्र आत्मा थेङ्की जोरी ब्योन्युबल म्रङ्बल मुब, ओसेम् ङ पङ्ब थेङ्नो पर्मेस्वर्की ज य्हीन्ब।”
येसुइ ङोन्ग्यम्की डबमा
35न्हम्स्य्होर्हङ् युहन्न देबेएनो र्हङ्की डबमान्हङ्की डब ङ्य्हीतेङ् हुजुरीनो रप्टीबल मुबल। 36थेचे येसु स्येःटीबल म्रङ्ज्यीम्, “च्याको, पर्मेस्वर्की थुमा!” बी पङ्ज्यी। 37चु थ्येःब बीसेम् युहन्नइ डब ङ्य्ही येसुइ लीप्चे ब्रज्यी। 38येसुचे दोःज्यीम् स्हीजेत्मम् थेङ्यीमा थेङ्की लीप्-लीप् खटीबल म्रङ्जेत्ज्यी, ओसेम् थेङ्यीमात, “एङ्यीमा ता म्हइबल?” बी ङ्योत्जेत्ज्यी। थेङ्यीमाचे थेङ्त, “लोप्पोन्, थेङ् खन स्य्हुःजेत्प?” बी पङ्ज्यी। 39थेङ्चे जोहप् न्हङ्ज्यी, “खोउ, ओसेम् एङ्यीमाचे म्रङ्स्ये मुब।” थेङ्यीमा येसुतेङ् बक्च्य ङ्यीज्यीम् थेङ् स्य्हुःबे ग्ला च्याज्यी, ओसेम् हुजु दीन् थेङ्तेङ् बक्च्यनो टीज्यी। होदे बेलोरी ङ्येसेइ चार् बत्तीय्हम्बल मुबल।
40युहन्नइ तम् थ्येःज्यीम् येसुइ लीप्चे ब्रबे डबमा ङ्य्ही न्हङ्री गीम् सीमोन् पत्रुस्की अले अन्द्रीयास् मुबल। 41ङोन्ग्यम् अन्द्रीयास्चे थेइ अज्यो सीमोन्त खतु लज्यीम् पङ्ज्यी, “ङ्यीमाचे मसीहत खतु तज्यी” (हीब्रु ग्योत्री मसीह पङ्बलमी मुक्ती न्हङ्बे ख्रीस्ट् य्हीन्ब।) 42हुजु लीप्चे अन्द्रीयास्चे सीमोन्त येसुइज बोर्ज्यी। येसुचे सीमोन्त म्रङ्ज्यीम् सुङ्ज्यी, “ए योआनेसकी ज सीमोन् य्हीन्ब, एइ मीन् केफास तस्ये मुब।” (केफासकी अर्थ अरामीक् ग्योत्री ङ्हच्छ्यङ् युङ्ब य्हीन्ब, होलेनो ग्रीक् ग्योत्री पत्रुस् पङ्बलेएनो ङ्हच्छ्यङ् युङ्ब य्हीन्ब।)
येसुचे फीलीप्तेङ् नथानेल्त दम्जेत्पल
43न्हम्स्य्होर्हङ् येसु गालील् प्रदेस्री स्येःबे थुः लजेत्ज्यी। ओसेम् थेङ्चे फीलीप्त खतु तज्यीम्, “ङइ लीप्चे ब्रउ” बी सुङ्ज्यी। 44फीलीप्एनो अन्द्रीयास्तेङ् पत्रुस् र्हङ्लेनो बेथ्सेदा पङ्बे ज्यीद सहर्की म्ही मुबल। 45फीलीप्चे नथानेल्त खतु लबरी ङ्यीज्यीम् पङ्ज्यी, “ङ्यीमाचे थेङ्त खतु तज्यी, थेङ्की बारेरी मोसातेङ् अगम्बक्तमाचे धर्म छ्येःरी ब्रीबल मुबल, थेङ्मी नासरत्की योसेफ्की ज येसु य्हीन्ब।”
46नथानेल्चे थेत, “नासरत् ग्यम्सेएनो तेए ज्यबे तम् डोङ्ब खम्ब?” बी ङ्योत्ज्यी।
फीलीप्चे थेत जोहप् पीन्ज्यी, “खज्यीम् च्याको।”
47ओसेम् येसुचे नथानेल्त र्हङ्ज खटीबल म्रङ्जेत्ज्यीम् नथानेल्की बारेरी सुङ्ज्यी, “च्याको थे देमेन्की इस्राएली य्हीन्ब, थेतेङ् तइ छल्एनो अरे।”
48ओसेम् नथानेल्चे थेङ्त, “थेङ्चे ङत खले खेम्जेत्ज्यी?” बी ङ्योत्ज्यी।
येसुचे थेत जोहप् न्हङ्ज्यी, “फीलीप्चे एत ङ्होत्प बीम ङोन्ग्यम्नो ङचे एत मको दोङ्बोइ दुङ्री म्रङ्ज्यीन्बल मुबल।”
49हुजुलीप्चे नथानेल्चे थेङ्त पङ्ज्यी, “लोप्पोन्, थेङ्मी पर्मेस्वर्की ज य्हीन्ब टीम्, थेङ् इस्राएलीमाकी ग्यल्बो य्हीन्ब टीम्!”
50येसुचे थेत ङ्योत्जेत्ज्यी, “ङचे एत मको दोङ्बोइ दुङ्री म्रङ्ज्यी पङ्बल तज्यीम् एचे ङत बीस्वास् स्य्हेङ्ब? एचे चु बीमाएनो ङ्हच्छ्यङ् तम्मा म्रङ्स्ये मुब।” 51ओसेम् येसुचे थेत सुङ्ज्यी, “ङ एङ्यीमात देमेन्नो पङ्ब, स्वर्ग ठोङ्बल, ओसेम् पर्मेस्वर्की स्वर्गदुत्मा म्हीइ जइजोरी तोर् क्रेत्टीबलतेङ् मोर् फप्टीबल म्रङ्स्ये मुब।”
Trenutno izabrano:
युहन्न 1: WTDG
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2025 by Mother Tongue Translators Society, Nepal Bible Society
and Wycliffe Bible Translators, Inc.
