Njɔyn 11
11
Lazalùs ə kwu
1Wùə vîvè tè nyiə zafə, zə vəynze e nyi Lazalùs. Petanì tè nyi tɔ̂ŋ zɛ ə ghɔ nyìə Lazalùsghè, mə nyi Mèli è Maltà, tè ndamə ətəyn. 2Mèli tè nyi wùə vɛ ə è te sɨs ngwɨl me lɨ̀mtə̂ tsofə̂ mɛ ə Njisə̀s əghòl ə zə̀sə̀ è nyuŋ sə atu sə vəynse. Ə tè nyi ànyìə vəyn Lazalùs kə è tè zafə 3Ghɔnyì nə ghɨ̂yn ə ke tomə tom sê Njisə̀s ə pìə nə, “Pɛ̂pɛ, soyn vɛ vɛ ə Ò kɔ̂ŋɔ̀ zâ nyîə zafə.”
4Pîza kə Njisə̀s zɨ tom ə̀təyn ə pìə nə, “È zafə pi za, va se nə kwu. Zaf ətəynze pə̂yn kê nə Zhə̀fè tyəyn pomsê ə vəynze, è kɨsè nə Va Fèzhə̀ kyi pomsêzè.”
5Njisə̀s tè nyîə kɔ̂ŋɔ̀ Maltà, è Mèli, è Lazalùs, 6pîza ə zɨə nə Lazalùs nyîə zafə, ə pa faŋa kə elùʼ vɛ ə è tè nyi ətəyn sə mtuʼ mpɛ̀ 7È və ke pì sê chùmtè èpàm sə vəynse nə, “Ə ghâsènì kɛse nduə ə Njòndyâ.”
8Chùmtè èpàm sə vəynsə ə tɔŋtə̂ tso vəyn ə pìə nə, “Tyə̀ynsè, ə̀ tè kwùʼte nyi ke nyi ghɨə Njûs ghe kyiŋə se tɨmnə̂ ghô è chîə, Ò pa pɨaʼtə̂ kəpî se fɨnə ndù fumə?”
9Njisə̀s ə pfɨfə sê ghənə nə, “Piə tuʼfe kyi sechwìə njò sepɛ̀? Ghɨ ghɛ ə kwîə è chwì vayn kaʼa tyamte pfɨ kûmə̀ nə ghənə nyi yî wùə vɛ ə è nyi epayn ə mbi zɨnə̀. 10Pîza ghɨ ghɛ ə kwîə alɨm kàʼa tyamte pfɨ kûmə̀ nə paynze va.” 11Ə pə̀ kə Njisə̀s pì mɨ̂sè zɨnə mə, ə kwəynsə̂ nə, “Sô ghâsènì Lazalùs pɨənə̂ ndò, pîza M ndûə fu se zə̀m ə vəyn.”
12Chùmtè èpàm sə vəynse ə pìə sê Vəyn nə, “Pɛ̂, ə è nyi mə è və pɨəyn, ə è nə̂ tɛ.”
13Wâmnè ə Njisə̀szè tè chwìtə nə Lazalùs ə kwu, chùmtè èpàm sə vəynse e zɨə ke kə nə è piə tsɨ̀yntsɨ̀ynə̀ sèmbɨəyn. 14Njisə̀s ə ke tsa paynsê ə ndayn nə, “Lazalùs ə kwu, 15pîza kè kûmə̀ ghàyn, M saŋnə̂ nə M tè va ghasè vəyn, kə ghàyn nə pomə. Ə ghâsènì ndu fumə zôyn.”
16Tɔ̀mɔ̂s vɛ ə tè tɔŋtə kəpî nə, (Epɨâʼsè) ə pìə sê chùmtè epàm sə Njisə̀s shise nə, “Ə ghâsènì əkɨ̂m ndo ndu ke ghasènyìə ghə̀ Tyə̀ynsè, kə ghâsènì nə̂ kwu paʼsê è vəyn.”
Njisə̀s ndùə se zuŋtə ə ghɔnyì ə Lazalùsghè
17Njisə̀s ə ndùə tâynə̀ ə Petanì ə zɨə nə ə pfɨ̂mə̀ Lazalùs sə epàm mtuʼ mkyàʼ. 18Petanì tè nyì se zaʼâ ghafke tìmsè mâyl sepɛ̀ se ndu ə Njèlusalɛ̀m, 19mə ghɨə Njûsə̀ se tsɨ̀ ə pə̀yn se fe Maltà yî Mèli se pì nə ghənə kol təmə kə ànyìə ghənə̂ kwu.
20Kə Maltà tè zɨ nə Njisə̀s pə̀ ndò ə fɨə ndûə se njiə vəyn endom, Mèli ə faŋa kə ə ndɛ. 21Maltà ə pìə sê Njisə̀s nə, “Pɛ̂, ə Ò tè nyi fâyn mə ànyì vɨ̂m pâʼà kwu. 22Pîza, m ke ndô nə pî zôyn, ə Ò pfɨf nâʼàpî ghè sê Zhə̀fè, ə fe nəyn ke kə ə Ò pì.”
23Njisə̀s ə pìə sê vəyn nə, “Ànɛ̂ nə̂ kɛsə̂ ndamə.”
24Maltà ə pìə sê vəyn nə, “M ke ndô nə è tə zômə̀ etuʼ e kwuŋsəve.”
25Njisə̀s ə pìə sê vəyn nə, “Ə̀ nyi Mi è zomsêzè, ə̀ nyi Mi èndamze. Ghɨ ghɛ ə pomə se Mi nə̀ ndamə, pi kə ghənə nyi mə ə kwu. 26Mə ghɨ ghɛ ə ndamə ə pomə̂ sê mi, ə tə tàʼa kwu nâʼà səkɔs. Ò pomə̂ ndò zɨ̂nə mə ə?”
27Maltà ə pomə ə pìə nə, “M pomə̂ ndò ə Pɛ̂ nə ò nyi vɛ ə chɔʼ ndə̂m, mə za nyi Va Fèzhə̀ vɛ ə Zhə̀fè tè tsɨ̀ne nə È tə pə̂ ə mbi.”
Njisə̀s ə chì
28Ə pə̀ kə Maltà pì zɨnə mə, e və kɛsə̂ ndûə ə nyaʼtə̂ tɔŋɔ ànyìə vəyn Mèli ə pìə sê vəyn nə, “Tyə̀ynsè ə pə̀yn pfɨfə ghò.” 29Kə Mèli zɨ, ə zàŋsə̀ fɨə ndûə se kwəynê yî Njisə̀s. 30Njisə̀s e pa nyi ke elùʼ vɛ ə Maltà tè kwəyne yî vəyn ətəyn endom, ndɔ̀ʼɔ è nyiəm nji əfètəyn èndaʼ. 31Ghɨ ghɛ ə ghe tè tsɨs zuŋtə vəyn ə ndɛ ə fɨə kə ə vəyn epàm, kə ghənə tè fe è və ndwìə ə zàŋsə̀ fɨə əpɨəyn kwaʼtə̀ nə è ndùə echo eshyə̀ sə chîə ànyìə vəyn.
32È və ndùə tâynə̀ elùʼ vɛ ə Njisə̀s tè nyi ətəyn, kè kə è tè fe vəyn ə tɨmə ə̀ ndzɨs ə və shi, ə pìə nə, “Pɛ̂, ə ò tè nyi fâyn, mə ànyì vɨ̂m paʼà kwu.”
33Njisə̀s ə fe kə è chîə za ghɨ ghɛ ə yî vəyn pə̀yn əmɔʼ e pɔŋɔ chîə, ghɛ ətəynze ə fo ngəʼ sê vəyn, ə zafə vəyn nâʼà sə ŋaŋ. 34È və pfɨfə sê ghənə nə, “Ghàyn nâ pfɨ̀mə ghayn vəyn ə?”
Ghənə ə pìə sê vəyn nə, “Pə ndùə fe ə Pɛ̂.”
35Njisə̀s ə chìə. 36Ghɨə Njûs ghə fe zâ ə pìə nə, “Fe ndom vɛ ə È kɔ̀ŋɔ̀ vəyn ətə!”
37Pîza ghɨə mɔ̀ʼɔghe ə pìə nə, “Piə ə tè nəyn Vəyn nə wùə èfòfə vɛ ə fe tèluʼ ə? È se faŋ se nə̀yn nə kə Lazalùs kwu kûmə̀ ghè?”
Njisə̀s ə zòmsè Lazalùs
38Njisə̀s ə ndùə tâynə̀ ə Lazalùs echo èshyə̀, ghɛ ətəynze e pa fo kə ndò ngəʼ se vəyn. Shyə̂ eghaʼâ ətəynze tè nyi mə tsof ətə̂ ànayn ə kɨlə ècho ətəynze è chize. 39Njisə̀s ə pìə sê ghɨ ghɛ nə, “Ghàyn nji tsɨ̂sè èchi ətəynze.”
Pîza Maltà, mə nyi ànyìə wùə kwuə, ə pìə nə, “Tuʼmə tsɛ̀ zôyn m̀kyàʼ ə Pɛ̂ kə ə pfɨ̂mə̀ vəyn, mə ə tsɨ̂sè chi ətəynze zôyn, ə zûʼə̀kè fɨ ə kə pofə kə nyi.”
40Njisə̀s ə pìə sê vəyn nə, “Piə mə fə pì sê ghò nə ə ò pomə, ə ò fe pomsê ə Fezhə̀zè ə?” 41Ghənə ə njìə tsɨ̀sə̀ èchi ətəynze. Njisə̀s ə naynə̂ kɔʼsə è Kwùtwəyn ə pìə nə, “M fo àzɔ̀ŋnè kɛke ə Pɛ̂ kûmə̀ nə ò ndamə zɨə ndò tsə̂m zɨmze, 42M ke ndô nə Ò ndamə zɨə ndò tsə̂m zɨme. Pîza m wàmnə̀ zôyn sə chùŋ ə̀ghɨ ghɨ̀yn ə ghe tyəm fâyn, kə ghənə pomə nə ə̀ tom ghô è Mi.” 43È və wamnə̀ nyi ə pɨa pîə nâʼà è kyə̀ ètɛ nə, “Lazalùs, fɨ pə̀!” 44Wùə èkwuə ə̀təyn ə fɨə pə̂ mə ə koyte gho vəynghe è gholə vəynghe è pɨ̂aŋ ə sendzɨsve, ə fɨnə kolə èkyâʼ ə vəyn è ndzɨs sə mɔ̀ʼɔse. Njisə̀s ə pìə nə, “Ghàyn zhəynte kɨ̂m kɨ̂yn ə vəyn ewìyn, ə ghàyn za ə è ndo.”
Ə pɨaʼtə se zhwiə Njisə̀s
(Matyò 26.1-5; Mâk 14.1-2; Lûk 22.1-2)
45Ghɨ Njûs ghɛ ə tè pə̀yn se zuŋtə̂ Mèli, ə fe èghɛ zɛ ə Njisə̀s nə̀yn, ə pomə sê Njisə̀s. 46Pîza, ghə mɔ̀ʼɔghe ə kɛse ndûə fe ə̀ghɨə Falàsî ə tsà èghɛ zɛ ə Njisə̀s nə̀yn. 47Ghɨə Falàsîə yighə̀ ghɨ kɔʼsə nə eshyə̀ ə ngaŋtə ə tɔŋnə̂ zùŋtə̀ ə̀ghɨ̀ atsɨ̀ynte ə pìə nə, “Ə ghâsènì kwi zayn zə? Fe ghɛ ə kayntə ghɛ ə wùə vɨ̂yn ə mɔ̂mə̀ ə. 48Ə ghâsènì zà È ve nə̂ kə nyi, ə ghɨ ghəkɨ̂m nə̂ pomə sê vəyn. Ə ghɨ ghəkɨ̂m pomə sê Vəyn, ə ghɨ Lûmə̀ pəyn kyi fi Ndɛ Ètsə̀mə ə̀ ghâsènì ə fɨyn kyi fi endaʼ ə ghasènìze.”
49Wùə vîvè ə ghənə əfètəyn, e tɔŋtə̂ nə Kayfàs, ə nyi vəyn wùə èkɔʼsə nə èshyə̀ èngaŋtə kwəynə ə pîŋ nə zɛ ə wàmnə̀ ə pìə nə, “Ghàyn ke va ghɛze nâʼà səkɔs! 50Ghàyn fe va nə e pɨlə tsɔ̂fə̀ kə wùə èmɔ̀ʼ kwu ə ghɨghe əkɨ̂m elùʼ tsɛ̂ kə ndaʼ ə ghasènìze njise ə?” 51È tè wàmnə̀ va ə vəyn ekwâʼtè. Kə ə̀ tè nyi vəyn wùə kɔʼsə nə̂ èshyə̀ èngaŋtə kwəynə fumə ə pîŋ, è tè piə kə èghɛ zɛ ə ze kyi se tə kyàyn nə, Njisə̀s nə̀ kwuə ə ghɨ Njûsghè elùʼ. 52È tè paʼà kwu ke sê ghənə. È və tè kwu kepî atu ə ghɔ Fezhə̀ ghɛ ə ghe chyâsè kə ghənə kɛse zûŋtè pə̂yn ə̀ nyi ke sə afɨa àmɔ̀ʼ.
53Se zhə̀tə̀ fumə etuʼ, ghɨə Njûs eghaʼlə̂ ghè e pɨaʼtə̂ se zhwiə Njisə̀s. 54Zɨnə mə ə nə̀ Njisə̀s e fɨnə fɨə va ə ndayn əfètə̂ ghɨ Njûsə̀. Yî chùmtè èpàm sə Vəynse ə pɨlə ndô ndûə ə tɔ̂ŋ zhîzè, e tɔŋtə̂ nə Ɛfelèm, ndamə fumə. Ndaʼ nə zɛ tè nyì paʼsê elùʼ ashəshəve.
55Tuʼ mə̂ Èzaʼa tsɛ̂ mə ghɨə Njûsə̀m ə paʼsə, ghɨghe e kɔʼɔ ə Njèlusalɛ̀m, tsɨ̀ə kə nyi, se shùə se ngɨŋ sə ghənə̂sè endom vɛ lâŋ ə Mosîskè tè chwìtə, se pɨaʼtê se tuʼ fe zaʼâ tsɛfe. 56Ghɨə Njûs ghɛ tè pa kwîə kyiŋə kə Njisə̀s. Ə pə̀ kə ghənə tsɨ̂yntè ə Ndɛ Ètsə̀mə, kyì e pfɨfə sê kyì nə, “Ò kwàʼtə̀ nə ghe? È nyiə nə̀ pə̀ ndò fayn èlùʼ ezhiəve ə?” 57Ghɨə kɔʼsə nə eshyə̀ ngaŋtəghe è ghɨə Falàsî e nyi mə ə tsɛ̀sè lâŋkè nə ə ke nâʼàpî ndè luʼ vɛ ə Njisə̀s nyi ətəyn, è və tsà sê ghənə kə e ko Vəyn.
Trenutno izabrano:
Njɔyn 11: bfm
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2022 CABTAL
