Ətefɨ̂aʼ 2
2
Epə̂ ə Sezuʼ se Ŋwaʼase
1Ə̀ tè nyi kə tuʼ azhi ə Pentikɔ̀vè pə̀yn, ghɨə poməghe ə zùŋtə̀ elùʼ emɔ̀ʼ. 2Kè nyi, fɨake ə kô ekwùtwəyn nyiə kə afof atɛke ə fɨnə kô ə ndɛ zɛ ə ghənə tè nyi ətəyn èkɨ̂m. 3Ghənə ə pfɨ̀ŋə̀ fe èfɨa, ve nyi kə endəm e wùsve, ve tyəm ə nâʼà piə ndè atu fu. 4Zuʼse Ŋwaʼase ə pə̀ njiə ə nâʼà piə ndè əfètəyn fu ə nə̀, ghənə zhə̀tə̀ sè wàmnə̀ ə tewâmnè tə tendaʼ tə ndôtè. Ə̀ tè nyi Sezuʼ sɛ ə se tè nəyn nə ghənə ə wâmnə̀ ə̀ghɛ ghɛ ə ghənə tè wàmnə̀.
5Ə̀ tè nyi əshɨŋ nə zɛ̂, ghɨ Njûsə̀ ghɛ ə ghe tè kɔʼsə Zhə̀fè e nyi ə Njèlusalɛ̀m mə ghənə fɨ pə̂yn ə tendaʼ, te tsɨ̀ə kə nyi ə mbi. 6Ə pə̀ kə ghənə zɨ kə fɨa kɛ kô zâ, ghɨ tsɨəghe ə zùŋtə̀ elùʼ vɛ ə ghɨ poməghe tè zùŋte. Ghənə tè nyi è kaynze kûmə̀ nə ghɨə pomə tè wàmnə̀, nâʼàpî ndè e zɨə kê èwâmnè ə ghənə̂ ze ndaʼze. 7Choghe ə zomə ghənə, ghənə pìə nə, “Piə ghɨ ghɨ̀yn ə ghe wàmnə̀ fâyn ə̀kɨ̂m ndò apàs endaʼ ə Ngalìlîkè ə? 8Ə̀ nyiə kyayn ghe nə nâʼàpî ndè ə zɨə, ghənə e wàmnə̀ kə vəyn èwâmnè endaʼze ə? 9Ghâsènì nyì fâyn, yîghe nyi mə ghe fɨ pə̂yn ə tèndâʼà tə Patyàtè, è Mendyà è Elàm; yîghe ghɛ ə ghe fɨ pə̂yn ə tèndâʼà tə Mèsòpòtemyàtè, è Njòndyâ, è Kàpàndoshyà; yîghe ghɛ ə ghe fɨ pə̂yn ə Pontùs è Esiyà, 10yîghe ghɛ ə ghe fɨ pə̂yn endaʼ ə Filinjyàzè, è Pàmfilyà, ghəmɔ̀ʼɔ ghɛ ghe fɨ endaʼ ə Enjìpzè è pâs endaʼ ə Lipyà kɛ ə ke paʼsə sê tə̀ʼ ə̀ Silên. Ghâsènì yîghe fɨ pə̀yn ə Lûm. 11Əfètə̂ ghɨ̀ nə ghɨ̂yn, ghəmɔ̀ʼɔ nyi əghɨ ə Njûsə̀, ghə mɔ̀ʼɔ ghe nyi ə̀ghɨ atumə mə ghe chûmtə̀ èpomə̂ əghɨ̀ ə Njûsə̀. Ghâsènì ghə mɔ̀ʼɔ fɨ pə̂yn endaʼ ə Klitzè, è kɨsè Àlepyà. Pîza ghâsènì əkɨ̂m e zɨə, ghənə e wàmnə̀ kə tèwâmnè tə tendaʼ tə ghasènìte, pîə ə̀ghɛ kayntə ghɛ ə Zhə̀fè nə̀yn 12Ghənə tè pa nyi è kaynze, è fâynzè, kyì e pfɨfə sê kyì nə, ‹Zɨnə mə tyə̀nə̀ nə ghe?›”
13Pîza ghɨə mɔ̀ʼɔghe e chaʼa əghɨ ə pomə nə ghɨyn pîə nə, “Ghənə ə mɨ lɨ̀m, m̀ mɛ m̀ ko ghənə.”
Pità ə wàmnə̀ sê nɔ̂yn ə ghɨ̀kè
14Pità yî ghɨətom ə Njisə̀s əmɔ̀ʼɔ njò èmɔ̀ʼ ə ndwìə tyəmə̂ ekwùtwəyn sè wâmnə̀ è kyə̀ è tɛ sê nɔ̂yn kɛ nə, “Ghɨ Njûsə̀, è ghàyn əkɨ̂m ghɛ ə ndamə ə Njèlusalɛ̀m, ghàyn zɨte sê mi, m tsayn ghɛ zɛ ə ghɛ nə zɨ̂nə̀ tyə̀nə̀ sê ghàyn. 15Ə̀ pâʼà ko lɨ̀m ghɨ ghɨyn kə ghàyn kwàʼtə̀, kûmə̀ nə ə zo pa nyi ke sèchwìə sè poləmɔ̀ʼ pɨ̂sə̀ pɨ̂sə̀. 16Zɨnə mə kyayn se lwiynsê ə kyə̀ zɛ ə fɨ̀aʼtè Njuwèl tè pi nə, È tè pi nə Zhə̀fè pi nə:
17‹Ə̀ zɨnə nyi eghɛ zɛ ə M tə nə̂ ə mtuʼ mə èkwùŋsə̂m.
M tə fo Sèzuʼ se Ŋwaʼa Sɨmse sê ghɨghe əkɨ̂m,
ə ghɔyn ghayn ghe ndômnə̀ è ghe zənə ə tsâ ə̀ghɛ ghɛ ə ghe tə kyanə̀ tsɔ̀fə kə shîŋə̀ ətəynke kwəyn.
Kwuŋ taynte tə fe ə̀ghɛ ə te laynəlaynə, mə ghe ndo sê Mi, ə tsəmse ə kyîə ə̀ ndumne ghaynghe.
18M tə fo Sezuʼ se Ŋwaʼa Sɨmse sê ghɨfɨaʼa ghɨmghe, ə M fo sê ndômnə̀, è zənə ə mtuʼ mê kwùŋsə̂m nə mɛ,
ə ghənə ə tsâ ə̀ghɛ ghɨm ghɛ ə ghe tə kyânə̀ tsɔ̀fə kə shîŋə̀ ətəynke tə kwəyn.
19M tə nə̂, ə̀ghɛ ə kayntəghe ekwùtwəyn,
ə M tyəyn chwìəse ə chi.
Ndə̂mə̀m tə sɨsə̀, ə wusve pɛ, ə ndəʼke fɨ.
20Chwì tə kɛsə̂ ə è zə nyì kə alɨm, ə njɔŋ kɛse ə è zə pâŋà kə mndəm.
Ghɛ nə ghɨnə tə kyanə̀ tsɔ̀fə kə tuʼ èghaʼâ ekɔʼnê ə Pɛ̂pɛve pəyn.
21Fumə ashìŋə̀, nâʼà pîndè vɛ ə è pomə nə Njisə̀s nyi Pɛ̂pɛ ə̀ vəyn, ə è kyi sɔzaze.›”
22Pità ə pìə kwəynsə̂ nə, “Ghàyn ghɛ ə ghàyn nyi əghɨ ə Isìlây, ghàyn zɨte ghɛ zɛ m kyiŋə se pì. Njisə̀s tè nyi wùə ə Nazalɛ̀t mə Zhə̀fè ə tyə̀yn ə ndayn sê ghàyn nə Fə tom Vəyn. Fe nəyn nyi endom nə Njisə̀s tè nə̂ əghɛ ə kayntəghe, tyə̂nə̀ sèchwìə sə ghɛse se tyə̀nə̀ nə ə̀ nyi Vəyn vɛ ə Zhə̀fè tom. Ghàyn, è ngɨŋ saynse nyîə fɛte ke ə̀ghɛ nə ghɨ̂yn nâʼà ə̀kɨ̂m, kûmə̀ nə ghe tè kyàynə ə ghàyn əfètəyn. 23Ə fo Njisə̀s nə vɨ̂yn ə gho se pàynghè, ghənə ə payntə̂ Vəyn awâmnè, kè eghɨ kə Zhə̀fè tè pɨaʼte ndəm. 24Pîza Zhə̀fè ə nə̀, È və zômə̀, ə sɔ̀zâ Vəyn sê tyaʼ ekwuke kûmə̀ nə kwuze tè vayn kàʼa e kyi Vəyn kə wùə ndɛ̂ ə̀chaʼ. 25Ndàfît ə tə wàmnè ghɛ ghɨ̀yn kûmə̀ Njisə̀s nə:
‘M fe Pɛ̂pɛ vɨ̂m ə mi ə shi shîŋə̀ tekɨ̂m.
È nyi ə mi ekɔyntwɔve, mə fɨake vayn kàʼa ə ke nəʼse mi.
26Kûmə̀ zɨ̂nə mə təm ghɨmə saŋnə ndò,
m wâmnə̀ è saŋnê e tsɨəze ə mìə təm.
Ə wiyn vɨmve ə kyi èsamsê kə m pa ndəmə.
27Kûmə̀ nə ò tə zâ maʼà va mi endaʼ əghɨ kwuze.
Ò tə zâ va pfɨyn ə wûə èfɨ̀aʼa vɛve èchùŋ nə ve fî eshyə̀.
28O tyə̀yn ndom tɛ ə te pə̂ èndam sê mi.
M kyi nâʼà èsaŋnê eghaʼaze kûmə̀ nə ghasè ghò tə nə̂ ə nyi əmɔʼ.’”
29Pità ə ke fɨnə pì nə, “Ghɔnyì ghɨmə, m kyi se wàmnə̀ sê ghàyn səmɔʼ kûmə̀ Ndàfît, pɨ̀a ghâsènì və shi. È və tə kwu, ə pfɨ̀mə̀, shyə̂ ə vəynze pa nyi ndò fayn se pə tàyn zôyn. 30Ndàfît tè nyi fɨ̀aʼtè ə̀ Fèzhə̀, ke àfɨa kɛ ə Zhə̀fè tè tsɨ̀ne se fo se vəyn. Zhə̀fè tè nji mkâyn nə È tə njiə vayn ə feghàŋ fə ndɛfə Ndàfîtfè sə fɔ̀yn kè eghɨ kə Ndàfît tè nyi fɔ̀yn. 31È və tə fe mɨ̂sè ghɛ zɛ ə Zhə̀fè tè kyi se nə̀yn tsɔ̀fə kə shîŋə̀kè kɔʼ kwəyn, ə wàmnə̀ kûmə̀ èzomə̀ vɛ ə tè chɔʼ ndəm. È tè pi nə:
‘Zhə̀fè pâʼà za Vəyn endaʼ ekwuəze,
pfɨyn ə Vəynze ə tàʼa fì eshyə̀.’
32Ghasə ə̀kɨ̂m nyi setsɛ̀ èsaʼ nə Zhə̀fè ə nə̀yn, Njisə̀s nə vɨ̂yn ve è zômə̀. 33Zhə̀fè ə njì Vəyn elùʼ ekɔʼnəve, ə Vəyn ekɔyntwɔve. È və fo Vəyn è Zuʼse Ŋwaʼa sɛ ə È tè tsɨ̀ne nə È tə fo sê vəyn. Njisə̀s ə pɔŋ fo Zuʼse Ŋwaʼa nə sɛ se ghàs, ə̀ nyi səynse ə se nə̂ ghàyn e fe fɨnə zɨə nâʼàpî èghɛ èkè zɛ ə ze kyânə̀ ndâyn. 34Ghàs ke ndô nə Ndàfît tè paʼà kɔʼ ekwùtwəyn, pîza ə pìə nə:
‹Pɛ̂ Zhə̀fè ə pì sê Pɛ̂pɛ vɨm nə,
Tsɨsə ə mì ekɔyntwɔve,
35se zaʼâ ashîŋə̀ kɛ M tə nə̂ ə o tsəle pàyn sɛse è ghol ghɛghe.›”
36Pità ə fɨnə pîə nə, “Ghàyn ghɨə Isìlâyghè ə̀kɨ̂m, ghàyn ə ke səmɔʼ nə m wàmnə̀ kûmə̀ Njisə̀s vɛ ə ghàyn tè nəyn ə payntə̂ Vəyn ə awâmnè, pîza Zhə̀fè ə nə̀ nə è və nyi Pɛ̂pɛ, fɨyn nyi vɛ ə chɔʼ ndə̂m.”
37Ghɨ nə ghɨyn ə zɨə əghɛ ghɛ ə Pità wàmnè, ghe ə njiə ghənə ətəm nâʼà sə ŋaŋ, ghənə pfɨfə sê Pità yî ghɨətom ə Njisə̀s əmɔ̀ʼɔ̂ nə, “Ghɔnyì ghasə, ghàs nyiə kàʼa ə ghàs ghayn ghe?”
38Pità ə pə̀ynsə̀ sê ghənə nə, “Nâʼà ghàyn ə̀kɨ̂m kwiyne təm ghaynghe ə ghɛ ə pi, ə ghàyn fi môm se tyə̀yn nə ghàyn ə pomə sê Njisə̀s Klâys kə Zhə̀fè lɛse fo ə̀ghɛ ə pi ghaynghe, ə È fo ghàyn è fo ə Vəynze, mə za nyi se Zuʼse Ŋwaʼase. 39Tsɨ̂nè ə Fezhə̀ nə zɨ̂nə̀ pə̀ sê ghàyn è ghɔyn ghaynghe è ghɨghe əkɨ̂m ghɛ ə ghe nyi ə tendomte tyâtè. Ə̀ nyi əghɨ ghɛ ə Pɛ̂, Zhə̀fè ghâsènì Fe tɔŋɔ nə ghe pəyn sê Vəyn.”
40Pità ə təftə̂, ə fɨnə wàmnə̀ ə̀ghɛ sê ghɨ ətəynghe, ghe tsɨ̀ə kə nyî. È və chyatə̂ ghənə, ə piə nə, “Nâʼàpî ndè sɔza ngɨŋə̂ vəyn, kə ndɔ̀ʼɔ Zhə̀fè nə poynsê ghàyn eghɨ kə È pɔynse ghɨə təm ə pi ghɨyn.”
41Kûmə̀ nyi, ghɨ tsɨə ghe ə pomə̂ ewâmnè ə Pità nə zɨ̂yn, ə fiə m̀mo. Ghɨghe ə paʼsə̂ anɔ̀yn ə ghɨe poməke etuʼ nə vɛ se zaʼâ sekam sèta. 42Ghənə ə fɨnə fo sèngɨŋ sə ghənə̂sè sə̂ zɨtə̂ ə̀ghɛ ghɛ ə ghɨətom ə Njisə̀sghè tè zaʼlə. Ghənə tè nyì sə eghɛ èmɔ̀ʼ yîghə̀ ghɨ pomə ə Klâysghè. Ghənə əkɨ̂m tè tsə̂mə̀ fɨnə zhiə kɨŋnə̂ luʼve mɔ̀ʼ.
Endam akaʼ amɔ̀ʼ əghɨ poməghe
43Ghɨətomə tè nə̂ ə̀ghɛ kayntə è chwìə se tsɨəse. Ghɨghe əkɨ̂m ə fe, nyi èkaynze. 44Ghɨ poməghe ə̀kɨ̂m ə faŋa nyi ke sə afɨa àmɔ̀ʼ, fɨnə njîə nâʼà pi ghè vɛ ə ghənə tè kyi, chyâtə̀ sê ngɨŋ sə ghənə̂sè. 45Ghənə tè pəʼlə èfɨa ə ghənə̂vè, chyâtə̀ èkɛ ətəynve, fo kə se wùə kè kə è tè làʼà. 46Ghənə tè pə̂ zûŋtə̀ ə Ndɛ Ètsə̀mə tuʼ mè m̀kɨ̂m se tsə̀m, fɨə kwiə zhiə kə ə ndɛ ə ndɛ, nyi ke sə eghɛ èmɔ̀ʼ, saŋnə kə ndò. 47Ghənə e fɨnə kɔʼsə̂ Fèzhə̀, ghɨghe əkɨ̂m e kyi ə̀təm əchûŋə̀ sê ghənə. Pɛ̂pɛ e kwəynsə̂ ə̀ghɨ ghɛ ə È sɔ̀zâ ə ghənə anɔ̀yn tuʼmè m̀kɨ̂m.
Trenutno izabrano:
Ətefɨ̂aʼ 2: bfm
Istaknuto
Podeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©2022 CABTAL