Luka 24
24
Ukuzyulupuka
(Mateyu 28:1-10; Marko 16:1-8; Yohani 20:1-10)
1Mwepwi paMulungu awanachi awalawila kunkungwe wasenzile nuwusule wununchile wuno wayanizye. 2Awazana iwe litantazizwe lifumile pankungwe, 3awinjila mwenemo; ukuwa nanti kuzana ichala cha muwili wa Mfumu e Yesu. 4Awimilila sweka awazunguka kwechochonye, napaponapapo awantu wawili wane wazwite ivizikimile awaya awimilila pewoliwo. 5Intete azilema awanachi kutaluvile awasokowala pansi, awantunye wawo awanena awanachi awati, Ngamuno chani chino mukuvwamba umupuma muwafwe? 6Nawumwi moo; ukuwa azyulupuzilwe. Yizukani chino wawanenile pano walinji mu Galileya: 7watili, Umwana Muntu alila ale alemekwe kuwawembu, wamupamantile pawuchingane, ukuwa uwanda wachititatu azyulupuke.
8Awanachi awizuka amazwi yakwe, 9awafuma kunkungwe awawela, awaya awanena awasambilizi ikumi nawenga nawanji vyonye-vyoo vyonsi. 10Awanachinye wawo wumwi walinji we Mariya waku Magadala, nu Joana nu Mariya enyina wakwe Jemusi; wanyewaa apaliponga nawanachi wanji wayile awanena awasolwa vyonye-vyoo vyonsi. 11Ukuwa awasolwa awelengania awati amazwi yano awanachi wawanenile yalinji ayavye, awakana ukusuwila. 12Ukuwa Peter weni avundumuka asamalila kunkungwe; afika asungamila alola imyenda yamunkungwe mitupu. Awela kukaya mbali akuzunguka kwechino chaponile,
Umusinzo wakuya ku Emawusi
(Marko 16:12-13)
13Pawandanye wowo wawili awakwe woliwo wapitanga wakuya kukaya kakwe Emawusi, amayilosi munenulambali ukufuma kwe Yerusalemu 14walandilananga vyonye-vyoo vyonsi vino vyaponile, 15Awala pano wakulandilana wakuwuzyania nukuwuzyania, Yesu nalwakwe apalamila awapita nawo; 16awamulola, ukuwa nanti kumumanya. 17Yesu awawuzya ati, Nga mukuvwanga chani, chino mukulandilana, pano mukupita?
Awimilila awakangamala-mya, nimpumi mfwilimane. 18Wenga uwakwe woliwo, e Kliopa, amuwuzya ati, Wuzye mwe Yerusalemu wikala wenganye nanti kumanya vino viponile mwenemo mumandanye yaa?
19Awawuzichisya ati, Vintu-chi? Awamutolelela awati, ivintu vino viponezile e Yesu wa mwe Nazareti Umuntunye wee walinji amutumwa'wachindisilwe nu Leza nawantu wonsi'walinji namaka yamivwanjile nimiwombelenye. 20Wasimapepo witu wasongo nawakapanzya wamulemesile ukuti akomwe, waya wamupamantila pawuchingane. 21Weyonye awino twalolelenga ukuti wandi akomole awa Israeli! Ukuwa naponye, pano vyonye-vyoo vyaponela kwapita amanda yatatu. 22Awanachi wamwi awamwiwumba litu watuzungusya; watela wayile kunkungwe amachacha, 23nanti kuzana ichala chakwe. Wiza wati walola ichilolwa chawangeli wane wawanenile awati amumi, 24Wamwi awamwiwumba litu waya kunkungwe waya wazana ndimuno awanachi watachizile; ukuwa nanti kumulola.
25Ngapano Yesu awanena ati, Yeo mwasowa amana wuli, mwe wamyezo mitombozyoke kukusuwila vyonsi vino awatumwa wavwanzile! 26Wuzye chitayine ukuti Mesaya ayimbe kuvintunye vyoo pakwinjila mukuchindamikwa kwakwe? 27Ngapano Yesu awatantila vyonsi vino vyawalisilwe muMawaliko Matele kuvyakwe weliwe ukufumilila mwe wakalata wakwe Musa nga navino awatumwa wawalisile.
28Awapalamila kukaya kano wayanga, Yesu weni akola ngati akupitilila; 29awamunyosya awati, Yikala naswe; amuno ilanzi lyapita kwati kwafita. Achaleka aya ayikala nawo. 30Ayikala nawo pachakulya, atola ichakulya, achipepa, amenyania awapa. 31Ngapano paminso apati-mpe awamumanya; ukuwa weru asowa napano walyata.
32Awanenana wakuti, Wuzye chitatela chikutupya mumyezo pano watela akuvwanga naswe munzila napano watela akutwilulila ivya Mawaliko Matele?
33Napaponapapo awakatuka awanyochela kwe Yerusalemu, awaya awazana awasambilizi ikumi nawenga wawungine apaliponga nawanji 34wakuti, Imfumu e Yesu azyulupusile nawuzyenye! Alolesile kwe Simoni!
35Ngapano wawo wawili awawalandila vino vyalosile pano wapitanga, navino wamanyile Imfumu e Yesu pano wamenyinie ichakulya.
Yesu aloleka kuwasambilizi wakwe
(Mateyu 28:16-20; Marko 16:14-18; Yohani 20:19-23; Imilimo 1:6-8)
36Awala pano wakuwanena ivintunye-vyoo, Yesu ayimilila pakwe woliwo awanena ati, Umutende wuwe namwe.
37Intete aziwalema kutaluvile, amuno welenginie awati walola ichiwa. 38Ukuwa awanena ati, Ngamuno chani chino mukupungana? Ngamuno chani chino ukuvwilikanye koo kuli mumyezo yinu? 39Silolani amakasa yane namatamba mwandi mulole kuno anenenye, nalwane. Ndemani, mwandi mulole, amuno ichiwa chisi numunyafu namafupa, ndivino mwalola nene indi navyo.
40Ala wavwanga wowonye awalanjizya amakasa namatamba. 41Ukuwa naponye nanti kuti wasuwile, wizwile nichimwe mbali nukuzunguka; achaleka awawuzya ati, Wuzye muli nichakulya chimwi? 42Awamupa ichipilimfya chanswi, 43atola alya pano wakulola.
44Ngapano awanena ati, Vyonyevyoo avino nawanenile pano nachilinji indi namwe: vyonsinye vino vyawalikwa mumasundo yakwe Musa kuvyane, namumawaliko yawatumwa, nga namundwimbo zyamalumbo avino vyanga vile vifiswe.
45Ngapano awatungulula ukuti walowoke Amawaliko Matele, 46ati, Chawalikwa wonye-woo; ukuti Mesaya angayimba, azyulupuke kumfwa uwanda wachititatu, 47nukuti ukutontolokwa nukutetelwa kwamawembuko kwize kuwawizwa kumyiko yonsi ukufumilila mwe Yerusalemu, mwizina lyakwe. 48Mwemwenye mwewakalola wavintunye vyoo. 49Nani nandi mbatumile chino Tata walayilizya. Ukuwa lindililanji mukaya yasuke amaka yafume mupela yapwe kwemwemwe.
Yesu asendwa mwiyulu
(Marko 16:19-20; Imilimo 1:9-11)
50Ngapano awakolelela ukufuma mukaya ukuyafika ku Betane, kuno wayile atumpula amakasa yakwe awapepa. 51Ala vino wawapepa, awasya asendwa atwalwa mwiyulu. 52Awamufukamila nga awanyochela kwe Yerusalemu, wizwile nichimwemwe chikulu, 53awalanga wali mung'anda yakwe Leza wakusalifya Leza.
Trenutno izabrano:
Luka 24: WWN82
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Chinamwanga Bible © United Bible Societies, 1981.
