Luka 14
14
Yesu apozya umulwale
1Uwanda wumwi uwakusolezya Yesu wayile mukulya ichakulya mung'anda yakwe songo wawaFalisi wumwi; nawantu awapanga Yesu naminso. 2Umuntu wumwi wino amanama namakasa yavimvile aya kwe Yesu, 3nga Yesu avwanga nawasambilizya wamasundo nga na waFalisi ati, Wuzye isundo litu lyatuzumilizya ukupozya pawanda wakusolezya, pamwi pole?
4Ukuwa awaswima awati-mya. Ngapano Yesu asenda umuntu amupozya, aleka apita. 5Anyoka awanena ati, Wuzye ndiwumwi pakwe mwemwe ali numwana pamwi inkambaku nga iponele muchifula uwanda wakusolezya wuzye atanga akayifumye nanti kuzinguluka pawanda wakusolezyanye wowo?
6Ukuwa awasowa nichakutolelela kwevyonye-vyoo.
Ukuyichefya
7Yesu alolechesya kuno wane wisilwe wasolanga amasyo mazima ayakwikala, achaleka awumila umulumbe wonsi ati, 8Ndi uyisilwe nawumwi kuchakulya chawinga, utize uwakwikala pachilimba chizima. Amuno pamwi atele umuchindame wumwi wino akulusizye ayisilwe, 9ngapano wino akwisile wewe naweliwe ayize akunene ati, Leka wee ayikale paa. Paponye insoni zikuleme uye mukwikala kumasyo yakupelelechezya. 10Ukuwa uwala ndiwitwa, uya uyikala kumasyo yakupelelechezya, alyakuti wino akwisile ayize akunene ati, Wane, zanga apasanzame, pamasyo mazima. Peni apano ungatela wachindikwa kwakwe wonsi wano wisilwe. 11Amuno wensi wino akuyikuzya alichefwa, nawensi wino akuyichefya alikuzwa.
12Yesu anyoka anena wino wamwisile ati, Uwala ndiwateweta ichakulya chamusanya nanti achamanguzi, utakwita ivizuwa vyako, nanti awanyonko, pamwi nanti anko zyako, pamwi awawuyo awachindame amuno pamwi nawonye wangakwita ndiwachita wowonye watele wakulambula kwechino wawachitizile. 13Ukuwa uwala ndiwateweta ichakulya, uyita awasaluke, nawachikonta, nawalemale, nintonko, 14apano ulipepwa; amuno wasi nachino wangakulambula. Wenji ulilambulwa nu Leza pane awalungamane wiza wazyulupuka kumfwa.
Umulumbe wachakulya chikulu
(Mateyu 22:1-10)
15Ala umuntu wumwi wino wisile pachakulya wivwa wonye-woo anena Yesu ati, Awalongo awano waliyikala pachakulya mu Wufumu wakwe Leza!
16Yesu amunena ati, Kwalinji umuntu wumwi wino watewesile ichakulya chikulu, ayita awavule. 17Achila ichakulya chapalamila atuma umuwomvi wakwe ukuyanena awitwa ukuti, Yitawani, vyonsi vyasenganwa! 18Ukuwa wonsi awumila umulimonga, awavwamba utupemezyo. Uwakutalika anena umuwomvi ati, Nkazile ichalo, nkasi inje nkachilole; nazina nsinakwiza. 19Nawe winji ati, Nkazile ing'ombe zyavikonkoli ikumi napita nayazyelezya, nazina nsinakwiza. 20Winji ati, Nenji ntwazile kanonzinye, achaleka ntanga njize. 21Umuwomvi anyoka aya anena yisikulu ivintunye vyoo. Umwening'anda avitwa, anena umuwomvi wakwe ati, Pitisya yanga mumisolo namutuzila twamukaya, ukalete awasaluke, nawachikonta, nintonko, nawalemale. 22Nanti kuzimbanye umuwomvi aya ati, Tatakulu chino untumile chachitwa, naponye, uwikalo wuchili wulipo. 23Nga yisikulu anena umuwomvi ati, Yanga mwewakumba namunzila, uwakuwizya awantu wize, wizule mung'anda yane. 24Achaleka nkuwanena nkuti, Nawumwi uwawantunye wawo wane wisilwe wino aliyiza atome ichakulya chane.
Intazi zyakuwa wemusambilizi wakwe Yesu
(Mateyu 10:37-38)
25Amawumba makulu ayapita nu Yesu, Apiluluka awanena ati, 26Wensi wino wiza kwenene atanga awe amusambilizi wane suka ndiwatela wapata yisi nunyina, numuchi nawanakwe, awanyina ninkazi zyakwe, swinya wapata nuwumi wakwenye. 27Wensi wino wakana ukuyisendela uwuchingane wakwe nga ankonke atanga awe amusambilizi wane. 28Ndi wumwi pakwe mwemwe akulonda ukuzenga akapungu, akatela ayikala pansi pakutalika awazye indalama alole, ndizingakwila kumulimo wonsi. 29Ndi atanga achite wowonye atanga ayize amale ukuzenga akapungu ndi wimba ulufula; nawonsi wano wamulola wangatalika ukumuseka wakuti, 30Umuntu wee watalisile ukuzenga ukuwa kanonzi wapotwa ukumala! 31Ndi imfumu yakatuka nawantu imyanda ikumi impindi ikumi (10,000) ukuya mukulwa nimfumu yinji? yino ili nawantu imyanda ikumi impindi amakumi yawili (20,000) pakutalika, yazipila iyikala pansi iyipanzya ndi ili namaka yakulwa nimfumu mbuye. 32Ukuwa ndi asi namaka angatuma intumi zyakwe ukuya sunkania imfumu mbuye, pano ichili ukutali, ukulanjililana ivyamutende. 33Yesu apelelechezya namazwi yakuti, Awowonye, pasi wino angawa amusambilizi wane suka ndi watela wasya vyonsi vino ali navyo.
Umuchele wuno wutanona
(Mateyu 5:13; Marko 9:50)
34Umuchele wazipa, ukuwa ndiwasukuka pasi chimwi chino chingawunovya swinya. 35Wusiwa awuzima mumusili nanti apachituntululu; wukasumbwa. Achaleka nkuwanena nkuti, Wino ali namakutwi, ndayivwe!
Trenutno izabrano:
Luka 14: WWN82
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Chinamwanga Bible © United Bible Societies, 1981.
