Luka 12
12
Uwusoche kwewachawufi
(Mateyu 10:26-27)
1Walile awantu imyandanamyanda wawungana apaliponga, awalyatana nukulyatana, pakutalika Yesu anena awasambilizi wakwe ati, Chenjelani numutawa wawa Falisi—kuwufi wawo. 2Chonsinye chino chafumfunjizwa chiliwa palwenze, ninkama yonsinye ilimanyikwa. 3Achaleka mukula mukuvwanga mumfinzi achivwika apatiswe, nachino mukutokotezyania kuntanda chiliwumbulwa pamusonje papela.
Wino wazipila ukutinwa
(Mateyu 10:28-31)
4Nkuwanena mwemwenye, viwuza vyane, ukuti mutatina wano wakakoma umuwili ukuwa pansizi nanti kufungula chimwi. 5Ukuwa nawalanjizya uwakutina: tinanji e Leza, wino akula wakoma, alanga ali namaka yakusumbila mwilungu lyamulilo. Awenche, weyonye awino tinanji!
6Wuzye utusawa tusano tusikalwa amakopala yawili? Ukuwa pasi nanti konga akakwe tolito kano kakakwiwililwa nu Leza. 7Ninyele zyakumitwe yinunye zyonsi-pyu zyawazwa. Achaleka mutize muwatina; muli nuwuzi wukulu ukulusye nutusawa tuvule!
Ukuzumila mbali nukukana Klistu
(Mateyu 10:32-33; 12:32; 10:19-20)
8Nkuwanena nkuti, wensi wino akunzumila pankolelo pawantu, weyonye awino Umwana Muntu alimuzumila pankolelo pawangeli wakwe Leza; 9ukuwa wino akunkana pawantu, nawe Umwana Muntu alimukana pawangeli wakwe Leza.
10Wensi wino wiza wavwanjila Umwana Muntu uluwi alitetelwa; ukuwa wino wiza wiza wavwanjila e Muzimu Mwimichile uluwi chilimukulila.
11Ndiwiza wawatwala mung'anda zyakupepela nakuwalasi nakuzyamfumu mukupanzwa, mutize mwize muwasaya umwakuyichinjililila nanti amwakuvwanjila. 12Amuno pampindinye yoyo Muzimu Mwimichile aliwasambilizya ichakuvwanga.
Umulumbe wachiwelewele chichindame 13Wumwi piwumba amunena ati, Musambilizya, nena umwanawitu ukuti twankane ivipyana vino tata watusila.
14Ukuwa amutolelela ati, Wechimuntu-we, ngaweni wampa uwukapanzya, nanti akuwa nekankania winu mwewili? 15Alandalila ukuvwanga ati, Chenjelani, yisungani kwikumbuchila lyonsi; amuno uwumi wamuntu wusiwela kunsawo mvule yino ali nayo, chingatenga achindame muno-muno.
16Yesu awumila umulumbe ati, Umuchindame wumwi walinji nichalo chavizawalo vivule. 17Umwenechoayipanzya ati, nganachita wuli vino insi numwakulonga ivizawalo vyane. Nganchite wulimwe? 18Ati, Nandi nchite wonye-woo; namongola inkoma zyane nzenge inkulu, amuno ndonge ivizawalo ninsawo yane yonsi. 19Ngapano injinene inti, Wemuntu walongo-we! Kanonzi uli nivintu vyonsi vizima ivyakulandila kumyaka mivule. Sankananga, lyanga, ng'wanga, uwazewela! 20Ukuwa Leza amunena ati, Wechiliwese-we! Uwusikunye woo umwezo wako wukulondwa; ngafwandi vino vyasyala vilisyala avyakweni?
21Yesu apelelechezya namazwi yakuti, Avino chili kwewino akuyisengulila insawo ukuwa kwe Leza kweni nanti kuwotoka.
Suwilanji mwe Leza
(Mateyu 6:25-34)
22Yesu anena awasambilizi wakwe ati, Achaleka nkuwanena nkuti, Mutachitezele uwumi winu ukuti mwandi mulye chani, nanti akumiwili yinu ukuti mwazwala chani. 23Uwumi wakula walusya ivyakulya, nawo umuwili walusya ivizwalo. 24Silolani wakungwa: wasitanda nanti akusinza wasisinza; wasi nichitupa nanti ankoma; we Leza awino akawalela! Mwenji mwakula uwuzi mwalusya inyunyi! 25Ngaweweni pakwe mwemwe wino angayonjelezya imyaka kukutezela uwumi wakwe? 26Ndi mukapotwa ukuchita akatichinye kaa, ngamuno chani chino mukupechela vinji? 27Lolani amaluwa yalonde muno yakamelela; yasiwomba nanti akuvwamba ivyakuzwala. Ukuwa nkuwanena nkuti nanti we Solomoni-nye nukuchindama kwakwe konsi, atalinji nivizwalo viyembe ivizima ndivino amaluwanye yaa. 28Ukuwa we Leza awino akazwika isote — isote lino likula lilipo ilelo, awucha, alisumbilwa mwiziko. Wuzye fwandi mwenji atanga awazwike alusye? Ye, vino mwachepa isuwilo! 29Achaleka mutize muwakwinuluka penye, ichakuti mwandi mulye chani nanti ukuti mwandi mung'we chani. 30(Amuno imintamanya Leza wamunsinye yoo avino wakavwamba.) Eso wamanya vino mwasowelwa. 31Achino vwambanji Uwufumu wakwe, ngapano ayize awape ivintunye vyoo.
Insawo yamwiyulu
(Mateyu 6:19-21)
32Utatina, kawufyo katichi-we; amuno Umonsi winu wakunda ukuwapa Uwufumu. 33Kazyani ivinu vyonsi mupe awalanda indalama. Yisumilani utumyuwa twandalama tuna tutanga tulepuke, muyisengulile insawo mwiyulu, muno italitela ichepe, amuno umung'o atalitela asende, nanti akawunguzi ksaikonona. 34Amuno penye umwezo wako wukuwanga kuno kuli insawo yako.
Ukulolela kwawawomvi
35Yisenganianji kwechonsi chino chingiza, mupimpe chikale chiti-ndi munyepe imyenda yinu mumitembeleko mukozye ninkozyo zinu, 36muwe ngati awawomvi wano wakulolela yisikulu pano akuwela kuchakulya chapawinga. Alyakuti ndiwiza wakong'onsya, wafike wamwiyulile. 37Ye, awalongo wuli awawomvi wawonye wano akula yisikulu akwiza azana wakulola ukuti wamupochelele pano akwiza! Nkuwanena nkuti alinyepa umupango wakwe chikale chiti-ndi, aleke wikale pansi, awawapyunjila. 38Awalongo wuli ndi wiza wazanwa wakumulindilila chingatenga nanti akwiza uwusiku pakasi nanti ndiwachelwanye! 39Ukuwa yizukani chonye-choo! Kuno ndi umwening'anda amanyile impindi yino umung'o angizila, atanga aleke umung'o afotole ing'anda yakwe. 40Namwenye, yisenganianji, amuno impindi yino mutawisile insingo ayino Umwana Muntu aliyizila.
Umuwomvi musuwilwa pamwi umuntasuwilwa
(Mateyu 24:45-51)
41Peter ati, Mfumu, wuzye wumila sweswe umulumbenye woo pamwi nche wumila wonsi?
42Imfumu e Yesu ati, Nga umuwomvi wisuwilo ninjelu weweni? Awino yisikulu alimulasika pawusongo, ukusunga ing'anda nukulela awawomvi wawuye pampindi nzipile. 43Umuwomvi weyonye awili walongo wino alila yisikulu wiza azane akuchita wonyewoo! 44Awenche, nkuwanena nkuti, alilasika umuwomvi wakwe pansawo yakwe yonsi. 45Ukuwa ndi umuwomvi weyonye wavwanga mumwezo wakwe wati, Tatakulu wazimba ukwiza, paponye atalike awakuma awawomvi wawuye awonsi nawanachi, awalya, awang'wa nukung'wa mbali nukukolwa, 46eyisikulu wamuwomvi weyo ayize pampindi yino asinakulolela napampindi yino atamanyile. Yisikulu alimuputulania, amusumbile kuchipya chamintasuwila.
47Umuwomvi wino akamanya chino yisikulu akalonda ukuchita, nanti kuti asenganie achitile ndimuno yisikulu akulondela, alisundwa nivyumo vikulu; 48ukuwa umuwomvi wino atamanya chino yisikulu akulonda, alanga akuchita vino vyazipila ivyumo, aliyumwa nivyumo vitichi. Numuntu wensi wino wapwa ivivule, kweweliwenye akuno vililondwa ivivule, nakwewino walemekwa ivivule nkani, kwakwe weyonye akuno kulilondwa ivilusye.
Awantu walipawunkana amuno we Yesu
(Mateyu 10:34-36)
49Niza sonteka umulilo munsi, changa chizipe chilusye ndachino wutele wapembwa kali! 50Indi nibatizyo lyakupochelela; ye, nalemenchezwa wuli apakutilisile! 51Wuzye mwenji mukuti niza leta umutende munsi? Nkuwanena nkuti, Ng'o, ukuwa akupawunkania. 52Amuno ukufumilila kanonzi ukuya kunkolelo wasano awapachiwanza walipawunkana, watatu wasambuchile wano wali wawili, nawo wane wali wawili awasambuchila wano wali watatu. 53A-wakwasi walisambuchila awana wawo awachonsi, nawo awana wasambuchile wayisi; wanyina walisambuchila awana wawo awachanachi, nawo awana wasambuchile wanyina; nawanyinavyala wasambuchile wanyinavyala wana, nawanyinavyala wana wasambuchile wanyinavyala.
Chino impindi ikusula
(Mateyu 16:2-3)
54Swinyanye Yesu anena awantu ati, Mukula mwalola amawingo yakwiza yafumilila kasika, paponye amuti imvula yakwiza, nachawuzimanye iyiza, 55Swinya ndimwalola umuza wakambazwa wukupupa, amuti, Kwandi kulungulisye, nachawuzimanye akulungula. 56Mwewakachenjezya-mwe! Mukalola ivyamunsi nivyamupela amumanya chino chikusula; ngafwandi, amuno chani, mutamanya chino impindinye yoo ikusula?
Ukulanjililana nusimilandu
(Mateyu 5:25-26)
57Ngamuno chani chino musiyipanzya mwewenecho chino mungachita? 58Ndi similandu wako wakutwala kwipembo lyamilandu, chazipila uchita ichete amulanjililana pano mukupita, alyakuti atize awakukwema akukutwala kwekapanzya, nawe kapanzya akulemeke kumusilikali, nawe umusilikali akutwa le mung'anda yavingololo. 59Nkuwanena nkuti, mutanga mufume mwenemo nawanda, musuke mulipe nikopala lyakupelelechezya.
Trenutno izabrano:
Luka 12: WWN82
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Chinamwanga Bible © United Bible Societies, 1981.
