Luka 10
10
Yesu atuma amakumi munenulambali nawawili
1Pansizi pavintunye vyoo Imfumu e Yesu asontola wanji amakumi munenulambali nawawili, atuma wawili wawili pankolelo peweliwemutwaya tonsi namumasyo yonsi kuno walondanga ukuya. 2Awanena ati, ivisezwa vyavula amasika, ukuwa awawomvi wakusezya wachepa. Lambilizyanji umwenimasika atume awawomvi kukusezya ivyakulya vyakwe. 3Pitani! Nawatuma ngati awanang'onzi mukasi mumpumpi, 4Mutasenda akamuwa kandalama, nant'achakupempela, nanti andyatu; mutize muwakwimilila amulamuka umuntu wumwi munzila. 5Muwala mung'anda yino mwafichila, amutalika amuti, Umutende wuwe mung'andanye yoo. 6Ndi mung'anda muli umuntu wamutende, umutende winu awikala mumuntunye weyo; ukuwa ndi nawumwi umutende winu awuwanyochela. 7Amwikala mung'andanye yoyo, amuwalya nukung'wa vino wawateweta, amuno umuwomvi wazipila ukulambulwa. Kusikwezya ukupitapita muzyang'anda. 8Muwala mukaya kano mwinjila, ndiwawapochelela amulya vino wawateweta, 9amupozya awalwale wano wali mwenemo, amuwanena amuti, Uwufumu wakwe Leza wapalamila pakwe mwemwe. 10Ukuwa mukaya konsi kano mwiza mwaya mwenemo nanti kuti wawapochelele, amuya pamusolo pakasi amuti, 11Nitukumbunye ilyamukaya kinu, lino lyakakatila kumatamba yitu twawakunkumulila mwewenecho; ukuwa yizukani choo, Uwufumu wakwe Leza weni wapalamila kwemwemwe! 12Kweni nkuwanena nkuti, pawanda wipanzyo Leza alifwila Sodomu inkumbu ukulusye akayanye kako!
Utwaya tuno tutalinji nisuwilo
(Mateyu 11:20-24)
13Akalanda kasikolo, kwewewe Korazini! Nawenye akalanda wuli, we Betisaida! Ndachino ivyakuzungusya vino vyachisilwe mwakwe mwemwe vyanga vichitwe mwe Ture na mu Sidoni, ngali awamwenemo watontolosilwe kalinye, awikala pansi awazwala amasanko, awayikunchila nitoyi ukulanjizya ukutontolokwa kwawo! 14Pawanda wipanzyo Leza alifwila Ture nu Sidoni inkumba, mwenji pole. 15Ukuwa wenji we Kapemahumi! Wuzye walondanga ukuyitumpulila mwiyulu? Ulisumbilwa mwilungu lyamulilo!
16Yesu anena awasambilizi wakwe ati, Wensi wino akuwivwa mwemwe atela akunjivwa nene; nawensi wino akuwakana, atela akunkana nenenye; nawe wino akunkana nene, atela akukana wino wantuma.
Amakumi munenulambali nawawili wano watumilwe awanyoka
17Wawo amakumi munenulambali nawawili awanyoka nichimwemwe chikulu. Awafika awati, Mfumu, nimizimu miwipenye yatutontelanga ndi twayikalipilila mwizina lyako!
18Yesu awatolelela ati, Naweni Satana wapungumuka wapona ukufuma mwiyulu ngati ankuwa. 19Yivwani! Nawapa uwukankala wakulyatanjila inzoka namakalayili, nukulyatanjila aamaka yonsi ayamulwani, pasi chimwi chino chiliwachisa. 20Ukuwa mutize muwazewela muno imizimu miwipe ikuwatina; ukuwa sechelanji amuno amazina yinu yawalikwa mwiyulu.
Ichimwemwe achilema Yesu
(Mateyu 11:25-27; 13:16-17)
21Pampindinye yoyo ayizuzwa nichimwemwe nu Muzimu Mwimichile, ati, Tata, we Mfumu Leza wamwiyulu namunsi! nkukusalifya amuno walanjizya kumintamanya vino wafisa kuwachenjele nawamano. Eta, Tata, wachisile chonye-choo nukulonda kwako ukukulu.
22E Tara wampa ivintu vyonsi. Swinya pasi wumwi wino wamanya Umwana nkandi Umukwasi, swinya pasi wumwi wino wamanya Umukwasi nkandi Umwana nawano Umwana wawawumbulila.
23Ngapano Yesu apiluluchila kuwasambilizi awanena pano walinji wonga ati, Ye mwewalongo wuli, pakulola ivintu vino mukulola! 24Nkuwanena nkuti awatumwa wavulenye nizyamfumu walondanga ukulola vino mwemwe mukulola, ukuwa watatela wavilole, nanti akwivwa vino mwenji mukwivwa, ukuwa watatela wavivwe.
Umulumbe wa muSamariya muzima
25Umusambilizya wamasundo wumwi wayile ukuti akelezya Yesu. Afika ati, Musambilizya, nganaz ipila nchita chani alyakuti mpochelele uwumi wamuyayaya?
26Yesu amutolelela ati, Nga Amawaliko matele yakati wuli? Nga mukayalondolola mukuti wuli?
27Umuntu amutolelela ati, Uwakunda Imfumu e Leza wako numwezo wako wonsi, numuzimu wako wonsi, namaka yako yonsi, namano yako yonsi; swinya, nukukunda umuwuyo ndivino wayikunda.
28Yesu ati, watolelela molimonye, alefwandi chitanga wonye-woo apano ulilandila.
29Ukuwa weni umusambilizya wamasundo walondanga ukuyizifizya, achaleka awuzya Yesu ati, Ng'uwunji weweni?
30Yesu atolelela ati, Kwalinji umuntu wino wafumile kwe Yerusalemu wayang a ku Jeriko, wakapoka awamuvundumuchila, awamuzula, awamuma, awamusya akulonda nukufwa. 31Simapepo wumwi wapitanga munzilanye yoyo; ala walola umuntu alola kumbali apambata awapita. 32Numu Levi-nye awowonye ala wafika paponye, apalamila alola umuntu, alola kumbali apambata awapita. 33Ukuwa umuSamariya wumwi wino nawenye wapitanga munzilanye yoyo amutuluchizya, ala wamulola ichilanda achimulema. 34Apalamila, amwitila amafuta nipala pavilonda vyakwe amunyepela nukumunyepela; amukwezya napanyama yakwe amutwala kung'anda yawapitanzila, awamusunga. 35Uwacha asenda indalama ntiswe ziwili apa kasunga wang'anda yawapitanzila. Ati, Musungange, ngandi niza nawela ndiyiza nkulipe vyonsi vino wonona pakumusunga.
36Yesu apelelechezya namazwi yakuti, Ngawenji ukwelengania ukuti weweni pakwe wanye-waa watatu wino walinji amuwuye numuntu wino wakapoka wamumile?
37Umusambilizya wamasundo ati, Wino wamufwizile inkumbu.
Yesu amutolelela ati, Ale fwandi pitanga, ukachitange wowonye.
Yesu asyungula Marita nu Mariya
38Ala pane Yesu nawasambilizi wakwe wali pamusinzo, afika mukaya kamwi muno umwanachi e Marita wamupochelezile mung'anda yakwe. 39Marita walinji numunyina e Mariya, wino wisile pamanama ya Mfumu alanga akumwivwa pano akusambilizya. 40Marita afulichilwa pakupinkintika kumilimo yonsi yino wawombanga; achaleka wayile ati, Mfumu, wuzye utapechezile kuno umwanawitu andechezile ukuwomba imilimo yonsi nenga? Munene uleke ayize anjavwe!
41Imfumu e Yesu amutolelela ati, Marita, Marita! Ukusaya mbali nukutamika nivintu vivule, 42ukuwa chikulondwa ichintu chonga. Chino Mariya wasola achintu chizima, chitalipokwa kweweliwe.
Trenutno izabrano:
Luka 10: WWN82
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Chinamwanga Bible © United Bible Societies, 1981.
