Intaliko 4
4
Keni nu Ebelo
1Adamu amanya umuchi Eva, amupa uwula, apapa Keni, ati, Napochelela umwana ukufuma ku Mfumu e Leza. 2Swinya apapa nu Ebelo umunyina. Nu Ebelo awa we kachema wa ng’onzi, ukuwa Keni walinji we kalima wa musili. 3Yalanga pano amanda yapita Keni afima ivya vizawalo vya mu musili ku Mfumu e Leza, 4nu Ebelo nawe wafimile inyama none iyakwe wakatote wa mu wufyo wakwe. Imfumu e Leza wapochelezile ivifimwa vino Ebelo wamufimizile, 5ukuwa nanti kupochelela ivifimwa vino Keni wafimile. Achaleka Keni avitwa nkaninye, afwilimana. 6Ngapano Imfumu e Leza wawuzizye Keni ati, Nga wavitwa chani? Nga impumi yako yafwilimana chani? 7Wuzye ndi utele uchisile ichete, wuzye utanga upochelelwe? Ukuwa ndi utachisile chete, uluwembu lukukulindilila pa mulyango: lukukulindilila wewe, ukuwa wazipila ukuluchimvya.
8Keni anena Ebelo umunyina ati, Tuye mu lutala, ukuwa awala pano wali mu lutala, Keni apiluchila Ebelo umunyina amukoma. 9Ngapano Imfumu e Leza awuzya Keni ati, Nga umunyonko Ebelo ali kwi? Nawe atolelela ati, Manyi; nsa nene nkasunga umwanawitu? 10Nawe Imfumu e Leza ati, Nivwa ukupoma kwa wazi wa munyonko watantala pa musili wukundilila. 11Achaleka watipwa nu musili, wuno wukupochelela uwazi wa munyonko wuno wafuma kwakwe wewe. 12Ponsi pano wandi uwalima, umusili wutalikulambula nkani; ukuwa wandi uwatamika mu mwezo nu kusowa iteko munsi. 13Keni anena Imfumu e Leza ati, Ukusundwa kwane kwakulisya swinya kwamvinda. 14Silola wambinga nene ilelo lyoo pa musili; na pankolelo pakwe wewe ukuti imbe ne wavye indalulumba munsi, na wensi wino wiza wanzana alinkoma. 15Apano Imfumu e Leza amunena ati, Chisi awowo! Wensi wino wiza wakoma Keni, alilandulwa impindi munenulambali. Nga Imfumu e Leza awika Keni ichakumanyichilwa, ukuti wensi wino wamuzana atize amukome. 16Nga Keni afuntuka pa Mfumu e Leza, aya ayikala munsi ya Nodi lwa kapela kakwe Edeni.
Ikwata lyakwe Keni
17Keni amanya umuchi, amupa uwula ngapano apapa Enoki; azenga na kaya kakulu, akita izina ati, Inoki, lino lyalinji a lizina lya mwanakwe umonsi. 18Nu Enoki nawe apapa Iradi; nawe Iradi apapa Mehujaeli, nu Mehujaeli apapa Metusaeli, nu Metusaeli apapa Lameki. 19Lameki watwazile awanachi wawili; wumwi walinji we Ada, nu muwuye walinji we Zila. 20Ada apapa Jabali; wino walinji we yisi wakwe wano wakwikalanga mu mitanda wakateka wavikwato. 21Ni zina lya munyina walinji we Jubali; wino walinji we yisi wakwe wano wakalizya wa nsangonsango na wapembe. 22Zila apapa Tubali-keni; wino walinji we musyani wa viwombelo vyonsi ivya vyela vya mukuwa nga ni chela. Ni nkazi yakwe Tubali-keni walinji we Naama.
23Lameki anena awachi ati,
We Ada nu Zila, yivwani izwi lyane.
Mwe wamuka Lameki njivwani.
Amuno nakoma umuntu wino wandasa,
umulumendo pakunjuma.
24Ndi Keni walandulw’ impindi munenulambali,
Nachawuzimanye e Lameki weni alilandulwa impindi amakumi
munenulambali ni mfumila munenulambali.
25Swinya Adamu amanya umuchi amupapila umwana amwita izina ati, we Seti, ati E Leza wampa umwana winji impyani pakwe Ebelo, wino Keni wakomile. 26Nu Seti nawe apapa umwana, amwita izina ati we Enosi. Ukufumilila paponye awantu watalisile ukupepa ku Mfumu e Leza.
Trenutno izabrano:
Intaliko 4: WWN82
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Chinamwanga Bible © United Bible Societies, 1981.