മത്തായി 4
4
ഏസു സോദണെപഡ്‌റാ്
1അദ്‌ക്ക് പ്‌റ ഏസുണ സെയിത്ത്യാ് സോദണെ സെയ്യ ബേ്ണ്ടി സാമിണിഗാല് ബെ്ട്ടെകാഡ്‌ക്കെ കൂട്ടി പോറ്റു. 2അദിലി ഏസു ഇ്റ്‌ട്ട്‌പഗാല് ണാപ്പദ് ണാള് തീനി തിന്നാത്ത പരേസ പരേസി കൊണ്ടിര്‌ന്താ്. അദ്‌ക്ക് പ്‌റ ഏസുക്ക് പജി പ്‌ഡിത്ത്‌ദ്. 3അക്കുളെ സോദണെ സെയ്‌രവാ് ഏസുദ് അര്‌ഗെ ബന്ത്: <<ണീ സാമിദ് മഗാ് ആയിര്‌ന്താക്കി ഈ കല്ല്‌ഗണ അഡെ ആയ സൊല്ലക്കന>> എന്ത് സൊല്ലിറ്റ്.
4അദ്‌ക്ക് ഏസു: << <മന്‌സാ് അഡേന താനെ തിന്തല്ല ഉജുറു പെ്ളേക്കാദ്, സാമിദ് ബായിലിര്‌ന്ത് ബര ഒരൊരു ണായഗണാലേമ് ഉജുറു പെ്ളേക്കാര്>#മറ്‌ദെ സൊല്ലുറ സട്ട 8:3 എന്ത് എ്ള്‌ദിര്‌ക്ക്‌ദ്>> എന്ത് സൊന്നാ്.
5അദ്‌ക്ക് പ്‌റ സെയിത്ത്യാ് ഏസുണ സാമിക്ക് പട്ട എര്‌സലേമ് പട്ടണാക്കെ കൂട്ടി പോയി, സാമികൂരേദ് മ്‌ഗാള്‌ക്കുദ്ദാക്ക് ഒരേപെ്ട്ട് ഉജാന്ത പട്ട്‌ക്ക് ണില്ലിസിര്‌ന്ത് ഏസുക്കെ: 6<<ണീ സാമിദ് മഗാ് ആനക്കന ഇദിലിര്‌ന്ത് അഡി ഗുദി. എന്ത്‌ക്കെന്റ,
<ണിനാണ പറ്റി സാമി തന്ന് ദൂദലാക്കെ സൊല്ലുവാ്.
അവാര് ണിന്ന് കാല് കല്ല്‌ക്കെ തട്ടാദെ ഇര്‌ക്ക്യ ബേ്ണ്ടി
ണിനാണ കയ്യിക്കെ താങ്കി എ്ഡ്‌ക്കുവാര്>#സാമി പാട്ട് ബുക്ക് 91:11,12
എന്ത് എ്ള്‌ദിര്‌ക്ക്‌ദല്ല?>> എന്ത് സൊല്ലിറ്റ്.
7അക്കുളെ ഏസു അയ്യി ജാദിക്കെ: << <ണിന്ന് സാമ്യാന ആണ്ടവാന സോദണെ സെയ്യ ബേ്ഡ> #മറ്‌ദെ സൊല്ലുറ സട്ട 6:16എന്ത് ഗൂഡി എ്ള്‌ദിര്‌ക്ക്‌ദല്ല?>> എന്ത് സൊന്നാ്.
8പിന്നേമ് സെയിത്ത്യാ് ഒരേപെ്ട്ട് ഒരു ഉജാന്ത മലെ ഉച്ചിക്കെ കൂട്ടി പോയി ഉലഗാത്തില്യ മുച്ചുഡ ണാഡ്‌ഗണാമ് അദ്‌ദ് മദ്‌പ്പ്‌ണാമ് കാട്ടി: 9<<എന്ന് കാല്‌ക്കെ ബ്‌ന്ത് എനാണ കുമ്മുഡ്‌റദാനാക്കി ഇദ്‌ണ ഒട്ടുക്ക് ണാന് ണിനാക്ക് തരെ>> എന്ത് സൊല്ലിറ്റ്.
10അദ്‌ക്ക് ഏസു: <<സെയിത്ത്യാനെ, എനാണ ബ്‌ട്ട് കഡാന്ത് പോ. <ണിന്ന് സാമ്യായിര്‌ക്ക ആണ്ടവാനമാട്ട് കുമ്മുഡികൊണ്ട്‌മ് അയ്യി സാമിക്ക് പ്‌ഡിക്ക കാര്യഗണമാട്ട് സെയ്‌ദ് കൊണ്ട്‌മ് ണഡാക്കുഡൊ>#മറ്‌ദെ സൊല്ലുറ സട്ട 6:13 എന്ത് എ്ള്‌ദിര്‌ക്ക്‌ദല്ല>> എന്ത് സൊന്നാ്.
11അക്കുളെ സെയിത്ത്യാ് ഏസുണ ബ്‌ട്ട് പോനാ്. പ്‌റ സാമിദൂദല ബന്ത് ഏസുക്ക് ബേ്ഡുമാനാദ് സെയ്‌ദ് കൊഡുത്താര്.
ഏസു ഗെലീലേലി ബേലെന സെയ്യ പ്‌ഡിക്കാ്
12ഓഗന്നാന പ്‌ഡിത്ത് ജെയില്‌ക്കെ ഇക്കിന സേദിന ഏസു കേ്ക്കാട്ടി ഗെലീലെ ണാഡ്‌ക്കെ തിലിമ്പി പോനാ്. 13അയാള് ണസറത്തിലിര്‌ന്ത് ഗെലീലെ കഡാലോരാത്തിലി പെ്ളേക്ക സെബുലൂന് കാല്‌ക്ക് പട്ടവാര്‌മ് ണപ്‌ത്താലി കാല്‌ക്ക് പട്ടവാര്‌മ് ഇര്‌ക്ക കവറ്‌ണഗൂമ് പട്ടണാക്കെ പോയി പെ്ളേത്താ്. 14-16ഏസു അച്ചെ പോയി പെ്ളേത്താദ്,
<<കഡാലോരാത്തിലിര്‌ക്കാദ്‌മ് ഓറ്‌ദ്ദാ് ബാനിദ് അയ്യേ്ട്ടി ഇര്‌ക്കാദ്‌മ്
എഗുദാര് അല്ലാത്ത ജാദിഗാദ് ഗെലീലെ എങ്ക ണാഡ്‌മ്‌ത്തെ
സെബുലൂന് കാല്‌ക്ക് പട്ടവാര്‌ദ്‌മ്, ണപ്‌ത്താലി കാല്‌ക്ക് പട്ടവാര്‌ദ്‌മ് ണാഡ്. ഇ്റ്‌ട്ട്‌ക്കുള്ളുക്ക് പെ്ളേക്ക ഈ ണാഡില്യവാര്
ബെല്ല്യൊരു ബെ്ള്‌സണ കണ്ടാര്.
സാവുക്ക് അഞ്ചി പെ്ളേത്തിര്‌ന്ത ഇവാര്‌ക്ക്
ബെ്ള്‌സ അഡിത്ത്‌ദ്>>#എസയ്യാ് 9:1,2
എന്ത് എസയ്യാ് സാമിദാസ് സൊന്നാദ് അദേപാസെ ണഡാക്ക്യ ബേ്ണ്ടിത്തെ.
17അയ്യി ണാളിലിര്‌ന്ത് ഏസു: <<സാമി ആള്‌റാദ് ണിമ്മ്‌ദ് കാല്‌ക്കെ ബന്ത് എജ്ജിര്‌ക്ക്‌ദ്. അദ്‌ണാലെ പാവ സെയ്‌രാദ്‌ണ തള്ള്യെക്കി സാമി സാരി തിലിമ്പിരി>> എന്ത് ബെല്ല്യാദ്‌ക്ക് ആലാത്ത് ആലാത്ത് സൊല്ല്യ പ്‌ഡിത്താ്.
ഏസു തന്ന് സൊല്ലുപഡി ണഡാക്ക്യ ണാല് ആള്‌ഗണ ഒളേക്കാ്
18അച്ചെ ഏസു ഗെലീലെ കഡാലോര മേലെ ണഡാന്ത് പോഗാട്ടി സീമോന് എന്ത് ഒളേക്ക പത്ത്‌റോസ്‌മ് അവാന്‌ദ് തമ്പി അന്ത്‌റോസുമ് കഡാലിലി ബലെ ബീസികൊണ്ടിര്‌ക്കാദ്‌ണ കണ്ടാ്. അവാര് റണ്ട് ആള്‌മ് മീന് പ്‌ഡിക്കവാരായിര്‌ന്താര്. 19<<ണിമ്മ എന്ന് പിന്ന്‌മേലെ ബായി. മീന് പ്‌ഡിക്കവാര് മീന് പ്‌ഡിക്ക പാസെ ണാന് ണിമാണ സാമി ആള്‌റാദ്‌ക്കെ മന്‌സാര്‌ണ സേത്ത്‌റവാര് ആക്കുവെ>> എന്ത് ഏസു അവാര്‌ക്ക് സൊന്നാ്. 20അപ്പ്‌താനെ അവാര് റണ്ട് ആള്‌മ് ബലേന തള്ള്യെക്കി ഏസു പിന്ന്‌ക്ക് പോനാര്.
21ഏസു അദിലിര്‌ന്ത് ലേസ അക്കോസ പോഗാട്ടി, അണ്ണതമ്പില ആന ബേ്റെ റണ്ട് ആള് തോണിലി തമ്മ്‌ദ് അപ്പാ് സെവെദ്യോഡെ ബലേന പിരിബ്‌ഡ്‌സ്‌റാദ്‌ണ കണ്ടാ്. അവാര് സെവെദിദ് മഗനാരാന ആക്കോവുമ് അവാ് തമ്പി ഓഗന്നാന്‌മ്‌ത്തെ. ഇവാര്‌ണാമ് ഏസു ഒളേത്താ്. 22അവാര്‌മ് അപ്പ്‌താനെ തോണിനാമ് തമ്മ്‌ദ് അപ്പനാമ് തള്ള്യെക്കി ഏസു പിന്ന്‌ക്ക് പോനാര്.
ഏസു ണോയിക്കാറാര്‌ണ തെ്ള്‌സ്‌റാ്
23പ്‌റ ഏസു ഗെലീലെ ണാഡ്‌ദ് എല്ല എ്ഡേഗാക്കേമ് പോയി എഗുദാര് പരേസ്‌റ കൂരെക്ക്‌റാഗ പഡിസികൊണ്ട്‌മ് സാമി ആള്‌റാദ്‌ണ പറ്റി സൊല്ലുറ ണല്ല സേദിന ആള്‌ഗാക്ക് സൊല്ലികൊണ്ട്‌മിര്‌ന്താ്. അയ്യി ഗള്യേലി ആള്‌ഗാക്ക് തട്ടിര്‌ക്ക എല്ല ദിന്‌സ് ണോയിഗണാമ് ഗെര്‌ഗ ബ്‌ന്തിര്‌ക്കവാര്‌ണാമ് അയാള് തെ്ള്‌സിനാ്. 24ഏസുണ പറ്റ്യുള്ള സേദി സ്‌റ്യ ണാഡ് മുച്ചുഡ പാസിറ്റ്. അദ്‌ണാലെ ആള്‌ഗ പല ദിന്‌സ് ണോയിഗ തട്ടി കജട്ടപട്ടിര്‌ന്തവാര്‌ണ മുച്ചുഡാമ് അയാള് പട്ട്‌ക്ക് എ്ഡ്‌ത്ത് ബന്താര്. അവാര് കൂട്ടാത്തിലി ബിജഗാക്ക് അഗാറിര്‌ന്തവാര്‌മ്, കെ്ട്ടജാദി തട്ടി പിരാന്ത് ബ്‌ന്തിര്‌ന്തവാര്‌മ്, പക്കിമെ്ട്ട് ണോയിക്കാറാര്‌മ്, സപ്പെ ണോയിക്കാറാര്‌മ് ഇര്‌ന്തിര്‌ന്താര്. ഏസു അവാര്‌ണ തെ്ള്‌സിനാ്. 25അച്ചെ ഗെലീലെ, ദെക്കെപൊലി, എര്‌സലേമ്, എഗുദ എങ്ക എ്ഡേഗളിലിര്‌ന്ത്‌മ് ഓറ്‌ദ്ദാ് ബാനിക്ക് അയ്യേ്ട്ടിര്‌ക്ക എ്ഡേഗളിലിര്‌ന്ത്‌മ് ബെല്ല്യൊരു ആള്‌കൂട്ട ഏസു പിന്ന്‌ക്ക് പോനാര്.
Trenutno izabrano:
മത്തായി 4: സാമിദ് സേദി
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
New Life Literature
