ዋ̈ኒ̇ሳ 17
17
ዬሱ̈ሲ ፌ ቆሚ̇ምቦ ዎ̈ሲ̇ዴ
1ዬሱ̈ሲ ዪኖ̇ ሶ̈ሊኖፖ̇ ዓኒ ፉዳ ኣፋ ሾክ ጋ̈ር ቤቃ̇ሪ “ታ ባ̈ባ̈ዶ! ኬሊ̇ን ዬሊ̇ኔ፤ ቴ ኔ ናኣ ኔ̈ና ቦንቻ̇ምፔ̈ኒ ኔ ታ̈ና ኔ ናኣ ቦንቻ̇ቤ። 2ኔ ታ̈ብ ኢሚ̇ኖ ኣሳንቦ ዎይ ታ̈ኒ ሜናብ ሼምፓባር ዶኢ ኢማ̇ምፔ̈ኒ ኔ ታ̈ቦ ኣስ ጌይዛ ዎይ ጋልዳ ሲልጣ̈ና ኢሚ̇ኔ። 3ሜናብ ሼምፓባር ዶኢ ጋ̈ዚንዳ፥ ኪን ጾ̈ስ ማ̈ቂ̇ኖ ኔ̈ና ኤራዚንዲኬ ኔ ኪ̈ታ̇ር ሚሺኖ ዬሱ̈ስ ክርስቶ̈ሳ ኤራዚንዶ̇። 4ኔ ታ̈ብ ኢሚ̇ኖ ኦ̈ሲ̇ን ኦ̈ ፎታራ ሳ̈ዝ ጋልዳ̇ ቴ ኔ̈ና ቦንቺ̇ሳዴ። 5ቴ ባ̈ባ̈ዶ! ሳ̈ዝ ኤ̈ሺ̇ን ኮቺ̇ንታካ̇ይዶ̈ን ታ̈ብ ኔ ቲ̈ን ዎ ቦንቺ̇ንዲፌ̈ኒ ዓት ኔ ታ̈ና ኢዝፌ̈ን ኔ ቲ̈ን ቦንቻ̇ቤ።
ዬሱ̈ሲ ፌ ታማ̈ራንቦ ዎ̈ሲ̇ዴ
6“ኣላሚን ዓና̇ ጋርታ̇ፖ̇ ኔ ታ̈ብ ኢሚ̇ኖ ኣሳንቦ ቴ ኔ̈ና ኤሪሳዴ፤ ኢንቲ̇ ኔዪዶ̈ን ኔ ኢንታ̇ ታ̈ብ ኢማ̇ዴ፥ ኢንታ̇ር ኔ ቃ̈ሊምቦ ኪ̈ቲንቲ̇ዴ። 7ኔ̈ኒ ታ̈ብ ኢሚ̇ኖ ባዛን ዎይ ኔ̈ፖ̇ ታ̈ብ ዬይኖን ኢንቲ̇ ዓት̇ ኤሪኔ። 8ኔ ታ̈ብ ኢሚ̇ኖ ቃ̈ሊን ቴ ኢንታ̇ብ ኢሚ̇ኔ ኢንታ̇ሬ ኢዞ ኤኪ̇ኔ። ታ̈ናሬ ኔ̈ካፖ̇ ዬይኖን ኪንባር ኢንቲ̇ ኤሪኔ፤ ታ̈ና ኪ̈ታ̇ር ሚሺኖ ኔ̈ና ማ̈ቂ̇ኖን ኢንቲ̇ ኣማ̇ኒኔ።
9“ኢንቲ̇ ኔዪ ማቂኖኮታ̇ቦ ቴ ኢንታ̇ብ ዎሳ̇̈ሬ፤ ቴ ዎ̈ሳዚንዳ̇ ኔ ታ̈ብ ኢሚ̇ኖንቦዶኬ ኣላሚን ጋልዳ̇ ዎ ኣሳንቦ ዎይ ዎ̈ሳ̇ባሴ። 10ቴዪ ማ̈ቂ̇ኖ ባዝ ዎይ ኔዬ̇። ኔዪ ማ̈ቂ̇ኖን ዎይ ቴዬ̇። ታ̈ናር ኢንታ̇ባር ቦንቺ̇ንቲ̇ኔ። 11ዪዚ ዓኒፖ̇ ጌዳ ታ̈ኒ ሳ̈ዝ ዓና̇ ጋልዳ̇ ጋምኣባሴ፥ ኢንቲ̇ ዓኒ ሳ̈ዚን ጋልዳ ዎ። ቴ ኔ̈ክ ዬ̈ሬ፥ ጌ̈ሻ̇ ቴ ባ̈ባ̈ዶ! ኔ̈ናክ ታ̈ናክ ዎል ፔታ̇ን ማ̈ቂኖንዲፌ̈ን ኢንታ̇ር ዎል ፔታ̇ን ማ̈ቃምፔ̈ን ኔ ታ̈ብ ኢሚ̇ኖ ኔ ሱምምባ̇ር ኢንታ̇ ና̈ጋቤ። 12ቴ ኢንታ̇ባር ዎምባራ ኔ ታ̈ብ ኢሚ̇ኖ ሱ̈ሚምባራ ኢንታ̇ ና̈ጊኔ። ጌ̈ሻ̇ ማጻ̈ፋ ጋልዳ ጻ̈ፊንቲ̇ኖ ቃ̈ላ ፎቲንታ̇ምፔ̇ኒ ያንፔ̈ን ዎሳ̇ኒንቲ̇ኖ ና̈ሳ ሙታ̇ዶኬ ኢንታ̇ ጋርታ̇ፖ̇ ኦ̈ናካር ያካ̇ዬ። 13ዓት ቴ ኔ̈ክ ሉካ̈ሬ፥ ታ̈ኒ ኣላሚን ጋልዳ̇ ዎ̈ምባ̇ራ ዓኖ̇ ኢንታ̇ብ ሶ̈ላዚንዳ̇፥ ኢንታ̇ ቡ̈ዳ ጋርታ̇ ኡፋይሲ̇ ዎይላምፔ̈ኔ።
14ቴ ኔ ቃ̈ሊን ኢንታ̇ብ ኢሚ̇ኔ፤ ታ̈ኒ ዓና̇ ኣላሚን ጋልዶ ኣስ ጊዳካ̇ዮንዲፌ̈ኒ ኢንታ̇ሬ ዓና̇ ኣላሚን ጋልዶ̇ ኣስ ጊዳካ̇ዮኮታ̇ቦ ዓኒ ኣላሚን ጋልዶ ኣሳን ኢንታ ኢጺ̇ኔ። 15ቴ ኔ̈ና ጌሻዚንዳ ኔ ኢንታ̇ ሴ̈ጣና ኩሽታ̇ፖ̇ ና̈ጋምፔ̈ንዶኬ ዓኒ̇ ኣላሚን ጋልዳፖ̇ ኢንታ̇ ኬሳ̇ምፔ̈ን ጊዳካዬ። 16ታ̈ኒ ዓኒ ኣላሚን ጋልዶ̇ ኣስ ጊዳካ̇ዮንዲፌ̈ን ኢንታ̇ሬ ዓኒ ኣላሚን ጋልዶ̇ ኣስ ጊዳካ̇ዬ። 17ኔ̈ ኢንታ̇ ኔ ኪን ቃ̈ሊምባ̇ር ጌ̈ሻ̇ቤ፥ ኔ ቃ̈ላዲ ኪን። 18ኔ ታ̈ና ዓኒ̇ ኣላሚን ጋልዳ̇ ኪ̈ታ̇ር ሚሺኖንዲፌ̈ኒ ታ̈ናር ኢንታ ኣላሚን ጋልዳ̇ ኪ̈ታ̇ ሚሻዴ። 19ኢንቲ̇ ፌ ኣሲቲን ዉርሲ ኔ̈ዪ ማ̈ሳምፔ̈ኒ ታ̈ናር ታ ኣሲቲንዶ ዉርሳ ኔ̈ብ ኢሚ̇ኔ።
ዬሱ̈ሲ ኢያ ኣማ̇ኒኖ ኣሳን ዎይንቦ ዎ̈ሲ̇ዴ
20“ኢንታ̇ ቃ̈ሊን ሲስካ̇ር ታ̈ና ኣማ̇ኒዛንቦ ዎይ ዎ̈ሳ̇ርዶኬ ኢንታ̇ብ ሙታ̇ ዎ̈ሳባሴ። 21ዪ̈ዳሬ፥ ቴ ባ̈ባ̈ዶ! ኔ ታባር፥ ታ̈ናር ኔባር ዎንዲፌ̈ኒ፥ ኢንታ̇ር ዎይ ዎልኣ ፔታ̇ን ማ̈ቃ̇ምፔ̈ኒ፥ ማ ኔ ታ̈ና ኪ̈ታ̇ር ሚሺኖን ኣላማ ጋልዳ ዎ ኣሳን ኣማ̇ናምፔ̈ኒ፥ ኢንታ̇ር ኑባር ፔታ̇ን ማ̈ቃ̇ምፔ̈ን ቴ ኔ̈ና ጌሻ̈ሬ። 22ኑ̈ኒ ዎል ፔታ̇ን ማ̈ቂ̇ኖንዲፌ̈ኒ ኢንታ̇ር ዎል ፔታ̇ን ማ̈ቃ̇ምፔ̈ኒ ኔ ታ̈ብ ኢሚ̇ኖ ቦንቺ̇ን ቴ ኢንታ̇ብ ኢሚ̇ኔ። 23ቴ ጌሻዚንዳ̇ ታ̈ኒ ኢንታ̇ባራ፥ ኔ̈ናሬ ታባራ ማ̈ቂ̇ኖንዲፌ̈ኒ ኢንታ̇ሬ ፎቲ ፔታ̇ን ማ̈ቃ̇ምፔ̈ኒዬ። ዪኒ̇ባራ ኔ ታ̈ና ኪ̈ታ̇ ሚሺኖንዲፌ̈ንኬ ታ̈ና ካኖንዲፌ̈ን ማ ኔ ኢንታ̇ር ካኖን ኣላሚን ጋልዶ̇ ኣሳን ኤራምፔ̈ኒዬ።
24“ቴ ባ̈ባ̈ዶ! ዓን ኔ ታ̈ብ ኢሚ̇ኖ ኣሳን ቴ ዎ ቤስ̇ ኢንቲ ዬ̈ምፔ̈ንኬ፥ ዓና ሳ̈ዚን ኮቺ̇ንታካይዶን ኔ ታ̈ና ካኖኮታ̇ቦ ታ̈ብ ኢሚ̇ኖ ቦንቺ̇ን ቤቃምፔ̈ን ኮያ̈ሬ።
25“ቴ ባ̈ባ ጺላ̇̈ዶ! ዓኒ̇ ኣላሚን ጋልዳ ዎ ኣሳን ኔ̈ና ኤራካ̇ይ ኣቲ̇ናካር ቴ ኔ̈ና ኤራ̈ሬ፤ ኣስ ዪንሬ ኔ ታ̈ና ኪ̈ታ̇ ሚሺኖን ኢንቲ̇ ኤሪ̈ሬ። 26ኔ ታ̈ና ካኖ ካንን ኢንታ ጊዳ̇ ዶኣምፔ̈ንኬ ታ̈ናር ኢንታ̇ባር ፔታ̇ን ማ̈ቃ̇ሜ̈ኒ፥ ቴ ኔ̈ና ኢንታ̇ብ ኤሪሳዴ፥ ዓታ̇ር ኢንቲ̇ ኔ̈ና ኤራምፔ̈ን ዎታሙታ̇ ዶኣንዳ̇” ጌዪ ዎ̈ሲ̇ዴ።
Trenutno izabrano:
ዋ̈ኒ̇ሳ 17: ኦጫ̈ቃማ
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
