Lukas 24

Si Isa pinakallum

(Matiyu 28.1-10; Malkus 16.1-8; Yahiya 20.1-10)

1Na paddus jaꞌ siꞌ Llaw Pahali, sayu alab lagi ni llaw Ahad, lay na ga karandahan looy siꞌ pilay pa kubu si Isa. Maka luu na du bay boo da uliꞌ looy ka insallan hamut ma ndang lay na panyap da halliꞌ man ngintu mayat na. 2Tapit jaꞌ siꞌ sila, ndaꞌ da, ndang lay na lligiran batu mehe man bay nambo behe kubu looy. 3Dari lay sila paasok, sugaꞌ pag ndaꞌ da, yaꞌ na luu mayat Papuꞌ Isa.

4Sasang da papiha-piha bong ongoy meꞌ looy, sarunduun du tulun duwa lalla nangge ni bihing da nahayaꞌ na pamakoy da. 5Ni katawu ga danda looy baw siꞌ tu, lay na ga sila magti sujud. Pag-anu, yuk siga lalla looy, “Ongoy doꞌ kam ina miha jama llum ni tampat jama matoy? 6Yaꞌ na sina ya luu ntuu. Lay na pinakallum. Ongoy, yaꞌ na kina taintom bi bay halling na ningkaam jaman bi lagi ni Jalil? 7Saꞌ ba, ndang bay ya halling, talpaksaꞌ Anak Manusiyaꞌ pina-ntan pa jawom komkoman ga jama maat, boꞌ na pinapatoy llansang taꞌ tehang? Sugaꞌ pag taabut ni katallu ngallaw, llum du ya pabalik.”

8Pag-anu, ilooy ma taintom da na bay bitsala si Isa. 9Dari siꞌ, magti du sila pabeleng pa daira boꞌ da nuntutan siga rasul si Isa sikasapu-dambuwaꞌ ka siga soheꞌ da mimon bay tasakup da. 10Ilooy siꞌ ma bay nuntut yana ga si Mariyam man Magdala, si Jowanna, si Mariyam, yana nneꞌ si Yaꞌkub, maka luu gi kasohean karandahan bay soheꞌ da pilay pa kubu. 11Sugaꞌ siga rasul si Isa baw siꞌ tu yaꞌ pitsayaꞌ ni bitsala da. Kanna da mitsala jaꞌ sila manunsāp. 12Sugaꞌ kuwan si Pitel baw, pag takale na bitsala da, magti nangge boꞌ na sonse pilay pa kubu. Takka ndooy, magti ya pakokoꞌ ngandaꞌ pa jawom, sugaꞌ isu-isu tungkus sa takita na tamban ndooy. Dari lay na ya lakka maka papiha-piha na pin ya bong ongoy bay meꞌ looy.

Si Isa nammuhan mulit na duwa lān da pa Emeyas

(Malkus 16.12-13)

13Na ni llaw looy du siꞌ, luu duwa mulit si Isa lay lumān song pilay pa disu kawum inawnan Emeyas, kira ga sapū batu lawak na man Jerusalem. 14Sasang da siꞌ lumān, binitsala na pin meꞌ da mimon bay kahalan si Isa. 15Mindangoy ko, luu na patuhut ninsila disu lalla sampay lay na pahaboy ninsila. Na ilooy ilay siꞌ yana si Isa na mismu 16sugaꞌ yaꞌ gi sila pinadari meꞌ Tuhan ngila iya.

17Yuk si Isa ninsila, “Oy siꞌ tu la pagbitsalahan bi satahaꞌ-tahaꞌ lān?” Dari lay sila patagong lumān, boꞌ tumatandaꞌ na ni bantuk luwa da tud susa sila. 18Yuk disu ninsila ma inawnan si Kelopas, “Kira ku njawom mimon manusiyaꞌ ma lay na bahuklud pa Jerusalem sasang paballangan Ngalingkaꞌ, marean ta isu-isu kau du masi awam ni hāl ma bahau jaꞌ bay magkadarihan ni lahat tuu.”

19Yuk si Isa, “Na oy baw lay siꞌ?”

Yuk da, “Pasal si Isa bilay, lalla man Nasaret. Iya ilay nabi mehe ni mata Tuhan sampay na ni manusiyaꞌ, tumatandaꞌ ni tōꞌ na ka ni kawasa na mōꞌ jinisan pabuwatan kahaylan-haylan. 20Sugaꞌ lay gi ya pina-ntan meꞌ siga imam langkaw ka ga pa-mmean tabi kasohean pa mman gubnul nohoꞌ binotangan hukuman kapatoy. Dari lay na ga ya llansang taꞌ tehang sampay lay na matoy. 21Na kami ilay siꞌ, holat kami, iya na Almasi ma bay njanjiꞌ meꞌ Tuhan maddusan bangsa tabi Israil man komkoman siga banta tabi. Sugaꞌ lay na ya matoy, boꞌ ituu na situ ni katallu ngallaw na. 22Sugaꞌ nsiniꞌ luu habal kahaylan-haylan. Luu kasohean karandahan ni baanan kami bay pilay pa kubu si Isa sayu alab lagi. 23Sugaꞌ takka ndooy, pag ndaꞌ da, yaꞌ na luu mayat na. Pamāꞌ da, lay gi sila tinammuhan meꞌ siga malaikat mahati sila lay na konoꞌ llum si Isa pabalik. 24Dari siꞌ, luu gi kasohean ni baanan kami bay du pilay pa kubu looy. Takka jaꞌ siꞌ sila, ndaꞌ da, mawjud du bana bay tuntut ga danda looy siꞌ. Tud yaꞌ na du luu mayat na ndooy.”

25Dari yuk si Isa ninsila, “Uy kaam tu, ongoy kam yaꞌ kahati? Ongoy kam kaawran pitsayaꞌ ni siga tunaꞌ kanabi-nabihan pasal Almasi? 26Saꞌ ba, njawom kitab da, Almasi subay doꞌ duhuꞌ lumingkaꞌ njawom jinisan kamalasahiyan boꞌ na koleꞌ kabantugan saꞌ alang-alang?” 27Pag-anu, lay gi pinassaꞌ meꞌ si Isa ninsila hatiyan siga suwat njawom kitab ma tuwaꞌ pa iya, labba man suwat Nabi Musa sampay mimon suwat kanabi-nabihan kasohean.

28Na tapit jaꞌ siꞌ sila pa kawum ma tiniluꞌ meꞌ da, kuwan si Isa baw, meꞌ bantuk luu gi palanan lanjahan na. 29Sugaꞌ lay doꞌ ya bitsalahan da nohoꞌ pahantiꞌ mman da dambahangi sabap song sangom na lahat. Dari siꞌ, lay na ya mmeꞌ pa lumaꞌ mman da.

30Na pag tingkōꞌ da mangan, lay si Isa ngaddoꞌ tinapay boꞌ pinagsukuhan meꞌ na pa Tuhan. Pag lupus, pinong-pōng na baw meꞌ na boꞌ sinongan pa mman da. 31Pag-anu, ilooy ma pinabalik na pangandaan da sampay takila da na si Isa. Sugaꞌ yaꞌ gi san luu bay tapahalling da oy maka oy na, sarunduun du lay ya lanyap. 32Dari yuk da, “Uy la, Papuꞌ Isa bilay siꞌ hati! Sangkon du bilay lān tabi siꞌ pitu, lay baleyang atay ta sasang na mitsala ningkita sampay massaꞌ hatiyan siga suwat njawom kitab.”

33Dari siꞌ, magti sila pabeleng pa Jerusalem. Takka ndooy, lay na tatammu da siga mulit si Isa sikasapu-dambuwaꞌ ka ga soheꞌ da kumpo-kumpo. 34Yuk siga ilooy siꞌ ma bay kumpo-kumpo ni lalla looy ma duwa, “Tud mawjud du la Papuꞌ llum na pabalik, boꞌ lay gi siꞌ ya nammuhan si Saymon!”

35Pag-anu, lay na baw ga lalla looy siꞌ ma duwa nuntutan sila ni hāl meꞌ da bay tinammuhan meꞌ si Isa lān da pa Emeyas. Maka yuk da sakayi tasayu da ilooy na si Isa, noy bay na ya takita da mong-mōng tinapay.

Si Isa nammuhan siga mulit na

(Matiyu 28.16-20; Malkus 16.14-18; Yahiya 20.19-23)

36Sasang da masi mitsala, sarunduun du luu na si Isa nangge ni tangngaan da sambayan na halling, “Kasannangan ningkaam sikamimon.” 37Kuwan sila baw siꞌ tu labbasakayi, tud bay kahimattaan sampay sinawan na ga batan kanna da ngita sila tubangkit.

38Sugaꞌ yuk si Isa ninsila, “Ongoy na pin doꞌ tu gundalaꞌ pamiki bi? Ongoy taggahaꞌ hawal-hawalan na pin kam itu na ku llum pabalik? 39Ndaun bi teꞌ limpaꞌ lansang ni battis-tangan ku. Tud aku na situ. Purutun bi teꞌ ku mari tatantu bi na saꞌ ku tubangkit. Tubangkit bina yaꞌ luu towang na atawa isi na. Boꞌ niyaku itu, luu. Itu na du takita bi.”

40Pag lupus na halling meꞌ looy, lay na sila pakitahan na ga battis-tangan na. 41Sugaꞌ minsan sila gāk banahan, masi sila kaawran pitsayaꞌ batan landuꞌ ehe jayip da. Dari supaya pitsayaꞌ na sila banahan, ilooy ma nilaw na si Isa, yuk na, “Luu takakan-kakan tabi ntuu?” 42Dari siꞌ, lay na ya sinongan daying bay tinunu. 43Luu jaꞌ siꞌ, lay na kakan na ni pag-awpan da sikamimon.

44Pag lupus, yuk na, “Bay waktu tabi dambuwaꞌ, ndang bay kam baan ku meꞌ tuu: Saꞌ ba, yuk ku, mimon ma bay sinuwatan meꞌ Nabi Musa ka ga kanabi-nabihan ilooy kasohean sampay na njawom Kitab Jabul pasal aku talpaksaꞌ binakbul jaꞌ?” 45Dari siꞌ, supaya tahati da na banahan, meka na suwat pasal iya njawom kitab lay passaꞌ na hatiyan na ninsila. 46Maka lay gi ya maintoman sila tunaꞌ njawom kitab, ilooy ma yuk na, “Almasi ina talpaksaꞌ lumingkaꞌ njawom kabinsanaan sampay pinapatoy, sugaꞌ pinakallum du ya ni katallu ngallaw.” 47Maka yuk si Isa, “Luu gi bay sinuwatan subay pinasaplag umanat mahap pasal Almasi ni mimon kabangsa-bangsahan nagnaꞌ mantuu ni Jerusalem. Subay jama binaan bong tawbatan da dusa da maka pitsayaꞌ ni Almasi, malaingkan inampun na sila meꞌ Tuhan.

48“Na kaam ina, lay na bay tasakup bi mimon bay kadarihan ku. Sangkon pasaplagun bi na ni manusiyaꞌ. 49Yaꞌ na du sina hallom, papitu ku sa Rū Sutsiꞌ ma bay njanjiꞌ meꞌ Mmaꞌ ku pa mman bi. Ngagad jaꞌ kam ni daira tuu ngkod-ngkoran yaꞌ gi kam bay pinatannaan kawasa man sulgaꞌ meꞌ Rū Sutsiꞌ.”

Si Isa inangkat pa sulgaꞌ

(Malkus 16.19-20; Salsila siga Rasul 1.9-11)

50Pus meꞌ looy, lay na sila binoo meꞌ si Isa lumān pa Betani. Takka ndooy, lay angkat na tangan na nupaatan sila. 51Sasang na masi nupaatan sila, lay na ya inangkat pa sulgaꞌ.

52Pag-anu, ilooy ma lay sila numba iya, boꞌ da pabeleng pa Jerusalem njawom kagakan mehe. 53Maka llaw pa dangallaw luu sila ni langga mehe mudji Tuhan.

Trenutno izabrano:

Lukas 24: sjm

Istaknuto

Podijeli

Kopiraj