Lukas 23

Si Isa binoo pa mman Gubnul Pilatu

(Matiyu 27.1-2; 27.11-14; Malkus 15.1-5; Yahiya 18.28-38)

1Pus meꞌ looy, lay na baw si Isa binoo meꞌ baanan ga jama looy siꞌ labbasakayi pa mman Gubnul Pilatu nohoꞌ hinukum. 2Takka ndooy siꞌ, pinalkalaꞌ na si Isa meꞌ da, yuk da, “Lalla tuu tu, kon na bay boo kami pitu sabap lay taabut kami moo-moo pagkahi kami Yahudi migta man saraꞌ parinta Rom. Bbuwatan na moo-moo kami yaꞌ mayaran sukay parinta pa mman Sultan Sisal. Maka baꞌ-bāꞌ na, iya na Almasi, sultan ma bay njanjiꞌ meꞌ Tuhan nalamat bangsa kami.”

3Dari tilaw Gubnul Pilatu ni si Isa, “Bana kina sultan bangsa Yahudi ko?”

Tampung si Isa, “Meꞌ bay halling sambat nu na siꞌ.”

4Pag-anu, yuk Gubnul Pilatu ni siga imam langkaw ka ni baanan jama ndooy, “Yaꞌ bitu ku nammu dusa pataꞌ man jama tuu pinalkalaꞌ.”

5Sugaꞌ amu-amu baw sila halling, “Kalingog baw bina ya ni sikaliput Yahudiya. Sabapan tōꞌ na, hiluhalaꞌ na manusiyaꞌ labba man Jalil ngabut sampay pitu pa Jerusalem.”

6Pag takale meꞌ Gubnul Pilatu bay bitsala da, tilaw na, “Jama Jalil kitu ya?”

7Tampung da, “Ohoꞌ, Tuwan Gubnul.”

Tasayu jaꞌ siꞌ meꞌ Gubnul Pilatu si Isa jama Jalil, lay na sohoꞌ na binoo pa mman Gubnul Herod hinukum batan Jalil ilay njawom sakup na. Sarī gi, luu gi du Gubnul Herod ni Jerusalem waktu looy.

8Pag takita meꞌ Gubnul Herod si Isa, tud bay gāk ya batan ndang hallom na ya bay doman sitammu ka si Isa. Ndang bay na ya kale habal pasal iya. Boꞌ doman ya ngita si Isa mōꞌ pabuwatan kahaylan-haylan. 9Pag taabut na numariya si Isa, tud bay meka tilaw na, sugaꞌ yaꞌ san bay nampung si Isa. 10Boꞌ luu na pin ndooy ga imam langkaw ka ga guru saraꞌ agama ngahowapan jinisan palkalaꞌ da njataꞌ si Isa. 11Pag-anu siꞌ, inudjuꞌ na baw si Isa meꞌ Gubnul Herod ka ga sundalu na sampay lay gi ya binuwat kalabbiyan. Bbuwatan da lay mapatukan iya juba alatan bahasa inalak ya subay ga sultan. Pus meꞌ looy, lay na baw ya sinohoꞌ binoo pabeleng pa mman Gubnul Pilatu. 12Dari siꞌ, labba man llaw looy, san bay kuntra si Herod ka si Pilatu, batnaa bagay na sila.

Si Isa binotangan hukuman kapatoy

(Matiyu 27.15-26; Malkus 15.6-15; Yahiya 19.16)

13Luu jaꞌ siꞌ si Isa man Gubnul Pilatu balik, lay na baw tawag na siga imam langkaw, siga matatoa ni agama sampay mimon jama lundooy. 14Luu jaꞌ siꞌ, yuk Gubnul Pilatu ninsila, “Baꞌ-bāꞌ bi, ngkon lalla tuu binoo pitu pa mman ku sabap moo-moo ya jama migta man saraꞌ parinta Rom. Sugaꞌ bay na siꞌ ya sumariya ku ni pag-awpan bi, masi du yaꞌ luu tatammu ku dusa na ma sikatuwaꞌ ka siga palkalaꞌ bi njataꞌ na. 15San pun Gubnul Herod, yaꞌ du luu dusa bay tatammu na njataꞌ lalla tuu. Sangkon lay jaꞌ ya pabeleng na pitu pa mman ku. Basta yaꞌ baw tu luu bay pabuwat na pataꞌ man na kalabuan hukuman kapatoy. 16Sangkon saddong na situ sohoꞌ ku na jaꞌ ya llagpiꞌ boꞌ na pinōꞌ.”

17Ngkon Gubnul Pilatu halling meꞌ looy sabap ndang luu tabiat na maddusan disu pilisu taun-taun sasang paballangan Ngalingkaꞌ. 18Sugaꞌ pag takale baanan jama ndooy bitsala gubnul, ilooy ma maghowapan na sila, yuk da, “Papatoyun na ya! Bong ko moan kami pilisu, gam na si Barabas.” 19Na si Barabas siꞌ tu, kon na bay tajīl sabap bay ya pingkaꞌ moo hiluhalaꞌ ni Jerusalem sampay mapatoy jama sasang na naggaꞌ parinta Rom.

20Na sabap doman Gubnul Pilatu maddusan si Isa, lay na pin sila bitsalahan na. 21Sugaꞌ amu-amu sila maghowapan, yuk da, “Papatoyun na! Lansangun na taꞌ tehang!”

22Pag-anu, halling Gubnul Pilatu kamintallu na, “Oy doꞌ tu dusa na? Bong ni bandingan ku, yaꞌ luu pataꞌ man na kalabuan hukuman kapatoy. Sangkon, sohoꞌ ku na jaꞌ llagpiꞌ boꞌ na pinōꞌ.”

23Sugaꞌ amu-amu sila ngahowap mogos nohoꞌ si Isa llansang taꞌ tehang mari matoy. Dari sabap kalanduꞌ sila mogos, song hallom, jamu na Gubnul Pilatu naggaꞌ. 24Dari lay na duwan na kahandak baanan ga jama ndooy. 25Pag-anu, lay na pa-ntan na si Isa ni siga sundalu na nohoꞌ pinapatoy man na mean kahandak baanan Yahudi ndooy. Dari siꞌ, san si Barabas bay tajīl sabap meꞌ na bay moo hiluhalaꞌ sampay bay gi mapatoy jama, iya ya bay pinōꞌ meꞌ Gubnul Pilatu.

Si Isa llansang taꞌ tehang

(Matiyu 27.32-44; Malkus 15.21-32; Yahiya 19.17-27)

26Kuwan si Isa, lay na binoo meꞌ siga sundalu song nilansang taꞌ tehang. Lān da siꞌ pōꞌ man daira magsabtan du baw ka luu disu lalla man Sayrin inawnan si Saymon song paasok pa daira. Pag-anu siꞌ, lay na baw ya pinaggos meꞌ siga sundalu nohoꞌ manangkit tehang si Isa, boꞌ na nohoꞌ patuhut ni si Isa.

27Jama siꞌ tu, sakiyan patuhut ni si Isa, boꞌ meka du karandahan ni baanan looy magkarukkaan nangisan iya. 28Sugaꞌ lay sila tineleꞌ meꞌ si Isa sambayan na halling, “Kaam, karandahan Jerusalem, daa kam nangis susahan aku, arapun iya tangisan bi dī bi sampay siga anak bi. 29Batan luu sina mintu masa bi lumangga ni kasusahan mehe ntuu ni Jerusalem. Sampay meka na sina mintu kapahalling mahap sukud karandahan ma yaꞌ anakan. 30Pag taabut waktu looy ilay mintu, ni kaehe kasusahan jama ntuu, doman na ga sila matoy deꞌ-dēꞌ. Kainagon da kaluntuhan na sila meꞌ punu mari sila katambunan. 31Batan baan ta kam banahan, bong batnaa meꞌ tuu meꞌ siga Yahudi buwat aku yaꞌ san luu dusa ku, labi gi sina mintu kamalasahiyan da meꞌ siga banta da buwat sila.”

32Na sarī man si Isa, luu gi duwa mundu bay pinagsihaboy ka iya lān pinapatoy du. 33Pag takka da taꞌ buntuꞌ inawnan Lugar Baung Kōk, ndooy na man si Isa bay llansang taꞌ tehang. Maka ga mundu looy siꞌ lay na du llansang taꞌ tehang, disu huwin pa kawnan man si Isa, kuwan ilooy disu, huwin pa kayli.

34Pag-anu, lay si Isa maku duwaa, yuk na, “Maꞌ, ampunun doꞌ sila batan yaꞌ tasayu da bong oy pabuwat da.”

Kuwan ga sundalu ndooy, lay pinagsarī-sarī meꞌ da pakayan si Isa, boꞌ pinagkimbuan meꞌ da bong mamooy sukuꞌ ni dangan.

35Na baanan jama siꞌ tu, luu na pin ndooy nangge-nangge maimanan si Isa. Boꞌ luu du ndooy siga pa-mmean Yahudi ngaludjum iya, yuk da, “Bay baw ya katabang jama, subay siꞌ tabang na du dī na bong tud mawjud iya na Almasi ma bay pineneꞌ meꞌ Tuhan magsultan.”

36Kuwan siga sundalu pun, buwat iya du kalabbiyan. Bbuwatan da nongan iya tubaꞌ anggul bahal nohoꞌ ininum, 37maka yuk da, “Bong mawjud kau sultan bangsa Yahudi, tabangun teꞌ dī nu.”

38Na pajataꞌ man takōk si Isa luu papan bay llansang, maka luu ka suwat na. Batsahan na, “Ituu itu Sultan bangsa Yahudi.”

39Na disu mundu looy siꞌ ma bay nilansang haboyan si Isa, lay du bay mmeꞌ-mmeꞌ ngaludjum iya. Yuk na, “Baꞌ-bāꞌ nu, kau na Almasi. Bong mawjud, paddusan teꞌ dī nu sampay na kami!”

40Sugaꞌ ilooy baw disu, lay naggong soheꞌ na, yuk na, “Uy, subay ko tawu pa Tuhan. Saliꞌ-saliꞌ du bina kitabi bay kalabuan hukuman kapatoy. 41Kita itu pataꞌ pinapatoy sabap tawop ka dusa ta. Boꞌ iya ina yaꞌ dusahan.” 42Pag-anu siꞌ yuk na, “Tuwan Isa, intomun sa ku la pag taabut nu mintu magsultan.”

43Pag tampung si Isa niiya, “Baan ta ko banahan, llaw tuu du basta dambuwaꞌ du sina ko ka aku njawom patannaan ayad ma yaꞌ luu sibuꞌ sabanding na.”

Kapatoy si Isa

(Matiyu 27.45-56; Malkus 15.33-41; Yahiya 19.28-30)

44Na pag taabut tangngaꞌ llaw, ngalindom na sikaliput lahat ngabut sampay lisag tallu kohap. 45Tud yaꞌ na pōꞌ sinag mataallaw. Maka ndooy ni langga mehe sarunduun du salik duwa kultina kapa ma nallang Bilik Pinakasutsiꞌ ka Bilik Sutsiꞌ. 46Pag-anu, lay na baw si Isa ngingan pahaddo, yuk na, “Maꞌ, pa-ntan ku na ningkau nyawa ku.” Na paddus na pin si Isa halling meꞌ looy siꞌ, ilooy ma makkat du ya.

47Na pag takita kapitan sundalu bangsa Rom meꞌ looy bay kadari si Isa, kapamudji na ga ya Tuhan, maka yuk na, “Tud bana du la lalla tuu yaꞌ magdusa.” 48Sampay ga baanan jama ma bay kumpo-kumpo ndooy, pag takita da mimon ma bay katuwaꞌ ni si Isa, tud bay sarī parasahan da. Dari lān da moleꞌ, bbuwatan da nugtug dakan da tandaꞌ ehe dukka da. 49Kuwan siga bagay si Isa sampay karandahan ma ndang bay pahaboy niiya lakka man Jalil, maiman na pin man katāhan.

Si Isa kinubu

(Matiyu 27.57-61; Malkus 15.42-47; Yahiya 19.38-42)

50-51Na ndooy siꞌ, luu disu lalla inawnan si Yusup man daira inawnan Aramatiya ndooy ni Yahudiya. Iya ilay jama mahap maka intong. Maka ndang ngagad ya ni pamarinta Tuhan pinatangge. Iya ilay disu pa-mmean ni baanan kapakihan ma bay ngahukum si Isa. Sugaꞌ ndang yaꞌ ya dambuwaꞌ pamiki ka siga soheꞌ na ma bay nohoꞌ si Isa pinapatoy.

52Na lay jaꞌ siꞌ matoy si Isa, lay pilay si Yusup pa mman Gubnul Pilatu muhunan mayat si Isa kinubu. 53Pagka lay kuhi gubnul, lay na paduwai si Yusup mayat si Isa boꞌ tinungkus ka kuku poteꞌ. Pag-anu, boꞌ na tinampat ni kubu ma bahau jaꞌ bay pinabuwat ni battisan pampang. 54Na llaw looy ilay siꞌ Jumaat, yana llaw man bangsa Yahudi manyap sabap pag sumaddop llaw yana panagnaan Llaw Pahali.

55Na kuwan karandahan looy siꞌ ma bay ngahaboyan si Isa lakka man Jalil, lay patuhut ni ga si Yusup. Dari lay takita da kubu looy man mayat si Isa tinampat. 56Pag-anu, lay na pabeleng ga karandahan looy siꞌ pa daira boꞌ da manyap insallan hamut ka uliꞌ halliꞌ man ngintu mayat si Isa. Sugaꞌ yaꞌ na luu dapat da pabeleng pa kubu deꞌ-dēꞌ batan taabut na sila meꞌ Llaw Pahali. Dari lay na du sila pahali man da ngikut saraꞌ agama da.

Trenutno izabrano:

Lukas 23: sjm

Istaknuto

Podijeli

Kopiraj