Ima̍tiyu 11
11
Ɛrɔ̄ nīi Ijɔ̍ɔn Ohuyenyi tū hu Iji̍sɔ̄ɔsi ma̍
(Ilu̍uku 7:18-35)
1Iji̍sɔ̄ɔsi kwɛ̍ɛjī lɛlā nūma̍ nīi o̍ yɛ ē ngū a̍chi̍kpo̍ yī nū lɔkɔ nīi e̍ ge̍ē ya̍ ma̍, o̍ pīya hī ɛbɛ ɔla̍ā. O̍ yɛ ga iyɔ̄bū ga ipwo̍gra ɛha̍ nīi hɔ̄ abɔ̍ɔ kurɛkurɛ ma̍ ge̍ yɛ ē ngū āchɛ lɛlā, ka ɛrɔ̄ yī Ɔwɔ ē de wa̍.
2Ijɔ̍ɔn Ohuyenyi po̍ abɔ̍ɔ la igbakɔbɔ lɔkɔ nīi Ikra̍yisi yɛ ē ya̍ u̍ku̍rɔ̍ ma̍. Wu̍chē yī ɔla̍ā, o̍ de a̍chi̍kpo̍ yī nū ɛha̍ tɛ̄rɔ̄ wā dikpo̍ba̍ Iji̍sɔ̄ɔsi. 3O̍ ka ɛ̍lɛ ge̍ che Iji̍sɔ̄ɔsi ikpo̍ hīka, “Awɔ - ɔ̄chɛ nīi Ijɔ̍ɔn ka ɔ̍lɔ ge̍ē wā ma̍ a̍nɛ? Kɛ̄ɛ alɔ ē deyīrɛ yī ɔ̄chɛ ɔha̍?”
4Iji̍sɔ̄ɔsi hīya a̍chi̍kpo̍ yī Ijɔ̍ɔn ɔkɔ hīka, “Ala̍ ā ku̍chē ge̍ koko̍o yī lɛlā nīi ala̍ yɛ ma̍ ē ma̍ ba̍la onīi ala̍ yɛ ma̍ ē po̍ ma̍ de Ijɔ̍ɔn gɛ: 5Epriyī de myɛ̍ma̍. Ekwi̍kpo̍ oko̍ōku̍ de yɛɛ ke̍e̍. Alimada de lɛ cha̍cha̍ ke̍e̍. Ɛdarɔ̄ de plɛ̍ɛ̄lā. Okū yɛ̄mɛ̄mɛ̄ yɛ amu ē hye̍ēyī wā la ɔhɔ̄leyī. E̍ chī yɛ amu ē de Wɔ̄kā Ɔlwɔnyɛ yī Ɔwɔ ē ka ē de alyeklo̍ mɛ̍. 6A̍hōhi ge̍ - iyī āchɛ nīi i̍ ta̍ahu̍ yī u ni̍ ma̍!”
7Alɛrɔ̄ yī Ijɔ̍ɔn pīya bɛ̍ɛ̄nɛ̄ ma̍, Iji̍sɔ̄ɔsi kū la lɛlā ɔka ku̍ Ijɔ̍ɔn de āchɛ nīi grēeyī ma̍. O̍ ka hīka, “Oji̍ nīi ala̍ ga lipu̍ a̍chi̍ chukuru i̍krɔ̍ɔ ge̍ē ma̍ ma̍/? Ahu̍ yī a̍chi̍ nīi ijija yɛ ē pu̍ ɔ̄ kɔ̍kɔ̍kɔ̍ ma̍? 8Ehe̍e! Ma̍, oji̍ kpɛ̍ɛ nīi ala̍ chī gāa ge̍ē ma̍ ma̍? Ɔngrɔ̄ɔ ɔtɔ̄jā la iyē hwɔhi hwɔhi? Īchāha̍-īchāha̍! Je̍ka aa̍ āchɛ nīi ē tū ɔjā oli̍hi̍hi̍ i̍ngɔ̍ɔ ma̍ ē gblāa la ipwɔ̍ɔ̄nū! 9Oji̍ kpɛ̍ɛ nīi ala̍ chī gāa ge̍ē ma̍ ma̍? Ɔ̄chɛ ɔkɛrɔ̄ yī Ɔwɔ kɛ̄ɛ? Ēē, anu̍ nɛ! Ɔ̍lɔma̍ n ge̍ē koko̍o ē de ala̍! Anu̍ pi̍i̍ gla ɔ̄chɛ ɔkɛrɔ̄ yī Ɔwɔ ji ta̍ pɛtɛpɛtɛ. 10Ijɔ̍ɔn nūma̍ pi̍i̍ nīi Īpū yī Ɔwɔ kɛlā nīi hɔ̄ ma̍ ma̍ ku̍ ɔ̄ a̍nɛ:
“ ‘Ɔwɔ ka hīka, “Ɔlɛrɔ̄ yī u hɔ̄ ma̍ a̍nɛ.
N ge̍ē de ɔ̍ ē tɛ̄rɔ̄ yɔbū de wɔ
O̍ ge̍ē gāa ge̍ē gbla̍a ɔpɔ̄pū yī wɔ ē lɔ̄lā de wɔ.” ’
11Lēchi̍, n ā koko̍o de ala̍! Ayi̍ wa̍a̍ nīi anyā ma ma̍, ɔ̄chɛ ɔnɔ̄kɔ̄kū bāa Ijɔ̍ɔn Ohuyenyi i̍ hɔ̄ ni̍. Ɔ̄chɛ nīi chī bi̍hi gɔ̄ga wa̍a̍ la ɛbɛ yī Ɔchwɔ̄lɛ̍ Oro̍ōre̍ yī Ɔwɔ ma̍ chī ga Ijɔ̍ɔn nūma̍ ɔgɔ̄ga pɛtɛpɛtɛ. 12Bū la yɛ̄grāa nīi Ijɔ̍ɔn yɛ ē ka ɛrɔ̄ yī nū ma̍ kpɛɛ ge̍ ku i̍chɛ nūma̍, Ɔchwɔ̄lɛ̍ Oro̍ōre̍ yī Ɔwɔ yɛ ē mi̍chi̍ gba̍a̍. E̍ ya̍ tāa anu̍ dwɔ̄bi̍-dwɔ̄bi̍. Alānyānyi ɛha̍ yɛ ē chikpo̍ ge̍ē de ku̍ wɔhu̍-wɔhu̍. 13Āchɛ ɔkɛrɔ̄ yī Ɔwɔ ba̍la Lihɔ yī Imo̍sīisi chī kɛlā ku̍ ɔchwɔ̄lɛ̍ Oro̍ōre̍ yī Ɔwɔ i̍ngɔ̍ɔ kpɛɛ ge̍ ku yɛ̄grāa yī Ijɔ̍ɔn Ohuyenyi. 14Ala̍ ge̍ chikpo̍ ge̍ē chɛ̄ lɛlā yī wā nīi e̍ ka ma̍, ɔ̍lɔma̍ Ijɔ̍ɔn nūma̍ re̍ka Ɛla̍yi̍ja nīi e̍ kɛlā yī ɔwɔ̄wā yī nū lɔ̄lā a̍nɛ. 15Ɔ̄chɛ otū arɔ̄ ɔplɛ̍ɛ̄lā ge̍ po̍ gɛ!
16“Oji̍ kpa̍a nīi n ge̍ē nāa kwichi̍ ē tāa āchɛ yɛchɛ u̍ma̍ama ma̍ dɛdɛ? Ala̍ ma̍ gɛ ko̍ō! E̍ lɛ bāa aɛ̍pɛ̄ ɛha̍ nīi gblāa la o̍gra ma̍. Ribi yī aɛ̍pɛ̄ ɛla̍ā ɛha̍ ka grāa ɛha̍ yī wā hīka, 17‘Alɔ gwe̍ejē yī angrɛ̄ba̍ tū ala̍, ala̍ i̍ chī chɛ̄ jēejē ni̍. Alɔ hɛ̍ agubē kurēkurēkurē, ala̍ i̍ chī chɛ̄ drɛ̄ɛgba ni̍.’ 18Ma̍ gɛ! Ijɔ̍ɔn wā ma̍, o̍ i̍ chɛ̄ re̍ ojōre̍ kɛ̄ɛ gwa̍ ɛ̍mwɔ̄ ni̍. Āchɛ wa̍a̍ chī ka bɛ̍ɛ̄nɛ̄ hīka ɔ̍lɔ - ɔlyapri̍ija ɔdwɔ̄bi̍ nɛ. 19Ɔyi̍ yī Ɔngrɔ̄ɔ chī wā bɛ̍ɛ̄nɛ̄ yɛ ē re̍ ojōre̍, e̍ gwa̍ ɛ̍mwɔ̄ mɛ̍. Āchɛ wa̍a̍ chī ka bɛ̍ɛ̄nɛ̄ ka ɔ̍lɔ ge̍ yii̍s! Ɔngrɔ̄ɔ nūma̍ ɔ̍lɔ - oli̍gbi̍re̍ ba̍la ɔ̄chɛ ɔgwɔ̍ɔ̄jā ka̍ka̍ nɛ. Ɔ̍lɔ gba̍a - ɔya yī ali̍kpa̍da̍ ba̍la a̍kpla āchɛ nɛ. N ā koko̍o de ala̍! Lɛlā ojo̍ōje̍ yī Ɔwɔ ē de iyī nū chabɔ̄ bū la lɛlā nīi o̍ ē ya̍ ma̍.”
Ipwo̍gra nīi i̍ chɛ̄ ku Iji̍sɔ̄ɔsi ni̍ ma̍
(Ilu̍uku 10:13-15)
20Iji̍sɔ̄ɔsi kū la alābi̍ ɔkɔ̄ka tāa ipwo̍gra ɛha̍ bɛ̍ɛ̄nɛ̄. Wu̍chē oji̍ nɛ, o̍ yɛ̍ɛ̄lā ɔlɛbɛ̍bi̍ mwɛbɛ mwɛbɛ abɔ̍ɔ la aa̍ mɛ̍; alɛbɛ ɛla̍ā i̍ chī gba̍a pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ we̍ ni̍. 21Iji̍sɔ̄ɔsi ka bɛ̍ɛ̄nɛ̄ hīka, “I̍īyo̍ de awɔ ipwo̍gra ɔla̍ā nīi re̍ka Iko̍rāsin ma̍. I̍īyo̍ de awɔ ipwo̍gra ɔla̍ā nīi re̍ka Ibɛsa̍yi̍da ma̍! Lɛlā ɔlɛbɛ̍bi̍ nīi n ya̍ abɔ̍ɔ la ala̍ ma̍ ge̍ ya̍ la Ita̍ya ba̍la Isa̍yi̍dɔn nɛ, alɛbɛ ɛla̍ā ke̍ ge̍ pīyabɔ̄ta̍ hī lɛlā abi̍ ɔyɔ̍ɔ̄ya̍ yī wā i̍gbi̍chɛ. E̍ ke̍ ge̍ kpo̍ a̍chiyɔ̄pa̍ tū, kpo̍ i̍bi re̍tū chabɔ̄ hīka aɛ̍lɛ mlɛ̍ha̍ yī lɛlā ɔdwɔ̄bi̍ yī aa̍ mɛ̍. 22N chī ge̍ē koko̍o ē de ala̍! I̍chi̍chɛ Nīi Ɔwɔ Ge̍ Ē Hlɛ̍ɛ̄pɔ̄ Ma̍, o̍ ge̍ē mlɛ̍ha̍ yī Alita̍ya ba̍la Alisa̍yi̍dɔn pɛtɛpɛtɛ ē hi̍ ala̍ ipwo̍gra ɛla̍ā. 23Ikapa̍num be̍e! A chikpo̍ ge̍ē hu iyī wɔ hwa̍a̍ ē gāa ichō hwɛɛ, i̍ i̍ngɔ̍ɔ ni̍? Ɔ̍lɔma̍, a ge̍ē ha̍ābɔ̄ ta̍tū gāa ayekū oli̍gba̍o̍ pɛtɛɛ. Wu̍chē oji̍ nɛ, lɛlā ɔlɛbɛ̍bi̍ wa̍a̍ nīi n ya̍ abɔ̍ɔ la awɔ ipwo̍gra ɔla̍ā ma̍ ge̍ ya̍ i̍ngɔ̍ɔ la Iso̍dɔm nɛ, ipwo̍gra ɔla̍ā ke̍ ge̍ e̍e hɔ̄ amu we̍. 24N chī ge̍ē koko̍o ē de ala̍! I̍chi̍chɛ Nīi Ɔwɔ Ge̍ Ē Hlɛ̍ɛ̄pɔ̄ Ma̍, o̍ ge̍ mlɛ̍ha̍ yī Aliso̍dɔm pɛtɛpɛtɛ ē hi̍ awɔ ipwo̍gra yī Ikapa̍num ɔla̍ā.”
Ala̍ yewā dikpo̍ba̍ u ge̍ myɛ̍nyɛ̍ gɛ
(Ilu̍uku 10:21-22)
25Yɛ̄grāa ɔla̍ā, Iji̍sɔ̄ɔsi ka bɛ̍ɛ̄nɛ̄ hīka, “Ɔwɔ A̍dā yī u, Ādādā yī ichō ba̍la ajɛ! N da wɔ o̍be kpɛ̍ɛji; wu̍chē oji̍ nɛ, lɛlā nīi a de trɛ̍ba hī āchɛ oje̍ kure̍kure̍ ma̍, a de chabɔ̄ hu̍ āchɛ i̍je̍ ɔjɔ̄jā ni̍ mɛ̍. 26Ēē Ādā! Lɔkɔ nīi a chikpo̍ ma̍, ba̍la ɔkɔ nīi o̍ hi wɔ ɔtū ma̍ nīi a ya̍ ke̍e̍ a̍nɛ.
27“A̍dā yī u de ɔjāmɔjā wa̍a̍ de u mɛ̍. Ɔ̄chɔ̄chɛ i̍ je̍ Ɔyi̍ yī Ɔwɔ ni̍, ɔ̍chi̍kpa̍kpa̍ Ɔwɔ A̍dā lōri̍īnū. Ɔ̄chɔ̄chɛ i̍ chī je̍ Ɔwɔ A̍dā ni̍, ɔ̍chi̍kpa̍kpa̍ Ɔyi̍ yī Ɔwɔ Ɔlɔjā ba̍la āchɛ nīi Ɔyi̍ ɔlɔjā chikpo̍ ge̍ē chabɔ̄ yī Ɔwɔ A̍dā hu̍ wā ma̍.
28“Ala̍ ā yewā dikpo̍ba̍ u, ala̍ āchɛ nīi yɛ̄jɛ̄ yī iho̍ ɔlyɛnu̍ obōbī yɛ ē jɛ̄ ala̍ ma̍, ma̍a n ge̍ē de ɔmyɛ̍nyɛ̍ ē de ala̍. 29Ala̍ ā de iyī ala̍ tū u la apli̍kpo̍ nīi n ā bī ala̍ ya̍ lɔkɔ nīi o̍ hī um ɔtū ma̍, hɛ̄ɛbɛ nīi ala̍ ge̍ ngū lɛlā bū la abɔ̄ yī u. Wu̍chē oji̍ nɛ, n lɛ du̍mɔ̍; n gba̍a lɛ mlɛ̍ɛ̍ la ūkpɔ̄tū ma̍; ala̍ ge̍ē lɛ ɔmyɛ̍nyɛ̍. 30Ɔjā nīi n chikpo̍ la abɔ̄ yī ala̍ ma̍ i̍ ge̍ē lichi̍chi̍ ɔ̄kɔ̄kū de ala̍ ni̍. Iho̍ yī lɛlā yī u nīi n ge̍ē de ē che ala̍ ma̍ lɛ bāa ofi̍ye̍fi̍ye̍ ma̍.”
Trenutno izabrano:
Ima̍tiyu 11: YBASR
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2020 Bible Society of Nigeria (second edition)
