Nɩ-toni 5
5
Ananɩasɩ nɩ a ʋ pɔw Safɩɩra yele
1Dɛb kãw bɛ na bʋɔlɛ kɛ́ Ananɩasɩ a, nɩ a ʋ pɔw Safɩɩra, tɩ wõ n taa kʋɔrɩ púo, 2ɛ́ gbab a libie a mɩnɛ tɛr, ɛ́ cen nɩ a ŋmãa tɩ bin a nɩ-toni niŋé. 3Lɛ n'a a Pɩɛr tɩ yel ʋ: «Ananɩasɩ i, bʋ̃ʋ n'ʋ so a Sɩtaana só fʋ tɩ zɛ̃ à ŋá, kɛ̀ fʋ ŋmãa ziri kʋ̀ a Vʋʋrʋ Sõw? Fʋ gbab'ɩ a púo libie ŋmãa tɛr. 4Fʋ nãá tʋ̃ɔ́ na bɛ kʋɔr'ʋ ɛ, ɛ́ fʋ na wa kʋɔr'ʋ baar'a, fʋ nãá tʋ̃ɔ́ na tɛr a libie ɩrɛ nɩ lɛ fʋ na bɔbr a. Ŋmɩŋmɩn za n'a a tɩɛrʋ ŋa tɔ ɩ tɩ wa a fʋ zie? Nɩsaalbɛ zie bɛ n'a fʋ ŋmãa a ziri ɛ, Naaŋmɩn zie n'a.» 5A Ananɩasɩ na tɩ wõ a ƴɛ̀r-bie á ŋá a, ʋ lo na kpi. Dɛ̃bɩ̃-kpɛ̃ɛ tɩ tɛr'ɩ a nɩbɛ bɛl za na tɩ wone a yel ŋa a. 6A pɔlbili tɩ wa na wa de pɛn pili pàw a kũu, ɛ́ ɓáw cen nɩ tɩ ũù.
7A tɩ maal'ɩ gbele ata, ɛ́ a ʋ pɔw wa ta kpɛ, ɛ́ bɛ bãw ʋlɩ bom nɛ na ɩ a ɩ. 8Lɛ n'a a Pɩɛr tɩ sowr'ʋ: «Yel ɩ̃ nyɛ̃, a púo daarʋ sɩrɩ n'ɩ à á ŋá a?» Ʋ tɩ sɔw na: «Ʋ̃ʋ, a daarʋ sɩrɩ n'ɩ a lɛ!» 9Lɛ n'a a Pɩɛr tɩ yel ʋ: «Ŋmɩŋmɩn za n'a nyɩ wõ taa yel kɛ́ nyɩ ɩ a Sore Vʋʋrʋ kɛ́ nyɛ̃? Nyɛ̃, a bɛlɩ dem na cen tɩ ũù a fʋ sɩr a ƴɛrɛŋa a, bɛlɛ n'ɩ bɛ ŋa ta a dɩ̃dɔr nʋɔr, bɛ mɩ̀ na ɓáw fʋ na tɩ ũù.» 10A pɛr nɛ pʋɔ, a pɔw tɩ lo n a Pɩɛr niŋé be kpi. A pɔlbili tɩ kpɛ na nyɛ̃ ʋ ʋ kpi, bɛ ɓáw yi cen nɩ tɩ ũù pɩɛlɩ a ʋ sɩr. 11Dɛ̃bɩ̃-kpɛ̃ɛ tɩ nyɔw nɩ a Lãw-yir za nɩ a bɛlɩ dem za na tɩ wone a yele á ŋá a.
A nɩ-toni maalɛ nɩ nɔ-ɓãa-yele yaga
12A Yeezu nɩ-toni tɩ maalɛ nɩ nɔ-ɓãa-yele nɩ yel-bãw-guuri yaga a nɩbɛ sɔgɔ. A bɛlɩ dem za na tɩ sàw de a Yeezu yele a, mɩ́ tɩ lãw nɩ taa be a Salomɔ̃ bɛ-caar na ƴãw kpule cɔrɩ cen a pʋɔ. 13Nɩ-yũo bɛ mɩ́ tɩ sàwr kpɩɛr a bɛ pʋɔ ɩ, a nɩbɛ na saa tɩ danɛ bɛ yaga za a. 14A nɩbɛ bɛl na tɩ sàw de a, ɛ́ tɩ wa wa lãwnɛ nɩ a Sore a, a bɛ nʋɔr tɩ kɛrɛ nɩ kʋralɛ, dɛbr nɩ pɔwbɛ yaga yaga. 15A nɩbɛ tɩ tuore nɩ a bɛ bàalbɛ yire nɩ tɩ gaalɛ a sɛ́ɛ pʋɔ, gadori zu nɩ sɛn pʋɔ, k'aa Pɩɛr wa tɔlɛ a, a ʋ dasule ɓaarʋ tɛwr, ʋ̃ʋ nɩ̃ɛ pàw a bɛ kãw. 16Nɩ-yaga yaga tɩ yire nɩ a Zerizalɛm tẽ-kpɔwlɩ ƴãw zɔrɛ waar. Bɛ mɩ́ tɩ tɛr'ɩ bàalbɛ nɩ nɩbɛ a kɔ̃tɔ̃-faar na fɛrɛ a wa n, ɛ́ bɛ za mɩ́ tɩ sanɩ na.
Bɛ dɔwrɛ nɩ a nɩ-toni
17Lɛ n'a a bàwr-maal-kara nɩ a ʋ nɩbɛ, a pɛr lɛ k'aa Sadiseyɛ̃ mɩnɛ lãw nɩbɛ, tɩ nyɛ̃ suur bɛ dɩ vuo ɩ. 18Bɛ tɩ ƴãw na bɛ nyɔw a nɩ-toni lɔb ƴãw a nɩbɛ za gaso pʋɔ. 19Ɛcɛ Sore malkɩ tɩ wa n tɩ̃ɩsɔw wa yuo a gaso dɩ̃dɛɛ pamɛ ɛ́ ƴãw bɛ yi, ʋʋ yel bɛ: 20«Nyɩ cen a Ŋmɩn-yir-kpɛ̃ɛ pʋɔ tɩ be a be hiere a nyɔ-vʋʋrʋ ƴɛ̀r-bie á ŋá za kʋ̀rɛ a nɩbɛ!» 21Bɛ tɩ sàw na de a malkɩ ƴɛ̀rʋ, ɛ́ a zie na wa vɩɛrɛ wa báarɛ a, bɛ cen nɩ a Ŋmɩn-yir-kpɛ̃ɛ pʋɔ tɩ be a be kanɛ nɩ a nɩbɛ.
A bàwr-maal-kara tɩ ta na. Ʋlɛ nɩ a ʋ nɩbɛ tɩ bʋɔl'ɩ a Zifʋ mɩnɛ ƴɛ̀rʋ-dɩb-lãw nɩbɛ ɓã taa, ɛ́ pãa tõ kɛ́ bɛ cen a gaso pʋɔ tɩ tɛr a nɩ-toni wa n. 22Ɛcɛ a tõ-tõ-biir na tɩ ta a, bɛ bɛ nyɛ̃ bɛ a gaso pʋɔ ɩ. Lɛ n'a bɛ tɩ lɛb wa manɩ 23à ŋá: «Tɩ cen na tɩ nyɛ̃ a gaso pamɛ a cãà pàw vla vla, ɛ́ a dɩ̃dɔ-gùrbɛ àr a dɩ̃dɔr nʋɔr gù, ɛcɛ tɩ na wa yuo a pamɛ a, tɩ bɛ nyɛ̃ nɩr za a gaso pʋɔ ɩ.» 24A Ŋmɩn-yir-kpɛ̃ɛ sojarɩ nɩ-kpɛ̃ɛ nɩ a bàwr-maal-nɩ-bɛrɛ na tɩ wõ à à ŋá a, bɛ bɛ tɩ bãw lɛ bɛ na na tɩɛrɛ a ɩ, ɛ́ tɩ sowre taa ʋlɩ bom nɛ na n'ʋ ɩ a nɩ-toni a. 25Ɛcɛ nɩr kãw tɩ wa na wa yel kʋ̀ bɛ: «A nɩbɛ bɛl nyɩ na nyɔw pàw a, bɛlɛ nɛbɛ be a Ŋmɩn-yir-kpɛ̃ɛ pʋɔ kanɛ nɩ a nɩbɛ.»
26Lɛ n'a a Ŋmɩn-yir-kpɛ̃ɛ sojarɩ nɩ-kpɛ̃ɛ tɩ tɛr a ʋ nɩbɛ cen nɩ kɛ́ bɛ tɩ tɛr a nɩ-toni wa n. Ɛcɛ bɛ bɛ tɩ ɩ n fãw ɛ, bɛ tɩ zɔrɛ nɩ dɛ̃bɩ̃ɛ a nɩbɛ nãà wa lɔbr'ɩ bɛ kʋsɛbɛ a ƴãw. 27Bɛ tɩ tɛr bɛ na wa n, wa ƴãw bɛ àr a ƴɛ̀rʋ-dɩb-lãw niŋé, ɛ́ a bàwr-maal-kara sowri bɛ: 28«Tɩ tɩ diw nyɩ na bɛr lãwnɩ kpãàfʋ kɛ́ nyɩ ta kanɛ nɩ a nɩbɛ a nɩr ŋa yúor ƴãw ɛ! Ɛcɛ nyɩmɛ n'ɩ bɛ ŋan paalɩ a Zerizalɛm za nɩ a nyɩ kanʋ! Nyɩ bɛ yel kɛ́ nyɩ ɩ lɛ a yele a nɩr ŋa kũu na na wa n a lɛb lo tɩ zu u!» 29Ɛcɛ a Pɩɛr nɩ a nɩ-toni tɩ sɔw nɩ à ŋá: «Naaŋmɩn nʋɔr-sàwfʋ n'ʋ fɛrɛ zuo a nɩsaalbɛ nʋɔr-sàwfʋ. 30A tɩ sãàkʋm-kore Naaŋmɩn ɩ n a Yeezu ŋa, nyɩ na ƴãw bɛ kpa a da-gara zu kʋ a, ʋ lɛb yi a kũu pʋɔ. 31Ʋlɛ n'ʋ a Naaŋmɩn zɛw nɩ a ʋ dʋrʋ nũu, ɩ k'ʋ ɩ nɩ-kpɛ̃ɛ nɩ faarɛ, k'ʋʋ tʋ̃ɔ́ ɩ a Ɩsɩrayɛl bibiir lɩɛbɩ a bɛ ɩb ɛ́ páw a bɛ yel-bebe suur. 32Tɩ dɩ n a yele á ŋá dãsɩɛ, tɩɩm nɩ a Vʋʋrʋ Sõw a Naaŋmɩn na kʋ̀ a bɛlɩ dem na sàwr a ʋ nʋɔr a.»
33A ƴɛ̀rʋ-dɩb-lãw nɩbɛ na tɩ wõ a ƴɛ̀r-bie á ŋá a, bɛ tɩ pi n kɔkɛɛ bɔbr'ɩ a nɩ-toni kʋb. 34Ɛcɛ nɩr kãw tɩ ìr'ɩ a bɛ sɔgɔ. Faarizɩ̃ɛ tɩ n'ʋ, a yúor dɩ kɛ́ Gamaliyɛl. Ʋ tɩ ɩ n Naaŋmɩn wulu bãw-bãw-kara a nɩbɛ za na ƴãwnɛ a. Ʋ tɩ ƴãw na kɛ̀ bɛ tɛr a nɩ-toni yi n yẽw blã, 35ʋʋ yel: «Ɩsɩrayɛl nɩbɛ ɛ, nyɩ gù nyɩ tʋɔra vla a lɛ nyɩ na bɔbr kɛ́ nyɩ ɩ a nɩbɛ bɛ ŋa a. 36Daar daar ŋa, Tedasɩ nɛ kãw tɩ ìr'a, yel kɛ́ ʋlɛ mɩ̀ n'ʋ. Nɩbɛ kɔbr anaar (400) tɩ ìr'a tu a ʋ pùor. Ɛcɛ bɛ tɩ kʋ ʋ na. A bɛlɩ dem na tɩ tu a ʋ pùor a, tɩ zɔ na yaarɩ, a ʋ dem baarɩ. 37Al pùorí, a nɩbɛ sɔ́rʋ daar lɛ, Galile tẽw Zuda mɩ̀ tɩ ìr'a, nɩ-yaga mɩ̀ tu a ʋ pùor. Bɛ mɩ̀ tɩ kʋ ʋ na, ɛ́ a bɛlɩ dem za na tɩ tu ʋ a zɔ yaarɩ. 38Ƴɛrɛŋa a, ɩ̃ yere na kʋ̀rɛ nyɩ: nyɩ ta kaarɛ a nɩbɛ bɛ ŋa zie ɩ, nyɩ bɛr bɛ. A lɛ bɛ na tɩɛrɛ nɩ a lɛ bɛ na ɩrɛ a, alɛ wa yi nɩsaalbɛ zie a, a na bɔr'ɩ a tʋɔra. 39Ɛ́ alɛ wa ɩ Naaŋmɩn zie n'a a yi a, nyɩ kʋ̃ tʋ̃ɔ́ ɩ a bɔr ɛ. Nyɩ taa ɩrɛ wa nanɩ zɛbr'ɩ Naaŋmɩn ɛ!» Bɛ tɩ sàw na de a ʋ ƴɛ̀rʋ, 40ɛ́ ƴãw bɛ lɛb bʋɔlɩ a nɩ-toni wa n, wa ƴãw bɛ fɔb bɛ, ɛ́ yel kʋ̀ bɛ kɛ́ bɛ taa lɛb wa ƴɛ̀rɛ a Yeezu yúor ƴãw towtow ɛ, ɛ́ lɛb bɛr bɛ. 41A nɩ-toni tɩ lɛb'a yi a ƴɛ̀rʋ-dɩb-lãw zie, ɛ́ nʋ̃ɔ̀ ɩrɛ bɛ yaga, a Naaŋmɩn na tɩ nyɛ̃ bɛ, bɛ sɛwnɩ zʋmɛ a Yeezu yúor ƴãw a. 42Bibie za, a Ŋmɩn-yir-kpɛ̃ɛ pʋɔ nɩ a yie pʋɔ, bɛ mɩ́ tɩ kanɛ nɩ nɩ a nɩbɛ, ɛ́ hiere a Yeezu Kɩrɩta Yel-nʋ̃ɔ̀ bɛ tɛr ŋmãafʋ ɛ.
Trenutno izabrano:
Nɩ-toni 5: DBDC
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
La Bible en Dagara © Alliance Biblique du Burkina Faso, 2013.