JAN 17
17
Jesu wí ma nyɛri wi ploʔofɛɛ kan be
1Wi gâ ki kaʔa yo kɔ ge, Jesu wɔ̀ɔ wi yugu jrɛʔɛ ge mà wele wa namuru ni de mà yo: «Na To, nyiŋi kí ma tyɛʔɛ. Ma ma Pyɔ wi kmara tyɛʔɛ de hɛɛn na be, jango ma Pyɔ wi ma kmara tyɛʔɛ de pe na kpo. 2Mɛjɛn má moo tɛnŋɛ hɛɛn pè bɛfu yugu na, jango wi nyuwyeʔe bajegɔ kan bee ma má ma kan wí ma ge. 3Nyuwyeʔe bajegɔ wí ŋa: Nà pe mo ŋa cɛn má nyɛ nigbe mâ po Nyɛʔɛlɛ cɛnlɛ le bi ní bí Jesu Krisi cɛn we ŋa ma dá dun ge. 4Mí ma ma kpangbanma tyɛʔɛ hɛɛn na be naʔa tra na de. Mɛjɛn tunŋu ga ma dá gan ná ma mâ yo bìʔi kɔ ge, mí maʔa funŋu kɔ. 5Na To, ŋaŋa ni ge, maʔa yaʔa bì na kmara ta de nɛ ma yɛʔɛ̀ ma ge, da ti da glú mâ po ná ma, sanni drunya wí bi hli ge.
6Mí ma ma tyɛʔɛ hɛɛn bee na má ma fara naʔa drunya ni we mâ pe kân ná ma ge. Pe dá bo ma woolo. À ma pé kan ná ma. À pe na ma kayoro kpɔʔɔ de. 7Pé maʔa cɛn ŋaŋa ni ge mà yo yrɛbɛ pì bɛfu ba má kan ná ma ge, pì bɛfu pí ma jɛ wa mo ma. 8Mɛjɛn kayoro da ma dá yo ná kan ge, mí ma tiì tere yo pé kan, à pe ti loʔo. Pé maʔa cɛn kanyɛmɛ na mà yo mí ma jɛ wa mo ma. À pe paʔa na nɛ màʔa cɛn mà yo mo ma na tun.
9Ho na ma nyɛri drunya hɛɛn kala na. Di mí na ma nyɛri bee kala na má ma kan ná ma ge, mɛjɛn pé nyɛ ma woolo. 10Ki hɛɛn pè bɛfu bee pé nyɛ na woolo be, pé nyɛ ma woolo kpo. Bee pé nyɛ ma woolo be, pé nyɛ na woolo kpo. Pe fanŋa ni, na kmara tí na tì teri hɛɛn na be. 11Mí na sye mà krugu. Mi ìn bi bo naʔa drunya ni we adi. Di pee pé nyɛ naʔa drunya ni we. Na To, mo wi má nyɛ kmaa we. Bee má ma kan ná ma ge, maa pe kɔ̀rɔ̀sí ma fanŋa ni, jango pe po nigbe nɛ pa wòó wó nyɛ nigbe pomo ma na ge. 12Mi dá bo wa pe ní nyiŋi ga na ge, à mi na pe kɔrɔsi ma fanŋa ni, ga má ma kan ná ma ge. Wà nigbe ìn bunŋu pe nî nà ki ìn bo ŋa dí bì bunŋu wiì nigbe wi ge, jango kayoro ti fùnŋù da tí nyɛ wa nyoŋoro Nyɛʔɛlɛ li sɛbɛ ni we.#17:12 ma wèle wa Ŋuʔu 41:10; Jan 13:18 ni wè.
13Di ŋaŋa ni ge, mí bi gɛri mà krugu, à mi na nyu ban nyiŋi ga na mí nyɛ naʔa drunya ni adi ge, jango na lafiʔimi mi po wa pe lama ni me, mi fùnŋù. 14Pa mí ma ma kayoro yo de pe ma, drunya woolo à pe pé cɛ, mɛjɛn poò nyɛ drunya wi woolo nɛ pa ho nyɛ drunya wi woo ge. 15Ho na ma nyɛri bì yo ma pe yrigi naʔa drunya ni we. Di mí na ma nyɛri jango ma pe syɔ ŋa ma pé na yeri Hɛnpee ge. 16Poò nyɛ drunya wi woolo, nɛ pa domi ho nyɛ drunya wi woo ge. 17Ma pe yaʔa mà kân kanyɛmɛ fanŋa ni ge. Ma kayoro tiì di kanyɛmɛ nì me. 18Mí ma pe tun wa drunya ni we nɛ pa ma da ná tun naʔa drunya ni we pomo ma na ge. 19À mi nà kân má ma pompli pe kala na le, jango pe pè kân má ma kanyɛmɛ miì fanŋa ni.
20Ho na nyɛri pee nigbe kala na, di mí na nyɛri kpo bee kan pé bi baa pe kayoro nuru de bí da ba ná na ge. 21Mí na ma nyɛri jango pè bɛfu pe po nigbe. Pe po wa wo ni nɛ pa má nyɛ ná ni, domi á mi po má ni kpo pomo ma na ge. Nàʔa po ban, drunya woolo pa peʔe cɛn bì yo mo ma na tun. 22Kpangbanma ma ma dá gan ná ma ge, má ma mi kân pé ma, jango pe po nigbe nɛ pa wòó wó nyɛ nigbe pomo ma na ge. 23Mí nyɛ wa pè nî. Mo à ma po wa na nî, jango pe po nigbe, pe fùnŋù drunya hɛɛn peʔe cɛn pe yo mo wi ma da ná tun ge. À pe na ma glanʔa nɛ pa mí na ma glanʔa pomo ma na ge.
24Na To, mí ma cori bee má ma kan ná ma ge, ma pe yaʔa, pe ya bo wa na ní dedege na, jango pe na kpangbanma nya me, ma má ma kan ná ma ge, mɛjɛn sanni drunya wí bi hli ge mi dáa ma glanʔa kɔ. 25Na To, mo ŋa má nyɛ sinŋi we, drunya hɛɛn pe ìn ma cɛn. Di domi mí ma ma cɛn. Na ploʔofɛɛ à pe naʔa cɛn mà yo mo wi má ma na tun ge. 26Mí ma ma tyɛʔɛ pé na. Ali mí bi da ma teri pé na, jango hɛɛn pe tɔɔ pe da mo glanʔa we nɛ pa mí na ma glanʔa pomo ma na ge, jango mì bi go wa pe nî kpo.»
Trenutno izabrano:
JAN 17: NLK10
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of Côte d'Ivoire
