JAN 10
10
Mbara nì, ní ti naʔafɔlɔ yomɛlɛ
1Mí biʔi yo ye ma kanyɛmɛ na, nà hɛn wà bi luʔu mbara jasaʔa namyɛlɛ là na bi je wa ge, kí po wi ìn je ki goyɛʔɛ na ge, paʔa bo ki woo wí nyɛ nikonŋo. 2Di ŋa wí na jin goyɛʔɛ na wiì wi mbara naʔafɔlɔ we. 3Mbara goyɛʔɛ welefɔlɔ wi naʔa nyɛʔɛ ki woo kan we. Mbara ti na wi àkpolo loʔo le. Wi na wi mbatara yeri de ti yegee na ge na ti kondo na ti yrigi. 4Nòo tì bɛfu kondo bi tí yrigi kɔ ge, wi na klu ti yɛʔɛ̀ ma na sye. Ti na pa wí na na sye wì krugu, mɛjɛn tí ma wi àkpolo cɛn le. 5Wi mbara toò na pa nabonmoo na. Tí na fe pé na, mɛjɛn ti ìn nabonmoo pe akpoʔolo cɛn ge.»
6Jesu wi dá ki yomɛlɛ la kmo le pe kân, ɛɛn di, pe ìn li kɔ̀rɔ́ cɛn we.
Jesu wí nyɛ mbara naʔafɔgmaa wi
7Kiì kɔsɔ na, Jesu wɔ̀ɔ pé po: «Mí biʔi yo ye kan kanyɛmɛ na, mɛjɛn mì wi mbara jasaʔa goyɛʔɛ ge. 8Bee pe da glú mâ pan na yɛʔɛ̀ ma ge, pè bɛfu pé nyɛ nikonmoo mɛjɛn mbara ti ìn dàá nuru ki woo wà ma. 9Mì wi mí nyɛ mbara goyɛʔɛ ge. Hɛn ŋa wí bi je wa na ni ge, ki woo pɔɔ syɔ. Ki woo pɔɔ da jin bì da nyini bì da wi akaʔa taʔa bì daʔa ka. 10Nikonŋo wi hîn na pan yuhaʔa na, ní kpomo nì, ní yrɛbɛ cɔʔɔmo ní dron. Di domi mí ma pan jango ti ba nyuwyeʔe ta, ga kí nyɛ kmaʔa ceŋge ge.»
11Mí nyɛ mbara naʔafɔgmaa. Mbara naʔafɔgmaa pɔɔ ki ta bì gu bì wi mbara syɔ de.
12Hɛn ŋa wí na mbara naʔa sràʔà na ge, woò nyɛ mbara naʔafɔgmaa. Mbara tòo nyɛ wi woro. Nyiŋi ga na wí bi gà wele bí sanwyele là nya lí na pan wa ge, wi na mbara yaʔa de be mà fɛ. Sanwyele li naa ti prɔ na ti cun mà kan ti na fɛ mà craʔa. 13Wi hîn fɛ̀, mɛjɛn wí na mbara naʔa de sràʔà na dron. Toò nyɛ wí ma yraʔa kà. 14Mí nyɛ mbara naʔafɔgmaa. 15Na To wí ma na cɛn pomo ma na, domi á muu cɛn pomo ma na, kí nyɛ ban kpo mì nì, ní na mbara nì de. Mí ma ti cɛn, à ti domi cɛn we kpo. À miʔi ta bì gu na mbara ti syɔmo kala na le.#10:15 ma wèle wa Mat 11:27; Luk 10:22 ni wè. 16Mbara tà nyɛ wa na ma nɛ toò nyɛ mbara jasaʔa ga kiì woro. Kí ma yala bì nì bì ki mbara kondo de bì gɛri tí ni. Tí bi yà na àkpolo loʔo le kpo. Ki nyiŋi na, tì bɛfu pa ti yà blɛn bì bo mbadaʔa nigbe. Mbara naʔafɔlɔ pɔɔ bo nigbe.
17Mí na na To glanʔa we, mɛjɛn mí maʔa ta bì na kân kùʔù ma ge, jango bì ba nì bì na syɔʔɔ ma nɛ. 18Hɛn wɛ̀ ìn bi ba na kan kùʔù ma ge. Di mí maʔa ta bì gu. Sye nyɛ ná ma bì nà kân kùʔù ma ge. Sye nyɛ ná ma kpo bì nà syɔʔɔ ma. Na To wiì ma yo bìʔi hanri.
19 Juwifiyee pe honriri à ti taʔa mà konʔolo tì na nɛ ki kayoro ti kala na le. 20Hɛɛn fafaʔabaa dáa ki nyu mà yo: «Gbosyo nyɛ wí ni, wɔ̀ɔ ní mà po ticere fɔlɔ. Nyaʔa kɔsɔ na, yé na nuru wí ma ge?» 21À pèè ma naʔa nyu nɛ mà yo: «Gbosyo fɔlɔ wòo gban bì da nyu banmɛ ge. Gbosyo pɔɔ gban bì da fyoon pe nyɛʔɛ nyɛri ge pé na yo?»
Juwifiyee pé ma ce Jesu ma we
22Ki dá bo wyere nyiŋi na. À pe na srɛʔɛ fɛti wà hanri wa Jerusalɛmu kàʔà ni jango bì da lama tun nyiŋi ga nì pe dá sraʔá go yɛli Nyɛʔɛlɛ li yɛʔɛ̀ na ge. 23Jesu wi da yâ je wa gopiʔi gee ni pé na yeri Salomo gopiʔi wa Nyɛʔɛlɛ li sràʔá go ki deʔe na ge. 24Ki nyiŋi na, Juwifiyee à pe kɛri mà yɔ́ɔ̀ kɛli mòo po: «Má ma cori wo nyiŋi jori kɔ má na da mâ wò lama sinŋi me wo na ge? Nàʔa po mo wi Nyɛʔɛlɛ li wofràa we, maʔa yo maʔa flìgí wo kan.» 25Jesu wɔ̀ɔ pé po: «Mi da glu naʔa nyu ye kan fan. Di yoò mɛɛ na paʔa na. Kaʔa gee mí ma hanri na To wi yele na le, ki kaʔa ké na nyu na kala na le mà naʔa teri ye na hɛn ŋa wi ná ni ge. 26Di yèé, ye ìn je baʔa na, mɛjɛn yoò nyɛ domi na mbara. 27Na mbara tí na na àkpolo nuru le. Domi mí ma ti cɛn. À ti na pa ná na. 28Mí ma nyuwyeʔe bajegɔ kan bee ma pé na pa ná na ge. Pe ìn bi gà bunŋu fyeu. Hɛn wɛ̀ ìn bi gban bì pe syɔ wa na kyɛʔɛ̀ ni ge. 29Na To wiì ma pe kân ná ma. Wí ma kpɔʔɔ mà toro yrɛbɛ pì bɛfu na. Hɛn wà wóo gban bì pe syɔ wa wi kyɛʔɛ̀ ni ge. 30Domi nì, ní na To nì wó nyɛ nigbe.»
31Ki nyiŋi na, Juwifiyee à pe taʔa ma ŋglɛnrɛ tà kpe nɛ jango bùu wa tí ni. 32Jesu wɔ̀ɔ pé po: «Mí ma kakmaʔa fafaʔagaa hanri yè yɛ̀ʔɛ̀ na na To wiì fanŋa ni. Ki kaʔa ni ge, lilii kɔsɔ na yé naʔa ca bì na wa ŋglɛnrɛ ní ge?» 33À poo po: «Kakmaʔa là kɔsɔ ban wó naʔa ca bì ma wa ŋglɛnrɛ ní ge. Nyɛʔɛlɛ li yele cɔʔɔmo kala li. Mo má nyɛ hɛnwyee dron, di má yo má nyɛ Nyɛʔɛlɛ.»#10:33 ma wèle wa Sraʔa 24:16 ni wè.
34Jesu wɔ̀ɔ pé po: «Koò nyɛ wa nyoŋoʔo ye furu sɛbɛ ni we yo mâ yo: Nyɛʔɛlɛ à liʔi yo mà yo: ‹Yé nyɛ nyɛʔɛŋɛɛ kèè gɛ ye nì ge?›#10:34 ma wèle wa Ŋuʔu 82:6 ni wè.
35Wó maʔa cɛn mà yo hɛn wɛ̀ ìn bi gban bì Nyɛʔɛlɛ kayoro krɛʔɛ de. Di li dá li kayoro yo hɛɛn bee ma ge, à li na pe yeri nyɛʔɛŋɛɛ. 36Ŋa To wi dá fara móò tun naʔa drunya ni we mì wi. Nàʔa po ban, paʔa bo mɛlɛ yé yo mí ma Nyɛʔɛlɛ li yele cɔʔɔ le, dee di, à mi gáʔà yo mâ yo mí nyɛ Nyɛʔɛlɛ li Pyɔ ge? 37Nàʔa po ho na na To wi nadanma kaʔa hanri ge, yò ga ba ná na. 38Di náʔa po mí na ke hanri, ali nàʔa ja bo ye ìn bi ba ná na, kí ma yala ye pà na kahranʔa na ge, jango yeʔe cɛn kmaʔa, ye yo To Nyɛʔɛlɛ lí nyɛ wa na nî. Mì fanna, mí nyɛ wa To Nyɛʔɛlɛ ni le.»
39Ki nyiŋi na, à pe naʔa ca nɛ pé buu co. Di wɔ̀ɔ nyini mà syɔ pé ma, 40mà hru mà kɛri nɛ Jurudɛn lɔʔɔ namyɛʔɛ gegeʔe na, deʔe ga na Jan wi dáa hɛɛn batise kplɛʔɛ na ge mà yâ go wa. 41Hɛɛn fafaʔabaa dá bo na sye wì krugu. Ki woò à pe naʔa nyu mà yo: «Ali Jan wi ìn dà ja kafonŋoo là nigbe hanri, kiì nì kì bɛfu ní, ga wi dáa nyu Jesu wi namyɛʔɛ na ge, kì bɛfu ki dá bo kayocɛnŋɛ gi.» 42À hɛɛn fafaʔabaa ma pa wí na wa ki deʔe na ge.
Trenutno izabrano:
JAN 10: NLK10
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of Côte d'Ivoire
