HLIMI 40
40
1Ki kaʔa ke kruʔu ma, Ejipite klo fɔlɔ wi hunmù kanfɛɛ pe lagwɔ ní wi bru kanfɛɛ lagwɔ ní à pe kala là hanri mà pe kafɔlɔ wi lama gban me ŋa Ejipite klo fɔlɔ we. 2Ki lekpandoo syɛn pe dá Farahon wi lama gban me wì na ceŋge wi hunmù kanfɛɛ pe lagwɔ ní wi bru kanfɛɛ pe lagwɔ ní we. 3Wɔ̀ɔ kí yo, à pe pe co mà pe wa kaso ŋa ni wi na wi kaso fɛɛ ni be. 4Kaso go welefɛɛ pe lagwɔ wɔ̀ɔ pé kan Josɛfu ma wi da pe kɔ̀rɔ̀sí. À pe nyiŋi kà kɔ wa cɛnri kaso nî.
Josɛfu wí ma kasofɛɛ syɛn pe ŋlonro ti kɔ̀rɔ́ tyɛʔɛ pè na
5Yeblitege kà ni, klo fɔlɔ wi bru kanfɛɛ lagwɔ ní wi hunmù kanfɛɛ lagwɔ ní pe syɛnmu à pe ŋlonro ŋolo wa pe kaso go ni. Ti kɔ̀rɔ́ wɔ̀ɔ po wì yɛ wi yɛ. 6Ki kpɛnmɛ mi gâ do, Josɛfu wɔ̀ɔ kɛri pè krugu bì yà pe wele. Wɔ̀ɔ yâ pe nya yɛpɛnʔɛ ní. 7Wɔ̀ɔ ki lekpandoo yugu bee pé nyɛ Farahon woo, bee pe dá bo wa wi ní teme na wi kafɔlɔ go ni mâ po pé ma pe le kaso nî ge. Wɔ̀ɔ pé po: «Nyaʔa ma po wa alaʔa nî á ye po yɛpɛnʔɛ ní ge?» 8À poo po: «Wó ma ŋlonro ŋolo, di hɛn wɛ ìn dà bi gban bì ti kɔ̀rɔ́ nyɛli wo kan.» Josɛfu wɔ̀ɔ pé po: «Nyɛʔɛlɛ liì ban lí ma ti kɔ̀rɔ́ cɛn we yo? Ye yè ŋlonro tanli de na kân.»
9Klo fɔlɔ wi hunmù kanfɛɛ pe lagwɔ wɔ̀ɔ wi ŋlonʔo tanli Josɛfu ma mà yo: «Ga mi dá nya wa na ŋlonʔo ni kí ga: Mi dí hunmù tiʔi nya wa na yɛʔɛma ni we. 10Ki tiʔi ki kaclara à ti po tanri. Ti gâ fun nyiŋi ga na, ti wofyɛnʔɛ àʔa kpɔʔɔ. Ki katoro à ti hrɛsɛn pibi sɛ pegɔbɔ. 11Farahon wi ajɔlɔ li dá bo wa na kyɛʔɛ ni, à mi hrɛsɛn pibi yuʔu mà pi nyumu le wa Farahon wi ajɔlɔ ni mà li kpe ma li le wa Farahon wi kyɛʔɛ ni ge.» 12Josɛfu wɔ̀ɔ wí po: «Ki kɔ̀rɔ́ wí ŋa: Katoro tanri wí nyɛ wlɛrɛ tanri wi. 13Nà wlɛrɛ tà bi doro nɛ tanri, Farahon pɔɔ ma kpɔʔɔ nɛ bì ma tunŋu kan ma ma nɛ ga ma di glú na ko fan mâ po wi hunmù kanfɛɛ pe lagwɔ ge. Pa ma ba nì bì wi ajɔlɔ kan wì ma nɛ wa wi kyɛʔɛ ni nɛ pa ma da glú mâ naʔa hanri pomo ma na nyiŋi ga na ma dá bo wi hungoon pe lagwɔ ge. 14Di nà ma gáa frɛmɛ ta nyiŋi ga na, ma lama to ná ni. Mí na ma fɛn, ma kmaʔa hanri ná na. Ma na kayoʔo yo Farahon kan jango wi lama to ná ni, wi na fara naʔa ki kaso ŋa ni we. 15Pé ma jɛ na ní Ebruyee klo ni. Ali naʔamɛ ni ge mi ìn katipele la hanri, di à pe na le naʔa ki kaso ŋa ni we.»
16Klofɔlɔ wi bru kmofɛɛ pe lagwɔ wi gâ Josɛfu nya wí ma ŋlonʔo ki kɔ̀rɔ́ tanli wɔ́ɔ po taan, wɔ̀ɔ Josɛfu po we: «Welé ga mi dí ŋolo kí ga: Mi diʔi ŋolo màʔa nya nɛɛ mí ma brufii kpogoo tanri tugu wa na yugu na. 17Wa kpòlò la ni li dá bo wa kè bɛfu ke yugu na Farahon wi akaba tyɛnʔɛ kè bɛfu ke dá bo wa lì ni mà po pegɔbɔ, di kajɛnʔɛ à ke bâ pi jɔ wa kpòlò ni na yugu na ge.» 18Josɛfu wɔ̀ɔ wí po: «Ki kɔ̀rɔ́ wí ŋa: Kpògoo tanri wí nyɛ wlɛrɛ tanri wi. 19Na wlɛrɛ tanri bi doro kɔ, Farahon pɔɔ ba ma yugu kon mà na bì ma pwɔ tiʔi na. Kajɛnʔɛ ke ma wre jɔ de.»
20Ki wlɛʔɛ tanriwoʔo ki dá bo Farahon wi hewlɛʔɛ gi. Wɔ̀ɔ fɛti hanri wi tungɔɔ pè bɛfu kan. Wi dá wi bru kmofɛɛ pe lagwɔ ní wi hunmù kan fɛɛ pe lagwɔ yrigi wa wi tungɔɔ pe nulala ni le, 21mà klo fɔlɔ wi hungoon pe lagwɔ kpɔʔɔ mà wi tunŋu kan wi ma nɛ, jango wi da Farahon wi ajɔlɔ kanʔa le wi ma nɛ wa wi kyɛʔɛ ni ge. 22Di wɔ̀ɔ bru kmofɛɛ pe lagwɔ kan, à pe yɔ́ɔ̀ pwɔ tiʔi na. Àʔa hanri mà yala ŋlonʔo ki kɔ̀rɔ́ ní ŋa Josɛfu wi dá yo ge. 23Hunmù kanfɛɛ pe lagwɔ kpangbanŋa wi ìn honri bì lama to Josɛfu nì, di wɔ̀ɔ lama wɔ wí ni.
Trenutno izabrano:
HLIMI 40: NLK10
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of Côte d'Ivoire