HLIMI 37
37
Josɛfu wi ŋlonro
1Jakɔbe wi dá go wa Kana klo ni wa deʔe ga na wi to wi dá bo ge. 2Jakɔbe wi kluʔu kiì ga ge. Josɛfu wi dá bo wí ma ta yɛʔɛ́ kɛ̂ ma kɛ̀ nasyɛn. Wɔ̀ɔ plɛn wi lɛɛ ní, à pe na wi to wi ajobo naʔa be. Ki pyɔ wi dáa gori pii bee tanla wi to cɛɛ syɛn Bila nì, ní Silipa nì pe dá he ge. Josɛfu wi dáa ban mà báa pe tipeme mì bɛfu nyu pe to ma we. 3Josɛfu wi dáa Israyɛli glanʔa mà toro wi pii pe tɔɔ na be, mɛjɛn wi dɔɔ́ he wi nalɛgɔmo nyiŋi na. Wɔ̀ɔ drekpɔʔɔ kà le wí na nyoŋomo ní fafaʔama. 4Wi lɛɛ pe gáʔà nya wí na pe to glanʔa mà toro pee pè bɛfu na, wɔ̀ɔ na pe bɛnʔɛ. Pe ìn dàá gbanni bì da nyu wí ni nɛ pa pe nagoro nyɛ.
5Josɛfu wɔ̀ɔ bâ ŋlonʔo ŋolo màʔa tanli wi lɛɛ kan be. Ki nyiŋi na wɔ̀ɔ pé bɛn mà toro kplɛʔɛ na. 6Wɔ̀ɔ pé po: «Ye na ŋlonʔo loʔo ga mí ma ŋolo ge. 7Wo dá bo na akpapwɔʔɔ pun wa kere nulala ni. Ye wèlé, pwɔlɔ la mi dá bwɔ à li jɛ mà yere. Yè woʔolo kè bɛfu à ke bâ na wolo kɛli le mà kpɔbu be lì tanla.» 8Wi lɛɛ à poo po: «Má bi ba glɛn wò yugu na bì bo wò kundiʔi yo? Má bi ba glɛn wò klo fɛrɛ na de yo?»
Ki nyiŋi na wɔ̀ɔ na pe bɛnʔɛ mà toro kplɛʔɛ na wi ŋlonro kala na ní wi kayoro ní de.
9Wɔ̀ɔ ní mà bâ ŋlonʔo kà ŋolo màʔa yo wi lɛɛ kan be nɛ mà yo: «Mí ma ŋlonʔo kà ŋolo nɛ màʔa nya yaa nì, yege nì, ní ŋoŋoo kɛ̂ mà kɛ̀ nigbe ní pi ba gboʔolo nà tanla na kunbiʔi kanni.»
10Wi dá ki ŋlonʔo tanli wi to kan ní wi lɛɛ ní be. Wi to wɔ̀ɔ yo wí ni gbanʔa mà yo: «Ma ŋlonʔo ga ma ŋolo ki kɔ̀rɔ́ wí nyɛ nyaʔa ní? Kí ma yala mì nì, ma no nì, ma lɛɛ ní wo pan wo ba kunbiʔi kán mo tanla tra na de yo?»
11Wi lɛɛ à pe kayaga co wi ní, di wi to wi dá ki kaʔa co kmaʔa mà na lama tun ké ni.
Josɛfu wi lɛɛ pé moo pɛrɛ
12Josɛfu wi lɛɛ pe da gɛrí Sisyɛmu ni bì yàá pe to wi mbara naʔa de wa. 13Israyɛli wɔ̀ɔ kí yo Josɛfu ma we mà yo: «Ma lɛɛ pé nyɛ wa Sisyɛmu ni na mbara naʔa de. Ma pan mí bi ma tun wa pe ma.» Wɔ̀ɔ yo: «Mí ŋa.» 14Israyɛli wɔ̀ɔ wí po: «Ma kɛri ma ya ma lɛɛ wele be wa, nàʔa po pé nyɛ gbanmaa, ajobo á pi po wa pi nolo, ma pan ma ba ki jase wa na kân.»
Ki nyiŋi na wɔ̀ɔ wi troʔo wa Ebron tindɛʔɛ nî ge. Josɛfu wɔ̀ɔ kɛri wa Sisyɛmu ni. 15À naŋa wà yâ flin wi ní wi ní wí na nyari na hɔlɔ wa kere ni de. Ki naŋa wɔ̀ɔ wi yugu mà yo: «Má na nyaʔa ca?» 16Josɛfu wɔ̀ɔ wí po: «Mí na na lɛɛ ca. Maʔa yo ná ma, mí na ma fɛn, pé na ajoyribi naʔa be hanbe?» 17Ki naŋa wɔ̀ɔ wí po: «Pé ma jɛ naʔamɛ mà kɛri. Mɛjɛn mi daʔa loʔó pé ma à pe naʔa nyu mà yo: Yo kɛ, wo kɛri Dotan ni.»
Josɛfu wɔ̀ɔ kɛri wi lɛɛ krugu be mà yâ pe nya wa Dotan ni we. 18Wi dá bo wí na pan wa leʔe, à poo nya. Sanni wí bi no wa pe na, à pe yo mà flinʔi na mà yo pe bɔɔ kpo. 19Pe dáa ki nyu pè ma mà yo: «Ye wèlé, ŋlonro ŋolofɔlɔ wí na pan wa. 20Ki tɔ na, ye pan wo bɔɔ kpo, woo wa tindɛʔɛ kà ni. Wo yaʔa yo wo yo ajotipeʔe kà moo ka. Nàʔa po ban, pa woʔo nya wi ŋlonro tí bi ba grɛʔɛ yraʔa ga ge.»
21Hrubɛn wi gáʔà loʔo wɔ̀ɔ kɛri mà yɔɔ syɔ pé ma. Ki nyiŋi na wɔ̀ɔ pé po: «Wò gɔɔ kpo.»
22Hrubɛn wi daʔá yo pé kan mà yo: «Yò gá disyan kà wo, di yòo wa wa tindɛʔɛ kà ni naʔa sinbriʔi ni ge. Yò gɔɔ kpo.»
Wi dáa ki honri bùu syo pé ma, jango bùu troʔo pe to kan we.
23Josɛfu wi da gaâ no wa wi lɛɛ na be, à pe wi drekpɔʔɔ fara wi na. Ki drekpɔʔɔ ki dá bo nyoŋomo ní fafaʔa mà po wí na leʔe, 24mòo kpe mòo wa wa tindɛʔɛ ni. Ki tindɛʔɛ ki dá bo waʔafe. Nyumu ìn dà bo waʔa nî. 25Ki kruʔu ma à pe klɛn bì li. Pe gâ yɛrɛ jrɛʔɛ mâ wele mà Isimayɛli woo pèè nya pe jɛ́ Galadi klo ni na toro na sye Ejipite klo ni. Pe nyoʔomɛyee pe dá tiri tà kro tugu da tí na nuʔu tanʔa ge. Pé na ti yeri Adrajante, bome nì, ní ladanumu nì. 26Ki nyiŋi na Juda wɔ̀ɔ kí yo pe tɔɔ ma be mà yo: «Nà wo wò conlo kpo bí wi disyan hra, pa wo nyaʔa ta? 27Ye pan woo pɛ̀rɛ́ Isimayɛli woo ma be. Wò gá tipeʔe hanri wí na wò kyɛ̀rɛ́ ni, mɛjɛn wò conlo wi wò wre tà di.»
Pe tɔɔ à pe loʔo wí ma. 28Majan klo ya wafɛɛ pèè dáa doro. Josɛfu wi lɛɛ à poo fara wa tindɛʔɛ ni mòo pɛrɛ ki ya wafɛɛ ma bee Isimayɛli kluʔu woo be, waafiʔi fonɛrɛ na. À poo syɔ mà kɛri wí ni Ejipite klo ni le.
29Hrubɛn wi gâ hru mâ pan be tindɛʔɛ deʔe na, wi ìn ba Josɛfu nya waʔa ni. Wɔ̀ɔ wi drere hlugu, 30mà hru mà kɛri pe tɔɔ krugu be mà yâ pe po: «Pyɔ woò nyɛ wa adi. Domi mí bi le hanbe ki tɔ na?»
31À pe Josɛfu wi drekpɔʔɔ kpe mà ŋkapɔlɔ wà kpo màʔa le wa wi disyan ni ge. 32Ki kruʔu ma à pe drekpɔʔɔ troʔo wa pe to ma we, ki drekpɔʔɔ ga ki dá bo nyoŋomo ní fafaʔa ge, mà yo pe yɔɔ po: «Welé ga wó ma nya wa kiì gi ga ge. Maʔa cɛ́n nàʔa po ma pyɔ wi drekpɔʔɔ kiì gi yoo, kana kiì ban yoo?» 33Jakɔbe wi daʔa cɛ́n, wɔ̀ɔ yo: «Na pyɔ wi drekpɔʔɔ kiì gi. Ajotipeʔe kà moo ka. Pé ma Josɛfu hlugu we.»
34Ki nyidege na, wɔ̀ɔ wi drere hlugu de mà kasyaʔa pwɔ wi hɛnŋɛɛ na mà klɛn wi pyɔ wi kùʔù na ma mo ceŋge. 35Wi pii, nabii ní cɛɛ ní pè bɛfu pe dá ban mà báa wi fɛn, di wi ìn daʔa ta bì loʔo pe fɛnmɛ kayoro kà nigbe ma. Mɛjɛn wi dáa ki nyu mà yo: «Nà mi da gbele, pa kiì bí ná kan bì gɛri ticaʔaga na pyɔ krugu wa kuu kaʔa ni ge.» Wi dáa gbele ceŋge wi pyɔ kala na.
36Majan woo pee à pe yɔ́ɔ̀ pɛrɛ wa Ejipite klo ni Potifari ma, ŋa wi dá bo Farahon wi kaso go welefɛɛ pe lagwɔ we.
Trenutno izabrano:
HLIMI 37: NLK10
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of Côte d'Ivoire