HLIMI 29
29
Jakɔbe wí ma flin Hrasyɛli nì
1Jakɔbe wɔ̀ɔ jɛ mà kloʔò kpe mà na sye yaa jɛhaʔa namyɛlɛ hɛɛn pe klòʔo ma. 2Wi gáa sye ná wele, wɔ̀ɔ kɔ̀lɔ́ wà nya wa kere ni de. À mbadara tanri mà po be deʔe ga na pe dáa ti kanʔa á ti na jo ge. À ti po tí na fyonri. Ŋglɛnʔɛ ga pe dá kɔ̀lɔ́ tón we àʔa po kpangbanŋa. 3Ki dá bo mbadara nà ti bâ gboʔolo be nyiŋi ga na kɔ̀lɔ́ tanla, pe na ŋglɛnʔɛ kloʔo màʔa laʔa wa kɔlɔ na mà mbara kan ti na jɔ. Ki kruʔu ma pe naʔa kloʔo màʔa tón wa nɛ kɔ̀lɔ́ no na ge. 4Jakɔbe wɔ̀ɔ mbara naʔafɛɛ yugu be mà yo: «Na woolo, yé ma jɛ hanbe?» À poo po: «Wó ma jɛ Aran ni.» 5Wɔ̀ɔ pe yugu mà yo: «Yé ma Laban cɛn yo, Nahɔri pyɔ we?» À poo po: «Wó moo cɛn.» 6Wɔ̀ɔ pe yugu mà yo: «Wí nyɛ gbanŋa yo?» À poo po: «Ee, wí gbanŋa. Ali wi picɛ Hrasyɛli wí ŋa wí na pan wa pe mbara nì de.» 7Wɔ̀ɔ yo: «Welé, kí nyɛ kpɛnmɛ na adi. Nyiŋi ki ìn je dyɛʔɛ kpɛn pe mbara kpoʔolo de. Ye ti kan ti jɔ. Ki kruʔu ma ye kɛri tí ni ti ya lì.» 8À poo po: «Wo ìn bi gban bìʔi hanri fɔ kí po mbara tì bɛfu tí ma kpoʔolo. Pa wo ba ŋglɛnʔɛ kloʔo bìʔi laʔa wa kɔ̀lɔ́ yugu na ki nyiŋi na bì na tí kan ti jɔ.»
9Wi dá bo wí na nyu pé ni adi, Hrasyɛli wɔ̀ɔ pan wi to wi mbadaʔa ní ge, mɛjɛn wi dá bo mbara naʔafɔlɔ. 10Jakɔbe wi da gâ Hrasyɛli nya nyiŋi ga na, wi no wi lɛ Laban picɛ we, wɔ̀ɔ flo wa mà ŋglɛnʔɛ kloʔo màʔa laʔa wa kɔ̀lɔ́ yugu na ge mà wi no wi lɛ Laban wi mbara kan, à ti jɔ. 11Jakɔbe wɔ̀ɔ Hrasyɛli fyon mà kpele gbanʔa ceŋge. 12Ki kruʔu ma wɔ̀ɔ ki tyɛʔɛ Hrasyɛli na mà yo wiì Jakɔbe wí nyɛ wi to wi heme woo wà wi wí ni, Hrebɛka pyɔ wi wí ni. Hrasyɛli wɔ̀ɔ fɛ mà kɛri mà yáʔà yo wi to ma we. 13Laban wi da gâ wi cɛpii pyɔ Jakɔbe kayoʔo loʔo nyiŋi ga na, wɔ̀ɔ fɛ mà kɛri mà yɔ́ɔ̀ flin mòo fyon mòo co mà pan wí ni wi go nî. Jakɔbe wɔ̀ɔ bâ ki kaʔa kè bɛfu tanli wí kan. 14Laban wɔ̀ɔ wí po: «Kanyɛmɛ na, má nyɛ na kacleʔe kà gi mà nì mà po na wre kpo.»
Jakɔbe wɔ̀ɔ ko wa Laban nì we mà ta yebogo.
Jakɔbe wi pii kayoʔo
15Ki kruʔu ma Laban wɔ̀ɔ Jakɔbe po we: «Pa ma gâ bo na heme woo wi ma ni, pa ma da tunŋu ko ná kan waʔafe yo? Ma ma sràʔà nyɛli na kân.»
16Àʔa hin bo picɛɛ syɛn dá bo Laban ma we. Lagwɔ pe dáa wi yeri Leya na wi conlo yeri we Hrasyɛli. 17Leya wi nyɛʔɛ ke ìn dà bo kmaʔala, di Hrasyɛli wi wre klɛnmɛ mi dá bo kmama. Wi yɛʔɛ̀ àʔa po kmaʔa kpo. 18Hrasyɛli wi dá Jakɔbe glan we. Wɔ̀ɔ yo: «Mí bi tunŋu kɔ má kan bì da yɛʔɛ́ nasyɛn, ma ba ma picɛ syɛnwoo kân na ma ŋa pé na yeri Hrasyɛli we.»
19Laban wɔ̀ɔ wí po: «Nà muu kân mo ma, paʔa na glan bì doro ga na mí buu kân hɛn wà ma wì yɛ ge. Ma kò naʔa ná ni.»
20Ki kala na Jakɔbe wɔ̀ɔ tunŋu kɔ Hrasyɛli kala na mà ta yɛʔɛ́ nasyɛn. Àʔa po wí ma nɛ wlɛrɛ cɛnri wi, mɛjɛn wi dáa wi glanʔa. 21Ki kruʔu ma Jakɔbe wɔ̀ɔ kí yo Laban ma mà yo: «Na cɔ kan na ma, mɛjɛn nyiŋi kí ma kɔ kɔ, jango bùu le go ni.»
22Laban wɔ̀ɔ ki deʔe hɛɛn pè bɛfu kpoʔolo mà fɛti hanri. 23Yaakwɔʔɔ na, wɔ̀ɔ bâ Leya kpe mà kɛri wí ni Jakɔbe kan we. Wɔ̀ɔ yâ go wi ní ki yebliʔi ni ge. 24Laban wɔ̀ɔ Silipa, ŋa wi tungɔɔ kan wi picɛ Leya ma wi ya bo wi tungɔɔ. 25Ki kpɛnmɛ mi gâ do, wɔ̀ɔ kí nya Leya wi. Jakɔbe wɔ̀ɔ kí yo Laban ma mà yo: «Má ma nyaʔa hanri ná ni banmɛ ge? Mi ìn dà tunŋu kɔ má kan Hrasyɛli kala na yo? Má ma na fanla nyaʔa?»
26Laban wɔ̀ɔ wí po: «Koò na hanri naʔa ban ki deʔe ga na ge, pe je glu bì picɛpii tatunŋu kan lagwɔ wi yɛʔɛ̀. 27Ma ki canwyele kɔ le ŋa nì we. Pa wo ba wi tɔ kan ma ma ma nì ma tunŋu kɔ ná kan fonŋo nɛ ma ta yɛʔɛ́ nasyɛn.»
28Jakɔbe wɔ̀ɔ ki hanri banmɛ ge. Wɔ̀ɔ ki canwyele kɔ Leya nì we. Ki kruʔu ma Laban wɔ̀ɔ wi picɛ Hrasyɛli kan wi ma wi po wi cɔ. 29Laban wɔ̀ɔ wi tungɔɔ Bila kan wi picɛ Hrasyɛli ma we wi ya bo wi tungɔɔ. 30Jakɔbe wɔ̀ɔ Hrasyɛli kpe we kpo wi cɔ. Wɔ̀ɔ noo glanʔa mà toro Leya na we. Wi da tunŋu kɔ Laban kan nɛ mà ta yɛʔɛ́ nasyɛn.
Jakɔbe wi pii
31Bajegɔ Nyɛʔɛlɛ li daʔá nya Leya wi ìn dàá wi pɔlɔ glanʔa we, à li piheʔe kan wi ma, di Hrasyɛli wiì wi ìn dàá hin. 32Leya wɔ̀ɔ acɛnlɛ ta mà bâ he nabii mà yele kan wí na mà noo yeri Hrubɛn, mɛjɛn wi dá yo: «Bajegɔ Nyɛʔɛlɛ lí maʔa nya pomo ma na pe na na cɛrɛ ge. Ki tɔ na mí bi da na pɔlɔ glanʔa we.»
33Wɔ̀ɔ bâ nì mà acɛnlɛ là ta nɛ mà bâ ki pyɔ he nabii mà yo: «Bajegɔ Nyɛʔɛlɛ lí maʔa loʔo mà yo mi ìn dàá na pɔlɔ glanʔa we, à li hin ki woo ŋa kan na ma.»
Leya wɔ̀ɔ yele kan wí na noo yeri Simenyo. 34Wɔ̀ɔ ní mà acɛnlɛ là ta nɛ mà bâ ki woo he nɛ nabii màʔa yo mà yo: «Ki tɔ na mí bi da na pɔlɔ glanʔa pɔɔ wì pwɔ ná na, mɛjɛn mí ma nabii tanri he wí kan.»
Ki kala na à pe na ki pyɔ yeri Lefi.
35Wɔ̀ɔ ní mà acɛnlɛ là ta nɛ mà bâ nabii wà he nɛ. Wɔ̀ɔ yo: «Ki tɔ na mí bi da Bajegɔ Nyɛʔɛlɛ sonni le.» Ki kala na wi dá yele kan wí na mà noo yeri Juda.
Wɔ̀ɔ yere ban. Wi nì da hin adi.
Trenutno izabrano:
HLIMI 29: NLK10
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of Côte d'Ivoire