HLIMI 13
13
1Abramu wɔ̀ɔ jɛ wa Ejipite klo ni mà hru mà kɛri Kana klo li yaa prama kaligi namyɛlɛ na wi cɔ nì, ní wi yrɛbɛ pì bɛfu ní. Lɔte wi dá blɛ́n wí ni kpo.
Abramu nì Lɔte nì pé ma kon pè na
2Abramu wi dá bo masanaŋa ceŋge. Ajobo pi dá bo wí ma fafaʔa ní waafiʔi gbejanra nì tɛ nì we. 3Wɔ̀ɔ jɛ na sye wi tanʔala na le wa yaa prama kaligi namyɛlɛ na na sye cɛn cɛn fɔ mà yâ no wa Betɛli na we, 4wa deʔe ga na wi da glú mâ wi kpasyoro go kán wa Betɛli nì, ní Ayi nì pi kpafoʔo ni, wa deʔe ga na wi da glú mâ sraʔá farahaʔa fan ge. Abramu wɔ̀ɔ na Bajegɔ Nyɛʔɛlɛ li yele yeri le wa ki deʔe na ge.
5Lɔte ŋa wi da blɛ́n wí ni, mbara fafaʔa dà bo wí ma, ní ŋkaa ní, niri nì, wɔ̀ɔ po kpasyoro goro tà nì wi ma kpo. 6Klo li da jɛrɛ pe na. Àʔa po pòo gban bì go teme na, mɛjɛn pe masaʔa ki dá bo fafaʔa ceŋge mà po pòo gban bì go teme na. 7À mlara na jrɛʔɛ wa Abramu wi ajobo naʔafɛɛ ní Lɔte wi ajobo naʔafɛɛ ní pe kpafoʔo ni ge. Kana woo ní, Fɛrɛsi woo ní pe dá bo wa klo ni le. 8Ki nyiŋi na Abramu wɔ̀ɔ kí yo Lɔte kan mà yo: «Ki ìn yala kakara bi jɛ wò kpafoʔo ni mì nì mo ní we. Ki ìn yala ti po wa kpo wò ajobo pi naʔafɛɛ pe kpafoʔo ni kpo. Mɛjɛn wó nyɛ hedeme woo bɛ wo nì. 9Klo lì bɛfu lí la wa ma yɛʔɛ̀ ma ge. Wo kon wò na. Nà ma kɛri kamolo na, domi pa mi gɛri kaligi na. Nà ma kɛri kaligi na, domi pa mi gɛri kamolo na.»
10Lɔte wɔ̀ɔ wi yɛʔɛ̀ jrɛʔɛ mà wele mà Jurudɛn deʔe nya hɔrɔ tí na pan waʔa na ceŋge. Sanni Bajegɔ Nyɛʔɛlɛ lí bi Sodɔmu nì Gɔmore kyɛ̀rɛ̀ cɔʔɔ de, ki da no wa fɔ Sowari na we mà po nɛ pa Bajegɔ Nyɛʔɛlɛ li nagɔ wi mà nì mà po nɛ pa Ejipite klo nyɛ le. 11Lɔte wɔ̀ɔ Jurudɛn lɔʔɔ tindɛʔɛ deʔe kpe ki po wi woʔo mà kɛri wi kaple ní le wa yaa jɛhaʔa namyɛlɛ na. À pe konʔolo pè na ki pomo ma miì na. 12Abramu wɔ̀ɔ ko wa Kana klo ni le. Lɔte wɔ̀ɔ kɛri mà yâ glɛn wa Jurudɛn klɛnmɛ ni mà yâ wi kpasyoro goro kán de wa fɔ Sodɔmu ni. 13Ki kàʔà hɛɛn pe dáa tipeʔe hanri Bajegɔ Nyɛʔɛlɛ na le ceŋge pe tanʔama tipeme kala na le.
14Lɔte pɔɔ da gâ laʔa Abramu na we kɔ, Bajegɔ Nyɛʔɛlɛ à liʔi yo Abramu ma we mà yo: «Ma wèlé wa namyɛʔɛ kè bɛfu na. 15Mɛjɛn ki klo la lì bɛfu la má na nyaʔa ge, mí bi li kân má ma ní ma kluʔu pii ní be, li kò yè wolo nyiŋi kì bɛfu na.#13:15 ma wèle wa Pit 7:5 ni wè.
16Mí bi ma kluʔu pii nyɛʔɛ be fɔ hɛn wà wóo gban bì pe tonli. Hɛn ŋa wí bi gban bí tanyrɛʔɛ tonli ga kí nyɛ naʔa tra na de, ki woo pɔɔ gban bì ma kluʔu pii tonli be kpo. 17Ta sye ma ya nyari ma ki klo kolo ma li krɛʔɛ̀ li tiklonmo ní, ní li prama ní, mɛjɛn mí bi ba li kan mo ma.»
18Abramu wɔ̀ɔ jɛ be ki deʔe na mà kɛri Mamre syɛni tiri deʔe na, ga kí nyɛ wa Ebron tanla we mà yâ sraʔá farahaʔa fan wa Bajegɔ Nyɛʔɛlɛ kan le.
Trenutno izabrano:
HLIMI 13: NLK10
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of Côte d'Ivoire