Махьтвеест 26
26
Кохт логь кудат алгтэс.
1Кось Исус кеджетій пукэд тайд санит, танна цилькій иджес вопнаттіит:
2Тій тетветте, пэйиль кохт пейв ленч Едж‐пейв; и олмэ эльк ленч антам поаншемме.
3Танна чоӈкдэттиш шорьмус папэ и кирь‐кидэ и паррасамус олмэть шорьмус папэ, нэм мельт Кайяфа, двор сиз.
4И пійиш сарнмужест вальтед Исус мудрэй налла, и коньтед.
5А сарнуш: ій гал пась‐пейв, ій леччи сягатамуш олмэ сист.
6Кось же Исус ляй Вифаніест, Семман хуррій пэртест;
7Пудій сунне ніезан‐біель алвастр асьтіин кал?-?лэшин мир‐вуйин, и валлэдій сунне лешмен ойв эл.
8Уйниш тан су вопнаттій, и ет саввашешкот?-?манч, и сарнуш: мэн дет моккам анмуш?
9Ой леччи миккэдь тан мир‐вуй шур арвэсьт, и аньтед юммель‐нэм‐аннэит.
10А Исус, кось томдэтій тан, цилькій сійит: мэйт сягатеппе ніезан? сон порь туй туій му баяс.
11Тэн дет што юммель‐нэм‐аннэит юккь баль тійи міельт ліе, а мон им лякку юккь баль тійи вуйм.
12Кось валэй таи мир‐вуй му лешк эл, сон валлэшестій му руккэдуммуже.
13Вуйкист тійит сарнам: косьт и ленч тат Евангели сагатаманч омп эльмест, цялкаманч ленч су мушьтме и тэн баяс, мэйт сон туій.
14Танна эхт кохтамлога сист, нэм мельт Іуда Искаріот, ваньцелій шоремус папэ гарра,
15И цількій: мэйт тій аньтветте мунне, мон тійит су андам? Сій таррашешкуттиш сунне колм логь силп‐пилпіит.
16И тэн балест сон одзэй порьмус баль эньтед су.
17А вус реск‐пейв, путтиш вопнаттій Исуссе, цилькиш сунне: косьт пакак мійит валлэшет тунне Едже‐пейв?
18Сон цилькій: ваньцед вен сиз мокме, целькед сунне: вопестій сарн: му баль ли эльт; ту гарьн туйям Едже‐пейв му вопнадій‐вуйм.
19Вопнаттій туйиш, махт пакэй сійит Исус; и валлэшиш Едже‐пейв.
20Кось же шэндэшкудій еккис‐пейв, сон вэн?-?лэдэй кохтамлогь вопнадэй‐вуйм.
21И кось сій порриш, цилькій: вуйкист сарнам тійит, эхт тій кэскест ант му.
22Сій чотта лосьвудэшкуттиш, и алгэтиш сарнэд сунне, іоксэнч сист: имма мон, Господи?
23Сон же цилькій воста: кобэнч муйн лошт кидэ іод сиз, тэт ант му.
24Я нуть ман олмэ эльк, махт ли кирьятаманч су баяс: а кэврь тэн олмэдже, кобэнь олмэ эльк энтлат; поряп леччи тэн олмэдже шэндекянна.
25Тэн баль и Іуда, су эньтій, цилькій: имма мон, Равви? Исус сарн сунне: тон цилькик.
26И кось сій порриш, Исус вальдій лейб, лао?-?словэй, мурьтлій, эньтлій вопнаттіит, цилькій: вальтед, порред; тат ли му лешкь.
27И вальдій напь, пасьбужій, кейкій сійит, и цилькій: юккэд су сист пук;
28Тэн‐дет што тат ли му вэр од завет, еннэги?-?дет валлэтаманч, рехкит куддэсталме.
29Цялкам же тійит, ангенч раест им альгь юккэд тан вин‐мурь‐шэнтмест тэн пейв райя, кось алгам тійи‐вуйм юккэд од вин му едж царвудэ сист.
30И кось лавлэтиш, вулькиш Елеон термь эл.
31Танна сарн сійит Исус: пук тій ряхкдун?-?ветте му баяс тан ин; тэн‐дет што ли кирьетам: так?-?лам варредій, и ратькедэдет тук лампаз.
32А мон иджан пайенам баяс сагэтам тійит Галилеест.
33Педар цилькій сунне воста: ленджет пук ряхквудет ту баяс, мун им ряхкэдед ни кось.
34Исус цилькій сунне: вуйкист сарнам тунне, тан ин, эвд‐бельт кон орес‐кань лэӈкяй, колмэешт сарн?-?дэдак мусьт.
35Сарн сунне Педар: леччи мунне галгэч и яммед туйн: им сарндэд тусьт. Эвт налла сарнуш и пук вопнаттій.
36Маӈӈа дест поттал сійи‐вуйм Исус сайя, сарнтаманч Гефсиманія, и сарн вопнаттіит: аррэстекке тасьт, кон мон волгам, айестастам томбе.
37И вальдій мельдес Педар и кухтэд Зеведей эльгит, лосьвудешкудій и тужэшкудій
38Танна сарн сійит Исус: му иӈк лосьвудуш сорьм налла; ворьтлеккед тасьт, и валвэдекке муйн.
39И ваньцласьтій кряха чорлакше, вэнлэдій иджес мод эл, айестій и сарнэй: ечча му! леччи ойям налла, ань ман рай му тат напь: а ій нуть махт мон татам, но махт тон.
40И потьтал вопнаддэи гарра, и кавнач сійит уодьмен, и сарн Педре: нуть еппед вайеманч валвдед эвт цас муйн?
41Валвэдекке и айестекке, тэн‐дет што еппе вирэчи кутталмуже. Вуйӈ валв, а лешк поад.
42Вял уйтластій нумб вар, аестій и сарнэй: Ечча му! леччи ій вай тат напь мэннэд рай му, му югкянна, ань ленч ту валт.
43И кось пудій, кавн сійит дас уодьмен: тэн‐дет што сист чельм лосниш.
44И кудій сійит, уйдій дас, айестасьтій колмат вар, и цилькій тэн же сань.
45Танна потьтал иджес вопнадій гарра, и сарн сійит: тій пай вял одьветте и оӈӈэдекке; кич, алт?-?нашкудій цас, и олму эльк энтлат ряхк‐олмэть кидэть.
46Коццэекке, ваньцлеккеп: кич, алтній му эньтій.
47И кось вял сон сарнэй, кич, Іуда, эхт кохтамлога сист, пудій, и суйн еннэгь олмэть микки‐вуйм и чолтни‐вуйм шорьмус папэнь и олмэ паррасамужэнь.
48И су эньтій эньдій сійит теттед, цилькій: кон мон цуклам, тэт и ли, вальтед су.
49И тэн цас пудій Исус гарра, и цилькій: рамшэд, равви! и цуклаттій су.
50А Исус цилькій сунне: пась‐виль, мэнь‐дет тон путтик? Танна путтиш, и пійиш кидэть Исус эл и вальтиш су.
51И кич, эхт сист, кок лейиш Исусэнь, вуйкій кид, кизій иджес мекь, чицкій шорьмус пап пакалдас, и чупэй сусьт піель.
52Танна сарн сунне Исус: пій мазать иджат мекь су сайя; тэн‐дет што пук, кок вальдет мекь, ме?-?кин майкэет.
53Или іордак, мун им вай ань айестаттед му Еччан, и сон пей му эвте енап кохтаплогит легіонит аньгелит?
54Махт ерес налла шэндэчэдет кирь, што нуть гэлк ляй?
55Тэн цас цилькій Исус олмэть: нуть махт олму‐коньтій эл вульгин тій микій‐вуйм и чолтній?-?вуйм, му вальтем баяс; юкке пейв тійи‐вуйм аррум мон, вопестемен церквест, и тій еппед валтлам му.
56Тат‐же пук ляй, што шэндэчиш пророки кирьи. Танна пук вопнаттій куддиш су, и урьчиш.
57А Исус вальтій виккиш су Кайяфе, шорьмус паппе, коз чоӈкдэттиш кирь‐кидэ и парсамуз.
58Педар же ваньцелій су мельт кукелдагэсьт, шорьмус пап двор райя; и чаӈӈэлій сиз, и иштій пакалдэзэ‐вуйм, што уйнэчій кедже.
59Шорьмус пап и парсамуз и пук синедріон#26:59 Элмус сут.) оцциш келлес‐сагэть Исус воста, су сарма эньтем баяс;
60И ет кавнманч: и, хоть еннэгь келлес‐сар?-?нэит потлиш, ет кавнманч. Но маимуссе путтеш кохт келлес‐сарнэй.
61И цилькиш: Сон сарнэй: вайам мурьтед Юммель церков, и колмэнь пейвест туйед су.
62И чунчдэдій шорьмус пап и цилькій Сунне: мэнь‐дет ик сарн ни мэн? мэйт сій ту воста сарнадет?
63Исус арій инта. И шорьмус пап цилькій сунне: пакам тунне иллій Юммелин, цельк мійит, тон ляк, ик Христос, Юммель эльк?
64Исус сарнэй сунне: тон цилькик; я сарнам тійит: ангенч раест уйнветте олму эльк иштмен воллес‐бельт вигэ, и потьмен эльм пэлвэ эльн.
65Танна шорьмус пап кешктій иджес асгит, и цилькій: сон Юммель хавк; мэз мійит вял саг‐олмэть? Кич, ань тій куллэнь су Юммель‐хавкмуш.
66Махт тійи мельт ли? Сій же цилькиш воста: сэрма ли вер.
67Танна чолкуш сунне мод воста, и пель?-?мантэге таккуш; а моттам пяккэстэш су кайбэ воста,
68И сарнуш: арьвед мійит, Христос, ки так?-?лій ту?
69Педар же арій олгэльт дворест; и пудій сунне эхт незан‐пакалдас, и цилькій: и тон леик Исусэнь Галилейланджин.
70Но сон пацдэдэй пукэдь пут, цилькій: им тед мэйт тон сарнак.
71Кось же сон вульгеш кудій увзэ токка; уй?-?нистій су нумп, и сарн томб арріит: и тат ляй Исусэнь Назореин.
72И сон дас пацдэдэй божьдэтмэнь, што ій тед тан олмэ.
73Ій еннэгь маньлакэсьт потлиш, кок томб чуньчиш, и цилькиш Педре: вуйкест и тон ляк сист; тэн‐дет што и ту сарнам‐наль чоят ту.
74Танна сон клендадэшкудій и божьдадэшкудій, ій гол тед тан олму. И ахтэн лавлэшкудій орес‐кань.
75И муштлій Педар сань, кон цилькій сунне Исус: эвд‐бельт кон лавл орес‐кань, колм варра пацдэ?-?дак мусьт. И вульгій олгас, и лойкэй чотта.
Trenutno izabrano:
Махьтвеест 26: Akkala
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Евангеліе отъ Матеен, изданное Обществомъ Распространеиія Библін въ Велико‐Британін и въ другихъ странахъ (British and Foreign Bible Society) 1878.
