Génesis 17
17
“Cohamacʉ yaina jija mari” ni, mʉsa wacũhtore yoana, õ sehe yoaga —ni yahuha Cohamacʉ Abrã cʉ̃hʉre
1Noventa y nueve cʉhmari Abrã to cjʉachʉ, Yawe tirore pari turi bajuaha tjoa. Ã bajuaro, õ sehe ni yahuha tirore:
—Yʉhʉ jija El Sadai —niha. (“El Sadai” nino, “Cohamacʉ Jipihtina Bui Tua Yʉhdʉrʉcʉ Sʉriro” nino nica hebreo masa ya dʉsero mehne)
à ninota, õ sehe ni namoha:
—Mipʉre yʉ ñʉrocaroi noaa dihtare yoarucuriro jiga mʉhʉ. Buhiri tiare yoaro marieno jirucuga. 2Mʉhʉre yʉ ya curua macaina cjihti ñʉchʉno cjihto besei yʉhʉ. Ã jicʉ yʉ mʉhʉre niriro seheta cua pisaro mehne pari turi õ sehe nija: Mʉhʉre ji nʉnʉ tihtina, mʉ panamanare payʉ wahachʉ yoaihtja —ni yahuha tirore.
3To ã nichʉ tʉhoro, Abrã sehe na tuhcua caha sʉ, muhri caha dijaha, te to wʉhdʉa wapare yahpa pihachʉpʉ. To ã yoaro watoi, Cohamacʉ tirore õ sehe niha:
4—Cua pisaro mehne mʉhʉre õ sehe ni namoja. Payʉ masa curuari ñʉchʉno cjihto jiihca mʉhʉ. 5Ã jicʉ mipʉre mʉ wamare, Abrã ni ti pisuri wamare cohtotai tai nija. Payʉ masa curuari ñʉchʉno cjihto cũi tai nija mʉhʉre. Ã jicʉ mipʉre Abrahã wama tiihca mʉhʉ. (“Abrahã” ni pisuri wama, “payʉ masa curuari ñʉchʉno” niri wama jira hebreo masa ya dʉsero mehne) 6Ã yoa mʉ panamana, mʉhʉre ji turiahtinare payʉ wahachʉ yoaihtja. Tinare payʉ masa curuari wahachʉ yoaihtja. Tinata cãina masa curuari pʉhtoa cjihti jiahca. 7Ahri yʉ mʉhʉre ã nia mʉ panamana cjihti cʉ̃hʉ boro marieno ã ti cjʉa turia wahcãrucuhti jiahca. Ã jicʉ yʉhʉ sehe mʉ Cohamacʉ ã jirucuihtja. Tuhsʉ, mʉ panamana cjihti ti Cohamacʉ cʉ̃hʉ ã jirucuihtja. 8Ã yoa ahri yahpa, Canaã yahpa, mipʉre mʉ ji sito tari yahpare mʉhʉre, ã jichʉ mʉ panamana cjihti cʉ̃hʉre waihtja. Ti ã cjʉarucuhti yahpa jirohca ahri yahpa. Ã yoa yʉhʉ sehe ti Cohamacʉ ã jirucuihtja —niha Abrahãre.
9Ã ni tuhsʉ, õ sehe ni namoha:
—Tí jira yʉ yoahti. Ã yoa mʉhʉ, ã jichʉ mʉ panamana ji turiahtina cʉ̃hʉ boro marieno ã ti yoa turia wahcãrucuhto õ sehe jirohca. 10Jipihtina mʉsa, ã jichʉ mʉsare ji turiahtina mʉare mʉsa cuhnu cũa sohtoa macari cahsarocãre yihso nano cahmana. 11Mʉsa pjacʉrire ã yoaina dihta jiga. Mʉsa ã yoaro sehe, “Cohamacʉ yaina jija mari” ni, mʉsa wacũhto jirohca. 12-13Yʉ nino seheta mʉsa mipʉ macaina yoa dʉcaga. Ã yoa mʉhʉre ji turiahtina cʉ̃hʉ ti yoahto jira. Mʉsa pohna wahma masa bajuaina, ocho dachori ti cjʉachʉ, ti cuhnu cũa sohtoa macari cahsarocãre yihso naga. Ã yoa mʉsa cahamacare, mʉsa cahamaca pohnare, ã jichʉ pa sehe macainare mʉsa nuchʉrina cʉ̃hʉre ãta yoaga. Mʉsa jipihtina mʉsa pjacʉrire ã yoaina dihta jiga. Mʉsa ã yoaro sehe õ sehe ni mʉsa wacũhto jirohca: “Cohamacʉ sãre ‘Yʉ yaina jira mʉsa’ ni tuhsʉhre. To ã nirire tiro ne cohtotasi” ni, mʉsa wacũhto jirohca. 14Diro mʉsa mehne macariro mʉsa yoaro sehe yoaerariro jiro, ne mʉsa mehne jiero tjijaro, ya curua macainare yʉ ã yoa dutirire to yoa duaerari buhiri —ni yahuha Cohamacʉ Abrahãre.
15Ã ni tuhsʉ, õ sehe ni yahu namoha:
—Mʉ namo Sarai sehere mipʉre “Sarai” ni, wama pisu namoecʉ tjiga. Mipʉre Sara wama tirohca ticoro jʉna. (“Sara” ni pisuri wama, “pʉhtoro macono” niri wama jica hebreo masa ya dʉsero mehne) 16Ticorore noano wahachʉ yoa, ticoro mehneta cʉ̃irocã mʉ macʉ cjihtore mʉhʉre waihtja. Ahri potocã tjira. Ticorore noano wahachʉ yoaihtja. Ã jiro ticoro sehe payʉ masa curuari ñʉchono cjihto jirohca. Ticorore ji nʉnʉ tihtina, to panamanata cãina masa curuari pʉhtoa cjihti jiahca —ni yahu namoha Cohamacʉ Abrahãre.
17To ã nichʉ tʉhoro, Abrahã sehe pari turi na tuhcua caha sʉ, muhri caha dijaha, pʉ to wʉhdʉa wapa yahpa pihachʉpʉ. Ã yoarota, õ sehe ni bʉjʉ tʉhotuha: “¡Cuenah! Yʉhʉ sehe bʉcʉro waro jija. Cien cʉhmari cjʉariropʉ jija yʉhʉ. Tuhsʉ, yʉ namo Sara cʉ̃hʉ bʉcoro waro jira. Ticoro cʉ̃hʉ noventa cʉhmari cjʉaricoropʉ jira. ¿Sã ã bʉcʉna pohna tibocari?” ni tʉhotu bʉjʉha. 18Ã ni tʉhoturo, Cohamacʉre õ sehe ni yʉhtiha:
—Jira yʉ macʉ Ismae. Mʉ noano wahachʉ yoahtire tiro sehere mʉ yahuchʉ noaboca —ni yʉhtiha.
19To ã nichʉ tʉhoro, Cohamacʉ sehe õ sehe ni yʉhtiha:
—Jierara. Mʉ macʉ Ismaere ahri yʉ ã nia ne sãerara. Yʉ nino seheta mʉ namo Sara mʉnocãre pohna tirohca. Tirocãre “Isaa” ni, pisuga. Tiro sehe jirohca ya curua macariro cjihto. Ã jiro cua pisaro mehne yʉ mʉhʉre yahuri tiro Isaa cjihto cʉ̃hʉre sãna. Ã yoa to panamana ji turiahtina cʉ̃hʉ boro marieno ã cjʉa turia wahcãahca yʉ ã niare. 20Ã yoa mʉ macʉ Ismaere mʉ sini payori cʉ̃hʉre tʉhohi. Ã jicʉ tiro cʉ̃hʉre noano wahachʉ yoaihtja. Tirore yʉ noano wahachʉ yoaa mehne tiro cʉ̃hʉ payʉ pohna tirohca. Tuhsʉ, tirore ji turiahtina payʉ masa puti, pjiri curua waharohca. Tiro Ismae doce masa curuari pʉhtoa cjihtire pohna tirohca. 21Wiho mejeta tiro ya curua macariro cjihto jisi. Isaa sehe jirohca ya curua macariro cjihto. Pa cʉhmare ahri sʉ̃ baroihta tirocãre mʉ namo Sara pohna tirohca —ni yahuha Cohamacʉ Abrahãre.
22Yahu tuhsʉ, wahaa wahaha. 23To wahari baharo, tí dachoihta Abrahã sehe to dutiro seheta yoa dʉcaha. To macʉno Ismae cuhnu cũnʉ sohtoa macari cahsarocãre yihso naha. Ã yoa paina tiro mehne macainare, ã jichʉ jipihtina to cahamacare, to cahamaca pohnare, ã jichʉ pa sehe macainare to nuchʉrina cʉ̃hʉre yihso naha. 24Ã yoa Abrahã sehe to cuhnu cũnʉ sohtoa macari cahsarocãre ti yihso nari pjare noventa y nueve cʉhmari cjʉaha. 25Ã yoa to macʉno Ismae sehe trece cʉhmari cjʉaha. 26Tina pʉarore cʉ̃ dachoihta yihsoha. 27Ã yoa paina tiro mehne macainare, ã jichʉ jipihtina to cahamacare, to cahamaca pohnare, ã jichʉ pa sehe macainare to nuchʉrina cʉ̃hʉre tí dachoihta yihso naha.
Trenutno izabrano:
Génesis 17: GVC
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO