Ko-Dabirɛnu 8
8
Yi Masagan-Koe
1Alla ma nyina Nowa anubɛ soge wonu ko minnu bi kulɔn wo rɔ nun. Alla ya fɔnyɔ latugu ka yi masagan. 2Yi min bi bɔla dugu kɔrɔ anubɛ yi min bi bɔla san ma, Alla ya wonu dan labira. 3Yi ma tora yigila dugu-kole kuma tele kɛmɛ ani tele bi-loli kɔrɔ. 4Nowa sɔrɔn-san kɛmɛ wɔrɔ nyɔgɛ, wo karɛ wɔrɔnfilɛ, tele tan-ni-wɔrɔnfila nyɔgɛ ma, kulɔn wo sigira Ararati kɔnkɔ-layan-bɛ do kuma. 5Yi wo ma tora yigila ha san wo nyɛrɛ karɛ tan tele fɔlɛ ma. Kɔnkɛ wonu kumɛ tora gbɛ rɔ wulɔn.
6Tele bi-nani tenbira tumɛ min, Nowa ya kulɔn wo wundan laka. 7A ya bibi do boloka. Wo tora ta-ni-sɛgi kɛla ha yi gbalata dugu-kole kuma. 8Wo kɔma, a ya purulan fanan boloka ka a lɔn ni yi ara fɔlɔ gbalala. 9Kɔnɔ purulan ma a sigi tina sɔrɔn, woletɔ a sɛgira Nowa wara kulɔn rɔ kamasɔrɔn yi ye dugu-kole bɛɛ kuma fɔlɔn. Nowa ya a bole labɔ ka purulan wo bira ka a ladon kulɔn rɔ. 10A ya a ma, tele wɔrɔnfila tenbira tun. A ya purulan wo lata tun. 11Purulan wo sɛgira a wara wurɛ la. Kɔlɔma yanba-kun-kuran min tɔgɛ Ɔlifi, wo ye a dɛ la. Nowa ya a lɔn wo le ma ko yi ara fɔlɔ gbalala dugu-kole kuma. 12A ya a ma, tele wɔrɔnfila tenbira tun. A ya purulan wo boloka tun. Wo tara kɔnɔ a ma sɛgi a wara tun.
13Nowa sɔrɔn-san kɛmɛ wɔrɔ ani san kelen nyɔgɛ (601) ma, wo karɛ fɔlɛ tele fɔlɛ ma, yi gbalata. Nowa ya kulɔn wo kumɛ wayan ka a lɔn ni yi ma ara sagan. 14A karɛ fila nyɔgɛ tele mogan-ni-wɔrɔnfilɛ ma, dugu-kole gbalata feu!
15Alla ya a fɔ Nowa ye ko, 16“Wobɛ ila musi ni bɔ kulɔn rɔ anubɛ ila den mɔgɔ sawɛ anubɛ wonuna musu mɔgɔ sawɛ. 17I ni nima-fan bɛɛsi labɔ kulɔn wo burɔ, kona wo, sogo wo, nima-fan bɛɛ. I ni wo bɛɛ labɔ alako anu ni yiri ka dugu-kole lafa.”
18Nowa anubɛ ala denbayɛnu bɔra kulɔn rɔ. 19Nima-fan bɛɛsi bɔra iko anu sunu bi nya min.
Nowala Saraka-Bɔ-Koe Mari Ye
20Nowa ya saraka-mintan-tinɛ sɔ Mari ye. A ya sogo-sɛnimɛ anubɛ kona-sɛnimɛ donu bi ka wonu mintan gburr, ka wonu ma sarakɛ la Mari ye nyɔ. 21Wo sumɛ ya a diya don Mari rɔ woletɔ Mari ya a fɔ a nyɛrɛ ma ko, “N ya a lɔn hali hadama-dan dennɛ le, a miriya bɛɛ bɛnnɛ ko-yogomɛ le ma kɔnɔ hali wo, n ti dugi danka tun mɔgɛnuna sɔn-yogomɛla ko la. N ti nima-fan bɛɛ faga tun iko n bara a ma nya min kɛ la.
22Fananta duninya ye nyɔ,
samɛ si don, telemɛ si bɔ,
kimɛ si na, wusi si na,
wɔli-kɛ-tumɛ si ke, a tɛgɛ-tumɛ si ke,
suyi si ke, bandɛ si ka.”
Trenutno izabrano:
Ko-Dabirɛnu 8: KCLB
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Kuranko Common Language Bible © The Bible Society in Sierra Leone, 2006.