Matayo 8
8
Itang'aleuni Yesu Etwan Loka eng'ulo
(Mar 1:40-45; Luk 5:12-16)
1Kedoku Yesu komoru, kotupete nesi itung'a lu epuwaka. 2Atipet Kosodi etwan lokikamuut eng'ulo abunore nama keng', kokukokini, kilipi, “Lokapolon, kicamuut ijo, ibeikini ijo akitalaun eong'.”
3Korwaari Yesu akani keng' kosodi ajorori nesi, ebala, “Akote eong'; kitalauni.” Atipet kong'aleuni. 4Kosodi Yesu alimokin nesi, “Mam alimokin itwan ipede kuju kanu esomakinosi; konye kolot, kitoduun kamaka esaseredootit, kolem idutan lu ketemarit Musa alemun korau akitodiaret kamaka itung'a.”
Itang'aleuni Yesu lokejaanakinan ka Ofisa loko Roma
(Luk 7:1-10)
5Na kelomia Yesu Kapernaum, kobuni lo epolokiit luka ajore akwatat nama keng' ka akimaima nesi, 6ebala, “Lokapolon, eperi lokejaanakinan kang' iteregegiara kore, erieba noi.”
7Kinyakak nesi ebe, “Abuni eong' ka akitang'aleun nesi.”
8Konye kosodi lokepolokiit eriong'et akinyakakin Yesu ebala, “Lokapolon, mam eong' kilesikina akidiaun ijo ko otogo kang'; konye kolim akirot, kosodi lokejaanakinan kang' ang'aleun. 9Naarai arai eong' etwan lo ejii kwap ka apedor, ajaasi eong' ka ajore kwap kang'. Alimokini eong' epe, ‘kolot,’ kosodi alosite. Alimokini eong' ice, ‘kobuni,’ kosodi abunore. Alimokini eong' ekejaanakinan kang', ‘Kisomak nu,’ kosodi akisomakin.”
10Na kiirara Yesu ng'unu, koumok, kosodi alimokin luketupito nesi, “Kalimokini eong' osi, mam eong' apelem kadumuut itwan ipede ka akwap kanako Israel ni ejaasi ka akiyuun kwape kana. 11Kalimokini eong' osi abeite ebe ebunete itung'a lu ipu alomuni ko kide ka to, kakinyam nenipe ka Abraam, ka Isaka, ka Yakobo kajakaanut kanako kuju. 12Konye ng'ulu lu ibusakinit ajaus ajakaanut nako kuju ecakaro king'a akirionus nama emonyata kesi ka akiriare ikial kes.” 13Kosodi Yesu alimokin ejakait, “Kolot ore! Ng'un nu iyuut ijo kisomakine ijo.”
Kong'aleuni ekejaanakinan ka ejakait akolong' ng'ipeng'in.
Etang'aleu Yesu Itung'a Ipuwaka
(Mar 1:29-34; Luk 4:38-41)
14Na kelomia Yesu otogo ka Petero, koanyuni akamuran keng' eperi edeka, emwanikina akwana. 15Kojorori nesi akani keng', kinyekini amwanus nesi, konyouni ka akijaanakin nesi.
16Na kedolia ebong', koyautu itung'a nama ka Yesu lu ipu lu alomito ajokin nama kes. Kireng'iari Yesu ajokin ng'unu kakirot, ka akitang'aleuni lukedekasi kere. 17Kisomae nesi nu aitodolikin nu kedauti Ekadwaran, Isaya, alimun araun abeite ebe, “Alema nesi elope ariebon wok ka akigwokar adekasinei wok.”
Lu Itemokina araus Lukatupitok ka Yesu
(Luk 9:57-62)
18Na kaanyuna Yesu itung'a lu ipu imanakito nesi, kicorakini ikiyakia keng' adokar kitala je ka akare. 19Kobuni nama keng' ekesisianakinan ka Ikisila ebala, “Ekesisianakinan, atupi eong' ijo ng'ini alaro na ilosi ijo.”
20Kinyakakini Yesu nesi, “Ejaasi ikweei ka aduyon, ejaasi ikweny ka ailita; konye Okoku ka Etwan emam alaro eperi ka akiyeng'un.”
21Kosodi ekiyakia ece alimokin Yesu, “Lokapolon, kinyek bere kaloto eong' akinuk papa kang'.”
22Konye kinyakakini Yesu nesi ebala, “Kotup eong', kinyek lukatwak konukata lukatwak kes.”
Isinapikin Yesu Eng'eso
(Mar 4:35-41; Luk 8:22-25)
23Na kelomia Yesu ataker kotupete ikiyakia keng' nesi. 24Atipet kogeuni eng'eso kang'olol, koapiari ataker akilum. Konye kejotoe nesi. 25Kosodete ikiyakia alosite nama keng' kakitonyoun nesi, ebalasi, “Koyuune siong', Lokapolon; apu siong' atwakare!”
26Kolimokini kesi, “Inyo ikuriaka osi, Okwai itung'a luka akiyuun kana edit?” Konyouni nesi, kiretakini ekuwan ka ang'olol; kojaikin akinapakina na epolo.
27Koumokisi ikiyakia ebalasi, “Erait lo etwan loka ekipone kali, eyong'ito nesi ekuwam ka ang'olol de?”
Itang'aleuni Yesu Itung'a Iare lu alomito ajokin
(Mar 5:1-20; Luk 8:26-39)
28Na kedolia Yesu jewai, kakwap kanakenyarite Gadarenesi, kosodete itung'a iare lu kelomito ajokin akiriamakin ka nesi, elomuuto ka atesin, ededeng' na kemamare itwan ipede kebeikit akitor oroto ng'ol. 29Atipet, kilulukinete, “Anyeka nukon ka siong', Okwai Okoku ka Akuju? Ibu ijo ne akisican siong' ering'a akolong' kedolo?”
30Kanep kaneni kejii esipan ka ipegei lu adakasi. 31Kosodete ajokin akimaima Yesu ebalasi, “Kireng'ia ijo siong' king'a, kijukia siong' osipan ka ipegei je.”
32Kolimokini Yesu kesi, “Kolototo.” Kolomunete, Koikarete akilom opegei; atipet, kosodi esipan kere amotari eleliaarit akare, kolumete ka akipi.
33Kokerata lukejokok ipegei, kolomete otaun, kalimokin itung'a akapolok kere kiton ng'unu kere nukebuutu kisomakinosi kamaka itung'a lu kelomito ajokin nama kes. 34Kosodete itung'a kere ko otaun alomari anyun Yesu; nape kaanyunata nesi, kosodete akilip nesi koika kakwap kes.
Trenutno izabrano:
Matayo 8: TESOP
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
©Bible Society of Kenya, 2020
info@biblesociety-kenya.org
AKITUTUKET NAKITETET (NEPEPEKA ISABULIN KA AWARAGASIA)
TESO NEW TESTAMENT PSALMS amp PROVERBS
