DEDI 22
22
I Ala na-pareta-ya i Ambarahàmu la pa-maraku wànya i Ihàku
1Pi - pirana na rehi la malamiri i Ala nakama-nya na tuturu-na i Ambarahàmu. I Ala na-paaungu, “Ambarahàmu!” wàna. Nahema i Ambarahàmu, “Ou MIRI,” wàna.
2Napaya i Ala, “Luawa la tana Moria dàngu i Ihàku na ana kamehangu-mu, na ana pambana mbuhamu. Lai nu, la hau palindi napa na pa-paita-nggunggau, maraku wànyawa na anamu ka kameti maraku patunu-ya lai Nyungga,” wànanya.
3Hadangu harii la mba - mbaru, bera-nanyaka ai i Ambarahàmu nduma kameti maraku patunu tàka hi nahondu-ha hi nawotu-ha la kalandai. Ka laku-danyaka anguda i Ihàku dàngu da atana da madua la pa-ngiangu na papeka-na i Ala lai nyuna. 4La lodu patailu wàna ita-nanyaka paraïna i Ambarahàmu nuna na pa-ngiangu la mamarau. 5Hàla hi napanii-nja da atana da madua, “Ndàdiku nyimi yiahu dàngu yiada da kalandai. Nyungga dàngu na ananggu lua-manya lai nu pa-hamaya-nya i MIRI, taï mabeli tomakai,” wànanja.
6I Ambarahàmu nawotu-ha la kunduna i Ihàku da ai pa-mutungu kameti maraku patunu, tàka nyuna wiki nangàndi kahidi dàngu wàla epi pa-paketingu wàngu ai pa-mutungu. Nàhu ba dalaku kariangu, 7paàrangu-nanyaka i Ihàku, “Ama!” wàna.
Nahema i Ambarahàmu, “Ou, nggàra wàmu ananggu?” wànanya.
Paàrangu-nanyaka i Ihàku, “Nàhu tangàndi-ka epi dàngu ai, tàka nggiyaka na ana mbimbi na patuu kameti maraku patunu?” wàna.
8Nahema i Ambarahàmu, “Napa i Ala wikima duna na ma-payema-nda ana mbimbi patunda kameti maraku patunu,” wàna. Hàla laku pangalangu-danyaka.
9Nu ba datàka-ka la pa-ngiangu papeka-na i Ala lai Ambarahàmu, ka pandoi-nanyaka hau ngia pawotu maraku dàngu hi na-pakala-nja da ai mutungu dita la pinu. Hàla hi napainya na anana hi na-kunggulu-nya la ngia pawotu maraku la pinu ai pa-mutungu. 10Hàla piti-nanyaka na kahidi-na, ka kurori-ya na ananggu, ba wàna. 11Tàka na papalewa-na i MIRI nawara-nya welingu la awangu, “Ambarahàmu, Ambarahàmu!” wànanya.
Nahema i Ambarahàmu, “Ou MIRI!” hi wàna.
12“Àmbu pakatiu-duya jàka ndia àmbu nggi - nggiki-dumunya nana na anakeda,” wànaka i MIRI la ngaruna na papalewa. “Nàhu pi-nggunyaka bau maraku dàngu bau karadaku lai Nyungga, nadu ba ndau pandia-ya la pawua-ngganya na ana ka-mehangu-mu,” wànanya.
13Hàla i Ambarahàmu hi na-pawilikungu matana la winggiru-na, ka ita-nanyaka na heu mbimbi bumbu na ma-pakànangu kaduna la wuku ai. Ka piti-nanyaka i Ambarahàmu nuna na mbimbi hi na-maraku wànya lai MIRI ka kameti maraku patunu-ya hiluna na anana. 14I Ambarahàmu natunya tamuna lai nu “I MIRI na-payemangu#payemangu; jàka ndia: itangu. pa-kalana,” wànanya. Dàngu lundu nàhumbu napanii wàngu na tau, “La Palindi-na i MIRI na-payemangu pa-kalana,”#i MIRI na-payemangu pa-kalana; jàka ndia: i MIRI paita-ya. wàdanya.
15Hili hàndakangui welingu la awangu na papalewa-na i MIRI nawara-nya i Ambarahàmu, 16“Natuu liina i MIRI: Nàhu kunjanji-ya lumuna na tamu wikinggu, nadu nyumu bau tuyaka na matuna nu dàngu ba ndau pandia-ya la pawua-ngganya na ana kamehangu-mu, 17napa Nyungga ku-pakanyuru wànggau ma-bundungu ma-làndangu dàngu ku-paworu-ha da wàla wuamu hama tuna na kandunu la awangu dàngu hama tuna na wara la hingi tehiku. Da ana umbuku-mu napa datalu-ha da muhuda. 18Mbuu ndàbada da banjaru la pinu tana da-kamahi-ngga ka peku pa-kanyuru-nggunja hama tuna ba ku-pakanyuru-ha da wàla wuamu – nadu ba mbàda karadaku-dumu-nyaka na pareta-nggu,” wànanya. 19Hàlaka nu beli-nanyaka i Ambarahàmu la atana da madua, nu ka pa-kariangu hàla-danyaka pabeli la Mbiruhemba, tàka i Ambarahàmu pa-engangu-nanyaka lai nu.
Da wàla wuana i Nahuru
20I Ambarahàmu ninya na ayana, Nahuru-ya na tamuna. La hambeli-na na matumbu la Palindi Moria, i Ambarahàmu narongu-ya na rukuna i Miluka, papaha-na i Nahuru ba ninguka anana mini tau mawalu nu: 21i Uhu, na ma-maaya dehi; i Mbuhu na erina; i Kamuilu na amana i Aràmu; 22i Kehitu, i Hahu, i Pilindàhu, i Yitulàpu, dàngu i Mbetuilu, 23napa jia-duyaka na amana i Ripuka. Nuda-haka da tau mawalu da ana pahabola-na i Miluka ndumana i Nahuru angu dedina i Ambarahàmu. 24I Nahuru ningu kala wihina, Riauma-ya na tamuna, nyuna na-paana-nya i Temba, i Nggahàmu, i Taha dàngu i Maaka.
Trenutno izabrano:
DEDI 22: KAM
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
@LAI 1995 Indonesian Bible Society (Lembaga Alkitab Indonesia)