Mt 7
7
N'wingayavanyiseni
(Lk 6:37-38,41-42)
1N'wingayavanyiseni, akuva n'wingatiyavanyisiwa na n'wine.
2Hileswo-ke, n'witayavanyisisiwa xiswoswi na n'wine n'wiyavanyisisaka xiswone a vambeni; na kone a mpimu lowu n'witakapima ha wone, na n'wine n'witapimiwa ha wone. 3Hayini ulavisa a ntwanyi lowu wunga tihlweni dra makwenu, na ungalangusi a ntrandra lowu wunga tihlweni draku? 4Utiyisa kuyini a kubyela makwenu leswaku: Nitriki nikususa a ntwanyi lowu wunga tihlweni draku, na kasi uni ntrandra a tihlweni draku? 5N'wamandrendre! Susa kusungula a ntrandra lowu wunga tihlweni draku, hi kone-ke utakavona swinene a ntwanyi lowu wunga tihlweni dra makwenu.
6N'winganyikeni timbyana a mintxhumu ya kuhlawuleka, na kone n'wingatxukumeteleni atinguluveni a maperola yenu, akuva tingatitxhuka timakandriyetela hi minenge ya tone, titlhela tin'windrulukela tin'wiphatlulela.
Kukhinyela akukombeleni
(Lk 11:9-13)
7Kombelani, n'witanyikiwa; djulani, n'witaswikuma; gongondrani, n'witapfuleliwa. 8Hikusa lweyi akombelaka, awanyikiwa; ni lweyi adjulaka, awaswikuma; ni lweyi agongondraka, awapfuleliwa. 9Hi mani ku n'wine lweyi anganyikaka a ribye ku n'wanake, loko amukombela a kati xana? 10Kumbe angamunyikaka nyoka loko amukombela a nhlampfi, xana? 11Nambi n'wine n'winga vamfani n'witivaka a kunyika mintxhumu leminene ku vanenu, ngopfu Tatana wenu, lweyi anga Matilweni, atanyika leswi swinene ku lava vamukombelaka!
12Hileswo-ke, hinkwaswu leswi n'widjulaka leswaku van'wana van'wiyentxela, na n'wine vayentxelani swone; hikusa lowu, hi wone Nawu ni vaprofeta.
Tindlela tibiri
(Lk 13:24)
13Nhingenani hi nyangwa leyi ya kukhuma! Hikusa a nyangwa ni ndlela leswi swiyisaka akulahlekeni swiyanami ngopfu, mfuri i vanyingi lava vanhingenaka ha kone; 14hikusa yikhumile a nyangwa, ni ndlela yilalile leyi yiyisaka avutomini, ni lava vayikumaka i vatrongo.
Vaprofeta va madrimi
(Lk 6:43-44)
15Tivonelani ku vaprofeta va madrimi, lava vataka ku n'wine na vayambali swanga tihamba, kambe hi le ndreni i mahava lawa mahahlulaka. 16N'witavativa hi mihandru yavu; kumbe xana vakhaya vana va nvhinya amitweni, ni makuwa ankanyini? 17Hi swoleswo a nsinya hinkwawu lowu wunene wuhumexa mihandru leminene, ni nsinya lowu wa kubiha wuhumexa mihandru ya kubiha. 18A nsinya lowu wunene aswikoteki akuva wuhumexa mihandru leyi ya kubiha, ni nsinya lowu wa kubiha aswikoteki akuva wuhumexa mihandru leminene. 19A minsinya hinkwayu leyi mingahumexikiki mihandru leminene mitremiwa mitxukumetiwa andrilweni. 20Hileswo-ke, n'wine n'witavativa hi mihandru yavu.
Maritu ni mintiro
(Lk 13:25-27)
21Ahi hinkwavu lava vanihlayaka: HOSI, HOSI! Vatakanhingena a Mfun'wini wa Matilo, kambe ntsena lava vayentxaka a kurandra ka Tatana wanga lweyi anga Matilweni. 22Asikwini ledro vanyingi vataku: HOSI, HOSI, xana ahaprofetanga hi vito draku? Ahihlongolanga mademoni hi vito draku? Ahayentxanga ni mahlolana lawa manyingi hi vito draku? 23Kutani mine nitavayangula niku: Anisami nin'witiva. Sukani ku mine, n'wine vayentxi va swidoho!
Xifaniso xa masungulu ya tiyindlu
(Lk 24:46-49)
24 # Lavisa Lk 6:46-49. Lweyi ayingelaka a maritu yanga ava amayentxa, atafananisiwa ni wanuna lweyi atlharihiki, ayakiki a yindlu yake aribyeni. 25Kutani kuna timpfula tinyingi, kukukumuka ni milambu, ni timheho tihunga, titataba a yindlu leyo; kambe ayiwanga, hikusa afa yiyakiwi aribyeni. 26Kambe lweyi ayingelaka a maritu yanga ava angamayentxi atafananisiwa ni wanuna wa singe, ayakiki a yindlu yake apfunyeni. 27Kutani kuna mpfula, kukukumuka ni milambu, ni timheho tihunga titataba a yindlu leyo yiva yiwa, a mawela ya yone mava lawa makulu!
28Loko Yesu aheti kukhanela a maritu lawo, a switrhungu swihlamala hi dondriso drakwe, 29hikusa afa avadondrisa swanga hi lweyi angani vuhosi, angafani ni vatrali vavu.
Trenutno izabrano:
Mt 7: NTX2007
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Xironga New Testament with Psalms © Bible Society in Mozambique, 2007.
