Lk 20
20
Vaprista ni vakulu vaphikisa ntamu wa Yesu
(Mt 21:23-27; Mrk 11:27-33)
1Kati hi drin'wana siku, Yesu aku na adondrisa tiko a Tempeleni, avabyela Ivangeli, a vaprista ni vadondrisi va Nawu, kun'we ni vakulu va tiko, 2vata, vavulavula na yene vaku: Hibyele, xana leswi uswiyentxa hi ntamu wini, kumbe i mani lweyi anga kunyika ntamu lowu? 3Yesu ayanguliki aku ku vone: Na mine nitan'wivutisa mhaka yin'we, n'winibyela: 4Xana a babatiso dra Yohana drapfi ku Xikwembu Nkulukumba kumbe avhanwini? 5Vone kambe vakhanelisana vaku: Loko hiku; ku Xikwembu Nkulukumba, ataku, ha yini n'wingapfumelanga ku yene, xana? 6Loko hiku, avhanwini, a tiko hinkwadru dritahikhandla hi maribye; hikusa drikholwa ngopfu leswaku Yohana Mubabatisi afa ali muprofeta. 7Vahangayangula vaku: ahikutivi lomu dripfaka kone. 8Yesu aku ku vone: Na mine ningan'wibyele a ntamu lowu niyentxaka leswi ha wone.
Vatiri va tinsulavoya
(Mt 21:33-46; Mrk 12:1-12)
9Kutani Yesu asungula kubyela tiko a xifaniso lexi aku: A mhunu abyali livhinya, alibeka ku vadrimi, ayendra ku drin'wana tiko hi nkama wa kuleha. 10Ke, hi nkama wa mihandru aruma nandra ku vadrimi, akuva vamunyika mihandru ya livhinya. Kambe a vadrimi vakuyamuba, vamutlhelisa na angatamelanga ntxhumu. 11Ayengesa aruma mun'wana nandra. Ni yelweyo vamuba, vamuyentxa nhlamba, vamutlhelisa na angatamelanga ntxhumu. 12Atlhela kambe aruma a wa vuraru. Kambe vone, vatiki vamutrunya timbanga, vamuhlongola. 13A n'winyi wa livhinya kutani aku: Xana nitayentxa yini? Nitaruma a n'wananga lweyi wa kurandreka; kumbe xana vatavani xihluwa ha yene. 14Kambe a vadrimi vatiki vamuvona, vatikhanelela, vabyelana vaku: Lweyi hi yene mudi wa pfindla. Ahi mudlayeni akuva a pfindla driva dreru. 15Vamutxukumetela handle ka livhinya, vamudlaya. Xana-ke a n'winyi wa livhinya atavayentxa yini? 16Atata, atadlaya vadrimi volavo, ava anyika van'wana livhinya.
Vaswiyingeliki leswo, vaku: Swingatxhuke swiva tanu! 17#Lavisa: Mps 118:22. Yesu atiki awavapondrolela, aku ku vone: Xake, dridjula kuhlaya yini a tralwa ledri dringe:
A ribye ledri a vayaki vangadridrela,
hi drone ledringayentxiwa ledri dra kusungula dra songo?
18Kutani ayengesa aku: Lweyo ni lweyo lweyi ataka wela henhla ka ribye ledro, atatrhovekela. Lweyi dritakamuwela henhla, dritamupswhandlasa ava ntrhuri.
Yesu apfilunganyisa valala
(Mt 22:15-22; Mrk 12:13-17)
19Kutani a vadondrisi va Nawu ni vaprista lava vakulu vadjula kukhoma Yesu ankameni wolowo, swakuva leswi afaka vatxhava tiko. Hikusa afa vaswitivile leswaku ahlayi xifaniso lexo ha vone. 20Vahanga mulavisisa, varuma tinhloli leti titihambaka swanga hi loko tilulamile, titakota kumuphasa hi ritu, akuva vatamunyiketa ku vafumi ni le ntan'wini wa mfumu. 21Vamuvutisa vaku: Mudondrisi, haswitiva leswaku uhlaya uva udondrisa hi kululama, na ungalavisi liso dra mhunu; na kone udondrisa ndlela ya Xikwembu Nkulukumba hi xihlayelamfuri. 22Xana swahifanela kuhumexela Khezari a nhlengo kumbe aswihifaneli xana? 23Yesu atiki avona marengu yavu, aku ku vone: 24Nikombani mali. A xifaniso ni vito swinga ku yone i swa mani xana? Vone vaku: I swa Khezari. 25Yesu ahangaku ku vone: Tlheliselani-ke swa Khezari ku Khezari ni swa Xikwembu Nkulukumba ku Xikwembu Nkulukumba. 26Vahluleka kukuma xa ntxhumu aritwini drakwe amahlweni ka tiko; vahlamala hi mayangulela yake, vamiyela.
Vasaduki ni mhaka ya kupfuka kufeni
(Mt 22:23-33; Mrk 12:18-27)
27Avan'we ku vasaduki lava valiki akuna kupfuxiwa ka vafi, vatrhindrekela vavutisa Yesu vaku: 28#Lavisa: Mlw 25:5-6. Mudondrisi, Moxe ahitraleli leswaku loko mhunu a fa, na ani nsati, kambe na angena vana, a ndrisana yake yitateka nsati lweyo, yitapfuxela makwavu avana. 29Kavi ni vamakwavu na makwavu va ntlhanu na vabiri. A nhondrwa yavu yiteka nsati, yakufa na yingena vana. 30Kutani lweyi wa vubiri ateka a nsati lweyo na yene a fa na angena n'wana. 31Ni lweyi wa vuraru amuteka; swiyentxisa xiswoswo ni ku lava va ntlhanu na vabiri, vafa na vangasiyi vana. 32Antrhaku kwavu naye wansati afa. 33Akupfukeni ka vafi xana a nsati lweyo atava nkata wa winike? Hikusa hinkwavu lava va ntlhanu na vabiri vavi vanuna vakwe.
34Yesu aku ku vone: Ku misava leyi valovola, valovoliwa. 35Kambe lava vataka pfumeleliwa kuvona nkama lowuya ni kupfuxiwa ka vafi, vangahalovoli, vangahalovoliwi. 36Hikusa vafana ni swirun'wa, i vana va Xikwembu Nkulukumba, vanga vana va kupfuka kufeni. 37#Lavisa: Ezy 53:12. Kambe amapfukela ya lava kufa, na ye Moxe akombisile amhakeni ya nkun'hu (xihlahla), loko atxhula Hosi, Xikwembu Nkulukumba wa Abrahamu, ni wa Yisaki, ni wa Yakobe. 38Ke Xikwembu Nkulukumba ahi Xikwembu Nkulukumba wa lava va kufa, kambe i wa lava vahanyaka. Hikusa ku yene hinkwavu vahanya. 39Avan'we ku vadondrisi va Nawu vayangula vaku: Mudondrisi, u hlayelamfuri! 40Kutani vangahatiyi kumuvutisa ntxhumu.
Kriste na Davida
(Mt 22:41-46; Mrk 12:35-37)
41Kambe Yesu aku ku vone: Xana vahlaya ha yini leswaku Kriste i n'wana Davida? 42Kasi na ye Davida ahlaya a bukwini dra swidrumiso; aku:
Xikwembu Nkulukumba ati ku Hosi yanga:
Trhamisa xineneni xanga,
43 # Lavisa Mps 110:1. nikota nibeka valala vaku vava vunalavutelo bya
minkondro yaku.
44Ke Davida amutxhula Hosi yake; xana Kriste i n'wanakwe ha yini-ke?
Yesu loko asandra vadondrisi va Nawu
(Mt 23:1-36; Mrk 12:38-40)
45A tiko hinkwadru driku na drimuyingela, Yesu aku ku vadondrisiwa: Tivonani ku vadondrisi va Nawu lava varandraka kuratela, na vayambali swiyambalu leswi swakuleha, varandra ni kulosiwa tihubyeni. 46Nikutidjulela switrhamu swale mahlweni amasinagogeni, ni vutrhamu lebyi bya kuranga aswilalelweni. 47Vone vadaka nhlengwe ya vamafelwa, ni hi kutiyentxisa vakhongota nkama wa kuleha. Kambe Xikwembu Nkulukumba atakhatisa a vana lavo, vatayamukela yavanyiso ledri drihundrisaka hi vukulu.
Trenutno izabrano:
Lk 20: NTX2007
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Xironga New Testament with Psalms © Bible Society in Mozambique, 2007.
