Mataio 6
6
1Taaurimo rio, rio niainiai wiha kidia’i idodiaimo aue oubi hohowa, neiio eaurimoi; nouri ata wiha rio Toboro‐abea mabudo rioo oweamo raihe.
2O’o, nou tauwa rovia niainiai wiha airemaati, ro tuture urioro aue Sunagowa wia navewa, kiromohuwodio oubi nei aibo. Mabu nouri nei himia paina ohuwa koari ata oubi maataudo nei niroi. Naiheha mo rioido nou naro, nei himia wiha‐wiha neiio tau iviaumo. 3Ata nou ta’uwa ro niainiai wiha naibaha emaati, nou meaha ro tuihaito kidodiai na’i ro pere tui ro nou umo owai aue. 4Ina nou aibo ro niainiai wiha nou piroha aiwaiti wia ro Abea, nouvia piroha eauri, nou roido paeaha wiha aiwamaati.
5Wia nou ta’uwa rio wade aroumo kirodumeaito, riovia kiromohuwadio oubi nei aibo idodiaimo aue, nouri nei auwo niro sunagowa wia navewa otoimoi; wia nei kirodumea wade nei niro oubi amidao nei iaurimoi. Naiheha mo rioido nou niao, neiio nei himia wiha tau iviaumo. 6Ata ro, nou ta’uwa ro wade kirodumeaito arowa, Ro himia nuumo tadoro, ina ro biri roro opaiwa, ro Abea piroha remidio, nouido wade taro kirodumeaito wia ro piroha keauri Abea nourovia roido wiha pa’eaha aiwamaati. 7Wia nou ta’uwa rio wade kirodumeaito atodoimowa, rio buru wade godogodo aibo iaomo aue, umo tato oubi aibo, nouri nei naibaha rararomodumo nouro nei aiwai‐rovidioi, mabu nouri nei wade horohorori. 8Nouri rio nei aibo moa, mabu nouri taiba nana rio niro rimahebidiodumo, rio himia Abea nouvia umori. 9Nouri rio naiba naiba wade taiaoumo kirodumeaito: Imo Abea toborowa airemidio, Ro Paina tana aiwaiti. 10Ro bububati mo’uro, Ro bubui batibati auwoha idodiaiwamoi naiba neiio toborowa nou ridodiaiwadumo. 11Imo kihona roro tanimaatiro hiwio nouri. 12Imo kirowarodio nana’i roro kiraromo biahai naiba oubi nei kirowarodio nana’i imoo iraromodioumo biahai. 13Kematuhe na’ito kiwaboiia biahai imo. Ubauba nanaudo imo tanidouti. Mabu nouri Bububatira, Pupuora, Moarira, nei ro himia nanari, kara’e, kara’e, Amen. 14Wia nouri rioido ubauba na kidodiaiwa oubii, ina rioo nei uba kidia iraromodiomo aue, rio toboro Abea rio himia uba kidia nouro aiwai‐ipiti. 15Ina oubi nei himia ubauba kidia rioo ipiti tatowa; rio Abea rio himia ubauba kidia nouro ipiti raihe.
16Ina nou ta’uwa rio dou iho tato emidiomowa, rioo hoho korohomiti aibo iwomidioumo aue kiromohuwadio oubi nei aibo. Nouri neiio nei hoho uba aiwaimooituti, nouri nei niro oubi umoitimoi neiio dou iho tato kemidiori. Naiheha mo rioido ainaro nei himia wiha na’i neiio tau iviaumo. 17Wia ro, nou ta’uwa ro dou iho tato emidiowa ro hoobo taremaditi wia ro hoho taroduuti. 18Ina nouri ro oubi nei umoiti tore ro dou iho tato emidiowa, na’u ro Abearo nouri nou piroha eauri; wia ro Abea nou piroha eauri, nouro ro wiha pa’eaha aiwawai.
19Tama nana horohoro batibatiwa rioo iwariiatutimo aue; batii nouowa kiwareauo airihodumo wia airaromoto pamu airoiti wia piro oubio naibaha ipeoutiumo wia piroha imemoi. 20Ata rio himiaido tama nana horohoro toborowa taiwariiatutimo, batii nouowa kiwareauo ihoumo biahai wia aramotowa pamu oiti biahai wia piro oubi ipeutimo biahai wia piroito imemo biahai. 21Mabu nouri, batii nouowa ro tama nana auwoha airiadumo, ro himia imini nouowa naiba aiwamidioi. 22Idomai nou goho lamepari; nouri ina ro idomai meahari ro goho auwoha pidapidaha waai. 23Ina ro idomai ubari ro goho auwoha duriiha waai. Ina nouri pida nou ro iminiwa airia nou durii aibori, tiaha durii nouowari. 24Dubu ata auwo dubu neewa nouro imotoimama raihe, mabu nouri na’u nouro oriha aiwa eauri wia ata nouro niainiai aiwamahebidioi; wia na’u nouro noumu naiheha aiwamidioi wia ata nouro nouido aiwamebeiuai. Iehova wia moni nana na’u ta’u, neitido imotoimama rioo naiba idodiai raihe. 25Mabu nouri rioido mainaro, Rio himia kiiro, taiba nana ihomoi wia idiomoi, rio pauwo araromomo aue; naiba rio goho taiba hipura rio orowamitimowa, rio pauwo araromomo aue. Kiiro nou opuitori wia kihona nou dooudori, naiba goho nou opuitori wia hipura nou dooudori. 26Taiaurimo pahagama toborowa. Nei mate iboi orohomo biahai, wia kihona iwohaudioumo biahai, wia kihona motowa idiamomo biahai, ina rio Toboro Abea neido kihona naibaha rimamaati. Taiba auwori pahagamara e riora? 27Ina rio boti kiraromodioi kiraromodioi tutu tutu oitutimoi, modobo ata aibo? 28Wia rio touna pauwa riraromodiodumo rio hipuraido? Taiaurimo kopo nei himia batiwa, taiba nei noro. Nei iwaatimo biahai wia hipura neiio idodiaiwaumo biahai. 29Wia mo rioido ainaro, Solomona nou himia tiaha moariwa, ina nou hipura nou orowamiteaiwa nou sovio biahai na’u kopo nou aibo. 30Mabu nouri ina Iehova batimabu kotoi pi naibaha amiteai, pi nouri hiwio’i nei aiotoimo wia dudueido kupoito iheemoi, Nouro rio auwo iwamiti tatora rio kekeha kiraromodio oubiri? 31Nouri rio pauwo araromomo aue wia atodoimo aue, Imo touna naimo ihoi e touna hipura naimo orowamiti imoo? 32Mabu nouri, umo tato oubio nana naiba imohowaumo wia rio Toboro‐abea nou umori nana auwoha naiba rio nou niroi. 33Nouri Iehova himia Bububatii wia nou himia meamea kidia’i, rioo opuito tamohoumo ina nana ata auwoha rioido aiwaimaati. 34Nouri dudueido nana rioo pauwo araromomo aue, mabu nouri dudueido nou himia nana nou meaha airiauridai. Hiwio auwoha nou himia uba nana modobori.
Trenutno izabrano:
Mataio 6: KXW1941
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Published by the British and Foreign Bible Society in 1941.
