Matius 6
6
Sésésa i mahsawangla wia sé tou zéi'kan siapa apa
1 #
Mat. 23:5
Kuano kasii ni Yesus, “Gena-genangen! An tinotoz witu um pahempungan én tia' uman pahlé'osen niou witu saru-sarun né tou wo niitu ileken néramé. Pahpaan sa téntu, ni kamu én zéi'kan makailek um wawaér ni Ama' niou si witi kasendukan. 2Niitumo, sa ni kamu méhé a sasawang wia sé tou zéi'kan siapa apa, tia'mo ipahwowoka' niou tanu am pahwangunen né tou mahgau-gau lé'os im wana am walé peraragésan né tou Yahudi kaapa wana a lalan, i mekilooz. Uli-ulit ikua-Kuma wia ni kamu: Ni séra é nimakailekola um wawaér wia ni séra. 3Taan sa ni kamu méhéla a sasawang, tia' wo um winangunla u lengen kakan éng kata'uan u lengen kawihi. 4Sa méhé a sasawang én ipahwuni-wunila, si Ama' niou si mahileké an ipahwuni-wuni itii é méhé um wawaér wia ni kamu.”
Kura i mengaléi
(Luk. 11:2-4)
5 #
Luk. 18:10-14
“Sa ni kamu mengaléi én tia' tanu sé tou mahgau-gau lé'os i mengaléi. Ni séra sa mengaléi én totoz paaz mererendai witu un untep am walé peraragésan né tou Yahudi wo wana ang kaéngkolan a lalan, wo séra pahilekené né tou. Uli-ulit ikua-Kuma wia ni kamu: Ni séra é nimakailekola um wawaér wia ni séra. 6Taan sa ni kamu mengaléi, muntepla witi penenekelan niou, likepé um pepenet wo mengaléila wia si Ama' niou si witi tampa méikawuni. Karia in téntu, si Ama' niou si mahileké a méikawuni é méhé um wawaér wia ni kamu.
7Sa kamu mengaléi én tia' pelambo-lambo'en, tanu ung kinanaram né tou zéi'kan Yahudi sé zéi'kan mata'u si Opo Empung. Pahgenangen nérala sa lakez an ipahkua, am pengaléien néra én énéané. 8Niitumo, ni kamu én tia' tanu ni séra, pahpaan kata'uan ni Ama' niou am pemandungen niou, puunala niana im pahaléien niou wia ni Sia.
9Pahpaano niitu, sa kamu mengaléi, mengaléiola tanu ang kenu,
Ama' nai witi kasendukan, u ngaran-Mu é lenasen,
10ung Kakolanoan-Nu é méyé,
um paaz-Mu é mamuali wia ung kaayahan wo witi kasendukan.
11Wéhané kai tikohon in endo i nania mengiit am pemandungen nai
12wo ampungané ni kai im wana ang kasumalaan nai
tanu ni kai kangkasii i niméhéla un ampungan wia sé tou nimangunla ang kasumalaan wia ni kai;
13wo tia'mo ipahwali ni kai witu um pema'waan,
taan ipiloté ni kai im wia si léwo'.
[Pahpaan ni Komo si makaanu ung Kakolanoan,
wo ung kawasa,
wo ung kawangko'an makaz ing kauré-uré. Amin.]
14 #
Mrk. 11:25-26
Pahpaan sa kamu méhéla ampungan wana ang kasumalaan né tou, si Ama' niou si witi kasendukan kangkasii é méhé un ampungan wia ni kamu. 15Taan sa kamu soo méhé ampungan wia sé tou, si Ama' niou kangkasii én zéi'kan méhé un ampungan wana ang kasumalaan niou.”
Sésésa i mahpuasa
16Kuan kasii ni Yesus, “Sa kamu mahpuasa, tia' ang gio niou ém pahileken in tekur tanu sé tou mahgau-gau lé'os. Pahwangu-wangunen néra ang gio néra, wo sé tou é mileké ni séra kare- gas i mahpuasa. Uli-ulit ikua-Kuma wia ni kamu: Ni séra é nima- kailekola um wawaér wia ni séra. 17Taan sa kamu mahpuasa, rumia'musla wo lanala um wuuk niou, 18wo zéi'kan kata'uan né tou i ni kamu é mahpuasa, taan akaz uman si Ama' niou si witi tampa méikawuni si mahileké. Ni Sia si mahileké a méikawuni é méhémé um wawaér wia ni kamu.”
Mahréwok u sangkum witi kasendukan
(Luk. 12:33-34)
19 #
Yak. 5:2-3
Kuano kasii ni Yesus, “Tia' kamu mahréwok uman a sangkum niou wia ung kaayahan, pahpaan im wia ung kaayahan sé meniksik wo an ta'ingkéré' é luméwo' niana, téntu kangkasii sé maremu' én toro rumemu' niana. 20Taan ruméwokola a sangkum niou witi kasendukan, pahpaan im witi kasendukan sé meniksik wo an ta'ingkéré' én zéi'kan luméwo' niana, wo sé maremu' én zéi'kan rumemu' niana. 21Pahpaan wisa a sangkum niou, ung genang niou kasii ém witu.”
22Kuano kasii ni Yesus, “Um weren én tanu u solo witu un tou. Sa um werenmu ém wangun, péléng un toumu én ayah. 23Taan sa um werenmu éng kewur, péléng un toumu é rimbengbeng. Sa u sena' witu un toumu é rimbengbengo, a sangali karimbengbeng ung karimbengbengan itii.
24Zéi'kan siapa si tou toro maayang wia sé zua tuang. Pahpaan sa téntu si esa é maikazi'zisna wo si walina én iraraaténa. Kaapa ni sia é mahtali-talinga wia si esa wo zéi'kan mahtali-talinga si walina. Ni kamu én zéi'kan mamuali i mahpaayang wia si Opo Empung wo karegas niitu mahpaayang wia si Mamon.”
Tia'mo ikaarét ung katou-touan niou
(Luk. 12:22-31)
25“Niitumo ikua-Kuma wia ni kamu: Tia'mo ikaarét ung katou-touan niou, tumoro ung kanen kaapa un elepen niou wo tia' kangkasii ikaarét un awak niou, tumoro ang karaien niou. Zéi'kankuaa ung katou-touampé' un ipahpuu-puuna taan ung kakanen, wo un awakpé' un ipahpuu-puuna taan ung karai? 26Ileken nioua sé tumétéwél witi langit, sé zéi'kan mahkeroz wo zéi'kan mahupu' wo zéi'kan mahréwoké ang kakanen wana an tatahu'an, taan si Ama' niou witi kasendukan é mahwéhémé ang kakanen wia ni séra. Zéi'kankuaa ni kamupé' sé ipahpuu-puuna taan sé tumétéwél itii? 27Séi si wia ni kamu si pahpaan im paharétan, toro mawes zozo' in zéi'kan uré witu ung katou-touanna?
28Kaa kamu paharétan tumoro ung karaien? Amoké ileken nioua am wunga bakung witi kapelasan, am wunga itii mahtoumé zéi'kan mahpaayang wo zéi'kan mahwangun wanang, 29#1Raj. 10:4-7; 2Taw. 9:3-6 taan ikua-Kuma wia ni kamu: Si Salomo im witu ung kawangko'anna, zéi'kan nimahkara-karaila tanu ung kawangun un esaané im wana am wunga itii. 30Niitumo, sa an zukut witi kapelasan an tumoumé in tarékan wo i sando én ziketano ém pahimeken ni Opo Empung, zéi'kankuaa si Opo Empung é mimek ni kamu lumouspé'mé niitu, é kamu sé zéi'kan tahlous ma'éman? 31Pahpaano niitu, tia'mo kamu maarét wo mahkua, ‘Apa ung kanenta?’ kaapa ‘Apa un elepenta?’ kaapa, ‘Apa ung karaienta?’ 32Péléng niana ém penéro-néron né tou sé zéi'kan mata'u si Opo Empung. Taan si Ama' niou si witi kasendukan é mata'u, i ni kamu é memandung niana péléng. 33Taan penérompé'la ung Kakolanoan ni Opo Empung wo um paaz-Na, wo péléng niana én iawes wia ni kamu. 34Pahpaano niitu, tia'mo ikaarét niou tumoro u mamuali i sando, pahpaan i sando ém wéwéhan ung kasusaana in esa. Ung kasusaan in endo kenu én tia'mo pengawe-ngawesen.”
Trenutno izabrano:
Matius 6: LAITOM
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
