Markus 8
8
Yesu tə Nyandə Nji Dəbu Fwaɗəu
(Mat 15:32-39)
1A da hətə bəji wa, ngə dlama nji tə ɓəla daɓətə dza, ya a sərsum da ka nda səm wa. Ngə Yesu tə nga shawa nyi shili da cha ga nar nda, 2“Yo ngatə təhuɗə nji'ina aka hanyi makər nə ea kə'i nda tangna, janə a nda uya madami ga səm wa. 3Ya ma ya wiɗənda nda na huɓwa, ndo dla ku laku, aka alenya nji ku pama nda hya'atə naɗəu.”
4Shawa nyi inda tə wuma, “A nji da na ngya tangnə wa. Aman njo uya sərsum nda kwa nji chul nji'ina?”
5Yesu tə jau nda, “Takwara yiɗawa ngə tsa hya?” Ngə nda ɓəlakə nyi, “Məɗəfa.”
6Ngə cha nar nyi nə dlama nji'inda nda uya vir ngya hu'i. Cha hətə takwara məɗəfə inda ga mərtə nyi usaku nə Hyel, ngə cha pəpasəu, ga nənyi nə shawa nyi ka nda nənyi nə dlama nji'inda, ngə nda tətəkəya nda. 7Ətsə'u, kalfi shiɗəɗə da tsa nda yiɗau. Ahir cha usaku Hyel təkəri, cha nar nyi nə shawa nyi nda təkəya nyi nə nji'inda tsə'u. 8Dəhə nji tə səma ga nyi. Ngə shawa inda tə tsəmtə sənda həyadza, tsəla məɗəfa. 9Ɗangkura nji'inda səm sərsum nda, kwa ɗa nji dəbu fwaɗəu. Ngə Yesu tə səu nda ku laku. 10Təma cha gwa ku param ka shawa nyi, ga təra yatə hə'i Dalmanuta.
Njir Farisi kwa Gwa'a Nja Char nda Sər Muniya
(Mat 12:38-42; 16:1-4; Luk 12:54-56)
11Ngə alenya njir Farisi tə shili ngə nda ghəya tlə kəpal na Yesu. Nda kwa gwa'a nda ngəya nyi ləbam, ngə nda gədi nyi cha mərtə səshinshin ga cha chari ənda Hyel nga sənyi. 12Yesu tə səbiya pi, ga na, “Mya gwa'atə njir bəji nə kwa gwa'a səshishina? Jiri yo nar hi, a sər muniya da yo char nyi nə njir bəji nə wa.” 13Ngə cha ngya nda.
Yesu tə Təɗəhima Shawa Nyi təkəra Njir Farisi ana Hiridus
(Mat 16:5-12)
Ngə Yesu ka shawa nyi a gwa ku param ga təra biya tə ya ya fa'a nda. 14Shawa Yesu tə far hətə gwazhilakə kəl nda zhang tanyi tsa nda ku param. 15Ngə Yesu tə təɗəhima nda tsa'anyata ga na, “Gəla ma tsa tləlam njir Farisi ana nə Hiridus.”
16Ngə shawa nyi inda ghəya ɓwanya ku pama kərnənda, “Aa mangə a gwazhilakə da tsamən wa nga gwa'atə cha na əngə ya?”
17Yesu zəndətə sənda nda kwa ɓwanya təkəri, ngə cha jau nda, “Mya gwa'atə hyo ɓwanya təkəra ənda a gwazhilakə da tsahi wa? A da təkər ngə ya ɓwanya wa. Mi nga katə tsahi da la'a hya ngabiya səngə ba'a sakana? Ɗufwa hi ɗatə ɓaɓal ya? 18Li ku kəra hi, a da hyo la'a sə ma? Himi dza kəra hi a da hyo ngatə ndər wa ya? A tsə'u hyo ɗənghatə ma? 19Aku bəji nda ya pəpasəu hi gwazhilakə takwara tufu nə nji dəbu tufu ya, tsəla yiɗawa hya tsəmtə sənda həyadza?”
Ngə nda nar nyi, “Tsəla kwabəmətləu.”
20“Bəji nda ya pəpasəu takwara məɗəfə nə nji dəbu fwaɗə ya, tsəla wawa'a yiɗawa nda hya tsəmtə chaɓə na sənda həyadza?”
Ngə nda nar nyi, “Tsəla məɗəfa.”
21Yesu tə nar nda, “A hi ta ngabiya nganə ja ba'aka sakanə wa?”
Yesu tə Mbandə Ndər Wuləfə avu Betsaida
22Ahir nga Yesu ka shawa nyi tə shili ku mələm Betsaida, ngə alenya nji tə shili na vanya ndər wuləfə ga gədi Yesu ka cha tsəka nyi cha mbandə nyi. 23Cha gəzəya cha ndər wuləfə nda ga təra nacha biyahir mələm. Ngə cha təfəu tuli gu lya ndə nda, cha tsəkar lya ndə nda ga jau nyi, “Kwa la'a kə sə ya?” 24Ngə ndə nda ndzamar sə ga na, “Ah, kwa la'a ya nji, kəl nda wi wu ingə kwa ma'i.”
25Ngə Yesu tə ɓəla tsəkar lya ndə nda səkəu. Ngə ndə nda dədəngbiya lya cha, cha mbə ga ghəya la'a sə charasəu. 26Yesu tə nar nyi nə ndə nda, “Sakanə ja, ko nau təra kyo ki, kəl nda ngwa ka da nəu tahə ta mələm wa.”
Bitrus tə Dəkəbiya ənda Yesu ngə Kəristi
(Mat 16:13-20; Luk 9:18-21)
27Ngə Yesu ka shawa nyi tə təra go giwa inda dzər mələm Kaisariya Filibi. Tsə'u nda ku huɗa ma'i, ngə cha jau shawa nyi, “Par ɗa ma, wa njo na naya?”
28Ngə nda wum ga na, “Alenya nji kwa na Yohana ndər mər baɓtisma, alenya nji kwa na Iliya, alenya nji tsəu kwa na ənda zhang ku huɗa njir mətakər.”
29Ngə cha jau nda, “Nahi nəkə hi ya, wa hyo na naya?”
Ngə Bitrus tə wum ga na, “Nakə ngə Kəristi.”
30Ngə Yesu tə təɗəhima nda, “Ngwa hya da ba'a par nyi nə madawa ndara wa ya wa.”
Yesu tə Pə Chul Tə nda Cho da Tah ana Hya'atə Nyi
(Mat 16:21-28; Luk 9:22-27)
31Yesu tə ghəya dlədləɓə nə shawa nyi, ənda tuku Zər Ndə kwa sa ɓwaɓwatə pampaməu gagaɗa, njirawawa'a mələm, wawa'ar fərist ana ka maləm gadlagadla Musa kwa ngya nyi. Njo tsəya nyi, ahir hanyi makər cho hya'atə səkəu. 32Cha dəkəbiya nda səngə bwabwa'a.
Ngə Bitrus tə təɗənda nyi ga guhi nyi cha ngyar pə chul ɓwanya nga.
33Kəl ja, Yesu tə sha ga ndzamar shawa nyi, ngə cha tsə Bitrus ga na, “Ɓəl hiɗa Shantan. Aka jigadəma nghə nə ndəkur nga, a da nə Hyel wa.”
34Kəl ngə cha nga dlama nji ba'a shawa nyi shili da cha ga nar nda, “Dəhə ndə nda kwa i nəu ɗa, tuku ngə cha ngyar kərnyi, cha hətə taməngəla nyi cha nəu ɗa. 35Dəhə ndə nda kwa i cha mbəɗandə pya cha cho tar pi nda ba'anawa. Kəl ja, dəhə ndə nda tar pya cha aka ya, ana Mafakə Mənakəu, cho uya pi nda ba'anawa. 36Mi zhar nda ndə kwa uya, macha uya dəhə sər dunəya ga tar pya cha? 37Aa mi sənda ndə kwa nau bəlabiya pya cha na? 38Dəhə ndə nda kwa ngatə kuzhi ɗa ana kuzhir nəu ɓwanya ɗa aku bəjir nji pəla'a ana səpəla'a 'ual'ual na, Zər Ndə kwa da ngatə kuzhi nyi aku bəji nda cho da shili aku səlir Ada nyi tsa'a na Chama Hyel inda karti.”
Trenutno izabrano:
Markus 8: hbbNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Wycliffe Bible Translators, Inc. and © The Nigeria Bible Translation Trust 2018
