Matta 14
14
Tər Yohana Ndər Mər Baɓtisma
(Mar 6:14-29; Luk 9:7-9)
1Aku bəji nda Hiridus Təl Galili tə ngatə ɓwanya təkəra Yesu. 2Ngə cha nar nyi nə mavi'i nyi, “A kəpal da wa, Yohana ndər mər baɓtisma nga hya'atə ku hwa, nacha gwa'atə chul səshinshin inga kwa ɗa təwa nyi.”
3Aka Hiridus tə ɗaka fəu Yohana ndər mər baɓtisma ku jarum. Cha mər ənga ga cha mərtə ɗufwa Hirudiya mala Filibus ɗakaɗa zamənya Hiridus twasəu. 4Aka haaɗa Yohana ndər mər baɓtisma kwa ɗaka na nə Hiridus. “A da ɗa tsa'atsa'a ka hə mala zamə nghə wa.” 5Hiridus gwa'atə cha tsəya Yohana, kəl ja, ləvər kwa tənyi tsa njir Isra'ila aka nda kwa hari ənda Yohana ndər mətakər cha.
6Nda bəjir ɗənghatə na pəchi nda nja ya Hiridus tə shili, ngə kwar Hirudiya tə utsə mar mihiɓi. Səngə tə mərtə ɗufwa Hiridus twasəu, 7ngə cha mər alkawal nə kwa nda ana səmfəla, ga na, “Dəhə sənda ka gədi tsa ya, yo nə ngha!” 8Ngə cha nəu sənda ama nyi tə nar nyi, ngə cha na, “Yo i ka na'a kəra Yohana ndər mər baɓtisma tə pəli nəchana!” 9Huɗa təl tə tla, kəl ja, aka səmfəla nda cha mər mar mihiɓi ladər nyi nda, kəl ngə cha na, “Nja nənyi sənda gwa'a cha.” 10Cha sə nja tlanda kəra Yohana ku jarum. 11Ngə nja shili na kər nda tə pəli ga nənyi nə kwa nda, ngə cha yi nənyi nə ama nyi. 12Ngə shawa Yohana tə shili hətə gundəɓər dza cha ga ki haɗənda, ngə nda yi dəkar nyi nə Yesu.
Yesu tə Nyandə Nji Ndiya Dəbu Tufu
(Mar 6:30-44; Luk 9:10-17; Yoh 6:1-14)
13Nda Yesu tə ngatə sənda ɗa na Yohana, cha gwatanyi ku param ga ki uya mbwa zhang tanyi. Nda dlama nji tə ngatə ənga, ngə nda nəu nyi hya'atə ku mələm pampam na hi. 14Manda Yesu tə biya ku param ga la'a dlama nji'inda, ngə cha ngatə təhuɗə kənda, kəl ngə cha mbandə njir shiləkə inda ku pama nda.
15Nda akə tə ɗa, ngə shawa nyi tə shili da cha ga na, “Akə wurta ɗa, ya takə na, nar nyi nə dlama nji'ina nda təra kyo giwa inga, nda ki gwa'a sərsuma ka kərnənda.” 16Ngə Yesu tə ɓəlakə nda, “A da kəl nda təra wa. Nənda ma sərsum nda səma.”
17Ngə nda na, “Wurnya sərsum nda tsa ea, kəl takwara tufu ana kalfi mətləu.”
18Ngə Yesu tə na, “Anda manə na'a.” 19Ngə cha nar nyi nə dlama nji, nda ngwaɓə tə sar, ngə cha hətə takwara tufu ana kalfi mətləu nda, cho ndzam shi huɗamələm cha usaku Hyel təkəri. Ngə cha pəpasəu takwara inda ga nənyi nə shawa nyi nda təkənda nyi nə dlama nji. 20Madawa tə səma ga nyi. Ngə shawa inda tə tsəmtə sənda həyadza, tsəla kwabəmətləu. 21Ba ɗangkura shili nda tə səm sərsuma nda kwa ɗa dəbu tufu, a da nja jiga mahi'i ka ngulisha'a wa.
Yesu tə Ma'i təkəra Fa'a
(Mar 6:45-52; Yoh 6:15-21)
22Təma Yesu tə pəu shawa nyi ku param aka ga nda təra biya tiya fa'a nda təvi cha nəu nda, tsa'aka cho wiɗənda dlama nji'inda. 23Ahir nda cha wiɗənda nji'inda, kəl ngə cha hya'atə ga təra gyatə sara mə zhang tanyi ka cha gi pətlənya. Nda akə tə ɗa ya tsəutanyi kinda zhang tanyi. 24Aku bəji nda param nda wurta ɗa naɗəu tsa nya bam, ɓiti kwa dəgə dza param nda, aka gyang kwa mbəla nda ka yahi.
25Aku pama saka makər ana kwah nə wurəvi, Yesu kwa shili da nda cho ma'i təkəra ɓiti. 26Manda nda la'a nyi cho ma'i təkəra ɓiti, kəl ləvər tə səya nda. Ngə nda na, “Mambəl nga!” Nda lələ ku ləvəra.
27Təma Yesu tə ndər nənda ga na, “Səda wa, naya na, ngwa hya da ləvər wa.”
28Ngə Bitrus tə na, “Tlakəu, ma cha nakə nga, nar ɗa ya yi da kə təkəra ɓiti.”
29Ngə Yesu tə wum ga na, “Anda!” Ngə Bitrus tə biya ku param nda, ga ghəya ma'i təkəra ɓiti yada Yesu. 30Kəl ja, nda cha la'a gyang nda kwa fi na dunama, ngə ləvər tə səya nyi, ngə cha ghəya sa, ɓiti kwa gwa'a ndasənya nyi, ngə cha ləlla ga na, “Maki Tlakəu, dləuya ɗa.” 31Təma Yesu tə ha cha cha ga gəzəya nyi ga na, “Kara ndər kushir jiri, mya gwa'atə ka kəpala?”
32Gwakura nda ku param nda, ngə gyang nda ta'i. 33Kəl ngə shawa nyi inda ku param tə hətə nyi səli, ga na, “Jiri, Zər Hyel ka.”
Yesu tə Mbandə Njir Shiləkə vu Janisarata
(Mar 6:53-56)
34Manda nda dləgəlbiya fa'a, nda ta'i vu Janisarata, 35a tangnda njo zəndə Yesu ti. Ngə nda sətə nyi mafakə nə nji'inda ku mələm inda lələhəu, ngə nda shili na njir shiləkə da Yesu. 36Ngə nda gədi nyi ka njir shiləkə inda tsəkar mada nyachira ləkutə nyi, dəhə nji'inda tsəkar tə uya mbəa.
Trenutno izabrano:
Matta 14: hbbNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© Wycliffe Bible Translators, Inc. and © The Nigeria Bible Translation Trust 2018
