Amatiyu 4
4
Obile ba Areabi a bile Eyesu
1Ambla he nga, Ogbgaodzi o da Eyesu a gre akla okyku o da Areabi a mbga ŋa a ka. 2Ambla baŋ a kpo elum ekʼpoenyi, ta la okyukyku ekʼpoenyi nga, a ri algo mbo nga embyle e kpo ŋa. 3Areabi a ba okro ba Eyesu nga a nyuŋ ŋa a lu mi le, O wo boŋ o wo Anwye Ahogbrẽ angyiŋ bgu le, o zhiŋ ézhim hi o da lo e dzu agbrotsa. 4Eyesu a tno ŋa ma a lu mi le, Odlo Ahogbrẽ o lu mi le, Arehwĩ a dzu ma okyku algori sha mbo, ambo á dzu ma okyku odloyaŋ a mbo la o zgi anyu Ahogbrẽ.
5Ambla he nga Areabi a sko Eyesu a shri a gre osku ba Esesla. Aŋa a shri ŋa a zga eshri Anyuŋ-akulu la a si a gre pyeŋ. 6Ambla he nga, Areabi lo a nyuŋ Eyesu a lu mi le, O wo boŋ o wo Anwye Ahogbrẽ angyiŋ le, aŋo o ta egʼba obiŋ okyku eshi Odlo Ahogbrẽ o lu mi le,
Ahogbrẽ á da moanwyeadga baŋ á kpaŋ ŋo
Nga moa á ta ŋo á kõ la abgo mo,
Okyku o da adga boŋ a yla ezhim mbo.
7Eyesu a tno ŋa ma a lu mi le, Ambo Odlo Ahogbrẽ o sa o lu mi le, Alo o wo odzi boŋ o mbga Adigi-odne la a wo Ahogbrẽ boŋ mbo.
8Ambla he nga Areabi, a sko ŋa a shri a gre anyuŋ akũ, nga a tsa ŋa ereŋ andandandim ba obiŋ hi mvye, la ekekʼpo mo. 9Nga Areabi a nyuŋ ŋa a lu mi le, O ka, alo pyeŋ ame é shri lo é doŋ, o wo boŋ o kne o dzu obiŋ egi ayi me nga o hlu me eshko bgu le. 10Omba he lo Eyesu a tno ŋa ma a lu mi le, Aŋo Eshitaŋ o ngʼba o sku me! Okyku eshi Odlo Ahogbrẽ o lu mi le, O hlu Adigi-odne Ahogbrẽ boŋ sha eshko, nga o lu ŋa ma!
11Okyku eka he Areabi a ngʼba a sku ŋa, moanwyeadga ba Ahogbrẽ a ba nga a kpo a ghwo a Eyesu.
Eyesu a zga esĩ otum baŋ obiŋ ba Egalili
12Omba ba Eyesu a gno oshpa ba moa a vu Eyohana a ta aku nga, aŋa a gre eŋa obiŋ ba Egalili. 13Aŋa a dzu osku ba Anazarata mbo, ambo a gre a yi a dzu Akafanahum, osku lo o wo osusku ta la atam ba Egalili, ogʼba obiŋ ba Ezabulu, ta la Anaftali. 14Ohi lo o kpo okyku o bli ekplo ba Eshaya arehwĩ ba Ahogbrẽ a hom otum a lu. Aŋa a lu mi le,
15Obiŋ ba Ezabulu, ta la Anaftali,
Evom ba anyuŋ-ondzu ongre olum-ore ba Ordu,
Aŋo Egalili, obiŋ moa la a wo moaEyahuda mbo!
16Moarehwĩ la a dzu evbu,
Moa á ka ayimom agagre!
Eshri moa la a dzu obiŋ evbu ba eku,
Ayimom á tra!
17A zga omba he lo angyiŋ, Eyesu a zga esĩ ba o nyum oshpa baŋ. Aŋa a la a nyum oshpa a lu mi le, Agimi e ngʼba e sku odlobi bimi, okyku eshi, Oreŋ Ongyeŋ o wo osusku a mo!
Eyesu a bzi moanyi la a kpo atsa
18Omba ba Eyesu a dzi akaŋ atam ba Egalili nga, aŋa a ka moanáŋ aha la a la a vu atsa. Moa a ri Esima la a sa a ri Ebitru, ta la anáŋ Andru. Moa a la a vu atsa atam la ekyeŋ. 19Eyesu a nyuŋ mo a lu mi le, Agimi e lu me ma, okyku o da me e nye gimi okyku o da gimi e vu moarehwĩ. 20Ebuebu, moa a ndbi ekyeŋ a ygi, nga moa a gba a lu ŋa ma.
21Aŋa a la a bre a yi nga, a sa a ka moanáŋ aha-akyeŋ. Moa a ri Eyakubu, ta la Eyohana. Moa a wo moanwye Azabadi. Moa a wo amgblami ta la adimo, moa a la a nyuŋ ekyeŋ mo a kpo. Eyesu nga a bzi mo. 22Ebuebu, moa a dzu amgblami lo, ta la adimo a zga nga, moa a lu Eyesu ma.
Eyesu a nye moarehwĩ, a nyum oshpa, nga a shaŋ moare
23Eyesu a dzi obiŋ da Egalili pyeŋ nga, a la a nye moare anwyeakulu. Nga a nyum Oshpaodzadzi ba Oreŋ lo, nga a shaŋ moare la a wo edgu elolo andandandim. 24Oshpa baŋ lo o ngla obiŋ ba Esiriya pyeŋ. Okyku eka he, moa a shri moare la a no elolo andandandim, pa la moare la a kpo edgu ewu andandandim, moa ba egbgabi e kpo otum pa la mo, moa la a gbu andom, pa la moa la a shla egʼba, Eyesu a shaŋ mo edgu ahe lo mvye. 25Moare nzenze nga a la a lu ŋa ma. Moa a zgi Egalili, ta la Esku Ekʼpo, ta la Orushalima, ta la Eyahuda, ta la obiŋ la o wo ongre ba Ordu.
Currently Selected:
Amatiyu 4: EGONT74
Highlight
Share
Copy
Want to have your highlights saved across all your devices? Sign up or sign in
Eggon New Testament © United Bible Societies, 1974. Bible Society of Nigeria