John 17
17
1A̱nniai a̱a̱niiwa Jesus. O̱ki. Sota̱mitapsspsspapiwa isspo̱o̱hsi. Sota̱maniiwa, “A̱yo ni̱nna. A̱kaoʼtsstsiiwa annihka nitsi̱takanisttotsiihpi nita̱yaakanisttsiihpi. Niisto̱akaoʼka kohko̱wa. Noohka̱i̱stamatstoktoota nani̱stsspsspi. Ki a̱nnihkayi nita̱kitohkottaistamatstohkatoʼpa kani̱stsspsspi. 2Takaa kika̱o̱hkokki na̱a̱hkitohkaninawaʼsi mata̱piiwa, omi̱i̱ksi ko̱mohtsspiohkokkihpiksi o̱tapiʼssini na̱a̱hkitohkanaohkotahsaawa a̱i̱sksipaitapiiʼssini. 3Omi̱i̱ksi niita̱ʼpssksinookiksi, a̱nniksaoʼki a̱kaissksipaitapiiyaawa. Omi̱i̱ksi ki̱niitaʼpsskinookiiksi kiisto̱ahkaoʼka niʼtsita̱piiwahka nita̱ʼpanistapssiwahka A̱ʼpistotooki, omi̱i̱ksi ni̱niitapsskinookiksi niisto̱ahkaoʼk annaahk Jesus Christ, annaahka kitoʼtsskoaawahka, a̱nniksaoʼki a̱kaisskipaitapiiyaawa. 4Niisto̱wa a̱nnohka nitsi̱taʼpaitapiiʼssi anno̱o ksa̱a̱hkommi nitsi̱tohkanawanisttotsiihpiaawa ki̱tohkokkihpistsi na̱a̱hkaʼpoʼtsissaawa. Ki a̱nniayi nanista̱i̱stamaatstohkatoʼpa kani̱stsspsspi. 5A̱yo ni̱nna. Anniihka kani̱stohpoksspssiimohpi itsa̱o̱maʼpaistotsiihpi ksa̱a̱hkommi noohkani̱stsspipoʼtookit a̱nnohka ka̱a̱hkanistohpoksspssiimohsi. 6Omi̱i̱ksi kitsi̱tohkokkihpiksi anno̱o istsitapi̱i̱ksi ksa̱a̱hkommi nita̱i̱stamatsaayaawa kiisto̱wa kanista̱pitapiiyihpi. Kiisto̱wa kitsina̱a̱natayaawa, kii niisto̱wa kitohkokkiaawa, ki sota̱manistsiʼtsimiaawa kitsi̱i̱ʼpoahsini. 7Ki a̱nnohka iihko̱i̱ssksinimiaawa ki̱tohkanohkokkihpistsi na̱a̱hkanistoohsi o̱mohtoʼtsstsissaawa kiisto̱i. 8Ki̱tohkokkihpi issksksi̱moʼtaani, nitsi̱i̱stapohkotayaawayi, ki sota̱moʼtsimiaawa. Sota̱mitsiitaʼpssksinimiaawa no̱mohtoʼtoohsi kiisto̱i. Ki sota̱momaiʼtsimiaawa kito̱ʼtsskookssi.
9A̱nnikskaoʼkiaawa nita̱waatsi̱moihkaahtamoayaawa. Ka̱taʼyaomaiʼtakiiksi nima̱tawaatsimoihkaahtamoayaawa. Ta̱waatsimoihkaahtamoayi a̱a̱mokska ki̱tohkokkihpiksi. Kitsina̱a̱niaawa. 10Ki nitohkana̱i̱naanistsi kitsina̱a̱niaawa. Ki kitsina̱a̱nistsi nino̱o̱hkattsinaaniaawa. Ki iihto̱ʼtaistamatstohkaʼsi nani̱stsspsspi. 11Nitaitamaaksistapa̱atoohpa ksa̱a̱hkommi. Niisto̱wa ta̱kitapoo kiisto̱wa. Osto̱aawai a̱kitsaakiitaʼpaissiiyaawa ksa̱a̱hkomm. A̱yo ni̱nnai. Kitsika̱toaʼpssi. Amo̱ksi a̱o̱maiʼtakiiksi isskska̱mmisaawa. Kanista̱pitapiiyihpi kani̱stsskonataʼpsspi, a̱nniayi noohkani̱stsskskammisaawa. Ki̱tohkokki na̱a̱hkaistamatstohkssi kanista̱pitapiiyihpi. Isskskammisaawa maahkohkanawanistapssaawa anni niʼtsita̱piiyi, ni̱i̱ʼtoi a̱nni kiisto̱wa ki niisto̱wa niitsi̱ʼtokskaaoʼpi. 12Nitsi̱tsakiohpokaʼpaissiimahpiaawa no̱mohtsitotoitsikatayaawa kitsskona̱taʼpssini, ki̱tohkokkihpi. Ki̱tohkokki na̱a̱hkaistamatstohkatoohsi kitsskona̱taʼpssini. No̱mohtsitotoitsikatayaawa, ki itsa̱yitaisstsiihpa na̱a̱hkaatsaai; nika̱kaatsaawa oma̱a a̱yaakaatsaawa, oma̱a Judas. Naato̱i̱sinaakiaʼtsisi itsi̱kayissiinaapsskohkatoohpa a̱akaatsaawa, ki a̱nnihkayii iihta̱a̱tsaawa.
13Ki a̱nnohka nita̱kitapoo kiisto̱wa. A̱a̱mostska nitsi̱tanistoohpiaawa anno̱o ksa̱a̱hkommi osto̱aawa ma̱a̱hkohpistapiiʼtaamssaawa nitsi̱ʼtaamssini. 14Nita̱a̱nistayaawa kita̱a̱niihpi ki otsi̱kaimmokoaawa ka̱taʼyaomaiʼtakiiksi. Ma̱tsitaoʼtssiwaiksi ka̱taʼyaomaiʼtakiiksi, niʼto̱i̱ niisto̱wa nani̱stsayitoʼtsspi ka̱taʼyaomaiʼtakiiksi. Ki a̱nnihkayii o̱mohtsi̱kaimmokoaawaiksi. 15A̱nnohka kima̱tawaanistohpa ka̱a̱hkohtsistapoʼtoahsaawa anno̱o ksa̱a̱hkomm. Nika̱kawaanii ka̱a̱hkitotoitsikatahsaawa ma̱a̱hksayikiihto̱yissaawa omi̱i sao̱mmitaʼpssi, omi̱i Maka̱ʼpatoʼsiyi. 16Nani̱stsayitoʼtsspi ka̱taʼyaomiaʼtakiiksi, niiʼto̱i̱ amo̱ksi, ma̱tsitoʼtssiiwaiksi. 17A̱kaisopoa̱tsistotoosaawa ka̱a̱hksopokitapi̱i̱matahsaawa. Noohkohta̱nisttotsita mooka̱moʼtaʼpii. A̱mohka nitani̱ssi moka̱moʼtaʼpii nanista̱pawaanii kitsi̱poahsiistsi. Kitsi̱ʼpoahsiistsi, a̱nnihkaoʼka moka̱moʼtaʼpii. 18Kansitsi̱poohsapsskookihpi anno̱o ksa̱a̱hkommi, niiʼto̱i̱ nanistsi̱tsspisskoaayaawa ksa̱a̱hkommi.
19Tsi̱i̱kaisopoatsistotoohsi kiisto̱wa ka̱a̱hkohtohkoikissi. A̱a̱mohka no̱mohtanisttsi amoksi a̱a̱hkoohkattsi̱tsi̱kaisopoatsistotoahsaawa ka̱a̱hkitsopokitapiimatahsaawa.
20Ma̱tsiʼtsitapiiwa amo̱ksi nita̱waatsi̱moihkaahtamoaiksi. Nino̱o̱hkattohkanawaatsi̱moihkaahtamoayi omi̱i̱ksi ota̱koinaiʼtakia̱ttsaawaawaiksi, anni̱i̱ksi ota̱koohtookoaawaiksi. Nita̱kohtsitomaiʼtookiaawa. 21A̱yo ni̱nna. Ni̱tohkanawaatsi̱moihkaahtamoayaawa ma̱a̱hkohkanawanistapssaawa a̱nni niʼtsita̱piiyi, niʼto̱i nani̱stohpipaitapiiyihpi kiisto̱wa, kani̱stohpipaitapiiyihpi niisto̱wa ma̱a̱hkoohkattohpipaitapiiʼssaawa kiisto̱nnooni. Ki a̱nnihkayii ka̱taʼyaomaiʼtakiiksi a̱kohtsitomaiʼtsimiaawa kiisto a̱nnayii kito̱ʼtsskookssi. 22Kiisto̱wa ki̱tohkokki na̱a̱hkitsspssi. Nitsi̱ʼtoomanistohkotayaawa ma̱a̱hksspssaawa. Ki a̱nnihkayii a̱kohkottohkanawanistapssaawa a̱nni niʼtsita̱piiyi. A̱nni niʼto̱i kiisto̱wa ki niisto̱wa niitsi̱ʼtokskaaoʼpi. 23Niisto̱wa no̱mohpipaitapiiyi amo̱ksi, kiisto̱wa ko̱mohpipaitapiiyi niisto̱wa. Ta̱waatsi̱moihkaahtamoayaawa ma̱a̱hkikkiaʼyaohkanaanistapssaawa a̱nni niʼtsita̱pii. Ki a̱nnihkayii ka̱taʼyaomaiʼtakiiksi a̱kohtsitssksinimiaawa kiisto a̱nnayi kito̱ʼtsskookssi. Ki a̱kitssksinimiaawa niʼto̱i kanista̱komimmahsi amoksi kanista̱komimmokihpi.
24Ni̱nnai, nitsiko̱o̱hkstatayi amo̱ksi ki̱tohkokkihpiksi na̱a̱hkitohpokaʼpaissiimi̱yissaawa omiim nita̱yaakitapoohpi, ma̱a̱hkitsinissaawa omiihka nani̱stsspssi. Kiisto̱wa ki̱tohkokki a̱nni na̱a̱hkanistsspsspi. A̱a̱mohka ko̱mohtohkokki takaa kitsi̱takomimmokssi anniihka itsa̱omaʼpaistotsiihpi anno̱o ksa̱a̱hkomm.
25A̱yo ni̱nna. Kiisto̱wa kitsiko̱kamoʼtaʼpssi. Ka̱taʼyaomaiʼtakiiksi kima̱tssksinookiaawa. Niisto̱wa kitsi̱naoʼkssksinoo ki amo̱ksi ki̱tssksinookiaawa kiisto a̱nnayii kito̱ʼtsskookssi. 26Nita̱i̱stamaatsaayaawa kiisto̱yi kanista̱pitapiiyihpi, ki nita̱kattsistaiʼstama̱tsaayaawayi. Ki a̱nnihkayi a̱kohtsitotoisapakomimmotsiiyaawa kanista̱komimmokihpi. Ki a̱kohpipaitapiiyaawa niisto̱i̱.”
A̱nniayii a̱a̱nistsiiwa Jesus o̱nni.
Trenutno izabrano:
John 17: BLA1979
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Translated by Wycliffe Bible Translators. Published by the Canadian Bible Society 1979.
