JOHAN 4
4
Jesuh le Samaria Nu
1Jesuh cu Johan sangin nungzuitu tam saw nei in, tuiphumnak vang pia tam saw hi tih Farasi ten za haw hi. 2A ngangai ti ahin Jesuh amah loli in, kuamah tuiphumnak pia ma hi; a nungzuitute bekin pia haw hi. 3Mahti bangin a son leilui lih haw cu Jesuh in, a zak ten Judah ngam pen tulin Galilee ah kikleh hi. 4A kik thahin Samaria ngam pal vawk hi.
5Samaria ngam a hawh laihin, Saikhar a tih haw mi khua pa khatah heng hi. Mah Saikhar khua cu Jakob in, a capa Josef lakah a piakmi lo pen khawla ma hi.#Pian 33:19; Josh 24:32; 6Mahlai ah Jakob tuikhuk um a, Jesuh cu a khualzinnak a cawl leita hangin mah tuikhuk elah khung hi. A hun cu sun hawng khi hi.
7Samaria numei nu pa khat cu tuicawi tukin hung a, Jesuh in, a lakah, “Intuk tui pia in,” tin ngen hi. 8A nungzuitute cu an lei tukin khuasungah hawh haw hi.
9Mah numei nu in, “Nang cu Judah mi hi ci a, kei cu Samaria mi sing; itin kaw tui intuk na nget theih?” tin ti hi; Judah ten Samaria mitei manmi na hihim cu mang nuam haw ma hi.#Ezr 4:1-5; Neh 4:1-2;
10Jesuh in, “Pathian in, a piakmi hi ihim, tih le tui a ngentu hi akua him tih na thei ahin ama lakah ngen saw tuk navecin, amah in nunnak tui pia tuk naven!” tin ti hi.
11Mah numei nu in, “Sazapa, bingkhai le nei ma sisi, tuikhuk le thukzet sih hi. Ilai pen kaw mah tui cu na ngah tuk? 12Ka pu uh Jakob in, hi tuikhuk cu pia hi, amah le a capate hihen, a tuuhon le a khuihon hihen, hih tuikhuk pen tui ngah haw hi. Jakob sangin ngeng saw ing, tin ngaisung duncop cim maw?” tin dong hi.
13Jesuh in, “Hi tui a intu hempoh cu dangdumleh haw tuk hi. 14Mahnaven ka piakmi tui a intute cu ituk mahten dangdumleh haw tukma toh hi. Keima piak tukmi tui cu a sungah ciktui in cang tuk a, mahmi in nunnak tui le kumkhua nunnak pia tuk hi,” ti hi.
15Numei nu in, “Sazapa, mah tui cu pia in! Mahten ka dangdumleh tukma tohin, hilai ah tuicawi tuk vangin ka hun kul tukma toh,” ti hi.
16Jesuh in, “Na pasal sam inna, hung lehin,” ti hi.
17“Pasal nei mang hi,” tin don hi. Jesuh in, “Pasal nei mang na tihmi cu thuman hilh ci. 18Pano pa nga pasal zo ci, atu a na umpih mipa cu na pasal ngangai kha ma hi. Thuman hilh ci,” ti hi.
19Numei nu in, “Sazapa, profet hi ci tih thei ing. 20Samaria mi kohte cu ka pu le pa uhten hi mualhumah Pathian bia haw hi; mahnaven noh Judah ten Pathian cu Jerusalem ah biak tuk hi, ti uh ci,” ti hi.
21Jesuh in, a lakah, “Numei nu, ka hilhmi hi umin: Miten Pathian cu hi mualah hihen, Jerusalem hei ah hihen a biak haw ngawl hun heng tuk hi. 22Noh Samaria ten na biak uhmi thei ngangai ma uh ci; mahnaven Judah mi kohten ka biak uhmi thei ung, itahim titale Judah mitei lak pen nunpatnak heng hi. 23Mahnaven Pathian i Hawvang ngilnak hangin Pathian a bia tatak ten Pa cu Hawvang le thutak tuah a biak haw hun heng tuk hi; mah hun cu atu-in hung zo hi. Mahti bangin biak tuk cu Pathian in, a deihmi hi. 24Pathian cu Hawvang hi in, a biatu ten Hawvang le thutak tuah bia haw tuk,” ti hi.
25Numei nu in, a lakah, “Khrih cu hung tuk a, a hun ten ihempoh aman hilhleh tuk,” ti hi.
26Jesuh in, “Na lakah a awn litu hi mahpa cu hi ing,” ti hi.
27Mahlai takin, Jesuh nungzuitute cu kikleh haw in, numei nu tuah a otpihdun lih amuh haw ten lamdangsa mahtak haw hi. Mahnaven kuamah in mah nu cu, “Ikaw na deih?” tin dong haw ma hi. Jesuh vang cu, “Ita hi nu otpih cim?” tin dong bok haw ma hi.
28Numei nu cu a tuithawl zamin, khua sungah a hawh nungten mipi tei lakah, 29“Tumasuan a ka bawlmi hempoh a hilh theitu pa hi zo un! Amah hi Khrih hi nan tih maw?” tin ti hi. 30Khuasung pen tulin, Jesuh lakah hawh haw hi.
31Mahlai in nungzuitu ten Jesuh cu, “Sazapa, an ei in,” tin ti haw hi.
32Amah in, “Na theih ngawl uhmi an eih tuk nei ing hi,” ti hi.
33A nungzuitute cu, “Pa kha khatin an pia haw hi nem tih maw,” tin pa khat le pa khat dongdun haw hi.
34Jesuh in, a lak hawah, “Kei ka an cu kei a tiiktu pa i deihnak bawl le a tiikmi deh khawng khi hi. 35Sontehnakin, ‘Ha li nungten an cop hun,’ tin ti uh ci. Mahnaven thutakin hilh ing hi: lo sung khi zo hem un! Ante thak zo toh hi, mah hangin ankung cop hun heng zo hi. 36An a cawmtu pa cu a thaman piak hi in, an cu kumkhua a nunnak tukin cawm hi. Mahten anci a cingtu le an a cawmtu cu langkhatin lungdam khawm haw tuk hi. 37Itahim titale thu santehnakin, ‘Mi pa khatin cingin; a dang pa khatin at hi,’ tihmi cu manzet hi. 38Nadeh awng uh ngawlmi lo sungah cang at tukin nohte tiik ing. Mahlai munah midang tei a dehnak sa haw pen midang tei dehnak hangin a met ngah uh ci,” ti hi.
39Numei nu in, “Ka bawlsa mi hempoh hilhleh khawng tin, a tih hangin mah khua sung a, ummi Samaria mi tampi ten Jesuh cu um haw hi.” 40A lakah Samaria mite hung haw in, “Keimu lakah caam hihin hi,” tin zawm haw a, ni nih caam hi.
41Jesuh i thuhilhmi za haw in, mitam dedeuhin, um haw hi. 42Numei nu i lakah, “Tu cu nangma thuhilhmi hang hi ngawlin keimuh loli in, a thuhilhmi zain, um ung hi; amah hi leihum Nunpantu hi tatak hi tihvang thei ung hi,” tin ti haw hi.
Bawi Upa Pa khat i Capa Damtik
43Mahlai ah ni nih a caam nungten Jesuh cu tulin Galilee ah hawh hi. 44Itahim titale amah loli in, “Profet cu ama umnak ngamah upat awng haw ma,” ti hi.#Mt 13:57; Mk 6:4; Lk 4:24; 45Galilee ah a hen ten mahlai a, mipi ten muak haw hi, Itahim titale Jerusalem khua a, Kaltan Puai ah hawhin, mah puai sung a, na bawlmi hempoh amuh zo haw toh hangin hi.#Jn 2:23;
46Jesuh in, tui cu sabitin, a suahtiknak Galilee peng Kanaa khua ah hawhleh hi. Mah laih ah acozah bawi pa khat umin, a capa pa khat Kapernaum khua ah a tina hi.#Jn 2:1-11; 47Jesuh cu Judah ngam pen Galilee ah heng hi, tih a zak ten a lakah hawh a, Kapernaum khua ah hawhin, a thi awndiak tohmi a capa damtik tukin hehpih kun hi. 48Jesuh in, “Na lamdang le thasiahhuaite na muh uh tih ngawl cu kuamah in um tukma uh ci,” ti hi.
49Mah bawi upa in, “Sazapa, ka capa a thih laih ngawlin hung zazalin,” tin kun hi.
50Jesuh in, a lakah, “Hawh inna, na capa cu nung tuk hi,” ti hi. Mahpa in Jesuh i awn cu umin hawh hi. 51A hawhnak lampi pen a umlawh ten muak haw a, “Na capa cu nung tuk hi,” tin ti haw hi.
52Amah in, “Itik hunin ka capa dam deuh kaw?” tin a dot ten amuh ten, “Zantak taklam nazi pa khat ten a nattun cawl hi,” tin ti haw hi. 53Mah hun cu Jesuh in, “Na capa nung tuk hi,” tin a tih hun kek khin na hi, tih a pa in theileh hi. Mahten amah le a innkua hawngin um haw hi.
54Hih nalamdang hi Judah ngam pen Galilee ngamah a hawh laihin Jesuh i nalamdang a vei nihnak a bawlmi hi.
Trenutno izabrano:
JOHAN 4: NBF1
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Ngawm Bible © Bible Society of Myanmar, 2014.
