Matthieu 11
11
Bʉr o mílʉ́mlʉ́ mé Yʉánɛs Ndubʉr
(Luc 7.18-35; 10.13-15)
1Nó ó, píhe Yésʉs á dwe ompʉ́n bé kám le obá metié, nye nzě duhǒ gúmo yaá, tô le elɛ̂ʼle le elɛ́ɛ mílɔ̌b mé Nzyɛ̌m ɨ́ binkana bí sí yaá.
2Jɔ̌ʼ Yʉánɛs Ndubʉr á be ɨ́ mbɛ̌r mímbʉʼ yɨ́, nye á si jóʼo lɔ́ɔ wé á dumo e bisyɛ́ɛla mé Krîst wɨ́. Nó nyé á lómo bʉ́ʉ́ ómpʉ́n, bé tôʼ nkǒ Yésʉs á be yɨ́, ó bé tôʼ dî e né ó: 3«Nzê go ó mʉr bɨ́h dí ebóno ó, nye ónze nyá ɛ́? Nzê bɨ̌h bónaa mʉr swîh ɛ̌?» 4Yésʉs nzě yala e bé ó: «Tó lɛ́ɛ gá Yʉánɛs sá bɨ́n dí ejóʼo le ebee yɨ́: 5Baántím, bé mû ó lɨ́ ebáʼǎ bee. Bʉr o b'á tɨtɨ́a bá, bé lɨ́ etye mbɨ̂mbɨá. Minzɨ̂nzǎm, sí tiʼe. Mingʉʼ, myé mû ó lɨ́ ejóʼo; odwe lɨ́ epah ɨ́ mesoo. Mbɨambɨa Lɔ́ɔ, wé mû ó lɨ́ elɛ́ɔɔ kwá baántéʼenteʼe o bʉ̂r le baá o dí ɨ́ kpaa nkóó bá. 6Metyɛʼ me mpóm, mé díʼee e mʉr bísyɛ́ɛla byâm ngá be, abe ébɔ̌ʼ lé óbɨma nyé ɨ́ léme lɨ́ nyá.»
7Jɔʼ ómpʉ́n mé Yʉánɛs, bé á be, bé mû sí tô yɨ́, Yésʉs nzě táare élɛ́ɛ éntumo e bʉ̂r laá dumo e Yʉánɛs ó: «Yé bɨ́n á to bee ɨ́ lʉá yɨ́? Nzê ká dí epɨ̂ʼla ɨ́ pubó yɨ́ ɛ́? 8Á nó? Bɨ̌n bé á to bee yé? Nzê mʉr mbɔ́rá e bidimé míkán mí ójɔɔ́ ɛ̌? Bʉr o dí ebwâr bídimé míkán mí ójɔɔ́ bá, bé di ó ɨ́ mimbɛ̌r mí ójwɨ́ɨ. 9Á nó, bɨ̌n bé á to bee yé? Nzê ngwíha milɔ̌b mé Nzyɛ̌m ɛ̌? Eee, mě lɛ́ɛ́ bɨ́n ó: laa ngwíha milɔ̌b mé Nzyɛ̌m. 10Ebě, yé ó waá bé á cɛma ɨ́ lɔ̌b wé nyá. Yê cɛmá ɨ́ Mekaná mé Nzyɛ̌m ó: Bɛɛngɛ́ɛ! Mɛm, me múo nzě lómo mʉ̂r milʉ́mlʉ́ wǎm nzɨ́ nyǒ dóló ó, nye tôʼ le esyɛŋle gó nzɨ̌ lɨ́ esôʼ lô. » 11Yésʉs, nye e bé ó: «Mě lɛ́ɛ́ bɨ́n lɨ́ otyeetye ó, ɨ́ páʼ bʉ̂r bɨ́bɛ̂h mû sí byɛ̂l ɨ́ sí yɨ̂ʼ bá, ngwár mʉr dí entaǎ Yʉánɛs nyá ntʉ́ʼ. Damá jóʼo nó, ɨ́ Mpóʼo mé Dâ Nzyɛ̌m, mʉr dí agbáŋɔɔ ɨ́ nkɔb nyá, nyě e kûm, laa nyê. Mě lɛ́ɛ́ bɨ́n lɨ́ otyeetye ó, ɨ́ sá yɨ́yɛ̂h yé á byɛ̂l ɨ́ mo mʉ́má yɨ́, abe e mʉr ngwár dí ɨ́ bwaʼ le buo kûm mpʉ mé Yʉánɛs Ndubʉr. Tó kœb ó, mʉr dí ɨ́ buú twâʼwo ɨ́ Mpóʼo mé Dâ nyá, nye ɨ́ buú bwaʼ, laa nyê. 12Táare ɨ́ jɔ̌ʼ Yʉánɛs Ndubʉr á nyɛl edu bʉ̂r yɨ́, nzě kumo ɨ́ báánâ: Mpóʼo mé Dâ, nye lɨ́ esuŋɔɔ e nkul. Bʉr o cére, bé sáá ó, bé dɛ́nɨɨ nye e nkul. 13Táare ɨ́ jɔʼ mé Moyɨ̂z, tó kumo lɨ́ ogwíha o mílɔ̌b mé Nzyɛ̌m bɨ́bɛ̂h, bé á si boo gwîh milɔ̌b mé Nzyɛ̌m, nzě kumo ɨ́ jɔʼ mé Yʉánɛs mʉr tɨ̂. 14Bɨ́n kpɛ́l ékʉ́ gwá jóʼo mé nó, Yʉánɛs ó dí Elie, waá nzéá wé, wé á boo lɛ́ɔɔ wɨ́. 15Bɨ́n bé e megwǎl mé éjóʼo nó, bɨ̌n jóʼaa náǎ!
16«Me ójwɨ̌ʼ myǎ bʉ̂r wɨ̂ʼ e wáa? Wé kʉ́ nwɨɨla ó e bwá ó ntwǒm dí lɨ́ ebɛhɛɛ mindîndǐl bá, lɨ́ ejébla páʼ nyɔ́ɔ́. Bé ó: 17“Bɨ̌h bɨ́ lʉ́o bɨ́n mindie, bɨ̌n l'abwal! Bɨ̌h bɨ́ dyɛɛ méjémé mé éswie, bɨ̌n l'ajɨ médwê!” 18Tó kœb ó, Yʉánɛs, nyɨ́ nze: adɨ́na, ade ményoʼ. Bʉr ɨ́ buo buo ntɔ̂ʼ swêʼ nyé ó: “Nyě le eleme!” 19Jɔʼ yɨ̂, Mwân mé Mʉr nyɨɛ, nyɨ́ kǎ pyâl: nye lɨ́ ede méde le menyoʼ. Bʉr baá nzě lɛ́ɛ ó: “Paá bee gá sâ ángʉ̂ngʉ̌l nɨ̌, nyʉnyóʼ, só bʉr o dí enʉǎ mɔnɨ́ tœ́a bá, só osyɛ̂l o mísyóm!” Sâ gwár, ocwóó mé Nzyɛ̌m wɨ́ɛ, wɨ́ kebe ɨ́ bisyɛ́ɛla bi dí eduho tɨ̂ʼ bí.»
20Nó ó Yésʉs á dwe binkana, súm nyé á bu sâ mesimá yɨ́, mebě, ebě, bé á bé atúmo míkoo myɔ́ɔ́ e mebébe mɔ́ɔ́, nkʉ̂ dwira míléme. Nye ó: 21«Nkoó, nye ó e bɨ̌n, bʉr ó Korazîn! Nkoó, nye ó e bɨ̌n, bʉr ó Bétsɛ́da! Yé bé mesimá mé á sâ kwá nyɨ́n má, mé á syɛ́ɛ ó, Tîr e Sidɔ̂n nó, lɛ́ɛ́, bʉr o tɨ̂, bɨ́ kʉ́ba mínkura le elɔma méswií lɨ́ elɛ̂ʼle ó, bɨ́ túmo míkoo e mebébe mɔ́ɔ́, le edwira míléme. 22Sâ yaá ó mé dí egwá kʉ́ lɛ́ɛ bɨ́n ó, dʉ́ó Nzyɛ̌m ngá tíʼe bʉ̂r milɔ̌b yɨ́, Tîr e Sidɔ̂n, bé ábuú dweŋɔɔ bíntɨ́ʼá mpʉ bɨ́n. 23Á gua, Kapernáʉm, nzê go óbɨ́nɔɔ, tó pyâl ɨ́ jʉ́o kʉ́ ɛ́? Tʉ̂toʼó! Go ósulɔɔ sí, tó pyâl ɨ́ bɨ́ siʼe. Yé bé mesimá mé á syɛ́ɛ kwá nyɨ́n má, mé á syɛ́ɛ ó, Sodôm nó, mpa nkana yaá, yé dína ó tɨ̂, kumo mûh. 24Sá tɨ̂ʼ ó mé dí elɛ́ɛ bɨ́n ó, ɨ́ dʉ́ó Nzyɛ̌m ngá tíʼe bʉ̂r milɔ̌b yɨ́, Sidɔ̂n, yé ábuú dweŋɔɔ bíntɨ́ʼá mpʉ gô, Kapernáʉm.»
Egbalá, lé ó kwá mé Yésʉs
(Luc 10.21-22)
25Jɔʼ yaá ó Yésʉs á nze lɛ́ɛ ó: «Dâ, me lɨ́ edwe gó kûm, gua Njwɨ́ɨ kʉ́ e sí, ebě, go á si lɛ̂ʼle bʉr o dí mpʉ bwá ó ntwǒm bá bisá gó á sol ocwóó le ogwɨ́a ó sí yɨ̂ʼ bí. 26Dâ, yé ó nó. Me lɨ́ egúmlo gô, ebě, go á komlo ó, yé syɛ́yɨɨ nó. 27Sɔ́ŋ wǎm á si dwe me bisá bíbyɛ̂h. Abe e mʉr dí egwá gʉ́a Mwân, pɛ̌ʼ njɨ Nzyɛ̌m Sɔ́ŋ nye omér. Abe e mʉr dí egwá gʉ́ǎ Nzyɛ̌m Sɔ́ŋ, pɛ̌ʼ njɨ Mwân ndu e waá Mwân kpɛ́l élɛ̂ʼle nyá.
28«Ntáʼ gá kwá nyǎm, bʉr bɨ́bɛ̂h mû sí tyɛʼ lɨ́ enkɛ́ɛ ódiledile o mímbeʼ bá. Me ódwe bɨ́n egbalá. 29Níʼéé gá ɨ́ jwɨ́ɨ́ yâm. Bɨ̌n a jóʼló métwɨ́ɨ́ mâm, ebě, me ɨ́ talǎ njwɨr le embɨa é léme. Bɨ̌n nkʉ̂ bi égbalá. 30Ebě, jwɨ́ɨ́ yâm, yé anyan. Mbeʼ wâm, wé adile.»
Trenutno izabrano:
Matthieu 11: ozm
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
