Lukə̀ 8

Pə̀ngyə̌ pɨ̀tse zùŋə̀ a Yěsû

1Tsaʼnə à lə̀ myàanə̀nə, à lə̀ làŋə̀ amwuə mɨ̀mbòmpə mɨ ɨ̀laʼà mɨ̀ẅùunə pobə ɨ̀laʼà ntyiʼə̀ mmə nchwìitə̀ ntwuumə̀ ghù ɨ̀shìʼnə̀ mbə̀ʼə ànwùə̀ Nɨ̀fò Nẅùə̀. À lə̀ pə pobə ɨ̀zùŋə̀ ndzùmə̀ ɨ̀pe pa ntsòbə̀ ɨpaa, 2farə pə̀ngyə̌ pɨ̀tse nɨ à lə̀ fuukə̀nə ɨ̀zhyə̂ a nɨ̀pùmə̀ pobə nkɨ mbarə̀ mɨghoonə ɨ̀mobə. Pə̀ngyə̌ pèrə pə lə̀ pə Màriyà nɨ à lə̀ furə̀nə a Magdalà mbə ẅùə̀ wa nɨ Yěsû à lə̀ fuukə̀nə ɨ̀zhyə̂ sàmbaa a nɨ̀pùmə̀ ze, 3nɨ Jòanà ngẅùə Chuzà. Chuzà à lə̀ pə àtwuə̀ ambo ngàŋə àfàʼà Heròdə̀ ɨ̀tsùmə̀, nkɨ mbə Ntsùsanà pobə pɨ̀tse pə̀ngyə̌ pɨ̀noʼnə nɨ pobə pɨ̀tsùmə̀ lə̀ pənə ŋŋâ ɨ̀pwuumə̀ ngyèmpə̀ a Yěsû pobə ɨ̀zùŋə̀ ndzùmə̀ ɨ̀pe.

Àshwəŋnə̀ nàanə nàanə mbə̀ʼə ɨ̀mbyə̀ ɨ̀pwuumə̀

(Mat 13.1-9; Mrk 4.1-9)

4Nkwùə̀ nɨ àpùŋə̀ pə̀ənə̀ a lə̀ tyiʼnə nshwatə̀ nfurə̀ alyiʼə alyiʼə ntô a nɨ̀pwùnə ze la, à lə̀ shwəŋnə̀ ambo pobə amwuə àshwəŋnə̀ nàanə nàanə lo, 5“Ŋònə̀ ɨ̀tse à lə̀ lèrə̀ a nɨ ghə̀ mmàʼà ngẅàrə̀ ɨ̀pwuumə̀ e; ngẅàrə̀ ɨ̀pwuumə̀ za yɨ̀tse kẅìnə̀ àlàŋə̀ ndwuumə̀ pɨ nyə̀nkə̀, pɨ̀sɨ̀ŋə kɨ nchi ndyàa nkwurə̀. 6Pɨ̀tse kẅìnə̀ àtwuə̀ àlàrə̀kə̀ nɨ̀ghòorə, nsaʼà nchi ndzwuumə̀, ntiinə ka pèrə a lə̀ pə e nɨ nchyə 7Yɨ̀tse kẅìnə̀ amwuə àŋwàʼŋwaʼa nkoʼò ndyipə̀ aŋunə, àŋwàʼŋwaʼa ghu a sòpə̀ a zèrə ɨ̀ kwɨghə̀. 8Yɨ̀tse lə̀ kɨ nkẅìnə̀ aŋunə alyiʼə ɨ̀shyə̂ ɨ̀shìʼnə̀, nkoʼò tyìʼə̀ ɨ̀shìʼnə̀ nkɨ ndzùmə̀ ɨ̀shìʼnə̀ nkɨ ŋŋâ ngẅàrə̀ mɨ̀zɨghə̀ yɨ̀noʼnə.” Nkwùə̀ nɨ à lə̀ shwəŋə̀nə mmyàanə̀ à tyiʼə̀ nshwəŋə̀ lo, “Ŋònə̀ nɨ à pənə nɨ mɨtugrə â zuʼù.”

Ɨ̀sùmə nɨ Yěsû à lə̀ shwəŋə̀nə àshwəŋnə̀ nàanə nàanə zə

(Mat 13.10-17; Mrk 4.10-12)

9Ɨ̀zùŋə̀ ndzùmə̀ ɨ̀pe lə̀ pyiitə̀ e nɨ ɨ̀sùmə àshwəŋnə̀ nàanə nàanə zə. 10A shwəŋə̀ lo, “Nẅùə̀ à ŋâ àzhìʼtə̀ mbə̀ʼə nɨ̀ zuʼù nkɨ nzhyə̂ ɨ̀nwùə̀ pɨ lə̀əmə̀nə mbə̀ʼə ànwùə̀ nɨ ànwùə̀ Nɨ̀fò Nẅùə̀ a pənə zèrə, la ambo pɨ̀tse pànə̀ à shwəŋə̀ amwuə àshwəŋnə̀ nàanə nàanə mbə̀ʼə pobə naŋə̀, la ka pə ndzəənə̀ a ghobə, ndzuʼù la nzhyə̂ a ghobə apə̀.

Yěsû a tiitə̀ ɨ̀sùmə àshwəŋnə̀ nàanə nàanə zə

(Mat 8.23-27; Mrk 4.35-41)

11“Ɨ̀sùmə àshwəŋnə̀ nàanə nàanə zə ɨ̀ chyə̂ la lo; ngẅàrə̀ ɨ̀pwuumə̀ za la àshwəŋnə̀ Nẅùə̀. 12Zhyə̀ nɨ ɨ̀ lə̀ kẅìnə̀nə àlàŋə ndwuumə̀ ɨ̀ chyə̂ la tsaʼa pànə̀ nɨ pɨ zuʼnə àshwəŋnə̀ Nẅùə̀, Satàanə̀ a tô fuukə̀ a zèrə amwuə mɨ̀ntɨŋmə̀ ɨ̀mobə, mbə̀ʼə pobə kaŋə pyiimə̀ chwarə̀. 13Zhyə̀ nɨ ɨ̀ lə̀ kẅìnə̀nə àtwuə̀ àlàrə̀kə̀ nɨ̀ghòorə la, a pànə̀ pa nɨ pɨ pa ndzuʼù àshwəŋnə̀ Nẅùə̀ nkẅiirə̀ nɨ nɨ̀ghaʼà, la ka a kwuunə̀ e amwuə mɨ̀ntɨŋmə̀ ɨ̀mobə. Mbyiimə̀ tyìʼə̀ aŋunə mətùmə nkwùə̀; la nkwùə̀ nɨ àkwàʼnə̀ a tônə pobə wɨ̀ghə̀. 14Ngə̀ aŋunə zhyə̀ nɨ ɨ̀ lə̀ kẅìnə̀nə amwuə àŋwàʼŋwaʼa la, ɨ̀ chyə̂ la tsaʼa pànə̀ pa pyə̀ nɨ pɨ pa ndzuʼù àshwəŋnə̀ Nẅùə̀, la tsaʼnə pobə tyiʼnə mmə nchyə̂, mɨ̀ntòmnə̀ amwuə nɨ̀chyə̂mbyə̂, nɨ ntoŋə nkabə̀ pobə ɨ̀pwuumə̀ mbyə̂ zòŋə̀ lo kò pobə kẅuə̀ nkùʼù. 15Ntyiʼə̀ ngə̀ aŋunə ngẅàrə̀ ɨ̀pwuumə̀ za nɨ ɨ̀ lə̀ kẅìnə̀nə aŋunə alyiʼə ɨ̀shyə̂ ɨ̀shìʼnə̀ la, ɨ̀ chyə̂ la tsaʼa pànə̀ pa pyə̀ nɨ pobə pa ndzuʼù àshwəŋnə̀ Nẅùə̀ ngẅìimə̀ a zèrə nkǔŋə nkuŋə nɨ ntɨŋmə̀ ɨ̀ghobə ɨ̀tsùmə̀ tə mbyàa nkwùə̀ nɨ a zumə̀nə mɨ̀ntàamə.”

Pɨ tswuʼə̀ a Làamə̀ pɨ tə̂ àtwuə̀ aləŋə làamə̀

(Mrk 4.21-25)

16“Mbə̀ʼə ŋwùə̀ a tswuʼə̀ e a làamə̀ ndòo nɨ̀kwùʼə̀ nkumnə̀ ghu apə̀, kə̀ ntswuʼə̀ e ntsàa a nkɨ̀kwùunə apə̀. Ŋwùə̀ à chyə̂ a nɨ tswuʼə̀ a làamə̀ ntə̂ pə aŋunə aləŋə làamə̀ mbə̀ʼə ŋwùə̀ pə nkwuunə̀ a ndâ a zəənə̀ nkàʼà. 17Ntiinə ka àzwuumə̀ àtse nɨ a pənə yè lə̀əmə̀nə a pə e ghu nɨ ka pɨ pə ghǎ fuukə̀ e a sàŋə̀, ka yètse nɨ a pənə yè lə̀əmə̀nə a kɨ mbə e ghu nɨ ka à pə ghǎ furə̀ e a sàŋə̀. 18Nɨ ndwuumə̀ wə̀, nɨ̀ zhìʼtə̀ amwuə ndwuumə̀ nɨ nɨ̀ wa nzhwiʼtə̀. Ntiinə ŋònə̀ nɨ à pənə nɨ ɨ̀pwuumə̀ pɨ̌ chi kẅìʼnə̀, la ŋònə̀ nɨ à puŋə̀nə pɨ̌ chi kẅiirə̀ farə a mɨlyiʼə nɨ à pənə ambo ze.”

Mǎ pɨ Yěsû pobə pɨ̀momaa ɨ̀pe

19Mǎ pɨ Yěsû pobə pɨ̀momaa pɨ Yěsû pɨ mbyàŋnə̀ lə̀ tô a nɨ zəənə̀ e, la ka àlàŋə a lə̀ pə e ghu nɨ mbə̀ʼə pobə tô mbaatə̀ e ntiinə pànə̀ lə̀ kamnə̀nə e. 20Ŋònə̀ ɨ̀tse a shwəŋə̀ ambo ze lo, “Mǎ o pobə pɨ̀momaa ɨ̀pô pɨ̀mbyàŋnə̀ pyə̀ ntəəmə̀ a àpyìinə mmə ntàʼà a nɨ ndzəənə̀ o.”

21A kẅùə̀ ambo pobə lo, “Mǎ mə̀ pobə pɨ̀momaa ɨ̀pâ pɨ̀mbyàŋnə̀ la pànə̀ nɨ pobə pa ndzuʼù àshwəŋnə̀ Nẅùə̀ nkɨ mmə ngɨ̀rə̀ tsaʼnə a za nshwəŋə̀.”

Ndwuumə̀ nɨ Yěsû à lə̀ porəkə̀nə a àghə̀ʼtə̀ yè tɨ̀ŋnə̀

(Mat 8.23-27; Mrk 4.35-41)

22A lə̀ pə njyə̂ ɨ̀tse, Yěsû a kwuunə̀ amwuə àkànwuʼə pobə ɨ̀zùŋə̀ ndzùmə̀ ɨ̀pe, nshwəŋə̀ ambo pobə lo, “Nɨ̀ ghɨ̀rə̀ pə̀ənə̀ twuumə̀ ndèrə̀ a ndzìnə atəŋə yì.” Tsaʼnə a lə̀ shwəŋə̀ lenə la pobə pɨ pobə kwuunə̀ ntyiʼə̀ mmə ndèrə̀. 23Tsaʼnə pobə lə̀ pənə ndèrə̀ la, a kunə̀ a pɨlô; àghə̀ʼtə̀ tɨ̀ŋnə̀ a pə ndàŋə̀ amwuə atəŋə za, nchyə ɨ tyiʼə̀ nkwuunə̀ amwuə àkànwuʼə za a tyiʼə̀ mmə ngẅènə̀ amwuə nchyə tə pobə tyiʼə̀ a ntswùə̀ nɨ̀wɨghə̀.

24Ɨ̀zùŋə̀ ndzùmə̀ ɨ̀pe zhwèmnə̀ e nshwəŋə̀ lo, “Masàa, Masàa! Pə̀ənə̌ kwɨghə̀!” Yěsû a lòo a ɨ̀shyə̂ nsaʼà a fèrə̀ pobə nchyə ghù pə̀grə̀nə wa ngɨ̀rə̀ àghə̀ʼtə̀ za a ləənə̀, ɨlyiʼə zhwemnə̀ nɨ tuʼu. 25Yěsû a pyiitə̀ ɨ̀zùŋə̀ ndzùmə̀ ɨ̀pe lo, “Àpyiimə̀ àzɨghə̀ a lèrə̀ ɨghə?” Àkẅàrə̀ a kwuunə̀ a ghobə, pobə yerə̀ ntyiʼə̀ mbyiitə̀ pobə nɨ pobə lo, “Lə̌ zèrə mbuurə̀ ŋwùə̀ nsaʼà àghə̀ʼtə̀ pobə nchyə ghù pə̀grə̀nə ɨ zuʼnə̀ e lə?”

Yěsû a fuukə̀ ɨ̀zhyə̂ amwuə ŋwùə̀

(Mat 8.28-34; Mrk 5.1-20)

26Yěsû pobə pɨ ɨ̀zùŋə̀ ndzùmə̀ ɨ̀pe lə̀ tyiʼə̀ ntwuumə̀ ndèrə̀ a pàa àlaʼà Gerasà zhyə̀ nɨ a pənə amwuə zhyə̀ ndzìnə atəŋə Galìlyə̂. 27Tsaʼnə a lə̀ furə̀nə amwuə àkànwuʼə la, ŋònə̀ ɨ̀tse nɨ a lə̀ furə̀nə amwuə mbòmpə àlaʼà; mbə nɨ ɨ̀zhyə̂, a tô ntsirə̀ e. Ŋònə̀ wə̀ à lə̀ chyə̂ a tə̀sàa nkwùə̀ ka mə ẅî e ɨtsəʼə, ka kɨ mə lyə̂ e a ndâ, la mə nchyə̂ pə àtwuə̀ mɨ̀shyə̀. 28Nkwùə̀ nɨ a lə̀ zəənə̀nə Yěsû, à lə̀ nkunə̀ a ɨ̀shyə̂ a mbyə̀ ze, nkyiinə̀ nɨ ɨ̀tɨ̀ŋnə̀ nshwəŋə̀ lo, “Wə̀ taʼà àkə a mbô mɨ̀ŋə̀ a Yěsû Moonə̀ Nẅùə̀koʼò ntsirə̀? Mbuʼù mbô, kò wə̀ ŋâ o a gha nɨ ngəʼə̀.” 29À lə̀ shwəŋə̀ a lenə la ntiinə Yěsû à shwəŋə̀ mə ambo àzhyə̂ za lo zèrə â furə̀ amwuə ze. Àzhyə̂ zə̀ a lə̀ mə mmàʼà a ŋònə̀ wə̀ a ɨ̀shyə̂ nkwùə̀ noʼnə, pɨ tyiʼə̀ mmə mbyabə̀ e, nchyâ mɨ̀tsaŋə̀ a mɨ̀kwùə̀ ze pobə mbô ɨ̀me. Mbaa pə tsaʼnə pɨ lə̀ mənə ngɨ̀rə̀ a lenə la, à lə̀ liitə̀ mɨ̀tsaŋə̀, àzhyə̂ za a tyiʼə̀ ngɨ̀rə̀ a lèrə̀ alyiʼə waakə. 30Yěsû a tyiʼə̀ mbyiitə̀ e lo, “Nɨ̀linə̀ ɨ̀tsô la ɨ̀wə̌?” A kẅùə̀ lo, “Nɨ̀linə̀ ɨ̀tsâ la ‘Legion.’” À lə̀ shwəŋə̀ a lenə la ntiinə ɨ̀zhyə̂ pɨ̀noʼnə lə̀ pənə amwuə ze. 31Ɨ̀zhyə̂ pa puʼù mbô ambo Yěsû lo, kò a shwəŋə̀ lo pobə̂ furə̀ ndèrə̀ amwuə nɨ̀ntaamə̀ tɨ ndẅùutə.

32A lə̀ kɨ pə la àpùŋə̀ pə̀kuŋə àtse a lə̀ mə ndzɨghə̀ a kòŋə̀ a nɨ paatə̀ alyiʼə ghu, ɨ̀zhyə̂ pa tyiʼə̀ mbuʼù mbô ambo Yěsû lo â myàʼtə̀ pobə kwuunə̀ amwuə pə̀kuŋə pa, a pyiimə̀. 33Ɨ̀zhyə̂ pa tyiʼə̀ nfurə̀ amwuə ŋònə̀ wa nkwuunə̀ amwuə pə̀kuŋə pa. Àpùŋə̀ pə̀kuŋə za a tyiʼə̀ nkẅìnə̀ aŋunə mbarə̀ za nkwuunə̀ amwuə atəŋə ngẅènə̀.

34Nkwùə̀ nɨ pànə̀ nɨ pɨ lə̀ mənə mbyabə̀ pə̀kuŋə pa lə̀ zəənə̀nə ànwùə̀ nɨ a lə̀ làŋə̀nə la, pobə lə̀ tyiʼə̀ nkɨ̀ɨrə̀ ngə̀ nshwəŋə̀ amwuə mbòmpə àlaʼà pobə àlaʼà àtsùmə̀. 35Pànə̀ tyiʼə̀ nfurə̀ a nɨ ghə̀ ndzəənə̀ ànwùə̀ nɨ a lə̀ làŋə̀nə. Nkwùə̀ nɨ pobə lə̀ tônə a nɨ̀pwùnə ndzəənə̀ a Yěsû pobə lə̀ zəənə̀ a ŋònə̀ nɨ ɨ̀zhyə̂ pa lə̀ furə̀nə a nɨ̀pùmə̀ ze la, à nwuunə̀ a ɨ̀shyə̂ a mbyə̀ Yěsû, ngẅî atsəʼə, àtwuə̀ e a kɨ mbə ɨ̀shìʼnə̀, lenə la àkẅàrə̀ a ẅìimə̀ a ghobə. 36Pànə̀ nɨ pɨ lə̀ zəənə̀nə ànwùə̀ zèrə zə lə̀ tyiʼə̀ ntiitə̀ pànə̀ tsaʼnə Yěsû à lə̀ parə̀nə a ŋònə̀ wa nɨ ɨ̀zhyə̂ lə̀ pənə a nɨ̀pùmə̀ ze la. 37Pànə̀ pa pɨ̀tsùmə̀ nɨ pɨ lə̀ furə̀nə amwuə pàa àlaʼà Gerasà la shwəŋə̀ ambo Yěsû lo â myàʼtə̀ àlaʼà àzobə ndèrə̀ e, ntiinə àkẅàrə̀ yè noʼnə a lə̀ kwuunə̀ a ghobə; lenəla a chi nkẅirə̀ nkwuunə̀ amwuə àkànwuʼə za nkẅirə̀ nkwə̂ e.

38Ŋònə̀ wa nɨ ɨ̀zhyə̂ pa lə̀ furə̀nə a nɨ̀pùmə̀ ze la à lə̀ puʼù mbô lo zùŋə̀ a Yěsû. La Yěsû a shwəŋə̀ ambo ze lo, 39“Kẅirə̀ ndèrə̀ a ndâ ghò, ntiitə̀ mɨ̀nwùə̀ ma mɨ̀tsùmə̀ nɨ Nẅùə̀ à ghɨ̀rə̀nə ambo ghò.” Ŋònə̀ wa a lèrə̀ nsìimə̀ ànwùə̀ nɨ Yěsû à ghɨ̀rə̀nə aŋunə ze amwuə mbòmpə àlaʼà ntsùmə̀.

Yěsû a zhwuumə̀ a moonə̀ Jarùsə̀ ghù mə̀ngyə̌ nkɨ mbarə̀ mə̀ngyə̌ nɨ à lə̀ pètə̀nə àtsəŋə̀ atsəʼə e la

(Mat 9.18-26; Mrk 5.21-43)

40Nkwùə̀ nɨ Yěsû à lə̀ twuumə̀nə atəŋə za nkẅirə̀ nkwə̂, àpùŋə̀ pə̀ənə̀ a lə̀ tô nkẅiirə̀ e, ntiinə pobə lə̀ pyə̀nə mmə mbyabə̀ e. 41Ŋònə̀ ɨ̀tse à lə̀ tô ambo Yěsû, nɨ̀linə̀ ɨ̀tse pə Jarùsə̀ mbə àtwuə̀ ndâ àshwatə̀ pɨ̀Jew. Tsaʼnə à lə̀ tônə ambo Yěsû à lə̀ kunə̀ a mɨ̀kwùə̀ Yěsû mbuʼù mbô ambo ze lo â tô pobə ze lèrə̀ a ndâ ze; 42ntiinə ndàʼà moonə̀ e ghù mə̀ngyə̌ nɨ à lə̀ pənə tsaʼa nguʼu ntsòbə̀ ɨpaa à mə ngòonə̀ ntyiʼə̀ a ntswùə̀ nɨ̀wɨghə̀.

Tsaʼnə pobə ze lə̀ mənə ndèrə̀ la, àpùŋə̀ pə̀ənə̀ za a lə̀ mə ndzùŋə̀ nnyoomə̀ aŋunə Yěsû. 43Mə̀ngyə̌ ɨ̀tse à lə̀ pə ghu nɨ nkwùə̀ e ɨ̀ lə̀ shwuʼnə tɨ ləənə̀ aŋunə nguʼu ntsòbə̀ ɨpaa la ka ŋònə̀ ɨ̀tse a pə e ghu nɨ mbə̀ʼə a lə̂ a zèrə. 44A furə̀ a ndzùmə̀ Yěsû, mbètə̀ àtsəŋə̀ atsəʼə e. Tyìʼə̀ tsaʼnə à pètə̀nə, nkwùə̀ e za ɨ̀ zùŋə̀ ndəənə̀.

45Yěsû à lə̀ pyiitə̀ lo, “Ŋònə̀ nɨ à pètə̀nə mə̀ lə ɨ̀wə̌?” Tsaʼnə ka ŋònə̀ ɨ̀tse a lə̀ pyiimə̀ e lo à pètə̀ e la, Pità à lə̀ tyiʼə̀ nshwəŋə̀ lo, “Masàa, àpùŋə̀ pə̀ənə̀ a zə nnoʼò tɨsɨŋnə mmə nnyoomə̀ aŋunə ghò.”

46La Yěsû a shwəŋə̀ lo, “Ŋònə̀ ɨ̀tse a pètə̀ mə, ndzuʼù tsaʼa mɨ̀tɨ̀ŋnə̀ ɨ furə̀nə amwuə mɨ̀ŋə̀.” 47Tsaʼnə mə̀ngyə̌ wa à lə̀ zəənə̀nə lo mbə̀ʼə ka à lə̀əmə̀ e ɨ̀pɨ̀ŋmə̀ e la, à lə̀ furə̀ amwuə àpùŋə̀ pə̀ənə̀ za mmə ngyìinə̀ ngwùrə̀ ntô nkunə̀ a mbyə̀ Yěsû ntyiʼə̀ nshwəŋnə̀ a mbyə̀ ŋwùə̀ ntsùmə̀ ntiitə̀ ànwùə̀ nɨ à ghɨ̀rə̀nə a pètə̀ e la. Pànə̀ pɨ̀tsùmə̀ nɨ pɨ pənə alyiʼə ghu zuʼù ànwùə̀ ghu. A tyiʼə̀ nshwəŋə̀ ndwuumə̀ nɨ à lə̀ zùŋə̀nə ntɨ̀ŋnə̀ nkwùə̀ nɨ à lə̀ pètə̀nə àtsəŋə̀ atsəʼə Yěsû la. 48Yěsû a tyiʼə̀ nshwəŋə̀ ambo mə̀ngyə̌ wa lo, “Moonə̀ mə, àpyiimə̀ ntɨŋmə̀ o a ghɨ̀rə̀ wə̀ tɨ̀ŋnə̀, tyiʼə̀ ndèrə̀ nɨ àporə̀porə̀.”

49Tyìʼə̀ tsaʼnə à lə̀ pirə̀nə mmə nshwəŋnə̀ la, ŋwùə̀ a furə̀ amwuə ndâ àtwuə̀ ndâ àshwatə̀ pɨ̀Jew za ntô nshwəŋə̀ ambo ze lo, “Moonə̀ o wa à kwɨghə̀ mə e, kò wə̀ chi ŋŋâ o ngəʼə̀ ambo ɨ̀nèrə̀ ɨ̀nwùə̀ wa.”

50Tsaʼnə Yěsû à lə̀ zuʼnə ànwùə̀ zə la, à lə̀ kẅùə̀ ambo Jarùsə̀ lo, “Kò wə̀ pô; nùŋə̀ tyìʼə̀ ntɨŋmə̀ o aŋunə Nẅùə̀ à pɨ tɨ̀ŋnə̀.”

51Nkwùə̀ nɨ à lə̀ ghə̀nə nkwuunə̀ a ndâ Jarùsə̀, ka à lə̀ chi mbyiimə̀ e lo ŋònə̀ nyàanə a chyə̂ nkwuunə̀ a ndâ ndàŋə̀ e Pità, nɨ Jònə, nɨ Jemə̀ pobə tǎ pɨ moonə̀ nɨ mǎ e. 52Pànə̀ pɨ̀tsùmə̀ nɨ pɨ lə̀ pənə ghu la, lə̀ pə nsòmnə̀ nkɨ mə ngyìi mbə̀ʼə mômə̀ngyə̌ wa, la Yěsû a shwəŋə̀ ambo pobə lo, “Kò nɨ̀ kɨ ngyìi; ntiinə ka à kwɨghə̀ e kwɨghə̀nə, à wə̀ ndyə̂ e lyə̂nə.” 53Pobə ẅìi e ntiinə pobə lə̀ zhyə̂nə lo moonə̀ wa a kwɨghə̀ mə. 54La Yěsû a ẅìimə̀ àpô e nshwəŋə̀ ambo ze lo, “mômə̀ngyə̌ lòo a ɨ̀shyə̂.” 55Àzhwùə̀ moonə̀ wa a kẅirə̀ nkwə̂, a zùŋə̀ ndòo a ɨ̀shyə̂ a taʼà nkwùə̀, Yěsû a shwəŋə̀ ambo pobə lo, pɨ tàʼà mɨ̀zɨghə̀ ŋŋâ ambo ze a zɨghə̀. 56Mǎ e pobə tǎ ghobə lə̀ yerə̀ amwuə ndwuumə̀ ɨ̀tsùmə̀ la Yěsû a kwàtə̀ ghobə nshwəŋə̀ lo, kò pobə tiitə̀ ghobə a ŋònə̀ ɨ̀tse nɨ ànwùə̀ nɨ a furə̀nə.

Trenutno izabrano:

Lukə̀ 8: pny

Istaknuto

Podijeli

Kopiraj