Lukə̀ 7
7
Yěsû a parə̀ a ngàŋə̀ àfàʼà àtwuə̀ pɨ̀soyì
(Mat 8.5-13)
1Nkwùə̀ nɨ Yěsû à lə̀ myàanə̀nə a nɨ shwəŋə̀ ɨ̀nwùə̀ pyə̀ nɨ à lə̀ tàʼnə lo pànə̀ zuʼù tyìʼə̀ ɨ̀tsùmə̀, à lə̀ furə̀ ndèrə̀ a nɨ̀kwurə̀ nɨ Kàpenòmə̀. 2Àtwuə̀ pɨ̀soyì nkɨrə yètse a àlaʼà Romə̀ à lə̀ pə nɨ ngàŋə̀ àfàʼà ẅùə̀ nɨ à lə̀ kòŋə̀nə e ka mɨ̀zùŋə a pə ngòonə̀ tə ntyiʼə̀ a ntswùə̀ nɨ̀wɨghə̀. 3Nkwùə̀ nɨ à lə̀ zuʼnə mɨ̀nwùə̀ nɨ Yěsû à lə̀ ghɨ̀rə̀nə, à lə̀ twuumə̀ pɨ̀lɨ̀ŋmə̂ pɨ̀Jew ambo ze lo pɨ tô nfuŋə̀ e mbə̀ʼə a tô mbarə̀ a ngàŋə̀ àfàʼà e wa. 4Pobə tô ambo Yěsû mbuʼù mbô ɨ̀shìʼnə̀ nshwəŋə̀ nɨ ze lo, “Yèmpə̀ a ŋònə̀ wə̀, a ŋònə̀ nɨ à kùʼnə̀nə lo mbə̀ʼə wə̀ yèmpə̀ e, 5ntiinə à kòŋə̀nə àlaʼà àzəənə̀; à lə̀ yèmpə̀ a nɨ korə̀ ndâ àshwatə̀ ɨzəə.” 6Lenəla Yěsû a zùŋə̀ a ghobə pobə pɨ pobə lèrə̀.
Nkwùə̀ nɨ pobə tyiʼnə mmə nkwuunə̀ a ɨmwuə alyiʼə, àtwuə̀ pɨ̀soyì nkɨrə za a tsàa pɨ̀swùə ɨ̀pe lo pobə̂ tô nshwəŋə̀ ambo ze lo, “Ndòʼnə̀mbyə̂, kò wə̀ chi ndzəənə̀ o ngəʼə̀ ntô ntiinə ka ǹkùʼnə̀ mə̀ lo mbə̀ʼə wə̀ tô nkwuunə̀ a ndâ mɨ̀ŋə̀. 7Ka ǹkùʼnə̀ mə a nɨ tô a nɨ̀pwùnə ghò; la kɨ shwəŋə̀ pə taʼà ànwùə̀ mbə̀ʼə ngàŋə̀ àfàʼà mə̀ wə̀ a tɨ̀ŋnə̀, 8ntiinə ǹchyə̂ mbə la ŋwùə̀, mbə nɨ pànə̀ nɨ pɨ pənə nɨ mɨ̀tɨ̀ŋnə̀ àtwuə̀ mɨ̀ŋə̀, ǹkɨ chi mbə nɨ ɨ̀tɨ̀ŋnə̀ àtwuə̀ pyə̀ pɨ̀soyì. Ngwa nshwəŋə̀ ambo ghùtse lo, ‘lèrə̀’, a lèrə̀ nkɨ nchi nshwəŋə̀ ambo ẅùə̀ lo ‘tô’ a tô, nkɨ nchi nshwəŋə̀ ambo ngàŋə̀ àfàʼà mə̀ lo ‘ghɨ̀rə̀ lo,’ a kɨ ngɨ̀rə̀.”
9Yěsû a zuʼù ànwùə̀ nɨ a lə̀ shwəŋə̀nə la ngyerə̀ mbə̀ŋə̀ nshwəŋə̀ ambo àpùŋə̀ pànə̀ za nɨ a lə̀ mənə ndzùŋə̀ e la lo, “Ǹshwəŋə̀ a wɨghə lo, tyìʼə̀ amwuə àlaʼà Israel m̀birə̀ tɨ zəənə̀ mbuurə̀ àpyiimə̀ ntɨŋmə̀ zə̀.” 10Pànə̀ pa nɨ à lə̀ twuumə̀nə a ghobə la lə̀ kɨ nkẅirə̀ nkwə̂ ntsirə̀ a ngàŋə̀ àfàʼà wa nɨ à fiitə̀ mə e.
Yěsû a zhwuumə̀ a moonə̀ nkwùə mə̀ngyə̌
11A kɨ pə tyìʼə̀ lə, Yěsû a lèrə̀ amwuə mbòmpə àlaʼà ɨ̀tse nɨ pɨ lə̀ mənə nfuŋə̀ nɨ Nenə̀ pobə ɨ̀zùŋə̀ ndzùmə̀ ɨ̀pe nɨ àpùŋə̀ pànə̀ pɨ̀noʼnə. 12Tsaʼnə à lə̀ tyiʼnə mmə mbyàa a ntswùə̀ àpùʼù mbòmpə àlaʼà za, à lə̀ kɨ wùutə̀ ndzəənə̀ pɨ pìʼì àkwuə̀ mômbyàŋnə̀ yɨ̀tse ẅùə̀ nɨ a lə̀ pənə ndàʼà mômbyàŋnə̀ ambo mǎ e nɨ à kɨnə mbə nkwùə mə̀ngyə̌, àpùŋə̀ pə̀ənə̀ nɨ a furə̀nə a mbòmpə àlaʼà ngẅùunə a pə pobə pɨ pobə. 13Nkwùə̀ nɨ Ndòʼnə̀mbyə̂ à zəənə̀nə e, à lə̀ koorə̀ mɨ̀lɨŋə̀ ɨ̀me, nshwəŋə̀ ambo ze lo, “Kò wə̀ chi ngyìi.”
14Lenəla, à lə̀ tyiʼə̀ ntô mbètə̀ nkwùumə̀ nɨ pɨ lə̀ pìʼnə àkwuə̀ za amwuə, pànə̀ nɨ pɨ lə̀ pìʼnə a zèrə tyiʼə̀ ntəəmə̀ nɨ tuʼu, a shwəŋə̀ lo, “Môngwàswùumə̀, ǹshwəŋə̀ ambo ghò lo wə̀ lòo a ɨ̀shyə̂.” 15Moonə̀ wa nɨ à lə̀ kwɨghə̀nə la a lòo a ɨ̀shyə̂ nnwuunə̀ mbìʼnə̀ a nɨ shwəŋnə̀, Yěsû a lòo e, nkẅirə̀ ŋŋâ e ambo mǎ e.
16Ànwùə̀ ghu a lə̀ kə̀ʼnə̀ a ghobə pɨ̀tsùmə̀ pobə tyiʼə̀ nguʼtə̀ a Nẅùə̀ nshwəŋə̀ lo, “Ngàŋə̀ ntwuumə̀ ngẅùunə a furə̀ a tɨ̀tɨ̀rə̀ pə̀ənə̀” nkɨ mə nshwəŋə̀ lo “Nẅùə̀koʼò a tô a nɨ yèmpə̀ pə̀ənə̀ ɨ̀pe.” 17Ànwùə̀ zə̀ nɨ Yěsû a lə̀ ghɨ̀rə̀nə lə a lə̀ sìimə̀ amwuə àlaʼà Judyà àtsùmə̀ farə amwuə ɨ̀laʼà pyə̀ nɨ ɨ paatə̀nə.
Ngàŋə ntwuumə̀ nɨ Jònə ngàŋə̀ àŋâ àkẅiirə̀ nchyə à lə̀ tsàanə ambo Yěsû
18Ɨ̀zùŋə̀ ndzùmə̀ Jònə lə̀ shwəŋə̀ ɨ̀nwùə̀ pèrə pə̀ ɨ̀tsùmə̀ nɨ lə̀ furə̀nə mbə̀ʼə Yěsû la ambo ze. 19Jònə à lə̀ fuŋə̀ ɨ̀zùŋə̀ ndzùmə̀ ɨ̀pe ɨpaa ntwuumə̀ a ghobə ambo Ndòʼnə̀mbyə̂ lo pobə ghə̀ mbyiitə̀ e lo, “Ghò la ẅùə̀ wa nɨ à lə̀ pənə tô la, kə̀ pəə pyabə̀ a ghù nyàanə?”
20Ɨ̀zùŋə̀ ndzùmə̀ ɨ̀pe pa ghə̀ ndzəənə̀ a Yěsû nshwəŋə̀ lo, “Jònə ngàŋə̀ àŋâ àkẅiirə̀ nchyə à tsàa a wəə lo pəə tô mbyiitə̀ o lo, ‘ghò la ẅùə̀ wa nɨ à pənə tô la, kə̀ pəə pyabə̀ ghù nyàanə?’” 21Tyìʼə̀ nkwùə̀ ghu, Yěsû a parə̀ ɨghoonə pɨ̀noʼnə, nfuukə̀ ɨ̀zhyə̂ amwuə mɨ̀pùmə̀ mɨ pə̀ənə̀ nkɨ nnyaʼkə̀ ɨ̀myə̂ mɨ pɨ̀fə̀. 22A tyiʼə̀ nkẅùə̀ ambo pobə lo, “Nɨ̀ lèrə̀ ngə̀ ntiitə̀ a Jònə nɨ ànwùə̀ nɨ nɨ̀ zəənə̀nə, nkɨ ndzuʼù; pɨ̀fə̀ zəənə̀ ɨlyiʼə, pɨ̀kòŋə̀ ɨ̀shyə̂ yìinə̀, pɨ parə̀ ngàŋə àkɨ̀kẅinə, ɨ̀puʼkə̀ mɨtugrə zuʼù, ɨ̀kwuə̀ pə̀ənə̀ lòo a ɨ̀shyə̂, pɨ mə nchwìitə̀ ntwuumə̀ ghù ɨ̀shìʼnə̀ ambo ngàŋə àfumə̀. 23Mborə̀ ɨ̀ chyə̂ ambo ŋònə̀ wa nɨ ka à mɨnkə̀ e a ŋònə̀ nɨ m̀bənə ẅèrə.”
24Nkwùə̀ nɨ ɨ̀zùŋə̀ ndzùmə̀ Jònə lə̀ lèrə̀nə la, Yěsû à lə̀ pìʼnə̀ a nɨ shwəŋnə̀ ambo ɨ̀pùŋə̀ pə̀ənə̀ pa mbə̀ʼə Jònə, “Nɨ̀ laʼa ndèrə̀ amwuə alyiʼə waakə la a nɨ ghə̀ ndzəənə̀ àkə? A àkɨ̀kàʼà zhyə̀ nɨ fèrə̀ à wə̀ nnə̀ʼə̀? 25Nɨ̀ lə̀ furə̀ ndèrə̀ la a nɨ zəənə̀ àkə? A ŋònə̀ nɨ à lə̀ ẅînə ɨtsəʼə pɨ̀shìʼnə̀? Pànə̀ nɨ pɨ ẅînə ɨtsəʼə pɨ̀tsə̂nə nkɨ mə nchyə̂ ɨ̀shìʼnə̀ chyə̂ la amwuə mɨ̀ntoʼò. 26La, nɨ̀ lə̀ lèrə̀ la a nɨ ghə̀ ndzəənə̀ àkə? A nɨ zəənə̀ a ngàŋə̀ ntwuumə̀ Nẅùə̀? Ee! La, ǹshwəŋə̀ a wɨghə lo nɨ̀ zəənə̀ a ŋònə̀ nɨ a tsàarə̀nə a ngàŋə̀ ntwuumə̀ Nẅùə̀. 27Lə̌ ze wa nɨ pɨ lə̀ ŋwàʼnə̀nə mbə̀ʼə e lo, ‘Mbɨ tsàa a ngàŋə̀ ntwuumə̀ mə̀ a mbyə̀ ghò, ẅùə̀ nɨ ǎ lèrə̀ ghə̀ tsùŋə̀ àlàŋə ambo ghò.’ 28Ǹshwəŋə̀ a wɨghə lo, ‘Ka ŋònə̀ ɨ̀tse amwuə pànə̀ nɨ mə̀ngyə̌ à pyə̂nə nɨ mbə̀ʼə a tsàarə̀ a Jònə; la ŋònə̀ nɨ à kɨ̂nə ndẅùutə̀ amwuə ànwùə̀ Nɨ̀fò Nẅùə̀ mmyàanə̀, à tsàarə̀ e.’”
29[Nkwùə̀ nɨ Pànə̀ pɨ̀tsùmə̀ farə pɨ̀nkẅiirə̀ pɨ̀taghə̀ lə̀ zuʼnə ànwùə̀ zèrə zə, pobə lə̀ pyiimə̀ lo ànwùə̀ nɨ Nẅùə̀ à lə̀ ghɨ̀rə̀nə a lə̀ təəmə̀, ntiinə àkẅiirə̀ nchyə ambo pobə à lə̀ ŋâ Jònə. 30La pɨ̀Farìsî pobə pɨ̀nèrə̀ mbòomə lə̀ twuunə̀ a ghobə àkwàŋə̀ nɨ Nẅùə̀ à lə̀ twuʼtə̀nə aŋunə pobə, ntwuunə̀ a ghobə lo kò Jònə a ŋâ e àkẅiirə̀ nchyə ambo pobə].
31Yěsû a làŋə̀ nɨ mbyə̀ nshwəŋə̀ lo, “Mbə̀ʼə m̀mɨ̀nkə̀ ɨ̀waanə̀ pànə̀ pə lə aŋunə àkə? Pobə lanə mbə lə tsaʼa àkə? 32Pobə chyə̂ tsaʼa kɨyii àghòbə nɨ pobə nwuunə̀nə amwuə àzàanə mɨ̀tàanə, pyə̀ pə nkyiinə̀ nfuŋə̀ pyə̀ shwəŋə̀ lo, ‘Pəə lə̀ puʼù àpinə̀ nɨ̀zoʼò ambo pɨghə, ka nɨ̀ pinə̀ a wɨghə. Pəə lə̀ zòbə̀ nchyə nɨ̀wɨghə̀, ka nɨ̀ yìi a wɨghə.’ 33Ǹshwəŋə̀ a lenə la ntii lo Jònə ngàŋə̀ àŋâ àkẅiirə̀ nchyə à lə̀ tô ka mə zɨghə̀ e, ka kɨ mə nô e mɨ̀lùʼù, nɨ̀ shwəŋə̀ lo, ‘A wə̀ nɨ àzhyə̂ a nɨ̀pùmə̀ ze.’ 34Moonə̀ Ŋwùə̀ à kùmə̀ lə̀ tô mmə ndzɨghə̀ nkɨ mmə nnô, nɨ̀ shwəŋə̀ lo, ‘Nɨ̀ zəənə̀ a noomənkyə̀ pobə àpaarə̀ mɨ̀lùʼù, nkɨ mbə ɨ̀swùə pɨ̀nkẅiirə̀ pɨ̀taghə̀ pobə pɨ ngàŋə ngɨ̀rə̀ ɨ̀nwùə̀ tɨ̀pòŋə̀. 35La Nẅùə̀ à wə̀ nnèrə̀ àzhìʼtə̀ e a nɨ làŋə̀ a ndzùmə̀ ngɨ̀rə̀ mɨ̀nwùə̀ pànə̀ nɨ pɨ pyiimə̀nə e.”
Yěsû pobə Shimùnə̀ ŋwùə̀ Farìsî
36Ŋwùə̀ Farìsî ɨ̀tse à lə̀ fuŋə̀ a Yěsû lo â tô ndzɨghə̀ a ndâ ze. A lə̀ tô nwuunə̀ àtwuə̀ tepèrə̀ a nɨ zɨghə̀. 37Nkwùə̀ nɨ à lə̀ mənə ndzɨghə̀, mə̀ngyə̌ nɨ̀kwurə̀ ghùtse nɨ à lə̀ pənə ngàŋə̀ ngɨ̀rə̀ ɨ̀nwùə̀ tɨ̀pòŋə̀ a zuʼù lo Yěsû a wə̀ ndzɨghə̀ a ndâ ŋwùə̀ Farìsî wa, ntyiʼə̀ ntô nɨ mɨ̀ghurə̀ mɨ àzhyǎ amwuə məndzìrə̀ nɨ pɨ tsùŋə̀nə nɨ Àlàbastà. 38Tsaʼnə à lə̀ tônə ntəəmə̀ a ndzùmə̀ Yěsû mbaatə̀ mɨ̀kwùə̀ ɨ̀me mmə ngyìi nkẅìrə̀ nchyə ɨ̀myə̂ aŋunə mɨ̀kwùə̀ mɨ Yěsû. Mmə ndòo ɨ̀nyùŋə̀ àtwuə̀ e ndzə̀ə mɨ̀kwùə̀ ɨ̀me ghu, ntyiʼə̀ mmə nnyòʼtə̀ mɨ̀kwùə̀ ɨ̀me ndzoʼò nɨ mɨ̀ghurə̀ mɨ àzhyǎ ma.
39Ŋwùə̀ Farìsî wa nɨ à tənə nfuŋə̀ a Yěsû la, a zəənə̀ ànwùə̀ nɨ mə̀ngyə̌ wa a lə̀ mənə ngɨ̀rə̀, nshwəŋə̀ amwuə ntɨŋmə̀ e lo, “Ŋònə̀ wə̀ a pə la mbə ngàŋə̀ ntwuumə̀ Nẅùə̀ yi à zhyə̂ a ŋònə̀ nɨ mə̀ngyə̌ wə̀ à pənə ẅèrə, nzhyə̂ mbuurə̀ mə̀ngyə̌ nɨ à pètə̀nə e lə, ntiinə à pənə ngàŋə̀ ngɨ̀rə̀ ɨ̀nwùə̀ tɨ̀pòŋə̀.”
40Yěsû a shwəŋə̀ ambo ze lo, “Shimùnə̀, ngwə̀ nɨ ànwùə̀ àtse a nɨ shwəŋə̀ ambo ghò.”
A pyiitə̀ e lo, “A pə ànwùə̀ àkə, ɨ̀nèrə̀ ɨ̀nwùə̀?”
41Yěsû a shwəŋə̀ ambo ze lo, “Ŋònə̀ ɨ̀tse à lə̀ pə ghu mbə ntsoʼkə̀ nkabə̀, mbə nɨ ngàŋə ndzǒ ɨ̀ze ɨpaa, taʼà a ẅìimə̀ e nɨ nkabə̀ silbà nkɨrə ɨtaanə̀, ghùtse a ẅìimə̀ e nɨ nkabə̀ silbà mɨ̀ghumə̀ mɨntaanə̀. 42Tsaʼnə ka pobə lə̀ pə a ghobə nɨ nkabə̀ a nɨ twuə̀ nkabə̀ ghu la, à lə̀ myàʼtə̀ a ghobə pɨ̀tsùmə̀ nshwəŋə̀ lo kò pobə gha nchi ntwuə̀ a ghobə a zèrə. Nɨ̀ kwàŋə̀ lo amwuə pànə̀ pə à lə̀ kòŋə̀ ẅèrə nkòŋə̀ e ntsàarə̀ a ẅùə̀?” 43Shimùnə̀ a kẅùə̀ lo, “Ŋònə̀ wa nɨ ɨze nkabə̀ ɨ̀ lə̀ noʼnə la.” Yěsû a shwəŋə̀ ambo ze lo, “Wə̀ kẅùə̀ tyìʼə̀ ɨ̀shìʼnə̀.” 44Ntyiʼə̀ mbə̀ŋə̀ nnaŋə̀ mə̀ngyə̌ wə̀, nshwəŋə̀ ambo Shimùnə̀ lo, “Wə̀ zəənə̀ mə̀ngyə̌ wanə? Nkwùə̀ nɨ ǹtônə nkwuunə̀ a ndâ ghò ka wə̀ tô ŋŋâ o nchyə lo n̂sùu mɨ̀kwùə̀ ɨ̀mâ ghu, la à sùu mə mɨ̀kwùə̀ ɨ̀mâ nɨ nchyə ɨ̀myə̂ ɨ̀ze ndzə̀ə nɨ ɨ̀nyùŋə̀ àtwuə̀ e. 45Ka wə̀ tô nnyòʼtə̀ o a gha, la a nɨ pìʼnə̀ nkwùə̀ nɨ ǹtənə nkwuunə̀ a ndâ ghə, à pirə̀ mə e tɨ zhwùutə̀ a nɨ nyòʼtə̀ mɨ̀kwùə̀ ɨ̀mâ. 46Ka wə̀ tə ndzoʼò o àtwuə̀ mə̀ nɨ mɨ̀ghurə̀, la à zoʼò mə mɨ̀kwùə̀ ɨ̀mâ nɨ mɨ̀ghurə̀. 47Nɨ ndwuumə̀ wə̀, ǹshwəŋə̀ ambo ghò lo ɨ̀nwùə̀ tɨ̀pòŋə̀ ɨ̀pe pa nɨ pèrə noʼnə la, pɨ̌ lə̀ənə̀ mə a pèrə. Ǹshwəŋə̀ ambo ghò lo pɨ̌ lə̀ənə̀ mɨ̀nwùə̀ mɨ tɨ̀pòŋə̀ ɨ̀me mɨ̀noʼnə ma, ntiinə à nèrə̀nə ɨ̀kòŋnə̀ ghù ẅùunə. La ŋònə̀ wa ẅùə̀ nɨ pɨ lə̀ənə̀nə a tɨ̀pòŋə̀ e pɨ̀mɨlyiʼə à kɨ nnèrə̀ la mɨlyiʼə ɨ̀kòŋnə̀.”
48Yěsû a tyiʼə̀ mbə̀ŋə̀ nshwəŋə̀ ambo mə̀ngyə̌ wa lo, “Pɨ lə̀ənə̀ ɨ̀fàntə̀ ɨ̀nwùə̀ ɨ̀pô.”
49Pànə̀ nɨ pobə pɨ pobə lə̀ mənə ndzɨghə̀ la lə̀ pìʼnə̀ a nɨ shwəŋnə̀ pobə nɨ pobə lo, “Ẅèrə wə̀ ŋwùə̀ la ɨ̀wə̌ nɨ à wa ndə̀ənə̀ ɨ̀fàntə̀ ɨ̀nwùə̀ pə̀ənə̀?”
50Yěsû a shwəŋə̀ ambo mə̀ngyə̌ wa lo, “Àpyiimə̀ ntɨŋmə̀ o a chwarə̀ o; lèrə̀ nɨ àporə̀porə̀.”
Trenutno izabrano:
Lukə̀ 7: pny
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2017, Cameroon Association for Bible Translation and Literacy
