MATIU 12
12
A leo huhui huri na rani mangaana
1Lo tarogi hi lo rani mangaana i Jisas mo dige lolo talui kon meire nona rorongtagi. Ira nona rorongtagi ram mwaruruhi, ram tauvuigi ram due na kon ram ganie. 2Ko ira Varise ram lehe, ram veve lawe Jisas vena, “Leo! Huri hava gineu nomu rorongtagi ram vai na gineu he tatarise tea huri Leo hora noi Mosis ve ran vaie lo rani mangaana?” 3I Jisas mo duvi lawera vena: “?Tau igimiu nehe valu tea huri na gineu i Devet u veie lune ingeie mena nona tangaloi ram mwaruruhi? 4Nge mo ahu lolo valei God ko nge mo gani na bereti hogoginie lawe God. Huri na Leo hora noi Mosis, hogosie ira rugurugu rain geni lei na bereti ngaha, nge i Devet mo ganie, ko mo bete lawera nona tangaloi vage. 5?Sige gimiu ne he valu tea lo Leo hora noi Mosis vena lo vataha rani mangaana ira rugurugu lolo Sara Gogona ram vai vohogi na Leo hora huri na rani mangaana, nge a bugure hatie hurie? 6Nge nam veve lawe gimiu vena a gineu tangaha u eno hageliu den Sara Gogona. 7Tare ve gimiu neu ilo na Reve reve Gogona vena, ‘Na he tarani na rugurugu gina kakarue tea, nge a lologarea,’ gimiu nehe vevegi irahine tea hi a bugure hatie. 8Huri i Netui Tangaloi ingeie a Huqegi goro na rani mangaana vage.”
A tangaloi a limana u koru
9I Jisas mo siregi na vanue ngehi ko mo vano lolo nora valei soneana. 10A tangaloi gatagale aie a limana u koru. A sinobu lavasigi ingere aiehi ram tarani ve ran tawei Jisas, ingere ram huie ram veve vena, “?U garea lo noda Leohora vena vai vagamwasoi lo rani mangaana sige hatie?” 11I Jisas mo duvi vena, “?Tare ve ihine den gimiu a bulana sibsib gatagale mo soi lolo walubue lo rani mangaana, ingeie vin he wiri bibie tea vena reve kaloe dena walu? 12Nge a tangaloi u liuhage dena sibsib! A vevenagi hi mo eno lo Leo hora vena vai vagamwasoi lo rani mangaana. 13Siu nge mo veve lawe na tangaloi hi a limana u koru vena, “Gon vugeri tovoragi na limemu.” Nge mo vugeri tovoraginie ko a limana mo garea taligu mwere na tavalugi. 14Ko ira Varise ram mwalue ram domdom lune huri ve rain wehi Jisas mwerehilogo.
A tangaloi leowahe noi God
15Lune i Jisas mo rongo mwerehi, nge mo vano dena vanue ngehi; ko a sinobu u sao ram hurie. Nge mo vagamwasoire ra segeana doluegi, 16nge mo tau leo lawera ve ran mese veve lategi hurie. 17Mwerehi mo vagahorongi na leo noi Aesaea a tangaloi veve rarai vena: 18“God u veve vena,
‘Nge ngaha a noku tangaloi tabanagi
nau leowahea,
a noku mweratabe nau lologarea ginie.
Nain mebu noku Vui lo ulune.
Ko nge vin serelue na noku leo vevegi
lawera sinobu teri.
19Nge vin he vuigarogi tea, vin he ulogi tea,
nge vin he laqa te siaga lo matahala lawua;
20nge vin he volo utu na mavuro tea u maweru,
ko nge vin he vagamate tea
na mangivivi mo gara,
vin dadari nge vin vei na hogo
mo tau na qoragi;
21ko a sinobu rain lado rarai hurie.”
I Jisas ko i Bielsebul
22Siu ram lai na tangaloi gatagale lawe Jisas, a matadodo ko a bao, a vevenagi a vui esi lune. Ko i Jisas mo vagamwasoie, giniehi, mo gato lai ko mo leo lai vage. 23A sinobu doluegi ram awogi hurie ram hui vena, “?Wa ingeie hatie i Netui Devet?” 24Ira Varise ram rongoe ram veve vena, “A tangaloi hingaha mo vuro lue na vui esi gina managi noi Bielsibul, a ratahigi nora vui esi.” 25I Jisas u ilo vurugegi na domire, mo veve lawera vena: “Vataha vanue mo vilewahe duvigi goro duvigi vin soi, ko a togagi venue sige a vale mo vilewahe duvigi goro duvigi vin he labe lai tea. 26?Ko tare ve i Setan mo vuro lue i Setan, nge mo vilewahe denie sibona; nona ute vin labe mwerehilogo? 27?Ko tare ve ineu nam vuro lue na vui esi gina managi noi Bielsibul, ira nomiu tangaloi rau vuro luara gina managi noi hine? A vevenagi hi mwere rain vevegi gimiu. 28Nge tare ve ineu nam vuro lue na vui esi gina Vui noi God, nem ilo ve a mwasoana garaqa God mo ratahigi lolona u dadari beno mei gimiu. 29Ihine tea vin he waga lai tea na valei tangaloi huire vena lai na nona lalaie teri, nge hogosie ve vin veuhi na tangaloi huire tomue; mo rovo, mo bei lei na nona lalaie teri. 30Ihine hatie meieu mo tavului vuro meieu; ihine he vilegibubugi tea meieu mo vilewahe. 31A vevenagi hi nam veve lawe gimiu, vin ladovohogi lei lawera tangaloi na bugure doluegi ko nora leo asi teri; nge tare ve ihine mo veve leo asi goro na Vui Gogona, vin he ladovohogi lai tea. 32Ko tare ve ihine mo veve leo asi goro i Netui Tangaloi vin ladovohoginie; nge tare ve ihine mo veve leo asi goro na Vui Gogona, vin he ladovohogi lai tea lo ure ngaha ko lo ure vin vonai.
A gai ko a mwasigi
33“Nen vai na gai na garea ko a mwasigi na garea, sige vin vei na gai vin esi ko a mwasigi vin esi, huri nein ilo vurugegi na gai lo mwasigi. 34?Gimiu ira duvi mwata, gimiu ira gineu esi nein veve lai na gineu garea mwere hilogo? Huri a wuwa mo serelue na gineu teri a taqangi u horo ginie. 35A tangaloi garea mo lai lue dena nona lalaie a gineu garea; ko a tangaloi esi mo lai lue dena nona lalaie asi a gineu esi. 36“Nam veve lawe gimiu vena, lo Rani Vevegi a tangaloi doluegi rain duvi goro vataha leo vurogi rau veve beno. 37Huri God vin vevegi gimiu lo leomiu, ve gimiu neu vovohoi sige neu galegaleasi.”
Ram hui Jisas huri na gigilegi
38Tau a huhui lavasigi talo Leo hora noi Mosis meire Varise lavasigi ram duvi lawe Jisas vena, “Huhui, gamai gam tarani ve gan lehi na gigilegi denigo.” 39Ingeie mo duvi lawera vena: “A sinobu rau esi rau galegaleasi ram hike huri na gigilegi. Nge hatie gigilegi ve vin haharagi lawera nge hogosie a gigilegi lui Jona a tangaloi veve rarai. 40Huri mwere i Jona u toga rani gaitolu ko a bongi gaitolu lo taqangi ige, mwerehi vage i Netui Tangaloi vin toga lolo loloi tano a rani gaitolu ko a bongi gaitolu. 41Lo Rani Vevegi ira ta Ninive rain maraga mena sinobu tau lo tarogi ngaha ko rain veveginire, huri ingere rau ladowenigi lune rau rongo na toretore noi Jona; ko a leo, a gineu lawua liu den i Jona nge tangaha. 42Lo Rani Vevegi a vavine ratahigi ta Hage vin maraga mena sinobu tau lo tarogi ngaha ko vin veveginire, huri nge u vonai lo goloi ure vena rongo huri na mataisao noi Solomon; ko a leo, a gineu lawua liu den i Solomon nge tangaha.
A vui esi mo vonai taligu
43“Lune a vui esi mo mwalue dena tangaloi, mo dige duru lo tano mamaha mo hike ve na toga surigi ko nge he haqe te lai. 44Nge mo veve vena, ‘Nain mule vano taligu lo valeku nau mwelue vonai denie.’ Nge mo mule vano mo leo haqe ve mo eno vurogi, u mwasara vurugegi. 45Nge mo vano mo lai na vui esi gaibitu ingere rau esi liue sibona ko ingere ram ahu ram toga lolo vale hi. Siu lo vagasigi a togaana nona tangaloi hi u esi den tomue. Vin mwerehi vage lawera ta lo tarogi ngaha.”
Retahi Jisas mei retuana
46Lune i Jisas mo laqa mosigei lawera sinobu, i retahine mei retuana ram vonai lobena, ram labe varea, ram vai leo ve ran laqa meie. 47Ko a tangaloi gatagale mo veve lawea vena, “Leo i retahimu ko i retuemu ram labe varea, ram vai leo ve ran laqa meigo.”
48I Jisas mo duvi lawea vena, “?Retahiku hine? ?Mei retueku irahine?” 49Ko nge mo tisu vano lure nona rorongtagi ko mo veve vena, “Leo, retahiku mei retueku! 50Ihine mo vai na taraniana noi Tamaku eulu, ngeie hi i tueku, haqeku, ko i retahiku.
Trenutno izabrano:
MATIU 12: HNT
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Bible Society of the South Pacific, 2013
