Pigane Binigo 9
9
Ngode Datagaliwabehanda Habo Nalolene bi Noala lo winigo ogo
1Ngode Datagaliwabehanda Noabi ibu iginirubi ti bayale helonaga bi ogodagua lalu, Dindi bibahendeni wali agali palu to̱lelo tígua waneigini dewa hono wialu halimu.#Pig 1.28 2Nogo tara tara karubi iba wena ega tia bedarubi ema bialu piaga bibahende irabuha gabua biragarubi andagaha hinini bedarubi uruni bibahende tígua handameho halimulo helarogoni. Uruni tigua wali agali hondowa gi halu birulebira. 3Ai tígua ema bialu piaga dindini biraga bedaru bowa nema bayale andaho ngaru heba tínaga tomo dawa nalu halimulo i̱na ngero. 4Mbiraore hangu nanolene ngago ogo. Nogo egaru bowa darama bedaore nanalimu. Darama ogonime dére holene ngiaga tene nga.#LBM 7.26-27; 17.10-14; 19.26; Man 12.15-23 5Mbiralime wali agali maru balu homelayagua i̱na ibu biragonaga pani genda timbuniore yu helolebero. Nde ema bialu piaga bedagomebi wali agali mbirago balu homelayagua i̱na ibuniore bo waholebero. 6Mbiralime wali agali mbira Ngode Datagaliwabehanda ibuni ale helo wabinigo balu homelayagua wali agali maru karume baga kago ibunibi bo waholene nga, lene.#Pig 1.26; Har 20.13
7Ngode Datagaliwabehanda lalu, Dindi bibahendeni tínaga aguanene palu to̱lelo tígua waneigini dewaore hono wilimu, lene.#Pig 1.28
8Ani lowa Ngode Datagaliwabehanda Noabi ibu igini biaruhondobi ogodagua lalu, 9Áyu howa tínibi tínaga aguanene mani hama polebiraruhondobi i̱na habo nalolene bi mbira lo ngero. 10Ani bialu ema bialu piaga nogo egarubi tia bedarubi ema bialu piaga iba talu biagoha berene tagira ibiyaru bibahendehondo habo nalolene bi mbira lo wialu bulebero. 11Tí baba habo nalolene bi ogoni ogodagua lo ngelaro. Aiore iba lime ema bialu piagaru lone bo wa naholeore. Iba lime dindi ogobi halu mende namulai naholebiraore laro, lene.#Pig 8.21; 9.15; Ais 54.9
12-13Ngode Datagaliwabehanda lalu, Ai i̱na tí bababi ema bialu piaga bedaru bababi habo nalolene bi lo werogo heneneore lowa walia halu ni domo mbira harini helolebero. Ni domo ogonime dindini ngarubi karubi bibahendeore baba habo nalolene bi lo werogoni heneneore lalu walia holene manane ogoni holebira. 14I̱na ginu hagua harini íbu helarogola ni domo ogonibi íbu holebira. 15Ani íbu kago hondowa i̱na wali agalibi dére ale ema bialu piagarubi iba lime halu mende nai nahelole lalu habo nalolene bi hongohe lo wirugo lone mitangi bu dai bulebero. 16Ai i̱na ni domo naina harini kagola hondowa i̱na nde wali agalibi ema bialu piaga damenerubi bibahende lone naboleore lalu habo nalolene bi hongohe lo wirugoni mitangiore bulebero, lene. 17Ani lowa ibugua Noahondo bi ogodagua lamialu, Ni domo ogoni i̱na dindi bibahendeni ema bialu piagaru heba habo nalolene bi lo wirugoninaga manane ogoni holebira, lene.
Noahanda ibu igini Hamahondo keba henego ogo
18Noa igini ibuni heba iba taluha biralu tagira ibinidaru ti Seme Hama Yabede imaru hene. Hama ibu Kenana aba hene. 19Noa igini uruni ti wali agali dindi bibahendeha hama pedarunaga mamali hene.
20Noa ibu agali e hangaga howa pu mbira mini gerebi lini dagane mabuha hangaga pigane ibu hene. 21Ani biaga henego horo mbirungi ibu waini iba hambu na timbu bialu luluyu howa ibuninaga balai anda tamuha agaru golo wahai halu mo koho palu wini. 22Ani palearia Kenana aba Hama ibugua ibu aba aga nabi tibabe paleago hondowa ibu hamene kirali biago labo lamule pene. 23Lamiyagola Seme Yabede libugua aga mbira libu aba aga nabi paleago hondoligonaga libuni de geho yalu tigibebege pialu libu abanaga balai anda ibuni tibabe paleagoha anda puwa agame bu dambi hene. Libu aba tibabe paleago nahende handa taraho yalu dai bini. 24Ai Noa ibu palenego heyuwa lulu ereba hayagola hale halu hearia ibu igini heyogone biagome aga nabi paleago handaya layagola hale hene. 25Ani hale howa Noahanda lalu,
Kenana ibu genda timbunioreme dambi hene íbu holebira.
Ibuore ibu hamenerunaga garabaya biabe ale biaga holebira.
26Semenaga Ngode Datagaliwabe Anduane Homogo ibunaga mini yaraga hama.
Kenana ibu Semenaga garabaya biabe ale bia haga holebira.
27Yabede waneigini Ngode Datagaliwabehanda mo dewa helo.
Ibunaga aguanene ti Seme waneiginiru heba mandagi helo.
Kenana ibu Yabedenaga garabaya biabe ale biaga dege holebira,
lalu Noahanda lene.
28Iba li timbuni biago ibini lo howa Noa ibu mali handari tebirani pira duria (350) hene. 29Ibunaga mali lamaga halu handari dirani pira duria (950) halu nde homene.
Trenutno izabrano:
Pigane Binigo 9: HUI
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Huli Bible © Bible Society of Papua New Guinea, 2002.