Lut 2
2
Lutite Bowa:sape egada gobala oko a:na:munoyana gi
1Naomipe gwanini eloyana, enoba obape dalagipe dede pala lumagi, enoba Elimelekepe udaganapa dalagi, oba sidinapa gwama ya:biya:bidanapa dalagi, obape gagi Bowa:s.
2Eta kadepala Lutite Naomidima a:negelayana, na: awapata egada sabama wete okona dalate ta:ta:minete aleladele na:sa:da:mininina bali alela gima pa: itawa eta lumagi na: iwalena:tena: dima oko pula ma:lamaleloga.
Naomi amale oba dima a:negelayana, na:pe aminagi, a: e lalelona gi wete a:na:mi. 3Amale obate egada gobama wete okona dalimunu baiga palale waminadele obaite na:sa:da:miniyana bali aleloyana. Lutite Elimelekepe udaganapa dalagi Bowa:sape egada gobala a:ma gi a:na:munoyana.
4Tepa ima:pula a pa:weleyala Bowa:sete Beteliyem baigale pa:te obape okona tida:te obidima ewatamada: gilala ladoloyana. Ma:ma enoba obape ewatamada: gilala.
Awapa LODote da:da elamalelo. Obai ameta oba dima a:negelaiyana.
Awapa LODote a: sa:kelaminamalelo.
5Amale Bowa:sate obape okona tida:napa dalagi anayana, ya:ma susa:gi powateya.
6A:ma dalagi amale a:negelayana, ya:ma atakabi susa:gi, Naomite Mowa:b wale wete elelote a:pite gwama pa:loyana tepala obada pa:yana susa:gi. 7Obate na: nanawena, na: awapata okona luma gwaladamate weladele obaite na:sa:da:minamadilina bali alela gima. Oba amata ibasege bapila oko a:na:mina asemite pa:te ma:ta amapula a:wale manate a:me elelo.
8Amale Bowa:sate Lutidima layana, na: eta gi a: ananowa. A: ege eta lumagipe egada gobala a: a:ila dowatilina bali alolamalelo. Ameta a: na:pe egada gobala na:pe gisaolana okona atoda menagimite bali alolamalelo. 9Enobala a: obaite bali ta:ta: minadele papada:minamadilina gi tiladele obaida elamalelo. A: ege gi iwaleda:bega elamalelo gi ase na: na:dowali okona dala a danawamena obaite a: dima eta sosawenapa gi pa:pa a:na:minamada:le, gwama a: wi iyawate lapolamalelona wete obaite a:itiliwina wi malipa gobala wi nidolamalelo.
10Enobala Lut obape asimisile manate a:ima baoladele Bowa:sadima a:negelayana, powa gi ase a: na: atakabinapa lumagi awena:delena: dima nagala eleloya.
11Bowa:s ameta Lutipe gilalama wisa eladele a:negelayana, a:pe dalagite kaoyana wapiki palala e a:pe apiladima a:na:da:munoyana sa:sa:lena gi waelabega na: a enamadoloyamana, gwama e a:pe agita: wawata: gwama wa bapita: a:ta:pi na:sa:da:mite pa:la ete e lope pa:pa tidoloyana luma gobama pa:te saoyana gi na: a enamayamana. 12Awapa a: LODope kabiginapa amowa gi itawa elamalelo. E Naomidima awapada:na gi a:na:da:munoyana gima. Awapa a: Islaelana lumumunu LOD Godope kabiginapa amowa gi itawa elamalelo, ase a: obadila galabe pawamina gi egelamalale pa:yana.
13Lutite gilala wisa eladele a:negelayana, apeyanapa, a:pe nagala gina: dima powa sa:lepulaya, na: pa: a:pe gisaolanapa elelowa, ameta a:pe nagala gilalate na:pe gi iwaleda:bega gi a wama galaminamawena.
14Baya nana tepa a saoyala, Bowa:sate Lutidima a:negelayana, a: pa:te sa:da baya nao.
A:pite oba pa:te okona lumate mitatiliyana sabama manayala, Bowa:sate oba dima baya apuloyana. Amale Lut baya nanadele gwana iyala, eta:mi baya papala na:sa:da:miyana. 15Enobala obate wit bali alolama weleyala, Bowa:sate obape gisaolana daladima gilala dapuloyana, obate sa:sa:lena wit bali gobala alolamalelona tepala oba ege anadelamadelewa. Da: ameta eta:mi sa:sa:lena papada:mina gobala alelete a:ima alilamadelewa obate alela gima, a:pite oba ege anadelamadelewa. 16Baya nana gi a guyala Lutite bali alolama weleyala, Bowa:sate obape okona luma danayana, eta lumagite Lut ekemina gilala pa:pa lalamalelo obate bali papada:mina ebatala a: dowatilina bali alolamalelona tepala, ameta da: papada:mina gobala eta:mi sisilida:minete ebatama alimenamadelewa obate alolamalale.
17Enobala Lut a:ma kadepala bali aletata wamunote sasada:mina gi asemiyana. A:pite kadepa siliminaleyala obate a:ma balipe mene tiliyana enoba 10 kilogla:m a:na:pi eyana. 18Enobala Lut a:ma bali baigama alete wete, obape apinapaya itumiyana, a:na:pi obate aleloyana balipe mene gi. Gwama obate baya nanoyana tepala na:sa:da:miyana baya papala iyata: oba dima apuloyana.
19Enobala Naomi Lut anate tiladele a:negelayana, a: miyala ma:ma bali kabigibega alelowenaya. Awapa Godote a: amowawena dalagidima nagala elamalelo.
A:pite Lut Naomidima a:negelayana, Na: Bowa:sape egada gobala oko a:na:minadele ma:ma bali kabigibega alelowamena.
20 #
Leb 25:25
A:pite Naomite sa:keladele obape apila dima a:negelayana, Awapa LODote Bowa:s ewamunamalelo. Obape lumadima a:na:da:munamalale gibalamale ladolona gilala obate waelabega tepala a:na:da:minano. A:pite Naomi gwama laladele a:negelayana, ya:ma sa: sa:lele amowawa:lona dalagi enoba na:pe dalagida:le gi menaginapa lumagi.
21Lut amale a:negelayana, pa: a:ma gi menagi. Bowa:s na: a nanawena ne obape okonada bali egada gobala oko a:na:minonomela okote wete a:yatama saolamalelo.
22Amale Naomite a:negelayana Lutidima, eya, na:pe aminagi, gi awapa e Bowa:sape egada gobala oko a:na:mininina atoda menagimite oko a:na:munamalale, powa tepala a: eta lumagipe egada gobama welamalelona obate a: wama atawamunamaleloga.
23Enobala Lutite obaida menagimite oko a:na:minaleyala a:ma okote gi guyana. A:pite obape ela sabala obape apilada menagimite elotoloyana.
Trenutno izabrano:
Lut 2: GBOTP
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
Gogodala Bible Translation Project © Bible Society of Papua New Guinea, 2016.